Historia di Bida

Jehova A Sostené Mi Tur Mi Dianan

SEGUN E RELATO DI FORREST LEE

Polis a caba di confiscá nos tocadisconan i nos literatura bíblico. Opositornan a usa Segundo Guera Mundial como un excuus pa persuadí un gobernadó general nobo di Cánada pa declará e actividad di Testigonan di Jehova ilegal. Esaki a sosodé dia 4 di juli 1940.

SIN ser intimidá dor di loke a pasa, nos a bai busca mas literatura na e depósito i a sigui cu nos predicacion. Semper lo mi corda Tata su palabranan n’e ocasion ei: “Nos no ta stop dje fácil ei. Ta Jehova a manda nos predicá.” N’e tempu ei mi tabata un mucha homber di 10 aña, yen di energia. Pero te awe, ainda Tata su determinacion i su celo pa e ministerio ta un recordatorio constante dje manera cu nos Dios, Jehova, ta sostené su sirbidónan leal.

E siguiente biaha cu polis a stop nos, nan no a bai cu nos literatura so, sino tambe a encarcelá Tata, lagando Mama su so cu cuater yu. Esei a sosodé na september 1940 na Saskatchewan. Djis despues nan a expulsá mi for di scol dor cu mi a sigui mi concenshi bíblicamente entrená i no a saludá bandera ni canta e himno nacional. Mi a sigui mi educacion via post, loke a duna mi un schedule flexibel, i mi a participá mas plenamente den e trabou di predicá.

Na 1948 a sali un yamada pa pioneronan, esta ministernan di tempu completo di Testigonan di Jehova, muda pa costa oriental di Cánada. Pues mi a bai traha pionero na Halifax, Nova Scotia, i na Cape Wolfe, Prince Edward Island. E siguiente aña mi a aceptá un invitacion pa traha dos siman na e oficina di sucursal di Testigonan di Jehova na Toronto. E dos simannan ei a para bira mas cu seis aña di sirbishi recompensador. Cu tempu, mi a topa Myrna,  kende mescos cu mi tabatin un amor pa Jehova, i nos a casa na december 1955. Nos a establecé na Milton, Ontario, i no a tarda hopi cu a forma un congregacion nobo einan. E bodega di nos cas a sirbi como Salon di Reino.

Nos Ta Deseá di Expandé Nos Ministerio

Den e añanan cu a sigui, nos a bira mayornan di seis yu, un tras di otro. Nos yu muher Miriam tabata e promé. Despues a bini Charmaine, Mark, Annette, Grant i finalmente Glen. Hopi bes ora mi a yega cas for di trabou, mi tabata haña e chikitinnan sintá abou rond di fogon, cu Myrna lesando pa nan for di Bijbel, splicando relatonan di Bijbel i inculcando den nan curason un berdadero amor pa Jehova. Danki na su sosten amoroso, tur nos yunan a adkerí un bon conocimentu di Bijbel for di chikitu.

Mi tata su celo pa e ministerio a keda grabá pa semper den mi mente i curason. (Proverbionan 22:6) P’esei na 1968, ora cu a invitá famianan Testigo di Jehova pa muda bai Centro of Sur América pa yuda cu e trabou di predicá, nos famia a deseá di reaccioná riba e yamada. P’e tempu ei nos yunan tabata varia entre 5 pa 13 aña, i niun di nos no tabata sa niun palabra spañó. Siguiendo e sugerencia duná, mi a biaha pa vários pais pa chek e condicionnan di bida. Despues cu mi a regresá, nos a considerá nos opcionnan huntu como famia i compañá cu oracion, i a dicidí di muda pa Nicaragua.

Sirbiendo na Nicaragua

Pa october 1970 nos tabata den nos cas nobo, i denter di tres siman e rumannan a asigná mi un parti chikitu riba programa na un reunion di congregacion. Mi a presentá e parti cu e tiki spañó cu mi tabata sa i a concluí invitando henter e congregacion pa bini diasabra 9:30 di mainta na nos cas pa cerveza. Mi kier a bisa servicio, e palabra pa sirbishi di veld, pero na lugá di esei mi tabata invitando tur hende bin bebe cerbes cerca nos. Siña e idioma tabata realmente un reto!

Na principio, mi tabata skirbi un presentacion riba mi man i tabata ensay’é segun mi tabata bai n’e porta. Mi tabata bisa: “Huntu cu e buki bo por haña un studio di Bijbel grátis.” Un persona cu a aceptá e oferta, a bisa mi despues cu e mester a bini nos reunion pa haña sa ta kico mi tabata purba bis’é. E homber aki a bira un Testigo di Jehova. Ta masha bisto anto cu ta Dios ta esun cu ta laga e simianan di berdad crece den curasonnan humilde, manera apostel Pablo tambe a reconocé!—1 Corintionan 3:7.

Despues di mas o ménos dos aña den e capital Managua, nan a pidi nos muda pa e parti  zuid di Nicaragua. Ei nos a traha cu e congregacion na Rivas i cu gruponan isolá di hende interesá den cercania. Pedro Peña, un fiel Testigo di edad, tabata compañá mi ora mi bai bishitá e gruponan aki. Un di nan tabata situá riba un isla volcánico den lago Nicaragua, caminda tabatin solamente un famia Testigo di Jehova.

Aunke e famia aki tabatin masha tiki materialmente, nan a haci gran esfuerso pa mustra aprecio pa nos bishita. E anochi cu nos a yega, tabatin un cena cla prepará pa nos. Nos a keda un siman einan. Hopi dje hendenan amabel einan cu tabata amante di Bijbel a compartí nan cuminda cu nos. Diadomingo nos a keda masha emocioná di por tabatin 101 persona presente p’e discurso público basá riba Bijbel.

Mi ta sinti cu Jehova su poder sostenedor a ser manifestá ora cu na un otro ocasion, nos mester a bishitá un grupo di persona interesá den e cerunan cerca dje frontera di Costa Rica. Riba e dia cu nos mester a bai, Pedro a bin busca mi, pero mi tabata na cama cu malaria. Mi di: “Pedro, mi no por bai.” Pedro a pone su man na mi frenta, i a contestá: “Bo tin keintura haltu, pero bo tin cu bai! E rumannan ta warda.” Anto el a haci un dje oracionnan mas sincero cu mi a yega di tende.

Ora el a caba, mi di: “Bai busca un refresco pa bo mes. Lo mi ta cla den dies minuut.” Tabatin dos famia Testigo ta biba den e área cu nos a bishitá, i nan a soru hopi bon pa nos. E siguiente dia nos a bai predicá cu nan, maske ainda mi tabata swak cu keintura. Esta fortalecedor pa mira mas cu shen persona presente na nos reunion di diadomingo!

Nos Ta Muda Atrobe

Na 1975 nos di shete yu, Vaughn, a nace. E siguiente aña, nos tabatin cu regresá Cánada pa motibunan financiero. No tabata fácil pa nos bandoná Nicaragua ya cu di berdad nos a sinti Jehova su poder sostenedor durante nos estadia. Pa ora nos a bai, mas cu 500 hende den e teritorio di nos congregacion tabata asistí na reunion.

Mas promé, ora cu ami cu mi yu muher Miriam a ser nombrá como pionero special na Nicaragua, Miriam a puntra mi: “Tata, si un dia boso tin cu bai Cánada bek, bo ta laga mi keda aki?” Mi no tabatin intencion di bai bek nunca, pues mi di: “Claro cu sí!” P’esei ora nos a bai bek, Miriam a keda atras pa sigui cu su ministerio di tempu completo. Despues, el a casa cu Andrew Reed. Na 1984 nan a asistí na e di 77 klas di Galad, e scol di misionero di Testigonan di Jehova, situá e tempu ei na Brooklyn, New York. Awor Miriam ta sirbi huntu cu su esposo na República Dominicana, cumpliendo cu un deseo cu e excelente misioneronan na Nicaragua a inculcá den dje.

Miéntras tantu, Tata su palabranan, “nos no ta stop dje fácil ei,” ainda tabata manera un candela den mi curason. P’esei pa 1981 ora nos a spar suficiente placa pa regresá Centroamérica, nos a bolbe muda, pero e biaha aki pa Costa Rica. Miéntras nos tabata sirbi einan, nos a ricibí e invitacion pa yuda cu e construccion di nan sucursal nobo. Sin embargo, na 1985 nos yu homber Grant tabatin mester di atencion médico, di manera cu nos a regresá Cánada. Glen a keda Costa Rica pa traha riba e proyecto di construccion di sucursal, miéntras cu Annette cu Charmaine tabata sirbi como pioneronan special. Nos cu a bandoná Costa Rica no a soña nunca cu nos lo no regresá.

Tratando cu Contratempu

Dia 17 di september 1993, tabata un dia cla cu hopi solo. Ami cu Mark, nos yu homber  mayó, tabata pone shingles riba un dak. Nos tabata traha banda di otro i combersando tocante asuntunan spiritual, manera ta nos custumber. Di un manera of otro mi a perde mi balansa i a lora cai for di dak. Tur loke mi por a mira ora mi a bini bek na tinu, tabata lus briyante i hende bistí na blancu. Mi tabata na poli di hospital.

Debí na loke Bijbel ta bisa, mi promé reaccion tabata: “No usa sanger, no usa sanger!” (Echonan 15:28, 29) Esta bon tabata pa tende Charmaine bisa: “Ta bon, Tata. Nos tur t’aki.” Despues mi a haña sa cu e dokternan a mira mi documento médico, i ningun momento uso di sanger no a bira un cuestion. Mi a kibra mi garganta i tabata completamente paralisá, mi no por a ni hala rosea riba mi mes.

Siendo paralisá, mi tabatin mas mester cu nunca pa Jehova sostené mi. Dor cu nan mester a habri un buracu den mi garganta pa pasa un tubu pa mi hala rosea, esei a blokea aire di pasa na mi stemband. Mi no por a papia. Hende tabatin cu lesa mi lip pa comprendé kico mi tabata purba bisa.

Gastunan a acumulá rápidamente. Siendo cu ami cu mi casá i mayoria di mi yunan tabata den e ministerio di tempu completo, mi tabata puntra mi mes si nan lo mester a bandoná e sirbishi aki pa por a cubri e obligacionnan financiero aki. Sin embargo, Mark a logra haña un trabou cu den tres luna so a yuda cubri gran parti dje gastunan. Como resultado, tur por a keda den e ministerio di tempu completo cu excepcion di ami cu mi casá.

Cientos di karchi i carta for di seis diferente pais a tapa e murayanan di mi kamber di hospital. Realmente Jehova tabata sostené mi. E congregacion tambe a yuda mi famia dor di cushiná pa nan durante parti dje cincu luna i mei cu mi tabata den departamento di cuido intensivo. Tur dia, un anciano cristian tabata pasa e atardi cu mi, lesando for di Bijbel i di publicacionnan bíblico, i tambe contando experencianan animador. Dos miembro di famia tabata prepará tur reunion di congregacion cu mi, di manera cu nunca mi no a perde nada di alimento spiritual vital.

Miéntras mi tabata na hospital ainda, nan a haci areglo pa mi asistí na un programa di dia special di asamblea. E personal di hospital a haci areglo pa un verpleegster diplomá i un técnico dje mashin di hala rosea compañá mi henter dia. Esta un deleite di por tabata huntu cu mi rumannan cristian atrobe! Lo mi no lubidá nunca e bista di cientos di ruman pará den rij pa cumindá mi.

 Manteniendo Spiritualidad

Rond di un aña despues dje accidente, mi por a bai cas bek cerca mi famia, aunke ainda mi tin mester di cuido 24 ora pa dia. Un ven specialmente ekipá ta haci posibel cu mi por bai reunion, i masha poco bes mi ta falta. Pero mi tin cu admití cu mi mester di determinacion pa bai. For di dia cu mi a bini cas, mi a logra asistí na tur congreso di distrito.

Finalmente, na februari 1997, mi a recobrá mi abilidad di papia te na cierto grado. Algun di mi verpleegsternan ta scucha cu aprecio ora mi ta compartí cu nan mi speransa basá riba Bijbel. Un verpleegster a lesa henter e buki Testigonan di Jehova—Proclamadónan dje Reino di Dios pa mi i tambe otro publicacionnan di Watch Tower. Mi ta tene corespondencia cu hende dor di usa un stoki pa traha cu e computer. Aunke e manera di tik aki ta masha monótono, ta recompensador di por ta enbolbí ainda den e ministerio.

Mi ta sufri hopi di dolor di nervio di curpa. Pero parce cu ora mi ta compartiendo berdadnan bíblico cu otro hende of ora mi ta tende nan lesa e berdadnan ei pa mi, mi ta haña poco alivio. De bes en cuando, mi ta predicá riba caya huntu cu mi casá cu ta apoyá mi, i e ta fungi como intérprete pa mi ora mi mester di yudansa. Na vários ocasion mi a logra sirbi como pionero auxiliar. Sirbiendo como un anciano cristian ta duna mi un sintimentu di goso, foral ora rumannan bini cerca mi na reunion of bishitá mi na cas i mi por yuda nan i animá nan.

Mi tin cu confesá cu ta fácil pa bira deprimí. P’esei ki ora cu mi sinti mi down, mi ta haci oracion mesora pidi pa mi por tin goso. Di dia i anochi mi ta pidi den oracion pa Jehova sigui sostené mi. Un carta of un bishita di un hende semper ta animá mi. Lesamentu di un dje revistanan Toren di Vigilancia of Spierta! tambe ta yena mi mente cu pensamentunan positivo. Tin biaha vários verpleegster ta lesa e revistanan aki pa mi. Desde mi accidente, mi a scucha shete biaha na e lesamentu di henter e Bijbel riba caset. Esakinan ta algun dje vários maneranan cu Jehova a sostené mi.—Salmo 41:3.

Mi cambio di circunstancia a duna mi hopi tempu pa meditá riba e manera cu nos Magnífico Instructor, Jehova, ta educá nos pa bida. E ta duna nos conocimentu exacto di su boluntad i propósito, un ministerio significativo, conseho en cuanto e secreto pa felicidad den famia i dicernimentu pa sa kico pa haci ora di contratempu. Jehova a bendicioná mi cu un esposa fiel i maraviyoso. Mi yunan tambe a apoyá mi lealmente, i ta un goso pa mi cu nan tur a participá den e ministerio di tempu completo. De echo, dia 11 di mart 2000, nos yu homber Mark cu su casá, Allyson, a gradua for dje di 108 klas di Scol di Galad i a ser asigná na Nicaragua. Ami cu mi casá a logra asistí na nan graduacion. Di berdad mi por bisa cu contratempu a cambia mi bida pero no mi curason.—Salmo 127:3, 4.

Mi ta gradicí Jehova pa e sabiduria cu el a percurá cu a capacitá mi pa transmití na mi famia e herencia spiritual cu ami a ricibí. Mi ta ser fortificá i animá ora mi mira mi yunan sirbi nan Creador cu e mésun actitud cu mi tata, kende a bisa: “Nos no ta stop dje fácil ei. Ta Jehova a manda nos predicá.” Di berdad, Jehova a sostené ami cu mi famia tur nos dianan.

[Plachi na página 24]

Ami huntu cu Tata i mi rumannan, pará banda di nos cas riba wiel, usá durante dianan di pionero. Ami ta na banda drechi

[Plachi na página 26]

Ami huntu cu mi casá, Myrna

[Plachi na página 26]

Un potret recien di nos famia

[Plachi na página 27]

Ainda mi ta predicá via carta