Un Spiritu Dispuesto Ta Trece Hende na Galad

E SCOL Bíblico di Galad di Watchtower t’ei pa entrená homber i muhernan dedicá pa e sirbishi di misionero den exterior. Ken por bai Galad? Esnan cu tin un spiritu dispuesto. (Salmo 110:3) Esei sigur tabata bisto dia 8 di september 2001, dia di graduacion di e di 111 klas.

Algun di e studiantenan dje klas ei ya caba boluntariamente a bandoná famia, amigu i nan pais natal pa sirbi caminda e necesidad ta mas grandi. Asina nan a pone nan mes na prueba pa mira si nan por a haci ahuste pa biba den un ambiente un poco diferente. Por ehempel, Richer cu Nathalie a regla nan asuntunan pa muda bai Bolivia, Todd cu Michelle pa bai República Dominicana i David cu Monique a bai un pais na Asia pa plama e bon nobo dje Reino di Dios. Tin otro studiantenan cu a yega di sirbi caba na Nicaragua, Ecuador i Albania.

Christy a haña animacion pa tuma spañó na scol secundario como preparacion p’e por bai sirbi dos aña na Ecuador promé cu e casa. Otronan a djoin congregacionnan di abla stranhero den nan pais natal. Saul cu Priscilla a enfrentá un reto diferente. Di buena gana nan a traha duru pa mehorá nan ingles promé cu nan a bai Galad.

E 20 simannan di entrenamentu pa misionero a pasa lihé. E dia di graduacion a yega i, huntu cu nan amigunan i famianan, e studiantenan a scucha e consehonan sabí i e palabranan di animacion como despedida.

E presidente dje programa tabata Theodore Jaracz, un graduado dje di shete klas di Scol di Galad, kende ta sirbi awor como miembro dje Cuerpo Gobernante di Testigonan di Jehova. Den su introduccion el a enfatisá e echo cu como organisacion, nunca nos no a perde for di bista cu e obhetivo di entrená studiantenan na Galad ta pa predicá e bon nobo di Reino den tur e tera habitá. (Marco 13:10) Galad ta prepará studiantenan cualificá pa cumpli cu e actividad di predicá aki riba un escala hopi mas grandi cu nan a haci den pasado i na partinan di mundu caminda tin hopi mester di misioneronan entrená. Ruman Jaracz a urgi e studiantenan pa nan haci bon uso dje entrenamentu cu nan a haña na Galad ora nan djoin e misioneronan cu actualmente ta sirbiendo den e 19 paisnan caminda e graduadonan a ser asigná.

Conseho Oportuno pa e Graduadonan

A sigui un seri di discurso. William Van De Wall, miembro dje comité di sucursal di Merca, a papia riba e tema “Celo di Misionero Ta un Característica di Cristiannan Berdadero.” El a enfocá atencion riba e comision di “haci disipel” cu ta registrá na Mateo 28:19 i 20. I el a urgi e studiantenan: “Imitá Jesus, kende a cumpli cu su asignacion di misionero cu celo i entusiasmo.” El a animá e futuro misioneronan pa: “Pega na un programa realístico; sigui bon custumbernan di studio personal, keda al dia cu asuntunan teocrático; i semper sigui enfocá riba e motibunan  pakico bo ta den bo asignacion.” Esaki lo ta un yudansa pa nan mantené nan celo p’e trabou di misionero.

E siguiente orador riba e programa tabata Guy Pierce, un miembro dje Cuerpo Gobernante. El a desaroyá e tema “Sigui Cultivá ‘Boso Facultad di Razoná.’” (Romanonan 12:1) El a duna e klas di graduado conseho práctico, animando nan pa usa e abilidad di pensa i razoná cu Dios a duna nan. “Sigui pensa profundamente riba loke Jehova ta bisa boso via su Palabra. Esaki lo protehá boso,” el a bisa. (Proverbionan 2:11) Tambe ruman Pierce a spierta e klas pa nan no para riba nan punto di bista di tal manera cu esaki ta stroba nan “facultad di razoná.” E recordatorionan oportuno aki sigur lo resultá útil p’e graduadonan ora cu nan ta sirbi como misionero.

Siguientemente, e presidente a introducí un dje instructornan di Galad, Lawrence Bowen, kende a papia riba e tema “Dicidí di No Sa Nada Otro.” El a mustra cu apostel Pablo, relacioná cu su trabou di misionero na Corinto, “a dicidí di no sa nada otro . . . cu no ta Jesucristo, i é, clabá na staca.” (1 Corintionan 2:2) Pablo tabata sa cu e forsa mas grandi den universo, esta, e spiritu santu, ta apoyá e mensahe cu henter e Bijbel ta reflehá: e vindicacion  di Jehova su Soberania mediante e Simia primintí. (Génesis 3:15) E ruman a urgi e 48 graduadonan pa ser manera Pablo cu Timoteo i pa nan logra éxito como misionero dor di pega na “e patronchi di palabranan saludabel.”—2 Timoteo 1:13.

“Apreciá Boso Privilegio Como un Don di Dios,” tabata e tema dje último discurso den e promé parti dje programa. Wallace Liverance, secretario dje Scol di Galad, a yuda e graduadonan comprendé cu privilegionan di sirbishi ta expresionnan di Dios su bondad inmerecí, i no algu cu nan tin derecho riba dje of ta merecé. Halando atencion riba e ehempel di apostel Pablo, ruman Liverance a señalá: “Jehova no a scoge Pablo como su apostel p’e nacionnan debí na Pablo su obranan, pa no parce cu Pablo a gana e derecho di haña e asignacion ei of cu el a merec’é. E escoho no tabata basá riba e cantidad di aña den e trabou ni experencia. Desde e punto di bista humano, kisas lo a parce lógico pa Dios a scoge Barnabas. E escoho no tabata basá riba abilidad personal pasobra aparentemente Apólos tabata mas elocuente cu Pablo. E echo cu Dios a scoge Pablo tabata un expresion di su bondad inmerecí.” (Efesionan 3:7, 8) Ruman Liverance a animá e graduadonan pa usa nan don, esta, nan privilegio di sirbishi, pa yuda otro hende bira amigu di Dios pa nan por ricibí “e don cu Dios ta duna . . . , bida eterno mediante Cristo Jesus nos Señor.”—Romanonan 6:23.

Despues di esaki, Mark Noumair, un otro instructor di Galad, a dirigí un combersacion entusiasmá cu un cantidad di studiante tocante e tema “Preparacion Ta Duna Bon Resultado.” (Proverbionan 21:5) E experencianan a mustra cu ora un proclamadó prepará bon pa e ministerio, foral si e prepará su curason, lo e por demostrá berdadero interes den hende. Nunca lo no sosodé cu e no sa sigur kico pa bisa hende. Mas bien, lo e bisa i haci cosnan pa yuda nan spiritualmente. Ruman Noumair a indicá cu “esei ta e clave pa logra éxito como misionero.” I el a usa su propio experencia di misionero na África como ehempel.

Sirbishi di Misionero —Un Carera Satisfaciente

Ralph Walls i Charles Woody a entrevistá algun misionero experenciá, kendenan tambe tabata n’e Centro Educacional di Patterson pa entrenamentu special. E entrevistanan a enfatisá e echo cu ta amor pa hende ta loke ta duna goso den e sirbishi di misionero. Ora e studiantenan, famia i amigunan presente den e auditorio a tende e misioneronan experenciá aki conta di nan propio experencia di con e sirbishi di misionero ta un carera satisfaciente, esei tabatin un efecto trankilisante riba nan.

John E. Barr cu ta sirbi den e Cuerpo Gobernante, a duna e discurso clave dje dia ei. E tema tabata “Canta na Jehova un Cantica Nobo.” (Isaías 42:10) Ruman Barr a mustra cu e expresion “un cantica nobo” ta aparecé nuebe bes den Bijbel. El a haci e pregunta: “Kico e cantica nobo aki ta?” Anto el a contestá: “E contexto ta revelá cu nan a canta un cantica nobo pasobra tabatin desaroyonan nobo den e manera cu Jehova ta ehercé su soberania.” El a urgi e studiantenan pa sigui uni nan bos den canta alabansa dje Reino triunfante di Dios den man di e Rey Mesiánico, Cristo Jesus. Ruman Barr a mencioná cu e entrenamentu cu e studiantenan a ricibí na Galad a yuda nan comprendé e vários aspectonan di e “cantica nobo” aki mihó cu nunca promé. “E scol a enfatisá cu boso mester ‘canta’ alabansa na Jehova na armonia cu boso rumannan unda cu boso bai; semper cultivá unidad cu otro hende den boso asignacion.”

Despues cu e studiantenan a ricibí nan diploma, un representante dje klas a lesa un carta cu a mustra nan aprecio sincero p’e entrenamentu cu nan a ricibí na Galad.

Bo por expandé bo sirbishi na Dios i hacié mas productivo? Si ta asina, traha diligentemente manera e graduadonan aki a haci. Esaki ta loke a yuda nan bira capas pa traha como misionero. Ora un persona ofrecé su mes boluntariamente den sirbishi di Dios, e ta haña hopi goso.—Isaías 6:8.

[Kuadro na página 25]

ESTADÍSTICANAN DJE KLAS

Cantidad di pais representá: 10

Cantidad di pais na cua a asigná nan: 19

Cantidad di alumno: 48

Edad promedio: 33,2

Promedio di aña den e berdad: 16,8

Averahe di aña den e ministerio di tempu completo: 12,6

[Plachi na página 26]

E di 111 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá di dilanti bai patras, i e nombernan ta bai di robes pa drechi den cada rij.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.