Edificando un Famia Spiritualmente Fuerte

“Sigui cria nan den e disiplina i reglamentu mental di Jehova.”—EFESIONAN 6:4.

1. Kico tabata Dios su propósito pa famia, pero en bes di esei kico a sosodé?

“SEA fructífero i bira hopi i yena e tera.” (Génesis 1:28) Cu e palabranan ei na Adam cu Eva, Jehova Dios a instituí e areglo di famia. (Efesionan 3:14, 15) Mirando padilanti, e promé pareha ei lo por a visualisá un tera yen di nan desendiente; un famia extenso di individuonan perfecto bibando cu goso riba un tera paradísico i adorando nan Magnífico Creador den unidad. Pero Adam cu Eva a cai den picá, i e tera no a yena cu hende hustu temeroso di Dios. (Romanonan 5:12) En bes di esei, bida di famia pronto a deteriorá, i odio, violencia, i un falta di “cariño natural” a prevalecé, specialmente den e “último dianan” aki.—2 Timoteo 3:1-5; Génesis 4:8, 23; 6:5, 11, 12.

2. Ki abilidad Adam su desendencia tabatin, pero kico lo tabata necesario pa edificá un famia spiritualmente fuerte?

² Adam cu Eva a ser creá den Dios su imágen. Aunke Adam a bira un pecadó, Jehova a permitié haña yu. (Génesis 1:27; 5:1-4) Mescos cu nan tata, Adam su desendencia tabatin capacidad moral i por a siña distinguí entre bon i malu. Nan por a ser instruí en cuanto con pa adorá nan Creador i e importancia di stim’é cu henter nan curason, alma, mente i forsa. (Marco 12:30; Juan 4:24; Santiago 1:27) Ademas, nan por a  ser entrená pa ‘ehercé husticia i stima bondad i ser modesto canando cu . . . Dios.’ (Mikéas 6:8) Sin embargo, como pecadó nan lo mester a presta basta atencion pa por edificá un famia spiritualmente fuerte.

Cumpra Tempu

3. Con mayornan por ‘cumpra tempu’ pa lanta yunan cristian?

³ Den e tempu crítico i complicá aki, mester haci hopi esfuerso pa yunan por bira “stimadónan di Jehova” cu di berdad ta “odia loke ta malu.” (Salmo 97:10) Mayornan sabí lo ‘cumpra tempu’ pa trata cu e desafio aki. (Efesionan 5:15-17) Si bo ta un mayor, con bo por haci esaki? Na promé lugá, establecé prioridad dor di presta atencion na “e cosnan mas importante,” incluso na siña i entrená bo yunan. (Filipensenan 1:10, 11) Na di dos lugá, simplificá bo estilo di bida. Kisas bo tin cu pone actividadnan cu no ta realmente necesario un banda. Of por ta bo tin cu deshací di posesionnan innecesario cu ta tuma tempu pa mantené. Como un mayor cristian, nunca lo bo lamentá cu bo a haci e esfuerso necesario pa lanta yunan temeroso di Dios.—Proverbionan 29:15, 17.

4. Con bo por mantené un famia uní?

⁴ Pasa tempu huntu cu bo yunan, specialmente ora esei ta drei rond di asuntunan spiritual, ta un esfuerso cu ta bale la pena i ta un di e mihó maneranan pa mantené un famia uní. Pero no laga esaki ta un asuntu di casualidad. Programá cierto momentonan pa boso pasa huntu. Esaki no ta nificá djis di ta huntu den e mésun cas, cada un pa su mes cuenta. Yunan ta progresá mihó ora nan haña atencion personal tur dia. Ta necesario desplegá hopi amor i interes. Asta promé cu parehanan casá dicidí di haña yu, nan mester pensa riba e responsabilidad importante aki seriamente. (Lucas 14:28) E ora ei nan lo no considerá criamentu di yu como un tarea desagradabel. Al contrario, nan lo mir’é como un gran privilegio.—Génesis 33:5; Salmo 127:3.

Siña cu Palabra i Ehempel

5. (a) Siña yunan stima Jehova ta cuminsá cu kico? (b) Ki conseho Deuteronomio 6:5-7 ta duna mayornan?

⁵ Siña bo yunan stima Jehova ta cuminsá cu bo mes amor p’e. Un amor fuerte pa Dios lo conmové bo pa sigui tur su instruccionnan fielmente. Esaki ta incluí lanta yunan “den e disiplina i reglamentu mental di Jehova.” (Efesionan 6:4) Dios ta consehá mayornan pa ser un ehempel pa nan yunan, comunicá cu nan, i siña nan. Deuteronomio 6:5-7 ta bisa: “Bo tin cu stima Jehova bo Dios cu tur bo curason i cu tur bo alma i cu tur bo forsa vital. I e palabranan aki cu mi ta mandando bo awe mester resultá di ta riba bo curason; i bo tin cu inculcá nan den bo yu homber i papia di nan ora bo ta sinta den bo cas i ora bo ta cana riba caminda i ora bo ta bai drumi i ora bo ta lanta.” Via spiertamentu i ripiticion frecuente, bo por inculcá Dios su mandamentunan den bo yunan. Asina, bo yunan lo mira e amor cu bo tin pa Jehova i, en turno, nan lo ser influenciá pa desaroyá un laso íntimo cuné tambe.—Proverbionan 20:7.

6. Di ki manera mayornan por probechá dje echo cu yunan ta siña di ehempel?

⁶ Yunan ta ansioso pa siña. Nan ta bon scuchadó i observadó i ta lihé pa imitá bo ehempel. Ora nan mira cu bo no ta materialista, esaki ta yuda nan siña con pa sigui Jesus su conseho. Bo ta siña nan pa no ansha pa cosnan material sino pa ‘busca promé e reino di Dios.’ (Mateo 6:25-33) Dor di tene combersacionnan sano i edificante tocante berdadnan di Bijbel, Dios su congregacion, i e ancianonan nombrá, bo ta siña bo yunan respetá Jehova i apreciá su provisionnan  spiritual. Ya cu mucha ta ripará inconsistencia masha lihé, mester apoyá instruccion oral cu conducta i actitud cu ta demostrá bo propio aprecio profundo pa cosnan spiritual. Ta ki un bendicion ora mayornan mira cu nan bon ehempel a producí den nan yunan amor di curason pa Jehova!—Proverbionan 23:24, 25.

7, 8. Cua ehempel ta mustra e balor di entrená yunan for di chikitu, i ken ta merecé e mérito dje éxito?

⁷ E balor di entrená yunan for di chikitu por ser mirá den un ehempel na Venezuela. (2 Timoteo 3:15) Ta trata aki di un pareha yong: Félix cu Mayerlín. Nan ta ministernan pionero. Ora nan yu Felito a nace, nan tabata ansioso pa haci tur loke nan por pa lant’é como un adoradó berdadero di Jehova. Mayerlín a cuminsá lesa na bos haltu pa Felito for di Mi buki di relato bíblico, publicá dor di Testigonan di Jehova. For di chikitu, Felito a parce di reconocé Moises i otro hendenan cu ta ser representá den e buki aki.

⁸ Ora e tabata basta chikitu ainda, Felito a cuminsá duna testimonio riba su mes. El a cumpli cu su deseo di bira publicadó di Reino, i despues el a bautisá. Cu tempu, Felito a bira un pionero regular. Su mayornan ta comentá: “Segun cu nos ta mira e progreso di nos yu, nos ta realisá cu nos debe esaki na Jehova i su instruccion.”

Yuda Yunan Crece Spiritualmente

9. Di con nos mester ta gradicidu pa e instruccion spiritual cu nos ta ricibí mediante e clase di esclabo fiel i discreto?

⁹ Tin masha hopi revista, cientos di buki i miles di Web site riba Internet cu ta ofrecé conseho con pa cria yu. Hopi bes “e informacion ta contradictorio,” segun Newsweek den un edicion special tocante mucha. “Mas alarmante ainda ta ora informacion cu bo ta pensa cu bo por confia, gewoon ta resultá completamente robes.” Esta gradicidu nos ta cu Jehova a proveé instruccion na abundancia pa desaroyo spiritual di famianan! Bo ta beneficiá plenamente di tur e provisionnan hací mediante e clase di esclabo fiel i discreto?—Mateo 24:45-47.

10. Con un studio di Bijbel di famia eficas por beneficiá tantu mayornan como yunan?

¹⁰ Un necesidad masha importante ta un studio di Bijbel di famia regular i consistente den un ambiente relahá. Pa hacié instructivo, agradabel i animador, bon preparacion ta esencial. Dor di laga nan yunan expresá nan mes, mayornan por haña sa kico tin den nan mente i curason. Un manera pa determiná con eficas un studio di famia ta, ta dor di tuma nota si tur miembro di e famia ta anticip’é.

11. (a) Ki metanan mayornan por yuda nan yunan pone? (b) Kico tabata e resultado ora un cierto hobencita hapones a sigui tras di su meta?

¹¹ Asina tambe metanan bíblico ta contribuí na un famia spiritualmente fuerte, i mayornan mester yuda nan yunan pone meta. Metanan apropiado ta incluí lesa Bijbel tur dia, bira un publicadó regular di e bon nobo, i progresá na dedicacion i bautismo. Otro metanan por incluí sirbishi di tempu completo como un pionero, na Betel of como un misionero. Miéntras e tabata bai scol básico, un hobencita hapones cu yama Ayumi a pone e meta pa duna testimonio na tur hende den su klas. Pa lanta e interes di su maestro i alumnonan di su klas, el haña permiso pa pone diferente publicacion bíblico den e biblioteca. Como resultado, Ayumi a conducí 13 studio di Bijbel durante su seis añanan di scol básico. Un di e studiantenan di Bijbel ei i otro miembronan di famia di e studiante a bira cristian bautisá.

12. Con yunan por saca mas tantu beneficio for di reunionnan cristian?

¹² Loke tambe ta necesario pa un salú spiritual fuerte ta asistencia regular na reunion. Apostel Pablo a spierta compañeronan  creyente pa ‘no bandoná nan reunimentu huntu, manera algun tabatin pa custumber.’ No laga esei bira nos custumber, pasobra tantu hende hóben como grandi ta beneficiá mashá dor di ta presente regularmente na reunionnan cristian. (Hebreonan 10:24, 25; Deuteronomio 31:12) Mester siña yunan pa scucha bon. Preparacion pa reunion tambe ta vital, pasobra e mayor beneficio ta bini di participá activamente dor di duna comentario. Aunke un mucha chikitu kisas ta cuminsá dor di bisa un par di palabra of lesa un porcion chikitu di un paragraf, lo ta mas beneficioso si entrená yunan pa busca contesta i duna esaki cu nan mes palabra. Boso como mayor ta pone ehempel dor di duna comentario significativo regularmente? Tambe ta bon pa cada miembro di famia tin un Bijbel, un buki di cantica i un ehemplar di e publicacion cu ta ser usá pa consideracion bíblico.

13, 14. (a) Di con mayornan mester traha cu nan yunan den e ministerio? (b) Kico lo yuda haci sirbishi di veld beneficioso i gososo pa yunan?

¹³ Mayornan sabí lo dirigí e energia hubenil di nan yunan na sirbi Jehova, yudando nan pa haci e predicacion un parti importante di nan bida. (Hebreonan 13:15) Solamente dor di traha cu nan yunan den e ministerio mayornan por haci sigur cu nan yunan lo haña e entrenamentu necesario pa bira ministernan “sin nada di tene bergwensa di dje, manehando e palabra dje berdad corectamente.” (2 Timoteo 2:15) Pues anto, kico di bo? Si bo ta un mayor, bo ta yuda bo yunan prepará pa sirbishi di veld? Esei lo yuda haci e  ministerio gososo, significativo i productivo pa nan.

¹⁴ Di con ta beneficioso pa mayornan traha huntu cu nan yunan den e ministerio? Di e forma aki, yunan por tuma nota di e bon ehempel di nan mayornan i imit’é. N’e mes momento, mayornan por observá e actitud, comportacion i abilidad di nan yunan. Haci sigur di hiba bo yunan cu bo den e diferente rasgonan di e ministerio. Si ta posibel, laga cada yu tin su mes tas di predicá, i siñ’é pa ten’é nèchi i representabel. Dor di entrenamentu i animacion consistente, yunan lo haña berdadero aprecio pa e ministerio, i nan lo mira e trabou di predicá como un medio pa mustra amor na Dios i próhimo.—Mateo 22:37-39; 28:19, 20.

Mantené Spiritualidad

15. Siendo cu ta asina importante pa mantené e spiritualidad di un famia, cua ta algun manera pa haci esaki?

¹⁵ Ta esencial pa mantené spiritualidad di e famia. (Salmo 119:93) Un manera pa haci esaki ta dor di considerá cosnan spiritual na  tur oportunidad cu bo famia. Bo ta considerá e texto di Bijbel pa e dia ei cu nan? Ta bo custumber pa “ora bo ta cana riba caminda” bo compartí experencia di sirbishi di veld of puntonan for di e último revistanan di E Toren di Vigilancia i Spierta! cu nan? Bo ta corda gradicí Jehova den oracion pa cada dia di bida i pa su provisionnan na abundancia “ora bo ta bai drumi i ora bo ta lanta”? (Deuteronomio 6:6-9) Ora bo yunan mira amor pa Dios reflehá den tur cos cu bo ta haci, esaki lo yuda nan pa haci e berdad di nan mes.

16. Con balioso ta pa animá yunan pa haci nan mes investigacion?

¹⁶ Algun biaha, yunan lo tin mester di guia pa trata exitosamente cu problema of situacionnan cu ta lanta. En bes di semper bisa nan kico pa haci, pakico no mustra nan con pa haña Dios su punto di bista riba asuntunan dor di animá nan pa haci investigacion riba nan mes? Siña yunan haci bon uso di tur e hermentnan i publicacionnan proveé mediante e “esclabo fiel” lo yuda nan desaroyá un relacion íntimo cu Jehova. (1 Samuel 2:21b) I ora nan compartí e beneficionan di nan investigacion bíblico cu otro miembronan di e famia, e spiritualidad di e famia ta crece mas ainda.

Dependé Completamente Riba Jehova

17. Di con mayornan soltero no mester desesperá ora di cria nan yunan como cristian?

¹⁷ Kico di famianan di un solo mayor? Esakinan ta enfrentá desafionan adicional ora ta trata di criamentu di yu. Pero mayornan soltero, no perde ánimo! Éxito ta posibel, manera a keda demostrá dor di hopi mayor soltero kendenan a confia den Dios, a aplicá obedientemente su conseho, i a lanta yunan spiritualmente bon i fuerte. (Proverbionan 22:6) Naturalmente, cristiannan cu ta mayor soltero mester dependé completamente riba Jehova. Nan mester tin fe cu lo e proveé yudansa.—Salmo 121:1-3.

18. Mayornan mester duna atencion na ki necesidad mental i físico di nan yunan, pero riba kico e énfasis mester ta?

¹⁸ Mayornan sabí ta realisá cu ‘tin un tempu pa hari i un tempu pa bula rond.’ (Eclesiástes 3:1, 4) Pa edificá e mente i curpa di un mucha ta esencial p’e tin tempu pa relahá i recreo sano i balansá. Música edificante i specialmente canta cantica di alabansa na Dios lo yuda un mucha desaroyá un actitud saludabel cu por hunga un rol importante den fortificá su relacion cu Jehova. (Colosensenan 3:16) Hubentud ta un tempu tambe pa prepará pa bira un adulto temeroso di Dios, dje manera ei un persona por sigui gosa di bida pa semper den un tera paradísico.—Galationan 6:8.

19. Di con mayornan por tin confiansa cu Jehova lo bendicioná nan esfuerso pa cria nan yunan?

¹⁹ Jehova kier pa tur famia cristian keda spiritualmente fuerte i uní. Si nos stima Dios di berdad i ta haci nos best pa obedecé su Palabra, lo e bendicioná nos esfuerso i lo e duna nos e forsa necesario pa sigui su direccion inspirá. (Isaías 48:17; Filipensenan 4:13) Corda cu e oportunidad cu bo tin awor di siña i entrená bo yunan ta limitá i lo no ripití. Haci bo máximo esfuerso pa aplicá e conseho dje Palabra di Dios, i Jehova lo bendicioná bo esfuerso pa edificá un famia spiritualmente fuerte.

Kico Nos A Siña?

• Di con ta asina importante pa cumpra tempu ora di cria yu?

• Di con ta necesario pa mayornan pone un bon ehempel?

• Cua ta algun manera importante pa yuda yunan crece spiritualmente?

• Con por mantené e spiritualidad di un famia?

[Preguntanan di Estudio]

[Plachinan na página 24, 25]

Famianan spiritualmente fuerte regularmente ta studia e Palabra di Dios, ta asistí na reunionnan cristian i ta participá huntu den e ministerio