Pregunta di Lector

Na 1 Pedro 4:3, nos ta lesa cu algun cristian a yega di participá den “idolatria ilegal.” No ta tur idolatria ta ilegal, condená i prohibí pa Dios?

Sí, den bista di Dios tur idolatria ta ilegal. Hende cu ta busca su aprobacion no por practicá idolatria.—1 Corintionan 5:11; Revelacion 21:8.

Sin embargo, ta parce cu apostel Pedro tabata referí na idolatria den un otro sentido. Un motibu ta cu den hopi nacion di antigwedad, idolatria tabata comun i no tabatin restriccion legal di parti dje autoridadnan. Es decir, e ley dje pais no a prohibí tal idolatria. Tabatin idolatria cu tabata asta parti dje política nacional of gubernamental. Den e sentido ei, algun hende a participá den ‘idolatria sin restriccion legal’ promé cu nan a bira cristian. (Traduccion di Mundu Nobo, edicion di 1950) Nos por tuma nota cu por ehempel rey Nabucodonosor di Babilonia a traha un imágen di oro como ídolo, pero e sirbidónan di Jehova, Sadrac, Mesac i Abednego a nenga di ador’é.—Daniel 3:1-12.

For di un otro punto di bista, hopi rito di adoracion di ídolo a encerá actonan escandalosamente contrario di cualkier ley natural of sentido moral cu ta originá di hende su concenshi heredá. (Romanonan 2:14, 15) Apostel Pablo a skirbi tocante prácticanan degradá cu tabata “contrario cu naturalesa” i “obseno,” i esakinan hopi biaha a tuma lugá den ritonan religioso. (Romanonan 1:26, 27) Homber i muher cu a participá den idolatria ilegal no tabata tene nan mes na e frenonan legal di naturalesa humano. P’esei, sigur tabata na su lugá pa esnan cu a bira cristian bandoná e prácticanan corupto ei.

Ademas di lo anterior, tal idolatria cu tabata comun entre hende no-hudiu a ser condená dor di Jehova Dios. Pues nan tabata contra ley. *—Colosensenan 3:5-7.

[Nota]