Destructornan di Palu

DEN tempu bíblico hende a considerá palu como algu di balor. Por ehempel, ora Abraham a cumpra un tereno pa dera su kerida casá Sara, e contract pa traspaso di e propiedad a haci mencion di e palunan.—Génesis 23:15-18.

Awe tambe hende ta considerá palu como algu di hopi balor, i internacionalmente hende ta enfocá hopi atencion riba conserbacion di selvanan. E buki State of the World 1998 ta bisa: “Aunke hopi hende den paisnan cu clima moderá ta preocupá p’e selvanan tropical, kisas nan no ta conciente cu e selvanan di clima moderá den nan mes pais ta mas plamá i menasá pa influencianan dañino.” Kico ta formando peliger p’e selvanan di e paisnan den e zona di clima moderá aki, esta, Europa i Nort América? Hopi hende ta señalá na rosamentu di mondi. Pero tin otro factornan cu poco-poco pero sigur ta destruí palu, na moda di papia, blachi pa blachi of taki pa taki. Kico nan ta? Polucion di aire i yobida ácido. E tiponan di polucion aki por debilitá e palunan lentamente i haci nan vulnerabel pa pest i malesa.

Pa décadanan, defensornan di medio ambiente i otro ciudadanonan preocupá a advertí cu ta necesario pa protehá e sistema ecológico di tera. Den añanan ’80 di siglo 20 despues cu científiconan na Alemania a studia e efectonan cu polucion di aire i yobida ácido tin riba e medio ambiente, nan a concluí: ‘Si no haci nada, rond di aña 2000, ta riba potret of pantaya di cine so hende lo por admirá selvanan.’ Felismente, e capacidad di tera pa restorá su mes ta di tal forma cu te asina leu e por a resistí hopi dje daño cu a ser predicí.

Sin embargo, riba término largu, Dios ta esun cu mas lo intervení pa conserbá nos sistema ecológico. “For di su kambernan ariba e ta muha e cerunan” i “ta haci yerba berde nace pa bestia i berdura p’e sirbishi di humanidad.” I el a primintí di “causa ruina di esnan cu ta ruinando tera.” (Salmo 104:13, 14; Revelacion 11:18) Lo ta ki un tempu maraviyoso ora e habitantenan di tera lo por disfrutá di un mundu liber di polucion pa semper!—Salmo 37:9-11.