Esaki Lo Por Ta e Mihó Carera pa Bo?

SI BO ta un cristian bautisá, amor pa Dios sin duda ta impulsá bo pa haci su boluntad. Ademas, e ministerio mester ta sigur bo vocacion den bida. Al fin i al cabo, Jesucristo a comisioná tur su siguidónan pa ta hacidó di disipel. (Mateo 28:19, 20) Sí, podisé awor aki bo ta trahando seglarmente pa mantené bo mes. Pero como un siguidó di Jesus i un Testigo di Jehova, bo ta primordialmente un minister cristian, esta, un persona cu ta duna e trabou di predicá e Reino prioridad den bida.—Mateo 24:14.

Podisé bo ta na final di bo añanan di tiener of bo tin 20 i picu aña. Por ta bo a pensa hopi riba ki rumbo bo ta bai sigui den bida. Ora di evaluá e opcionnan cu tin bo dilanti, probablemente satisfaccion personal ta un factor importante.

P’esei considerá loke Jørgen na Dinamarca ta bisa tocante loke e a scoge. Jørgen ta describié como “un estilo di bida ideal caminda bo por concentrá riba e trabou di mas importante cu tin.” Eva, un señora di 31 aña na Grecia, ta bisa: “Ora mi compará mi bida cu bida di mi pareunan, semper mi ta concluí cu di mi ta mas ricu, mas satisfaciente i mas excitante.” Ki carera ta duna tal satisfaccion? Con abo por alcansá un carera asina?

Dios Ta Mustra e Caminda?

Scoge un carera por ta basta difícil. De echo, tin hende kisas ta deseá pa Dios por a indicá nan exactamente loke e kier pa nan haci.

Ora Moises tabata na Madian, Jehova a mand’é bai bek Egipto i saca e israelitanan for di sclabitud. (Éxodo 3:1-10) E angel di Dios a aparecé na Gídeon, kende a ser nombrá pa salba Israel for di opresion. (Huesnan 6:11-14) David tabata cuida carné ora Dios a bisa Samuel pa ungié como e próximo rey di Israel. (1 Samuel 16:1-13) Awe nos no ta ser guiá asina. Mas bien, nos tin cu evaluá asuntunan i dicidí con pa usa nos abilidadnan cu Dios a duna nos.

Jehova a habri pa hóbennan cristian awe “un porta grandi cu ta hiba na actividad.” (1 Corintionan 16:9) Con asina? Den e último década, e cantidad di proclamadónan di Reino a aumentá cu mas di 2.125.000 te yega na mas cu 6.000.000 proclamadó rond mundu. Ta ken ta yuda percurá e miyones di Bijbel, buki, foyeto, revista i tratadonan cu tin mester pa sosten spiritual i pa e trabou mundial di predicá e bon nobo? E miembronan dje famia mundial di Betel ta disfrutá dje privilegio bendicioná aki.

Un Bida Recompensador

Betel ta nificá “Cas di Dios.” I e boluntarionan cristian cu ta sirbi n’e sede i n’e oficinanan di sucursal di Sociedad Watch Tower ta biba na e casnan di Betel ei. (Génesis 28:19, nota na pia di página) Por compará e famianan di Betel djawendia cu ‘famianan di cas edificá dor di sabiduria’ cu ta bon organisá i fundá riba amor pa Jehova.—Proverbionan 24:3.

Kico por bisa dje ambiente di famia cu tin na Betel? Un miembro di 25 aña di edad dje famia di Betel na Estonia ta bisa: “Mi ta gusta e sintimentu cu mi ta tur ora entre amigunan di Jehova. Esaki ta keda e cos mas balioso pa mi na Betel.”—Salmo 15:1, 2.

Mundialmente, rond di 19.500 persona ta disfrutá awor dje privilegio di sirbishi di Betel.  (Salmo 110:3) Na Merca, 46 porciento di esnan na Betel ta entre 19 pa 29 aña di edad. Mescos cu Isaías, nan a bisa: “Ata mi aki! Manda mi.” (Isaías 6:8) Isaías—cu ya caba tabata dedicá na Jehova—tabata ofreciendo su mes pa un privilegio adicional di sirbishi. Aparentemente esaki a nificá sacrificá algun bentaha personal. Esnan den sirbishi di Betel ta laga nan cas i ambiente conocí, i tambe nan mama, tata, ruman i amigunan. Nan ta haci e sacrificionan aki boluntariamente “pa causa dje bon nobo.”—Marco 10:29, 30.

En buelta, ta hopi bendicion spiritual tin na Betel! Un miembro hóben dje famia di Betel na Rusia ta splica: “Dor di desplegá sacrificio propio, nos por siña hopi cos cu lo yuda nos biba den e mundu nobo. Mi por bisa cu den mi caso e bendicionnan di Jehova ta hopi mas grandi cu mi sacrificionan.”—Malakías 3:10.

Bida na Betel

Con bida na Betel ta? Miembronan dje famia di Betel ta di acuerdo cu e ta un bida sano i satisfaciente, asta excitante. Jens, cu tin 43 aña, ta disfrutá di sirbishi di Betel. Di con? E ta bisa: “Debí na e sintimentu cu nos ta parti di un gran esfuerso pa efectuá un tarea importante. Mi por sinti e alcanse i magnitud dje obra di Jehova.”

Di dialuna pa diasabra, e dia na Betel ta cuminsá cu adoracion di mainta. Esaki ta un consideracion di Bijbel, presidí pa un anciano experenciá. Dialuna anochi ta dedicá un ora na studio di Bijbel di famia cu yudansa di E Toren di Vigilancia, siguí tin biaha pa un discurso basá riba un tema bíblico cu ta pas foral pa e famia di Betel.

Kico ta pasa ora un persona drenta Betel pa promé bes? Pa introducí miembronan nobo na bida di Betel, ruman hombernan maduro dje famia ta duna discursonan cu ta trata cu vários faceta di sirbishi di Betel. Pa vários siman durante e promé aña, un miembro nobo dje famia di Betel ta asistí na un excelente scol semanal diseñá pa amplia su comprendimentu dje Scritura. Tambe miembronan nobo ta disfrutá di un programa special di lesamentu di Bijbel. Durante nan promé aña di sirbishi di Betel, miembronan nobo dje famia ta lesa henter e Bijbel.

Kico ta e efecto di tur e entrenamentu aki? Joshua, un miembro di 33 aña di edad dje famia di Betel na Hong Kong, ta contestá: “Di berdad Betel a profundisá mi aprecio pa Jehova. Mi por asociá cu hopi ruman experenciá, kendenan a pasa mayor parti di nan bida sirbiendo Jehova. Mi ta disfrutá foral dje programanan spiritual, manera adoracion di mainta i e Studio di Toren di Vigilancia cu e famia. Ademas, mi ta gusta e estilo di bida ordená i simpel. Esaki ta libra mi di ansiedad innecesario. Tambe mi ta siña atendé cosnan den un manera cristian, i esaki semper a resultá di ta masha probechoso.”

Miembronan dje famia di Betel ta dedicá mayor parti di nan tempu i esfuerso haciendo loke nan a ofrecé nan mes pa haci. Esta, usa nan recursonan físico i mental principalmente pa atendé e asignacion cu a duna nan na Betel. Tin un gran variedad di cos cu mester haci. Tin ruman ta traha cu e mashinnan di imprenta of caminda ta kaft buki cu ta ser mandá pa hopi congregacion. Otronan ta sirbi den cushina, den comedor of den labanderia. E asignacionnan ta incluí limpiesa, traha den cunucu, trabou di construccion, etcétera. Algun ruman tin e responsabilidad di mantené e ekipo den e departamentonan aki. Otronan ta soru pa cuido médico of ta haci trabou di oficina. Tur asignacion di trabou di Betel ta encerá retonan agradabel i ta maraviyosamente recompensador. E trabou hací na Betel ta duna hopi satisfaccion pasobra e ta promové interesnan di Reino i ta ser efectuá dor di amor pa Dios.

Miembronan dje famia di Betel ta ser asigná na congregacionnan, caminda nan ta experenciá personalmente e beneficionan di nan trabou. Nan ta disfrutá di asistí na reunionnan di congregacion i di participá den e  trabou di predicá. Como resultado, miembronan dje famia di Betel a desaroyá banchinan fuerte cu nan rumannan den e congregacionnan local.—Marco 10:29, 30.

Rita, un miembro dje famia di Betel na Gran Bretania, ta bisa: “Mi ta asina gradicidu cu mi tin e congregacion! Ora mi ta n’e reunionnan i den e ministerio, mi fe ta ser fortalecé mashá di mira e rumannan stimá einan, rumannan homber i muher, muchanan i esnan di edad! Pase loke pase, nan ta einan. Esei ta yuda mi ser mas celoso den mi sirbishi di Betel.”

Bida na Betel no ta trabou so, reunion, sirbishi di veld i studia. E famia ta disfrutá tambe di periodonan pa recreá. Tempu-tempu, tin programanan di “Anochi di Famia” cu ta entretenedor i spiritualmente recompensador, nan ta duna e famia di Betel chens di disfrutá dje talentonan di hopi ruman i di siña cosnan animador tocante e bida di otro rumannan cu ta sirbi na Betel. Tambe e bishitanan social cerca otro ta dushi, sano i edificante. Kisas Betel ta percurá pa facilidadnan di recreo, i tambe pa biblioteca pa haci lesamentu i investigacion personal. I no mester lubidá e combersacionnan ameno rond di mesa di comedor ora di come.

Tom, un miembro dje famia di Betel na Estonia, ta bisa: “Laman ta djis un blok for di Betel, i no muchu leu tin un bunita mondi caminda ami cu mi casá ta gusta bai pa caminatanan corticu. Tambe de bes en cuando mi sa hunga golf, hockey i ténis cu amigunan den congregacion i na Betel. I ora tin bon weer, nos ta core baiskel.”

Kico Bo Por Haci pa Cualificá?

Claro cu Betel ta principalmente un lugá caminda cristiannan maduro ta rindi sirbishi sagrado na Jehova i ta traha na fabor di compañeronan creyente rond mundu. Esnan cu bira miembro dje famia di Betel tin cu cumpli cu cierto cualificacionnan. Kico abo por haci pa cualificá pa sirbishi di Betel?

 Mescos cu Timoteo, kende a sirbi huntu cu apostel Pablo, esnan aceptá pa sirbishi di Betel mester tin un bon nomber den e congregacion. (1 Timoteo 1:1) “E rumannan na Listra i Iconio a duna bon informe di” Timoteo. (Echonan 16:2) Aunke e tabata yong, Timoteo tabata conocé e Scritura i tabata bon fundá den e berdad. (2 Timoteo 3:14, 15) Di igual manera, ta ser verwagt di esnan aceptá pa sirbishi di Betel cu nan tin un conocimentu di Bijbel.

Miembronan dje famia di Betel mester tin un spiritu di sacrificio propio. Timoteo su spiritu di sacrificio propio i e dispuesto cu e tabata pa pone interesnan di Reino promé cu su propio interesnan tabata asina bisto, cu Pablo por a bisa di dje: “Mi no tin ningun otro cu un disposicion manera esun di dje,  kende berdaderamente lo atendé e cosnan cu ta pertenecé na boso. Pasobra tur e otronan ta busca nan mes interes, no esnan di Cristo Jesus. Pero boso conocé e prueba cu el a duna di su mes, cu manera un yu cu un tata el a sirbi como esclabo cu mi p’e adelanto dje bon nobo.”—Filipensenan 2:20-22.

Sirbishi di Betel ta rekerí homber i muhernan spiritual. E areglonan cu tin pa miembronan di famia di Betel ta haci posibel pa nan crece spiritualmente mediante studio di Bijbel, asistencia regular na reunionnan cristian i den e ministerio di veld, i asociacion cu cristiannan maduro. Pues ta yuda esnan na Betel sigui e conseho di Pablo: “Sigui cana den union cu [Cristo Jesus], cu rais den dje i siendo edificá den dje i siendo stabilisá den e fe, net manera boso a ser siñá, brotando over cu fe den gradicimentu.”—Colosensenan 2:6, 7.

Debí na e naturalesa di nos trabou na Betel, esnan cu ser aceptá pa e privilegio di sirbishi aki mester ta físicamente fuerte i den bon salú. Si bo ta cumpli cu e cualificacionnan cu nos a mencioná, bo ta riba 19 aña, i bo tin por lo ménos un aña bautisá, nos ta animá bo pa considerá sirbishi di Betel.

Nos Tur Tin un Parti

Como cristian, nos tur sigur ta deseá di pone interesnan di Reino promé den bida i sirbi Jehova di henter nos curason. (Mateo 6:33; Colosensenan 3:23) Tambe nos por animá esnan cu ta sirbi na Betel pa sigui rindi sirbishi sagrado einan. I mester urgi foral rumannan homber yong cu ta cualificá pa sirbishi di Betel pa haci esfuerso pa alcansá e privilegio bendicioná aki.

Sirbishi di Betel ta un estilo di bida spiritualmente satisfaciente, unu cu di berdad lo por ta e mihó carera pa bo. E tabata pa Nick, kende a cuminsá sirbi na Betel na edad di 20 aña. Despues di dies aña di sirbishi di Betel, e ta bisa: “Hopi bes mi ta haci oracion na Jehova pa gradicié pa su bondad inmerecí. Kico mas lo mi por pidi? Aki, nos ta rondoná pa cristiannan fiel cu ta haciendo nan best pa sirbi Jehova.”

[Kuadro/Plachi na página 22]

KICO ANCIANO I MAYORNAN POR HACI?

Anciano i superintendentenan biahero mester animá foral rumannan homber hóben pa solicitá pa Betel. Recientemente, un encuesta informal entre miembronan mas hóben dje famia di Betel a mustra cu cerca 34 porciento di nan tabata superintendentenan cristian cu principalmente a urgi nan pa haci sirbishi di Betel nan meta. Sí, por ta lo sinti nan falta den nan congregacionnan local. Pero ta bon pa corda cu aunke Timoteo sin duda tabatin un influencia sano riba otro hóbennan na Listra i Iconio, tog e ancianonan einan no a strob’é di bai sirbi huntu cu Pablo. Nan no a concluí cu si nan laga Timoteo compañá e apostel esei lo tabata un pérdida muchu grandi pa nan congregacion.—1 Timoteo 4:14.

Foral mayornan cristian mester trata pa ta un influencia positivo riba nan yunan den e asuntu aki. Den e encuesta cu nos a caba di mencioná, 40 porciento di esnan entrevistá a cita nan mayornan como e fuente principal cu a animá nan pa drenta sirbishi di Betel. Un ruman muher cu tin un par di aña ta sirbi na Betel a declará: “E bida di mi mayornan den e sirbishi di Jehova tabata un impulso fuerte pa mi drenta sirbishi di Betel. Mirando nan ehempel den e ministerio di tempu completo, mi tabata sa cu esaki lo ta e caminda di bida mas mihó i mas satisfactorio pa scoge.”

[Kuadro na página 24]

NAN TA APRECIÁ SIRBISHI DI BETEL

“Mi ta apreciá mi sirbishi na Betel. Mi ta haña un satisfaccion di sa cu mi a sirbi Jehova henter dia i cu lo mi haci mescos mañan, otromañan, etcétera. Esaki ta duna mi un bon concenshi i ta yena mi mente cu pensamentu positivo.”

“Betel ta un lugá caminda bo por dedicá tur bo tempu i energia na e sirbishi di Jehova sin distraicion. Esaki ta duna bo un goso di paden. Pero tambe bo por mira Jehova su organisacion for di un otro perspectiva. Bo ta sinti bo hopi mas cerca dje centro di actividad dje organisacion ei, i esaki ta hacié hopi excitante.”

“Bini Betel ta e mihó cos cu a yega di pasa cu mi. Aki, educacion nunca ta stop. I aki educacion no ta pa mi logro personal, sino pa Jehova. Aki mi trabou nunca lo ta en bano.”

“Usando mi talentonan na Betel ta laga mi sinti satisfecho i na pas, pasobra nan ta ser usá pa Jehova i pa e rumannan.”

“Mi no por a haña berdadero satisfaccion i felicidad den mi carera anterior. Pa hopi aña mi a soña di traha huntu cu mi rumannan i pa nan. Ta p’esei mi a bini Betel. Mi ta haña berdadero satisfaccion dor cu mi sa cu tur mi esfuerso lo beneficiá otro hende spiritualmente i lo trece alabansa pa Jehova.”