Historia di Bida

Lus Spiritual Ta Briya na Medio Oriente

SEGUN E RELATO DI NAJIB SALEM

Den e promé siglo E.C., e lus di e Palabra di Dios a briya desde Medio Oriente i a alcansá e partinan mas leu di tera. Durante siglo 20 e lus ei a bolbe iluminá e parti di mundu ei. Laga mi conta bo con esei a sosodé.

MI A nace na 1913 den e pueblo Amioun, den nort di Líbanon. Esei tabata e último aña cu a existí un stabilidad i trankilidad relativo na mundu, pasobra e siguiente aña Promé Guera Mundial a cuminsá. Ora e guera a terminá na 1918, Líbanon, cu e tempu ei tabata conocí como e perla di Medio Oriente, a keda completamente ruiná tantu económicamente como políticamente.

Na 1920 ora e servicionan postal a cuminsá funcioná atrobe na Líbanon, hende a cuminsá ricibí post for di libanesnan cu tabata biba den estranheria. Entre nan tabatin mi tionan Abdullah i George Ghantous. Nan a skirbi nan tata, esta mi welo Habib Ghantous, i a cont’é tocante e Reino di Dios. (Mateo 24:14) E solo echo cu mi welo a conta su co-ciudadanonan loke su yunan a skirbié a pone cu nan a tene mofa di dje. E ciudadanonan a plama e rumor cu e yunan di Habib tabata animá nan tata pa bende su tera, cumpra un buricu i bai predicá.

E Promé Rayonan di Lus

E siguiente aña, 1921, Michel Aboud, kende tabata biba na Brooklyn, New York, Merca, a regresá Trípoli, Líbanon. El a bira un Studiante di Bijbel, manera nan tabata yama  Testigonan di Jehova e tempu ei. Maske mayoria di ruman Aboud su amigu i famianan no a reaccioná n’e mensahe di Bijbel, dos persona bon conocí sí a hacié. Nan tabata un profesor, Ibrahim Atiyeh, i un dentista, Hanna Shammas. De echo, dr. Shammas a pone su cas i clínica disponibel pa tene reunionnan cristian.

Tempu cu ruman Aboud i ruman Shammas a bishitá Amioun, e lugá caminda nos tabata biba, mi tabata un hobencito ainda. Nan bishita tabatin un efecto profundo riba mi, i mi a cuminsá compañá ruman Aboud den e trabou di predicá. Pa 40 aña nos dos a traha cu regularidad huntu den e ministerio te na ruman Aboud su morto na 1963.

Entre 1922 i 1925, e lus dje berdad di Bijbel a plama tur caminda den hopi pueblo den nort di Líbanon. Rond di 20 pa 30 hende tabata reuní huntu den casnan privá—manera esun di nos na Amioun—pa studia Bijbel. Dor cu pastornan tabata manda mucha bin bati riba bleki i grita pa stroba nos reunionnan, tin bes nos tabata reuní den e mondi di pino.

Tempu mi tabata hóben, dor di mi celo p’e ministerio i tambe p’e echo cu mi tabata asistí na tur reunion cristian, mi a bin haña e bijnaam Timoteo. E cabes di scol a ordená mi pa stop di asistí na loke el a yama “e reunionnan ei.” Ora mi a nenga, el a kita mi for di scol.

Dunando Testimonio den Teranan di Bijbel

Djis despues di mi bautismo na 1933, mi a cuminsá den e sirbishi di pionero, manera Testigonan di Jehova ta yama e ministerio di tempu completo. Maske nos tabata tiki hende e tempu ei, no ta solamente den e mayoria pueblo den e parti nort di Líbanon nos a predicá, sino tambe na Beirut i su suburbionan i te den zuid di Líbanon. Durante e promé añanan ei, por lo general nos tabata biaha na pia of riba buricu mescos cu Jesucristo i su siguidónan di promé siglo tabata biaha.

Na 1936, Yousef Rahhal, un Testigo libanes cu tabatin hopi aña ta biba na Merca, a bin di bishita na Líbanon. El bin cu ekipo di zonido i un par di tocadisco. Nos a arma e ekipo riba un auto Ford di 1931 i a biaha den henter Líbanon i Siria, predicando e mensahe di Reino den e áreanan remoto. Bo por a tende e amplifier na un distancia di mas cu 10 kilometer. Hendenan tabata subi riba dak di nan cas pa tende loke nan a yama bos for di shelu. Esnan cu tabata den cunucu a laga nan trabou i a bini mas acerca pa scucha.

Un di mi último biahenan cu mi a haci cu Yousef Rahhal tabata pa Aleppo, Siria, den e winter di 1937. Promé cu el a regresá Merca, nos a bai Palestina tambe. Einan nos a bishitá e stadnan Haifa i Jerusalem i tambe pueblonan den e pais. Un di e personanan cu nos tabatin contacto cuné tabata Ibrahim Shehadi, cu kende mi a cera conocí mas promé via carta. Ibrahim a progresá den su conocimentu di Bijbel te n’e punto cu, durante nos bishita, el a cuminsá participá huntu cu nos den e ministerio di cas pa cas.—Echonan 20:20.

Tambe mi tabata ansioso pa topa cu profesor Khalil Kobrossi, un católico ferviente cu a studia Bijbel cu Testigonan di Jehova via corespondencia. Con bin el a haña e adres di e Testigonan na Líbanon? Wel, doño di un tienda na Haifa a lora Khalil su comestibelnan den papel cu el a ranca for di un publicacion di Testigonan di Jehova. Riba e papel ei tabatin nos adres. Nos a disfrutá dje bishita, i despues na 1939, el a bini Trípoli pa bautisá.

 Na 1937, Petros Lagakos i su casá a yega Trípoli. Durante e siguiente par di añanan, nos tres a cubri mayoria parti di Líbanon i Siria, bishitando hende na nan cas cu e mensahe di Reino. P’e tempu cu ruman Lagakos a muri na 1943, e Testigonan a hiba e lus spiritual na mayoria stad i pueblo di Líbanon, Siria i Palestina. Tabatin biaha cu nos 30 tabata sali cu auto of bus for di 3:00 a.m. pa por alcansá áreanan remoto.

Den e añanan ’40, Ibrahim Atiyeh tabata traducí E Toren di Vigilancia na arabir. Despues mi tabata traha cuater copia na man i manda nan p’e Testigonan na Palestina, Siria i Egipto. Durante e temporada di Segundo Guera Mundial, tabatin hopi oposicion contra nos trabou di predicá, pero nos a keda den contacto cu tur e stimadónan di e berdad di Bijbel den Medio Oriente. Ami personalmente a traha mapa di e stad i pueblonan den cercania i nos a planea pa bishitá nan cu e bon nobo.

Na 1944 miéntras Segundo Guera Mundial tabata andando ainda, mi a casa cu Evelyn, yu muher di mi compañero pionero, Michel Aboud. Cu tempu nos tabatin tres yu, un muher i dos homber.

Trahando Huntu cu e Misioneronan

Poco despues cu e guera a terminá, e promé graduadonan dje Scol di Galad pa misionero a yega Líbanon. Resultado di esei tabata cu e promé congregacion na Líbanon a ser formá, i mi a ser nombrá como sirbidó di compania. Anto na 1947, Nathan H. Knorr i su secretario, Milton G. Henschel a bishitá Líbanon i a animá e rumannan mashá. Djis despues, mas misionero a bini i nan tabata un gran yudansa pa nos den organisá nos ministerio i den conducí reunionnan di congregacion.

Durante un di nos biahenan pa un área remoto na Siria, nos a topa cu oposicion dje obispu local. El a acusá nos di ta distribuí loke el a yama publicacionnan zionista. Esei tabata un ironia ya cu promé cu 1948, hopi bes clero tabata yama nos “comunista.” N’e ocasion aki nos a ser arestá i interogá pa dos ora largu, durante cua nos a duna un excelente testimonio.

 Na final, e hues cu a scucha e caso a declará: “Aunke mi ta maldicioná e barba [un expresion pa referí na obispu] cu a haci e acusacionnan aki contra boso, mi tin cu gradicié pasobra el a duna mi e oportunidad aki pa conocé boso i haña sa di boso siñansanan.” Despues el a pidi despensa pa e incumbiniencia cu nan a causa nos.

Den un bus riba caminda pa bai Beirut dies aña despues, mi a cuminsá papia cu un homber, un ingeniero di agricultura, cu tabata sintá banda di mi. Despues cu el a scucha nos creencianan pa un par di minuut, el a bisa cu un amigu na Siria tambe a yega di papia dje cosnan ei cuné. Ken tabata e amigu ei? E hues cu a scucha nos caso dies aña promé!

Durante añanan ’50 di siglo 20, mi a bishitá e Testigonan na Irak i a bai cu nan den e ministerio di cas pa cas. Tambe mi a biaha bai Jordan i n’e área di Palestina west di riu Jordan vários bes. Na 1951, mi a forma parti dje grupo di cuater Testigo cu a bai Betlehem. Nos a celebrá e Cena di Señor einan. Na principio di e dia ei, tur esnan presente p’e ocasion ei a bai riu Jordan cu bus, caminda 22 persona a simbolisá nan dedicacion na Jehova. Ki ora cu nos a haña oposicion den e área ei, nos tabata bisa: “Nos a bin bisa bo cu un di boso mes yunan nativo lo bira Rey riba henter e tera! Di con bo ta rabiá? Bo mester ta contentu!”

Predicando Meimei di Dificultad

Por lo general, hende di Medio Oriente tin bon curason, nan ta humilde i hospitalario. Hopi di nan ta scucha e mensahe tocante e Reino di Dios cu interes. Realmente, no por tin nada mas refrescante cu sa cu pronto e promesa aki di Bijbel lo cumpli: “Dios mes lo ta cu [su pueblo]. I lo e seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas.”—Revelacion 21:3, 4.

 Mi a descubrí cu mayoria hende cu ta contra nos actividad realmente no ta comprendé nos trabou ni e mensahe cu nos ta hiba na hende. No ta poco cos e miembronan di clero di cristiandad a haci pa malrepresentá nos! P’esei, durante e guera civil cu a cuminsá na Líbanon na 1975 i cu a dura mas cu 15 aña, e Testigonan a haña nan cu hopi problema.

Un tempu mi tabata studia Bijbel cu un famia cu tabata baidó di misa fanático. E echo cu nan a progresá den siña berdadnan di Bijbel a iritá miembronan di clero. Como resultado, un anochi un grupo religioso local a instigá su miembronan pa asaltá e tienda dje famia aki, i nan a kima mercancia na balor di por lo ménos 18.000 florin. E mésun anochi ei, nan a bini i secuestrá mi. Sin embargo, mi por a razoná cu nan lider i splik’é cu si di berdad nan tabata cristian, nan lo no a comportá nan di un manera salbahe asina. Mesora el a manda nan para e auto i a duna mi ordu pa baha.

Na un otro ocasion cuater militar a secuestrá mi. Di ripiente, despues di hopi menasa, nan lider cu a menasá di tira mi a cambia di idea i mi a haña mi libertad. Awor dos di e hombernan aki ta den prizon pa asesinato i ladronicia, i e dos otronan a ser ehecutá.

Mas Oportunidad pa Duna Testimonio

Hopi bes mi tabatin oportunidad pa bula di un pais pa otro. Un biaha durante un vuelo di Beirut pa Merca, mi a sinta banda di Charles Malek, un ex-minister libanes di asuntunan exterior. El a scucha cu atencion i a gusta tur versículo cu mi a lesa p’e for di Bijbel. Na final el a bisa mi cu el a bai scol na Trípoli, caminda su meneer di scol tabata Ibrahim Atiyeh, un homber cu mi suegro a introducí n’e berdad di Bijbel! Señor Malek a bisa cu Ibrahim a siñ’é respetá Bijbel.

Durante un otro vuelo, mi a sinta banda di un representante palestino di Nacionnan Uní. Mi tabatin oportunidad di cont’é tocante e Reino di Dios. Cu tempu, el a introducí mi na famia di su ruman homber na New York, i hopi bes mi a bishitá nan einan. Tambe mi tabatin un famia cu tabata traha den e edificio di Nacionnan Uní na New York. Un dia cu mi a bishit’é na su oficina, mi a keda tres ora durante cua mi por a dun’é testimonio en cuanto e Reino di Dios.

Actualmente mi tin 88 aña, i ainda mi ta capas pa cumpli activamente cu responsabilidadnan di congregacion. Mi casá Evelyn, ainda ta sirbi Jehova huntu cu mi. Nos yu muher a casa cu un superintendente biahero di Testigonan di Jehova cu awor ta sirbi como anciano den un congregacion na Beirut. Nan yu muher tambe ta Testigo. Nos yu homber mas chikitu i su casá ta Testigo i nan yu muher tambe ta den e berdad. Pa loke ta nos yu homber mayó, e fe cristian a ser inculcá den su curason, i mi ta spera cu tardi of trempan lo e acept’é.

Na 1933, mi a ser nombrá como pionero, esun di promé na Medio Oriente. Mi no por a scoge un mihó manera pa hiba mi bida cu sirbi Jehova como pionero durante tur e último 68 añanan aki. I mi ta decididu pa sigui cana den e lus spiritual cu e ta percurá.

[Plachi na página 23]

Najib na 1935

[Plachi na página 24]

Cu un auto cu ekipo di zonido den e cerunan di Líbanon, 1940

[Plachinan na página 25]

Cuminsando ariba, direccion di oloshi: Najib, Evelyn, nan yu muher, ruman Aboud i Najib su yu homber mayó, 1952

Abou (promé rei): Rumannan Shammas, Knorr, Aboud i Henschel na cas di Najib, Trípoli, 1952

[Plachi na página 26]

Najib cu su casá, Evelyn