Para Completo i cu Conviccion Firme

Wardadónan di Integridad Yen di Curashi Ta Triunfá Riba Persecucion Nazi

“SEA sabí, mi yu, i alegrá mi curason, pa mi por contestá esun cu ta desafiá mi cu desprecio.” (Proverbionan 27:11) E peticion caluroso aki ta revelá cu Dios su criaturanan inteligente por alegrá Jehova su curason dor di ta fiel i leal na dje. (Sofonías 3:17) Sin embargo, Satanas, e desafiadó cu desprecio, ta determiná pa kibra integridad di esnan cu ta sirbi Jehova.—Job 1:10, 11.

Specialmente desde e promé parti di siglo 20 ora el a ser tirá for di shelu den becindario di tera, Satanas a desplegá gran rabia pa cu Jehova su pueblo. (Revelacion 12:10, 12) No obstante, cristiannan berdadero a para “completo i cu conviccion firme” i a warda nan integridad na Dios. (Colosensenan 4:12) Laga nos considerá brevemente un ehempel sobresaliente di tal integridad—esun di Testigonan di Jehova na Alemania promé i durante Segundo Guera Mundial.

Actividad Celoso Ta Hiba na Prueba di Integridad

Den añanan ’20 i principio di añanan ’30, Bibelforscher, manera Testigonan di Jehova na Alemania tabata conocí e tempu ei, a distribuí gran cantidad di literatura bíblico. Entre 1919 i 1933, nan tabata laga un promedio di ocho buki, foyeto chikitu of revista cu cada famia na Alemania.

Na e tempu ei, Alemania tabatin un di e gruponan di mas grandi di siguidónan ungí di Cristo. De facto, di e 83.941 personanan cu mundialmente a participá di e Cena di Señor na 1933, casi 30 porciento tabata biba na Alemania. No a dura mashá cu e Testigonan aleman aki a experenciá pruebanan horibel di integridad. (Revelacion 12:17; 14:12) Retiro di trabou, razia den casnan i expulsion for di scolnan a escalá masha lihé den golpiamentu, aresto i encarcelacion. (Potret 1) Como consecuencia, durante e añanan cu a hiba na e Segundo Guera Mundial, di tur esnan detené den campo di concentracion 5 pa 10 porciento tabata Testigonan di Jehova.

Di Con Nazinan A Persiguí e Testigonan

Pero, di con e Testigonan di Jehova a provocá e régimen nazi na rabia? Profesor di historia Ian Kershaw ta comentá den su buki Hitler—1889-1936: Hubris, cu e Testigonan a bira e blanco di persecucion dor cu nan a nenga di “haci tur loke e gobiernu nazi a bisa.”

E buki Betrayal—German Churches and the Holocaust (Traicion—Iglesianan Aleman i e Holocausto), redactá dor di profesor di historia Robert P. Ericksen i profesor di estudionan  hudiu Susannah Heschel, a splica cu e Testigonan “a nenga di participá den violencia of uso di forsa militar. . . . Testigonan a kere den neutralidad político, loke a nificá cu nan lo no a vota pa Hitler ni duna e saludo di Hitler.” E mésun fuente ta agregá cu esaki a provocá e rabia di e nazinan i a pone e Testigonan den un posicion vulnerabel pa ricibí daño dor cu “Socialismo Nacional lo no a tolerá tal rechaso.”

Un Protesta Internacional i un Atake Total

Joseph F. Rutherford a reaccioná riba e intolerancia nazi dor di manda un carta di protesta pa Hitler via un mensahero special, dia 9 di februari 1934. (Potret 2) Dia 7 di october 1934, siguiendo e carta di Rutherford, Testigonan di Jehova di 50 pais incluso Alemania a manda 20.000 carta i telegram di protesta pa Hitler.

E nazinan a respondé dor di aumentá e persecucion riba e Testigonan. Dia 1 di april 1935, a prohibí e Testigonan den henter e nacion. I dia 28 di augustus 1936, Gestapo a lansa un atake todo por todo riba nan. Tog, e Testigonan “a sigui distribuí pamfleta i a sostené nan fe di un of otro manera,” segun Betrayal—German Churches and the Holocaust.

Por ehempel, dia 12 di december 1936, dilanti nanishi di Gestapo, mas o ménos 3.500 Testigo a distribuí dies di miles di ehemplar di un resolucion imprimí tocante e maltrato cu nan tabata ricibí. Relacioná cu e campaña aki, E Toren di Vigilancia a informá: “Pa e goso indescriptibel di e trahadónan fiel, esaki tabata un victoria grandi i un golpi fuerte pa e enemigu.”—Romanonan 9:17.

Persecucion Ta Fracasá!

E nazinan a sigui busca Testigonan di Jehova. Pa 1939, seis mil di nan tabata encarcelá, i miles a ser mandá camponan di concentracion. (Potret 3) Con e situacion tabata na final di Segundo Guera Mundial? Mas o ménos 2.000 Testigo encarcelá a muri, di cua mas cu 250 a ser ehecutá. Sin embargo, profesornan Ericksen i Heschel a skirbi: “Mayoria Testigo di Jehova a pega firmemente na nan fe apesar di persecucion.” Como resultado, ora Hitler su régimen a cai, mas cu mil Testigo a sali victorioso for di e camponan.—Potret 4; Echonan 5:38, 39; Romanonan 8:35-37.

Kico a duna Jehova su pueblo e forsa pa wanta persecucion? Un sobrebibiente di campo di concentracion Adolphe Arnold a splica: “Asta ora bo ta hopi swak i down, Jehova ta mira bo, sa loke bo ta pasando aden i lo duna bo e forsa necesario pa superá e situacion i keda fiel. Su man no ta demasiado corticu.”

E palabranan di profeta Sofonías ta aplicá bon na e cristiannan fiel ei! El a declará: “Jehova bo Dios ta meimei di bo. Manera Unu poderoso, lo e salba. Lo e hubilá riba bo cu alegria.” (Sofonías 3:17) Ohalá cu tur adoradó di e Dios berdadero awe imitá e fe di e Testigonan leal ei cu a mantené integridad apesar di persecucion nazi i dje manera aki alegrá Jehova su curason.—Filipensenan 1:12-14.

[Rekonosementu pa Potrèt na página 8]

Państwowe Muzeum Oświȩcim-Brzezinka, cortesia di USHMM Photo Archives