Manifestá Bo Progreso

“Refleccioná riba e cosnan aki; sea intensamente ocupá den nan, pa bo progreso por ser manifestá na tur hende.”—1 TIMOTEO 4:15.

1. Con bo por sa ki ora un fruta ta hechu i bon pa come?

VISUALISÁ bo fruta faborito: un peach, un pera, un mango of cualkier otro fruta. Bo por sa ki ora e ta hechu i bon pa come? Sigur cu sí. Tantu su aroma, su color como su consistencia ta bisa bo cu tin un experencia suculento ta spera bo. Kisas bo ta asta saca un suspiro asina bo tin un pida di dje den bo boca. Esta bon! Esta dushi! E ta duna bo hopi goso i placer.

2. Con madures ta ser manifestá, i ki efecto e tin riba relacionnan personal?

² E experencia simpel pero deleitabel aki ta comparabel cu otro cos den bida. Por ehempel, mescos cu den caso di fruta, madures spiritual di un hende tambe ta manifestá su mes den vários forma. Nos ta mira cu un hende ta maduro ora e ta manifestá dicernimentu, perspicacia, sabiduria i otro cualidadnan similar. (Job 32:7-9) Sigur-sigur ta un placer pa asociá i traha cu hende cu ta desplegá e tipo di cualidadnan ei den nan actitud i den loke nan ta haci.—Proverbionan 13:20.

3. Kico e manera cu Jesus a describí e hendenan di su tempu a revelá tocante madures?

³ Di otro banda, kisas un hende ta maduro físicamente, pero e manera cu e ta papia i actua ta revelá cu emocionalmente i spiritualmente e no a madurá. Por ehempel, papiando di e generacion cabesura di su tempu, Jesucristo a bisa: “Juan a bini sin ta come ni bebe, tog hende a bisa: ‘E tin un demoño’; e Yu di hende sí a bini ta come i bebe, i ainda hende ta bisa: ‘Mira! Un homber golos i biciá na biña.’” Maske e hendenan ei tabata maduro den sentido físico, Jesus a bisa cu nan  a actua manera ‘mucha chikitu,’ esta, niun tiki maduro. P’esei, el a agregá: “Di tur manera, sabiduria ta ser probá hustu dor di su obranan.”—Mateo 11:16-19.

4. Den ki maneranan progreso i madures ta ser manifestá?

⁴ E palabranan di Jesus ta mustra nos cu ta e obranan cu un hende ta efectuá i e resultadonan producí, ta loke ta mustra si e tin berdadero sabiduria, loke ta un indicacion típico di madures. Den e mésun contexto aki, nota kico apostel Pablo a consehá Timoteo. Despues cu Pablo a mencioná un pa un e cosnan cu Timoteo mester a sigui tras di dje, el a bisa: “Refleccioná riba e cosnan aki; sea intensamente ocupá den nan, pa bo progreso por ser manifestá na tur hende.” (1 Timoteo 4:15) Sí, e progreso cu un cristian ta haci pa alcansá madures ta keda “manifestá,” esta, ta claramente bisto. Madures cristian ta manera un lus cu ta briya: e no ta un cualidad interno of scondí. (Mateo 5:14-16) P’esei, nos ta bai considerá dos manera principal cu nos por manifestá progreso i madures: (1) dor di crece den conocimentu, comprendimentu i sabiduria; (2) dor di manifestá fruta di spiritu.

Unidad den Fe i Conocimentu

5. Con por definí madures?

⁵ Mayoria diccionario ta describí madures como un condicion completamente desaroyá, ser adulto, i e echo cu algu a alcansá un estado final of un cierto norma deseá. Manera nos a bisa caba, un fruta ta maduro, of hechu, ora e completá su ciclo di crecementu normal, i su aparencia, su color, su aroma i su sabor a alcansá loke nos ta considerá deseabel. P’esei, madures ta igual cu excelencia, ser completo, i asta cu perfeccion.—Isaías 18:5; Mateo 5:45-48; Santiago 1:4.

6, 7. (a) Kico ta mustra cu Jehova ta sumamente interesá pa tur su adoradónan progresá na madures spiritual? (b) Kico madures spiritual tin hopi di haber cuné?

⁶ Jehova Dios ta sumamente interesá pa tur su adoradónan progresá na madures spiritual. Cu esei na mente, el a haci percuracionnan maraviyoso den e congregacion cristian. Apostel Pablo a skirbi e cristiannan na Efeso: “El a duna algun como apostel, algun como profeta, algun como evangelisadó, algun como wardadó i maestro, cu un bista riba e reahuste dje santunan, pa trabou ministerial, p’e edificacion dje curpa di e Cristo, te cu nos tur logra alcansá unidad den e fe i den e conocimentu exacto dje Yu di Dios, te na un homber maduro, te n’e midí di estatura cu ta pertenecé n’e plenitud di e Cristo; pa asina nos no ta baby mas, tirá p’aki i p’aya manera dor di olanan i hibá di aki p’aya dor di tur bientu di siñansa pa medio di triki di hende, pa medio di astucia den inventá eror.”—Efesionan 4:11-14.

⁷ Den e versículonan aki, Pablo a splica cu algun dje motibunan pakico Dios a haci tantu percuracion spiritual den e congregacion ta pa tur por “logra alcansá unidad den e fe i den e conocimentu exacto,” bira “un homber maduro” i tin e ‘midí di estatura di Cristo.’ Ta asina so nos por evitá di ser hibá di aki p’aya manera baby spiritual dor di ideanan i  siñansanan falsu. Asina nos ta mira cu tin un relacion estrecho entre progresá na madures cristian, i alcansá “unidad den e fe i den e conocimentu exacto dje Yu di Dios.” Tin vários punto den Pablo su conseho cu ta bon pa nos tuma na pechu.

8. Kico nos mester haci pa nos alcansá “unidad” den fe i den conocimentu exacto?

⁸ Di promé, ya cu nos mester mantené “unidad,” un cristian maduro mester ta den unidad i na armonia completo cu su compañeronan di creencia den loke ta toca fe i conocimentu. E no ta propagá of insistí riba su opinionnan personal, ni e no tin su propio ideanan riba asuntunan relacioná cu comprendimentu di Bijbel. Mas bien, e tin confiansa completo den e berdad manera Jehova Dios a revel’é pa medio di su Yu Jesucristo i “e esclabo fiel i discreto.” Dor di tuma regularmente e alimento spiritual suministrá “n’e debido tempu”—pa medio di publicacionnan cristian, reunionnan, asambleanan i congresonan—nos por tin sigur cu nos ta mantené “unidad” cu otro cristiannan den fe i den conocimentu.—Mateo 24:45.

9. Splica kico e expresion “e fe” ta nificá, manera Pablo a us’é den su carta n’e efesionan.

⁹ Di dos, e expresion “e fe” no ta referí na e conviccion cu cada cristian individual ta profesá, sino na e totalidad di loke nos ta kere aden: su “hanchura i largura i haltura i profundidad.” (Efesionan 3:18; 4:5; Colosensenan 1:23; 2:7) De echo, con un cristian por ta uní cu su compañeronan di creencia si ta un cierto parti di “e fe” so e ta kere aden of aceptá? Esei kier men cu nos no mester keda contentu cu conocé djis e siñansanan básico di Bijbel, of tin djis un idea aríbariba of incompleto dje berdad. Mas bien, nos mester kier probechá di tur loke Jehova ta percurá mediante su organisacion pa yuda nos coba profundo den su Palabra. Nos mester purba adkerí un conocimentu mas exacto i completo posibel di Dios su boluntad i su propósito. Entre otro esei kier men cu nos mester tuma tempu pa lesa i studia Bijbel i publicacionnan basá riba Bijbel, resa pidi Dios pa su yudansa i su guia, asistí na reunionnan cristian regularmente i participá dje manera mas pleno posibel den e trabou di predicá e Reino i haci disipel.—Proverbionan 2:1-5.

10. Kico e palabranan “te cu nos tur logra alcansá,” usá na Efesionan 4:13 ta nificá?

¹⁰ Di tres, Pablo a introducí su descripcion dje meta tripel cu e palabranan “te cu nos tur logra alcansá.” Un buki di referencia bíblico ta splica tocante e expresion “nos tur,” cu su nificacion ta: “No tur unu pa unu, esta, cada un riba su mes, sino tur huntu.” Cu otro palabra, cada un di nos mester haci un esfuerso razonabel pa sigui e meta di madures cristian huntu cu henter e hermandad. The Interpreter’s Bible ta remarcá: “Un individuo no por alcansá logro spiritual completo apart for di otronan, mescos cu un parti di curpa no por desaroyá te na madures a ménos cu henter e curpa ta sigui su crecementu na un manera saludabel.” Pablo a corda e cristiannan efesio cu ta “cu tur e santunan” nan mester a purba capta mentalmente e totalidad dje fe.—Efesionan 3:18a.

11. (a) Kico haci progreso spiritual no ta encerá? (b) Kico nos mester haci pa nos progresá?

¹¹ Pablo su palabranan ta haci cla cu progreso spiritual no kier men djis yena nos mente cu conocimentu i gran siñansa. Un cristian maduro no ta cana impresioná otronan cu con sabí e ta. Mas bien Bijbel ta bisa: “E caminda dje hustunan ta mescos cu e lus briyante cu ta bira mas i mas cla te ora e dia ta firmemente establecí.” (Proverbionan 4:18) Sí, ta “e caminda” ta “bira mas i mas cla,” no e persona. Si constantemente nos keda haci esfuerso pa keda pareu cu e comprendimentu cada bes mas briyante dje Palabra di Dios cu Jehova ta dunando su pueblo, nos lo ta haciendo progreso spiritual. Den e caso aki, keda pareu ta nificá haci progreso, i  esei ta algu cu nos tur por haci.—Salmo 97:11; 119:105.

Manifestá “Fruta di Spiritu”

12. Pakico ta importante pa nos manifestá fruta di spiritu segun cu nos ta traha pa progresá spiritualmente?

¹² Alcansá “unidad den e fe i den e conocimentu exacto” ta importante. Pero mes importante ta tambe pa nos manifestá fruta di Dios su spiritu den tur aspecto di nos bida. Di con? Pasobra, manera nos a mira caba, madures no ta algu di paden ni scondí. E ta ser identificá dor di característicanan claramente bisto cu por beneficiá i edificá otronan. Claro cu ora nos ta traha pa progresá spiritualmente, nos no ta hacié djis pa nos parce refiná den bista di hende. Mas bien, segun cu nos ta crece spiritualmente, siguiendo e guia di Dios su spiritu, un transformacion maraviyoso lo tuma lugá den nos actitud i nos accionnan. Apostel Pablo a bisa: “Sigui cana pa medio di spiritu i boso lo no cumpli cu ningun deseo carnal.”—Galationan 5:16.

13. Ki cambio ta un indicacion bon cla di progreso?

¹³ Despues Pablo a mencioná “e obranan di carni” un pa un; nan ta vários i nan ta “bisto.” Ora un hende no a mira e balor di Dios su rekisitonan ainda, su bida ta ser formá segun e sistema di mundu, i kisas e ta yen di algun dje cosnan cu Pablo a mencioná: “fornicacion, impuresa, conducta inmoral, idolatria, práctica di spiritismo, enemistad, pleitu, yaluzí, atake di rabia, contencion, desunion, secta, envidia, buracheria, paranda, i cosnan semehante.” (Galationan 5:19-21) Pero segun cu e hende haci progreso spiritual, poco-poco e ta logra dominá e “obranan di carni” indeseabel aki, i ta traha lugá pa e “fruta di spiritu.” E cambio externo visibel aki ta un indicacion bon cla di cu e persona ei ta progresando na madures cristian.—Galationan 5:22.

14. Splica e dos expresionnan “e obranan di carni” i “fruta di spiritu.”

¹⁴ Paga tinu riba e dos expresionnan ei, esta “e obranan di carni” i “fruta di spiritu.” “Obra” ta e resultado di loke un hende ta haci, e producto di nos accionnan. Cu otro palabra, e cosnan cu Pablo a mencioná como obra di carni ta resultado di sea un hende su decisionnan expres of dje influencia di carni pecaminoso. (Romanonan 1:24, 28; 7:21-25) Di otro banda, e expresion “fruta di spiritu” ta duna di comprendé cu e cualidadnan mencioná no ta bini djis dor di un hende su esfuerso pa imitá cierto característicanan di Cristo, loke nan a yega di yama “desaroyo di  caracter,” sino dor cu e spiritu di Dios ta operá den dje. Mescos cu un palu ta duna fruta ora e ta bon cuidá, un hende ta manifestá e fruta di spiritu ora spiritu santu ta operá libremente den su bida.—Salmo 1:1-3.

15. Pakico ta importante pa nos duna atencion na tur e aspectonan dje “fruta di spiritu”?

¹⁵ Otro punto pa nos considerá ta e manera cu Pablo ta usa e palabra “fruta” pa acapará tur e cualidadnan deseabel cu el a mencioná. E spiritu no ta producí un variedad di fruta pa nos scoge esun cu nos gusta mas. Tur e cualidadnan cu Pablo a mencioná—amor, goso, pas, gran pacenshi, amabilidad, bondad, fe, suavedad i dominio propio—ta mes importante, i ta huntu nan ta haci e personalidad cristian nobo posibel. (Efesionan 4:24; Colosensenan 3:10) P’esei, maske kisas nos lo nota cu algun dje cualidadnan aki ta mas bisto den nos bida pa motibu di nos propio personalidad i inclinacion, ta importante pa nos duna atencion completo na tur e aspectonan cu Pablo a mencioná. Dor di haci esei nos por reflehá un personalidad manera di Cristo na un manera mas completo den nos bida.—1 Pedro 2:12, 21.

16. Segun cu nos ta busca madures cristian, kico ta nos meta, i con nos por logr’é?

¹⁶ E les importante cu nos por siña di Pablo su consideracion ta cu segun cu nos ta traha pa alcansá madures cristian, nos meta no ta pa adkerí hopi conocimentu ni desaroyá rasgonan refiná di personalidad. Loke nos kier logra ta pa e spiritu di Dios operá libremente den nos bida. Te n’e grado cu nos moda di pensa i nos accionnan ta reaccioná riba e guia di Dios su spiritu, te n’e grado ei nos ta bira spiritualmente maduro. Con nos por logra e meta aki? Nos mester habri nos curason i nos mente pa e influencia di Dios su spiritu. Pa nos logra esei nos mester asistí i participá na reunionnan cristian cu regularidad. Tambe nos mester studia i meditá regularmente riba e Palabra di Dios i permití su principionan guia e manera cu nos ta trata cu otronan i e decisionnan cu nos ta tuma. Si nos haci asina, sin duda nos progreso lo ser manifestá claramente.

Progresá p’e Gloria di Dios

17. Ki relacion tin entre haci progreso i glorificá nos Tata celestial?

¹⁷ Finalmente, manifestá progreso ta trece gloria i alabansa, no na nos, sino na nos Tata celestial Jehova, esun cu ta haci posibel pa nos alcansá madures spiritual. E anochi promé cu nan a mata Jesus, el a bisa su disipelnan: “Mi Tata ta ser glorificá den esaki, cu boso ta sigui carga hopi fruta i duna prueba cu boso ta mi disipelnan.” (Juan 15:8) E disipelnan a duna Jehova gloria, tantu mediante e fruta di spiritu cu nan a manifestá, como mediante e fruta di Reino di nan ministerio.—Echonan 11:4, 18; 13:48.

18. (a) Ki cosecha gososo ta tumando lugá awe? (b) Ki reto e cosecha aki ta trece cuné?

¹⁸ Awe, Jehova su bendicion ta riba su pueblo segun cu nan ta participá den e cosecha spiritual mundial. Ya tin un par di aña caba cu un 300.000 hende nobo ta dedicá nan mes tur aña na Jehova, i simbolisá nan dedicacion cu bautismo bou di awa. Esaki ta haci nos contentu, i sin duda e ta alegrá Jehova su curason tambe. (Proverbionan 27:11) Sin embargo, pa esaki por keda duna Jehova  goso i alabansa, tur e hende nobonan ei mester “sigui cana den union [cu Cristo], cu rais den dje i siendo edificá den dje i siendo stabilisá den e fe.” (Colosensenan 2:6, 7) Esaki ta un reto den dos sentido pa e pueblo di Dios. Di un banda, si bo ta recien bautisá, lo bo aceptá e reto di haci esfuerso pa “bo progreso por ser manifestá na tur hende”? Di otro banda, si bo tin cierto tempu den e berdad, lo bo aceptá e reto di yuda carga e responsabilidad di cuida e bienestar spiritual di esnan nobo? Den tur dos caso, ta bisto cu nos mester avansá na madures.—Filipensenan 3:16; Hebreonan 6:1.

19. Ki privilegio i bendicionnan bo por ricibí dor di manifestá bo progreso?

¹⁹ Tin bendicionnan maraviyoso pa tur esnan cu traha duru pa manifestá nan progreso. Corda e palabranan animante cu Pablo a expresá despues cu el a urgi Timoteo p’e haci progreso: “Presta atencion constante na bo mes i na bo siñamentu. Persistí den e cosnan aki, pasobra haciendo esaki lo bo salba tantu bo mes como esnan cu ta scucha bo.” (1 Timoteo 4:16) Dor di manifestá bo progreso diligentemente, abo tambe por participá den e privilegio di glorificá e nomber di Dios i gosa di su bendicionnan.

Bo Ta Corda?

• Den ki maneranan nos por manifestá madures spiritual?

• Ki clase di conocimentu i comprendimentu ta reflehá madures?

• Con manifestacion di “fruta di spiritu” ta indicá progreso spiritual?

• Ki reto nos mester aceptá segun cu nos ta avansá na madures?

[Preguntanan di Estudio]

[Plachi na página 13]

Ta claramente bisto ora algu ta hechu, maduro

[Plachi na página 15]

Nos ta progresá spiritualmente dor di keda pareu cu e berdad revelá

[Plachi na página 17]

Oracion ta yuda nos manifestá “fruta di spiritu”