Bo Por Drecha Mundu?

TOKA NA

Bo Por Drecha Mundu?

“Política ta incapas pa drecha e structura di sociedad. E no ta poseé e hermentnan pa reconstruí e creencianan moral tradicional. E mihó estrategianan no por recuperá e balornan di ántes relacioná cu enamoracion of matrimonio, ni haci tatanan responsabel pa nan yunan, restorá e sintimentu di indignacion of bergwensa cu hende tabatin un tempu . . . Ley no por eradicá mayoria dje problemanan moral cu ta molestiá nos.”

ABO ta incliná na bai di acuerdo cu e palabranan ei di un ex-funcionario di gobiernu mericano? Si ta asina, kico ta e solucion p’e hopi problemanan djawe cu ta originá di golosidad, falta di cariño natural den famia, normanan moral abou, ignorancia i otro factornan destructivo cu poco-poco ta caba cu e structura di sociedad? Algun hende ta haña cu no tin solucion, i p’esei nan ta djis dal bai den bida i purba saca lo mihó. Otronan ta spera cu un dia un lider carismático i sobresaliente, tal bes asta un lider religioso, lo presentá i guia nan den e direccion corecto.

De echo, dos mil aña pasá, hende kier a haci Jesucristo nan rey pasobra nan a mira cu ta Dios a mand’é i cu lo e por a bira un gobernante masha capas. No obstante, ora Jesus a ripará kico tabata nan intencion, el a bai mesora for di einan. (Juan 6:14, 15) “Mi reino no ta parti dje mundu aki,” el a splica un gobernadó romano mas despues. (Juan 18:36) Sin embargo, awendia ta masha poco hende ta tuma e posicion cu Jesus a tuma—ni sikiera e lidernan religioso cu ta pretendé di ta su siguidónan. Algun di esakinan a purba drecha e mundu aki, sea dor di trata na influenciá gobernantenan seglar of dor di nan mes ocupá cargonan político. Nos por mira esaki dor di analisá e sucesonan di década 60 i 70 di siglo 20.

Intentonan Religioso pa Drecha Mundu

Na cabamentu di década 60, cierto teólogonan den paisnan latinoamericano a cuminsá lucha na fabor di hende pober i oprimí. Pa logra esaki, nan a desaroyá un teologia di liberacion, den cua Cristo no tabatin e papel mas di un salbador den e sentido bíblico so, sino tambe den un sentido político i económico. Na Merca, un cantidad di lider di iglesia cu a bira profundamente preocupá tocante debilitacion di balornan moral a forma un organisacion yamá e Mayoria Moral. Su obhetivo tabata pa haña den funcionnan político hende cu lo a crea leynan na fabor di balornan saludabel di famia. Di igual manera, den hopi pais moslim, gruponan a purba frena corupcion i exceso dor di stimulá hende pa tene nan mas na loke Koran ta bisa.

Abo ta kere cu e esfuersonan ei a drecha mundu? Echo ta mustra cu por lo general, balornan moral ta sigui bai atras i e brecha entre ricu i pober ta sigui hancha, incluso den e paisnan caminda e teologia di liberacion a bira mas conocí.

Pa motibu cu na Merca e organisacion di Mayoria Moral a faya den su obhetivonan principal, su fundadó, Jerry Falwell, a disolv’é na 1989. Otro organisacionnan a tuma su lugá. No obstante, Paul Weyrich, inventor dje expresion “mayoria moral,” a skirbi den e revista Christianity Today: “Asta ora nos gana den política, nos victorianan no ta traducí nan mes den e clase di política cu nos ta kere ta importante.” Tambe el a skirbi: “E cultura ta degenerando mas i mas. Nos ta den gara di un derumbe cultural di proporcionnan histórico asina grandi cu e ta simplemente aplastá política.”

E columnista i autor Cal Thomas a revelá loke el a mira como un defecto fundamental den purba elevá comunidad pa medio di política: “Cambio real ta bini cu cambio di curason, no dor di gana eleccion, pasobra nos problemanan primario no ta económico ni político sino moral i spiritual.”

Pero con bo ta resolvé e problemanan moral i spiritual den un mundu caminda no tin normanan definí, caminda hende ta dicidí pa nan mes loke ta bon i loke ta malu? Si hende influyente i di bon intencion—sea religioso of no—no por ègt drecha e mundu aki, ken sí por? Manera nos lo mira den e siguiente artículo, tin un contesta. De echo, e contesta ta sinta hustamente den e motibu pakico Jesus a bisa cu su Reino no tabata dje mundu aki.

[Rekonosementu pa Potrèt na página 2]

[Rekonosementu pa Potrèt na página 3]

E TOREN DI VIGILANSIA (EDISHON DI ESTUDIO)