Cana den ‘e Caminda di Rectitud’

PROFETA Isaías a declará: “Lo bai bon cu e hustu, pasobra nan lo come e fruta di nan mes trato.” Tambe Isaías a bisa: “E caminda dje hustu ta rectitud.” (Isaías 3:10; 26:7) Ta claro cu si nos kier pa nos tratonan producí bon fruta, nos tin cu haci loke ta hustu den bista di Dios.

Pero con nos por cana den caminda di rectitud? Ki bendicionnan nos por spera ora nos haci esei? I con otronan lo por beneficiá dje echo cu nos ta armonisá nos bida n’e normanan hustu di Dios? Den capítulo 10 dje buki bíblico di Proverbionan, rey Sálomon di Israel antiguo ta duna contesta riba e preguntanan aki den e contrastenan cu e ta haci entre e hustu cu e malbado. Ora e ta haci esaki, e ta usa e expresion “e hustu[nan]” 13 bes. Nuebe di esakinan ta den e versículonan 15 pa 32. P’esei anto, un consideracion di Proverbionan 10:15-32 lo ta un animacion. *

Tene Duru na Disiplina

Sálomon ta señalá na e importancia di husticia. E ta bisa: “E cosnan balioso di e ricu ta su stad fuerte. E ruina di esnan di condicion humilde ta nan pobresa. E actividad di e hustu ta resultá den bida; e producto di e malbado ta resultá den picá.”—Proverbionan 10:15, 16.

Rikesa por sirbi como un proteccion contra cierto insiguridadnan den bida, mescos cu un stad fortificá ta duna un grado di siguridad na esnan cu ta biba den dje. I pobresa por ta desastroso ora desaroyonan inesperá surgi. (Eclesiástes 7:12) Pero kisas e rey tabata dunando un indicacion tambe di un peliger cu tantu rikesa como pobresa por trece cuné. Un persona ricu kisas tin e inclinacion di pone tur su confiansa den su rikesa, pensando cu su cosnan balioso ta “manera un muraya protector.”  (Proverbionan 18:11) I un persona pober por tin e punto di bista robes cu debí cu e ta pober, e no tin futuro. Asina tur dos ta keda sin traha un bon nomber cerca Dios.

Di otro banda, sea cu un persona hustu tin hopi of poco cos material, su actividad recto ta hiba na bida. Con asina? Wel, e ta contentu cu loke e tin. E no ta permití su situacion financiero interferí den su bon relacion cu Dios. Sea cu un persona hustu ta ricu of pober, e manera cu e ta hiba su bida ta dun’é felicidad awor i speransa pa bida eterno den futuro. (Job 42:10-13) E malbado no ta saca beneficio ni maske e bira ricu. En bes di apreciá e balor protectivo di rikesa i biba di acuerdo cu e boluntad di Dios, e ta usa su rikesa pa promové un bida di picá.

“Esun cu ta pega na disiplina ta un caminda cu ta hiba na bida,” e rey di Israel ta continuá, “pero esun cu ta bandoná reprendementu ta causa dualmentu.” (Proverbionan 10:17) Un erudito di Bijbel ta sugerí cu por comprendé e versículo aki den dos manera. Un posibilidad ta cu e persona cu ta someté su mes na disiplina i ta sigui tras di husticia ta riba e caminda di bida, miéntras cu esun cu ta bandoná disiplina ta desviá for di e caminda ei. Tambe e versículo por duna di conocé cu “esun cu ta haci caso di disiplina ta mustra e caminda di bida [na otro hende pasobra su bon ehempel ta beneficiá nan], pero ken cu ta ignorá coreccion ta pone otro hende dual.” (Proverbionan 10:17, New International Version) Den tur dos caso, ta hopi importante pa nos tene duru na disiplina i no bandoná reprendementu!

Remplasá Odio cu Amor

Siguientemente, Sálomon ta presentá un proverbio dòbel cu ta transmití e mésun idea, di cua e segundo parti ta reforsá esun promé. E ta bisa: “Caminda tin un persona ta tapa odio tin lipnan di falsedad.” Ora un persona tin odio den su curason contra un otro persona i e ta sconde esaki tras di palabra dushi of labiamentu, e ta desonesto i e tin ‘lip di falsedad.’ Na esaki e rey sabí ta agregá: “Esun cu ta presentá un mal informe ta bobo.” (Proverbionan 10:18) En bes di sconde nan odio, algun hende ta haci acusacion falsu of ta cana difamá e persona cu nan ta odia. Esaki ta un bobedad pasobra un calumnia realmente no ta cambia loke e persona ei ta. I e perspicacia di esun cu ta scucha lo permitié dicerní e malicia i lo e perde respet p’e calumniadó. Pues esun cu ta plama un mal informe ta haci daño na su mes.

E proceder hustu ta pa no usa engaño ni calumnia. Dios a bisa e israelitanan: “Bo no mag odia bo ruman den bo curason.” (Levítico 19:17) I Jesus a consehá su oyentenan: “Sigui stima [asta] boso enemigunan i haci oracion pa esnan cu ta persiguí boso; pa boso demostrá di ser yunan di boso Tata cu ta den shelu.” (Mateo 5:44, 45) Ta cuantu mas mihó pa yena nos curason cu amor en bes di odio!

‘Frena Bo Lipnan’

Enfatisando e necesidad pa controlá e lenga, e rey sabi ta declará: “Den e abundancia di palabra no ta laga di tin delitu, pero esun cu ta frena su lipnan ta actua discretamente.”—Proverbionan 10:19.

“Esun bobo ta papia hopi palabra.” (Eclesiástes 10:14) Su boca “ta brota cu bobedad.” (Proverbionan 15:2) Esaki no kier men cu tur hende cu ta papia hopi ta bobo. Pero ta masha fácil pa un persona cu ta papia demasiado bira un medio pa plama redu perhudicial of rumor! Hopi bes por atribuí un reputacion dañá, sintimentunan heridá, relacionnan tenso i asta daño físico na papiamentu insensato. “Caminda tin abundancia di palabra, lo no laga di tin picá.” (Proverbionan 10:19, An American Translation) Ademas, ta un fastidia pa ta den presencia di un persona cu semper tin algu di bisa riba tur asuntu. Laga nos no papia demasiado.

 Esun cu ta frena su lipnan ta haci mas cu djis evitá falsedad. E ta actua discretamente tambe. E ta pensa promé cu e papia. Motivá dor di amor pa Jehova su camindanan i un deseo sincero pa yuda su próhimo, e ta tene cuenta cu e efecto cu su palabranan tin riba otro hende. Su expresionnan ta amoroso i bondadoso. E ta meditá riba con pa haci loke e ta bisa atractivo i práctico. Su palabranan ta manera “apel di oro den obra grabá di plata,” esta, palabranan cu tacto i cu ta dignificá tur ora.—Proverbionan 25:11.

“Sigui Alimentá Hopi Hende”

Sálomon ta sigui bisa: “Lenga di e hustu ta plata di calidad haltu; curason di e malbado ta di poco balor.” (Proverbionan 10:20) Loke e hustu bisa ta puru, mescos cu plata di calidad haltu, refiná, liber di impuresa. Esaki sigur ta e caso cu sirbidónan di Jehova pasobra nan ta duna otro hende e conocimentu salbador di bida dje Palabra di Dios. Nan Magnífico Instructor, Jehova Dios, a educá nan i ‘a duna nan e lenga di esnan siñá, pa nan por sa con pa contestá esun cansá cu un palabra.’ (Isaías 30:20; 50:4) Sí, nan lenga ta manera plata di calidad haltu ora e ta expresá e berdad di Bijbel. Pa hende sincero di curason, nan palabranan ta di un balor incalculabel na comparacion cu e intencionnan di e malbado! Laga nos ta ansioso pa papia tocante e Reino di Dios i e obranan maraviyoso di Dios.

Un persona hustu ta un bendicion pa esnan rond di dje. Sálomon ta sigui: “Lipnan di e hustu ta sigui alimentá hopi hende, pero pa falta di curason e bobonan ta sigui muri.”—Proverbionan 10:21.

Den ki manera “e hustu ta sigui alimentá hopi hende”? E palabra hebreo cu ta ser usá aki ta transmití e idea di “pastoreá.” (Proverbionan 10:21, nota na pia di página) E ta carga e idea di guia i tambe alimentá manera un wardadó di carné den antigwedad tabata cuida su carnénan. (1 Samuel 16:11; Salmo 23:1-3; Cantica di Sálomon 1:7) E persona hustu ta guia otronan na e caminda di husticia, su abla ta animá su oyentenan. Como resultado, nan ta hiba un bida mas felis i mas satisfaciente, i por ricibí asta bida eterno.

Pero kico di e persona bobo? Dor cu e falta curason, e ta mustra un falta di bon motivacion of interes den e consecuencianan di su curso di bida. Un persona asina ta haci loke e kier, sin tene cuenta cu e resultadonan. P’esei, e ta sufri e pena di su actonan. Miéntras e hustu ta yuda mantené otro hende na bida, e persona cu falta curason no por tene ni su mes na bida.

Evitá Libertinahe

Hopi bes loke un persona ta gusta of laga di gusta ta revelá su personalidad. E rey di Israel ta declará esaki dor di bisa: “Pa e estúpido, ocupá su mes cu libertinahe ta manera un wega, pero sabiduria ta pa e homber di dicernimentu.”—Proverbionan 10:23.

Algun hende ta considerá libertinahe como un wega, of un deporte, i nan ta participá den dje djis pa “pret.” Hende asina ta ignorá Dios como esun na ken tur hende mester rindi cuenta, i nan no ta mira cu e curso di bida cu nan ta hibando ta malu. (Romanonan 14:12) Nan razonamentu ta bira asina  trocí cu nan ta asumí cu Dios no ta mira nan maldad. Bon mirá, cu nan echonan nan ta bisa: “No tin Jehova.” (Salmo 14:1-3; Isaías 29:15, 16) Esta un bobedad!

Di otro banda, hende cu dicernimentu ta realisá cu libertinahe no ta un wega. E sa cu esei ta desagradá Dios i cu e por destruí un persona su relacion cu Dios. Un conducta asina ta bobedad pasobra e ta horta hende di respet propio, e ta ruiná matrimonio, e ta haci daño na mente i curpa i ta hiba na pérdida di spiritualidad. Ta sabí pa nos evitá libertinahe i cultivá cariño pa sabiduria manera pa un ruman muher stimá.—Proverbionan 7:4.

Edificá Riba e Fundeshi Corecto

Señalando n’e balor di edificá nos bida riba un fundeshi adecuá, Sálomon ta declará: “Loke ta spantoso p’e malbado—esei ta loke lo bini riba dje; pero e deseo di e hustunan lo ser otorgá. Mescos cu ora bientu di tempestad pasa, asina e malbado no t’ei mas; pero e hustu ta un fundeshi pa tempu indefiní.”—Proverbionan 10:24, 25.

Un hende malbado por pone otro hende spanta mashá. Sin embargo, al final, e spantu cu e ta hinca den otro hende lo bini riba dje mes. Dor cu e no tin un fundeshi riba principionan hustu, e ta manera un edificio instabil cu ta basha den otro durante un tormenta fuerte. E ta sucumbí bou di preshon. Di otro banda, e hustu ta manera un homber cu ta actua na armonia cu e dichonan di Jesus. E ta “un homber discreto, cu a traha su cas riba baranca.” “I,” segun Jesus, “awaceru a cai duru i tabatin inundacion i bientu a supla i a suta contra e cas ei, pero e no a basha den otro, pasobra e tabata fundá riba baranca.” (Mateo 7:24, 25) E persona ei ta stabil—su pensamentu i accionnan ta sólidamente fundá riba principionan divino.

Promé cu e sigui mas aleu cu e contraste entre e malbado i e hustu, e rey sabí ta presentá un spiertamentu breve pero importante. E ta bisa: “Manera binager pa djente i manera huma pa wowo, asina un persona floho ta pa esnan cu ta mand’é.” (Proverbionan 10:26) Binager ta algu cu ta molestiá djente. E ácido asético cu e ta contené ta producí un smak zuur den boca i por pone hende su djente bira hopi sensibel. Huma ta pone wowo pica. P’esei anto, ken cu tin un persona floho den servicio of ta us’é como su representante, por ta sigur cu hende lo papia riba dje i cu lo e sufri pérdida financiero.

“E Caminda di Jehova Ta un Lugá Fortificá”

E rey di Israel ta sigui: “E temor di Jehova lo agregá dianan, pero e añanan di e malbado lo ser hací corticu. E expectativa dje hustunan ta un alegria, pero e speransa dje malbadonan lo perecé.”—Proverbionan 10:27, 28.

E hustu ta ser guiá dor di temor di Dios i e ta purba agradá Jehova cu su pensamentu, palabra i echonan. Dios ta percurá p’e i ta cumpli cu su expectativanan hustu. Sin embargo, e malbado ta hiba un bida di maldad. Tin bes por parce cu su speransanan ta cumpli, pero asina mes lo ta solamente temporal, pasobra hopi bes su dianan ta ser cortá dor di violencia of un malesa cu su estilo di bida ta trece cuné. Dia e muri tur su speransanan ta cai na awa.—Proverbionan 11:7.

Segun Sálomon: “E caminda di Jehova ta un lugá fortificá pa hende sin culpa, pero ruina  ta pa e practicantenan di loke ta perhudicial.” (Proverbionan 10:29) Akinan, e caminda di Jehova no ta referí n’e caminda di bida riba cua nos mester cana, sino na e manera cu Dios ta trata cu humanidad. Moises a bisa: “E Baranca, perfecto ta su actividad, pasobra tur su camindanan ta husticia.” (Deuteronomio 32:4) Dios su camindanan hustu ta nificá siguridad p’e hustu i ruina pa e malbado.

Jehova di berdad ta resultá di ta un lugá fortificá pa su pueblo! “Pa loke ta e hustu, pa tempu indefiní lo no pon’é tambaleá; pero pa loke ta e malbadonan, nan lo no sigui biba riba tera. Boca di e hustu, esei ta duna fruta di sabiduria, pero lenga di perversidad lo ser cortá afó. E lipnan di e hustu, esakinan ta siña conocé bon boluntad, pero boca di e malbadonan ta perversidad.”—Proverbionan 10:30-32.

E hustu sigur tin éxito i e ta ser bendicioná dor cu e ta cana den e caminda di rectitud. Sí, “e bendicion di Jehova—esei ta loke ta haci ricu, i e no ta agregá ningun dolor na dje.” (Proverbionan 10:22) P’esei anto, laga nos semper haci sigur cu nos ta actua na armonia cu principionan divino. Tambe, laga nos sigui frena nos lip i usa nos lenga pa alimentá otro hende cu e berdad di Dios su Palabra salbador di bida i guia nan n’e caminda di husticia.

[Nota]

[Plachi na página 26]

Lenga por ta manera “plata di calidad haltu”