Bo Ta Corda?

Bo a apreciá di por a lesa e edicionnan recien di E Toren di Vigilancia? Wel, wak si bo por contestá e siguiente preguntanan:

• Di con apostel Pablo a mencioná speransa na final dje seri di puntonan na Romanonan 5:3-5?

Pablo a presentá un seri di cos cu cristiannan ta experenciá: tribulacion, awante, condicion aprobá i speransa. E “speransa” aki no ta e sintimentu inicial di speransa cu un persona ta haña for di Bijbel, sino ta e speransa mas fuerte, mas profundo i mas penetrante cu un cristian por adkerí atrabes di tempu.—15/12, página 22-3.

• Di con un cristian djawe lo ta interesá den e weganan di atletismo cu a tuma lugá den antiguo Grecia?

Un comprendimentu dje ambiente i custumbernan di e weganan ei por tira lus riba hopi versículo di Bijbel. Algun dje versículonan aki ta mencioná “competí segun regla” ‘kita tur carga i mira n’e ehempel di Jesus,’ “core e careda te na fin” i gana e corona of premio. (2 Timoteo 2:5; 4:7, 8; Hebreonan 12:1, 2; 1 Corintionan 9:24, 25; 1 Pedro 5:4)—1/1, página 28-30.

• Cua método nobo pa declará e bon nobo a ser introducí na januari 1914?

E aña ei a introducí e “Foto-Drama di Creacion.” E tabata un presentacion cu a consistí di cuater parti cu a incorporá segmentonan di película i cientos di slide di glas di color di cua hopi a ser sincronisá of compañá cu disco cu discurso grabá cu ta duna splicacion. A prepará binti set di e Drama aki i a usa nan extensamente pa siña hende e mensahe di Bijbel.—15/1, página 8-9.

• Di ki manera e Cuerpo Gobernante ta distinto for di un corporacion legal?

Miéntras cu e miembronan di un corporacion ta vota pa elegí e directornan, e Cuerpo Gobernante sí no ta ser nombrá dor di ningun hende, mas bien e ta ser nombrá dor di Jesucristo. No ta necesario pa e directornan di e diferente corporacionnan cu Testigonan di Jehova ta usa, ta miembro dje Cuerpo Gobernante. Na e reunion anual recien di Watch Tower Bible and Tract Society of Pennsylvania, miembronan dje Cuerpo Gobernante cu tabata sirbi como director i funcionario dje corporacion ei, boluntariamente a baha como tal. Rumannan maduro dje “otro carnénan” a yena e puestonan cu a keda bashí. (Juan 10:16) Pues asina e Cuerpo Gobernante por dedicá mas tempu na preparacion di cuminda spiritual i na otro formanan di percurá pa necesidadnan spiritual dje hermandad mundial.—15/1, página 29, 31.

• Cua dos ehempel bíblico nos por examiná pa siña con pa trata cu desanimacion?

Un di nan ta Hana, mama di Samuel. Hana por a permití su mes bira desanimá ora Eli, e sumo sacerdote di Israel, a husgu’é robes. En bes di esei, di un manera franco pero respetuoso Hana a aclará e malcomprendimentu. Ademas, Hana no a carga rencor contra Eli. E di dos ehempel ta Marco, kende mester a sintié desanimá ora apostel Pablo no tabata kier p’e bai cu nan durante un biahe di misionero. En bes di sintié aplastá debí cu el a perde e privilegio aki, el a sigui activo den sirbishi, biahando huntu cu Barnabas.—1/2, página 20-2.

• Di con cristiannan mester tene cuidou cu duna of tuma copia di programanan di computer?

Mayoria programa di computer (incluso weganan) ta ser protehá dor di licensia, cu ta indicá cu ta e doño/usuario por instalá e programa riba un solo computer. Generalmente, ta un violacion di ley di derecho di autor si traha copia pa otronan, asta ora ta pa regalo. Cristiannan kier obedecé ley, ‘pagando bek e cosnan di César na César.’ (Marco 12:17)—15/2, página 28-9.

• Ken tabata Cirilio i Metodio, i con nan a contribuí na estudio di Bijbel?

Nan tabata dos ruman homber cu a nace na Tesalónica, Grecia, den siglo 9. Nan a desaroyá un método pa skirbi idiomanan eslavo i a traducí hopi parti di Bijbel na esclavonio.—1/3, página 28-9.

• Kico e expresion “fiha mente riba e spiritu” kier men?—Romanonan 8:6.

E ta nificá cu e forsa activo di Jehova ta controlá, dominá i impulsá nos. Nos por laga e spiritu di Dios influenciá nos dor di lesa i studia Bijbel, dor di obedecé Dios su ley di henter nos curason i dor di haci oracion pidi Dios su spiritu.—15/3, página 15.

• Kico nos por haci si nos ta sinti cu hende ta comprendé nos robes?

Ta importante pa nos busca pa clarificá e asuntu cu un spiritu di amor. Si ta parce cu bo no ta logra, no desesperá. Pidi comprendimentu i yudansa di Jehova, kende “ ta evaluando e curasonnan.” (Proverbionan 21:2; 1 Samuel 16:7)—1/4, página 21-3.