“Siña di Mi”
“Siña di Mi”
“Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma.”—MATEO 11:29.
1. Di con siña di Jesus por ta algu placentero i enrikesedor?
JESUCRISTO semper a pensa, siña i actua corectamente. Maske su tempu riba tera tabata corticu, e tabatin un carera recompensador i satisfaciente, i el a keda felis. El a haci hende disipel i a siña nan con pa adorá Dios, stima hende i vence mundu. (Juan 16:33) El a yena nan curason cu speransa i “a tira lus riba bida i incorupcion pa medio dje bon nobo.” (2 Timoteo 1:10) Si bo ta considerá bo mes un di su disipelnan, kico segun bo kier men ser un disipel? Si nos considerá loke Jesus a bisa tocante ser disipel, nos por siña con pa enrikesé nos bida. Esei ta encerá aceptá su punto di bista i aplicá algun principio básico.—Mateo 10:24, 25; Lucas 14:26, 27; Juan 8:31, 32; 13:35; 15:8.
2, 3. (a) Kico kier men ser un disipel di Jesus? (b) Pakico ta importante pa nos puntra nos mes: ‘Ta disipel di ken mi ta?’
2 E palabra traducí como “disipel” den e Scritura Griego Cristian, ta nificá básicamente un persona cu ta dirigí su mente riba algu, of un persona cu ta siña. Den nos texto central, Mateo 11:29, tin un palabra similar: “Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma.” Sí, un disipel ta un hende cu ta siña for di un otro. Por lo general e Evangelionan ta aplicá e palabra “disipel” na Jesus su siguidónan íntimo cu el a instruí, esnan cu a biaha huntu cuné segun cu el a predicá. Tabatin hende cu kisas a djis aceptá e siñansanan di Jesus, haciendo esei asta secretamente. (Lucas 6:17; Juan 19:38) E escritornan di Evangelio tambe a referí na “e disipelnan di Juan [Bautista] i e disipelnan dje fariseonan.” (Marco 2:18) I como cu Jesus a spierta su siguidónan pa ‘vigilá pa e siñansa dje fariseonan,’ nos por puntra nos mes: ‘Ta disipel di ken mi ta?’—Mateo 16:12.
3 Si nos ta disipel di Jesus, si nos a siña di dje, anto otro hende lo tin cu sinti nan spiritualmente refrescá den nos presencia. Nan mester por ripará cu nos a bira di un genio mas suave i humilde di curason. Si na trabou nos tin responsabilidad di supervisá, si nos ta un mama of tata of nos tin e encargo di pastoreá den e congregacion cristian, e personanan bou di nos cuido ta sinti cu nos ta trata nan manera Jesus a trata esnan bou di su cuido?
E Manera Cu Jesus A Trata Hende
4, 5. (a) Di con no ta difícil pa sa con Jesus a trata hende cu tabatin problema? (b) Kico a pasa cu Jesus ora e tabata come den cas di un fariseo?
4 Nos mester sa promé con Jesus a trata hende, foral esnan cu tabatin problema serio. No ta difícil pa haña sa esei pasobra Bijbel tin hopi informe di encuentronan cu Jesus tabatin cu otro hende. I algun dje hendenan ei tabata den problema. Laga nos tuma nota tambe dje manera cu e lidernan religioso, foral e fariseonan, a trata hende cu problema similar. E contraste lo ta instructivo.
5 Na aña 31 Era Comun, ora Jesus tabata haci un gira di predicacion na Galilea, “un dje fariseonan a sigui pidi [Jesus] pa bin come cerca dje.” Jesus no a vacilá pa aceptá e invitacion. “P’esei anto el a drenta den e cas dje fariseo i a sinta na mesa. I, mira! un muher cu tabata conocí den e stad como un pecadó a haña sa cu e tabata comiendo den e cas dje fariseo, i el a trece un botter di alabaster di zeta perfumá, i, tumando posicion patras na su pia, el a yora i a cuminsá muha su pianan cu su lágrimanan i seca nan cu e cabei di su cabes. Tambe, e tabata sunchi su pianan tiernamente i a hunta nan cu e zeta perfumá.”—Lucas 7:36-38.
6. Con ta posibel cu e muher cu tabata “un pecadó” por tabata na cas dje fariseo?
6 Bo por mira e situacion bo dilanti? Segun un buki di referencia: “E muher (vers. 37) a probechá dje custumber social cu a permití hende pober bishitá un bankete asina pa ricibí un poco di loke a sobra.” Esei kisas ta splica con bini un persona por a drenta sin ta invitá. Podisé tabatin mas hende cu a spera di piki sobrá na fin dje comementu. Sin embargo, e muher aki su comportacion tabata inusual. E no a djis para warda na banda te ora e cena a terminá. I e tabatin mala fama, ya cu e tabata “un pecadó” bon conocí. Asta Jesus a bisa cu e tabata sa di “su picánan, maske nan ta hopi.”—Lucas 7:47.
7, 8. (a) Con nos kisas lo a reaccioná bou di un circunstancia manera esun mencioná na Lucas 7:36-38? (b) Con Simon a reaccioná?
7 Imaginá si bo a biba den e tempu ei i tabata na Jesus su lugá. Con lo bo a reaccioná? Lo bo a sinti bo incómodo ora e muher aki a acercá bo? Ki efecto un situacion asina lo tabatin riba bo? (Lucas 7:45) Lo bo tabata disgustá i hororisá?
8 Si bo tabata un dje otro huéspednan, lo bo a pensa un poco manera Simon e fariseo? “Ora el a mira esei, e fariseo cu a invitá [Jesus] a bisa den su mes: ‘Si e homber aki ta un profeta, lo e sa ken i ki clase di muher esun cu ta mishi cuné ta, cu e ta un pecadó.’” (Lucas 7:39) Na contraste, Jesus tabata un homber di profundo compasion. El a comprendé e muher su situacion penoso i a sinti e dolor grandi cu e muher tabatin. Bijbel no ta bisa nos con bini e muher a cai den un bida di picá. Si di berdad e tabata un prostituta, anto e hombernan dje stad, hudiunan deboto, aparentemente no a yud’é.
9. Con Jesus a reaccioná, i cu ki posibel resultado?
9 Pero Jesus kier a yud’é. E di cuné: “Bo picánan ta pordoná.” Anto el a agregá: “Bo fe a salba bo; bai na pas.” (Lucas 7:48-50) Aki e relato ta terminá. Tin hende kisas ta bini cu e obhecion di cu Jesus no a haci hopi p’e. Básicamente, el a mand’é bai cu su bendicion. Bo ta kere cu probablemente e muher aki a bolbe bek na e bida deplorabel cu e tabata hiba? Aunke nos no sa esei sigur, tuma nota di loke Lucas ta bisa despues di esei. El a conta cu Jesus tabata biaha “di stad pa stad i di pueblo pa pueblo, predicando i declarando e bon nobo dje reino.” Tambe Lucas a informá cu tabatin “cierto muhernan” huntu cu Jesus i su disipelnan, cu “tabata sirbi nan di [e muhernan su] pertenencianan.” Tin e posibilidad cu e muher arepentí i gradicidu, tabata awor entre nan. I kisas el a cuminsá hiba su bida na un manera cu ta agradá Dios, cu un concenshi limpi, cu un propósito nobo i cu un amor muchu mas profundo pa Dios.—Lucas 8:1-3.
Diferencia Entre Jesus i e Fariseonan
10. Di con ta bon pa considerá e relato di Jesus cu e muher na cas di Simon?
10 Kico nos por siña dje relato bibu aki? E ta conmové nos emocion, no ta asina? Imaginá bo den e cas di Simon. Con lo bo a sinti bo? Lo bo a reaccioná manera Jesus, of lo bo a sinti un tiki manera e fariseo cu a invitá Jesus? Jesus tabata e Yu di Dios, pues nos no por sinti precis mescos cuné. Di otro banda, kisas nos no ta masha ansioso pa considerá nos mes manera Simon, e fariseo. Poco hende lo ta orguyoso di ta manera un fariseo.
11. Di con nos lo no kier pa hende clasificá nos huntu cu e fariseonan?
11 Analisando evidencia bíblico i no-bíblico, nos por concluí cu e fariseonan a pensa masha cos di nan mes. Nan a considerá nan mes como protector di prosperidad i salú público i di bienestar nacional. Nan no tabata satisfecho cu Dios su Ley tabata básicamente bon cla i fácil pa comprendé. Tur caminda cu e Ley a parce di no ta masha specífico, nan a trata di agregá aplicacionnan specífico n’e Ley pa asina eliminá cualkier necesidad di usa concenshi. E lidernan religioso aki a purba inventá regla pa dirigí conducta den tur asuntu, asta den asuntunan insignificante. *
12. Kico e fariseonan a pensa di nan mes?
12 Josefo, e historiadó hudiu di promé siglo, ta mustra bon cla cu e fariseonan a considerá nan mes di ta hende bondadoso, suave, imparcial i debidamente cualificá pa nan tarea. Sin duda, algun di nan tabata asina. Kisas bo ta pensa riba Nicodemo. (Juan 3:1, 2; 7:50, 51) Cu tempu, algun di nan a aceptá e caminda cristian. (Echonan 15:5) Apostel cristian Pablo a skirbi tocante cierto hudiunan, manera e fariseonan: “Nan tin un celo pa Dios; pero no segun conocimentu exacto.” (Romanonan 10:2) Sin embargo, e Evangelionan ta presentá e fariseonan manera e pueblo comun a mira nan: orguyoso, arogante, hustu den nan mes bista, pikidó di pieu, cla pa husga i menospreciá otro hende.
Loke Jesus A Pensa dje Fariseonan
13. Kico Jesus tabatin di bisa dje fariseonan?
13 Jesus a scual e escriba i fariseonan i yama nan hipócrita. “Nan ta mara carga pisá i ta pone nan riba scouder di hende, pero nan mes no kier move nan ni cu nan dede.” Sí, e carga tabata pisá, i e yugo cu nan a pone riba hende tabata severo. Caba Jesus a yama e escriba i fariseonan “hendenan bobo.” Un hende bobo ta un menasa pa comunidad. Tambe Jesus a yama e escriba i fariseonan “guianan ciegu” i a declará cu nan “a pasa por haltu dje asuntunan di mas peso dje Ley, esta, husticia i misericordia i fieldad.” Ken lo kier pa Jesus consider’é manera un fariseo?—Mateo 23:1-4, 16, 17, 23.
14, 15. (a) E manera cu Jesus a trata Mateo Levi ta revelá kico di e actitud dje fariseonan? (b) Ki lesnan importante nos por siña for dje relato aki?
14 Casi ken cu lesa e relatonan di Evangelio por mira cu mayoria fariseo tabatin un actitud di criticá. Despues cu Jesus a invitá Mateo Levi, e cobradó di belasting, pa bira disipel, Levi a tene un bankete di recepcion grandi pa Jesus. E relato ta bisa: “Cu esei e fariseonan i nan escribanan a cuminsá murmurá contra su disipelnan, bisando: ‘Pakico boso ta come i bebe cu cobradónan di belasting i pecadónan?’ Contestando, Jesus a bisa nan: ‘. . . Ami a bini pa yama, no personanan hustu, sino pecadónan na repentimentu.’”—Lucas 5:27-32.
15 Levi mes a asta comprendé un otro cos cu Jesus a bisa n’e ocasion ei: “Bai, anto, i siña loke esaki ta nificá: ‘Mi kier misericordia, i no sacrificio.’” (Mateo 9:13) Aunke e fariseonan a pretendé di ta kere den e obranan skirbí dje profetanan hebreo, nan no a aceptá e dicho aki di Oséas 6:6. Pa nan, si nan mester faya mes, lo ta pasobra nan a pega muchu estricto na regla, no di ménos. Nos cada un lo por puntra nos mes: ‘Mi tin e reputacion di ta un hende cu ta pega estrictamente na cierto reglanan, manera por ehempel reglanan cu ta reflehá opinion personal of e maneranan cu hende en general ta abordá cierto asuntunan? Of hende ta pensa cu mas cu tur cos mi ta misericordioso i bondadoso?’
16. Kico tabata e estilo dje fariseonan, i con nos por evitá di ta manera nan?
16 Criticá, criticá, criticá. Esei tabata e estilo dje fariseonan. Nan tabata busca delaster un fout; sea esei tabata real of imaginario. Nan tabata pone hende keda constant den defensiva i a recordá nan di nan fayonan. E fariseonan tabata masha orguyoso di nan mes cu nan tabata duna diesmo di e yerbanan di mas chikitu, manera yerba buena, eneldo i comino. Cu nan forma di bisti nan kier a desplegá con deboto nan ta, i a purba dirigí e nacion. Un cos ta sigur, pa nos accionnan ta na armonia cu e ehempel di Jesus, nos tin cu evitá e tendencia di semper busca hende su fout i enfatisá nan.
Con Jesus A Trata cu Problema?
17-19. (a) Splica con Jesus a manehá un situacion cu lo por tabatin consecuencianan hopi serio. (b) Kico a pone cu e situacion tabata tenso i desagradabel? (c) Si abo tabata presente ora e señora a acercá Jesus, con lo bo a reaccioná?
17 Jesus su manera di trata cu problema tabata hopi otro for dje manera dje fariseonan. Considerá con Jesus a manehá un situacion cu lo por tabata hopi serio. Tabata trata di un señora cu tabatin un derame di sanger pa 12 aña. Bo por lesa e relato na Lucas 8:42-48.
18 E relato di Marco ta bisa cu e muher tabata “spantá i temblando.” (Marco 5:33) Di con? Sin duda, pasobra e tabata sa cu el a kibra e Ley di Dios. Segun Levítico 15:25-28, un muher cu un derame innatural di sanger tabata impuru tanten cu esei a dura, plus un siman. Tur cos cu el a mishi cuné i tur hende cu tabata den contacto cuné a bira impuru. Pa e muher aki a yega cerca Jesus, e mester a pusha pasa dor di un multitud. Nos awe cu despues di 2.000 aña ta lesa e relato, ta sinti duele di dje pa e situacion incómodo cu e tabata aden.
19 Si abo tabata presente e dia ei, con lo bo a mira e situacion? Kico lo bo a bisa? Ripará cu Jesus a trata e muher aki den un manera bondadoso, amoroso i cu consideracion, i ni sikiera el a haci mencion dje problemanan cu kisas e muher a causa.—Marco 5:34.
20. Si Levítico 15:25-28 ainda tabata un rekisito awe, ki desafio nos lo tabatin?
20 Nos por siña algu for dje suceso aki? Suponé cu bo ta anciano den un congregacion cristian djawe. I suponé tambe cu ainda Levítico 15:25-28 tabata un rekisito cristian i cu un muher cristian a violá e ley ei debí cu e tabata sinti su mes desesperá i indefenso. Con lo bo a reaccioná? Lo bo a humiy’é públicamente cu conseho crítico? “No, ami lo no a haci e cos ei nunca!” bo ta bisa. “Siguiendo e ehempel di Jesus, lo mi a haci mi esfuerso pa ta bondadoso, amoroso, comprensivo i cu consideracion.” Hopi bon! Pero e desafio ta sinta den hacié, den imitá e ehempel di Jesus.
21. Kico Jesus a siña e hendenan tocante e Ley?
21 Básicamente, Jesus a laga hende sinti nan refrescá, mas mihó i animá. Caminda e Ley di Dios tabata specífico, e Ley tabata men loke el a bisa. Si e Ley di Dios a parce general, hende lo mester a haci mas uso di nan concenshi i nan lo por a demostrá nan amor pa Dios mediante nan decisionnan. E Ley a duna nan espacio. (Marco 2:27, 28) Dios a stima su pueblo, i constant el a obra pa nan bon, i e tabata dispuesto na mustra misericordia ora nan a faya. Jesus tabata mescos.—Juan 14:9.
E Resultadonan di Jesus Su Siñansa
22. Siña di Jesus a yuda su disipelnan cultivá ki clase di actitud?
22 Esnan cu a scucha Jesus i a bira su disipel a apreciá cu loke el a declará tabata cierto: “Mi yugo ta suave i mi carga ta leve.” (Mateo 11:30) Nunca nan no a sinti cu Jesus a pone un peso riba nan, iritá nan constantemente of zundra nan. Nan tabata mas liber, mas felis i tabatin mas confiansa den nan relacion cu Dios i cu otro. (Mateo 7:1-5; Lucas 9:49, 50) Di Jesus nan a siña cu pa bo ta un lider spiritual bo mester ta refrescante pa otro hende, manifestando humildad di mente i curason.—1 Corintionan 16:17, 18; Filipensenan 2:3.
23. Ki lesnan importante e disipelnan a siña dor di asociá cu Jesus, i na ki conclusionnan nan a yega?
23 Ademas, hopi di nan a keda profundamente impresioná cu e importancia di keda den union cu Cristo i adoptá e actitud cu el a demostrá. El a bisa su disipelnan: “Mescos cu e Tata a stima mi i ami a stima boso, permanecé den mi amor. Si boso warda mi mandamentunan, boso lo permanecé den mi amor, mescos cu mi a warda e mandamentunan di mi Tata i a permanecé den su amor.” (Juan 15:9, 10) Pa nan por tabatin éxito como minister i sirbidó di Dios, nan lo tabatin cu aplicá diligentemente loke nan a siña di Jesus, tantu ora di predicá como ora di siña hende públicamente tocante Dios su maraviyoso bon nobo; tambe den nan trato cu famia i amigunan. Segun cu e hermandad a crece bira hopi congregacion, nan lo mester a recordá nan mes cu frecuencia cu ta Jesus su manera tabata e manera corecto. Loke el a siña tabata e berdad, i e bida cu nan a observá cu el a hiba tabata realmente e bida cu nan mester a aspirá pa hiba.—Juan 14:6; Efesionan 4:20, 21.
24. Kico ta e cosnan cu nos mester tuma na pechu for dje ehempel di Jesus?
24 Segun cu abo awor ta refleccioná riba algun dje cosnan cu nos a trata, bo ta mira caminda cu bo por mehorá? Bo ta di acuerdo cu Jesus semper a pensa, siña i actua corectamente? Si ta asina, cobra ánimo. Su palabranan animador pa nos ta: “Si boso sa e cosnan aki, felis boso ta si boso haci nan.”—Juan 13:17.
[Nota]
^ par. 11 “E diferencia fundamental [entre Jesus i e fariseonan] ta ser clarificá solamente si wak e desde e punto di bista dje dos maneranan contrali na otro cu nan a mira Dios. Segun e fariseonan, Dios ta principalmente un persona cu ta exigí; segun Jesus e ta misericordioso i compasivo. Claro cu e fariseo no ta nenga Dios su bondad i amor, pero p’e fariseo, Dios a expresá esakinan dor di duna e Tora [Ley] como regalo i den e posibilidad di cumpli cu loke e Tora ta exigí. . . . E fariseonan a considerá cu e manera pa cumpli cu e Tora tabata dor di pega n’e tradicion oral, cu su reglanan pa interpretá e ley. . . . E echo cu Jesus a elevá e dos mandamentunan di amor (Mat. 22:34-40) n’e nivel di ta e interpretacion aceptabel i e echo cu el a rechasá e caracter restrictivo dje tradicion oral . . . a pon’é den conflicto cu e fariseonan su manera di resolvé cuestionnan di concenshi mediante interpretacion di doctrina religioso.”—The New International Dictionary of New Testament Theology.
Con Bo Ta Respondé?
• Segun bo, kico ta nificá ser un disipel di Jesus?
• Con Jesus a trata hende?
• Kico nos por siña dje manera cu Jesus a instruí?
• Con e fariseonan i Jesus tabata distinto di otro?
[Preguntanan di Estudio]
[Plachi na página 18, 19]
Jesus su actitud pa cu hende tabata completamente otro for dje actitud dje fariseonan!