Henry VIII i Beibel

DEN su buki History of the English-Speaking Peoples (Volúmen 2), Winston Churchill a skirbi: “E époka di Reformashon a trese un kambio profundo riba tereno di kreensia religioso. Beibel a bira awor un fuente nobo pa konseho efikas ku tabatin un influensia riba hopi tereno. E generashon bieu tabata di opinion ku ta peligroso pa Skritura Santu ta den man di hende ku no ta eduká i ku ta pastornan so mester les’é.”

E relato ta sigui: “Na final di lènte di aña 1535, pa promé bes, a imprimí Beibel kompleto tradusí na ingles dor di Tyndal i Coverdale, i awor nan tabata produsiendo vários edishon di Beibel. Gobièrnu a pidi klero pa animá hende pa lesa Beibel.” Grásias na e gobièrnu di Henry VIII, i no iglesia, ku despues di siglonan di ignoransia, hende na Inglatera a haña sa kiko Beibel ta bisa. *

Tambe e buki ta bisa: “E generashon bieu a haña un otro gòlpi mas ora e gobièrnu a laga Paris imprimí un gran kantidat di Beibel mas luhoso ainda na ingles. I na luna di sèptèmber di aña 1538, gobièrnu a manda kada parokia kumpra un Beibel tamaño grandi na ingles pa pone den kada iglesia, kaminda parokianonan por a yega fásilmente i les’é. Nan a pone seis ehemplar den e katedral di St. Paul ku ta keda den e stat di Lònden, i henter dia masha hopi hende tabata bai na e katedral pa lesa nan, manera nan a bisa nos, spesialmente ora nan por a haña un hende ku tabatin un bos fuerte pa lesa pa tur hende tende.”

Lamentablemente, den vários pais, hopi hende no ta probechá di e privilegio pa lesa Beibel regularmente. Esaki ta un motibu grandi pa preokupashon, ya ku ta Beibel so “ta inspirá pa Dios i ta útil pa siñansa, pa reprendementu, pa korekshon, pa eduká den hustisia.”—2 Timoteo 3:16.

[Nota]

[Rekonosementu pa Potrèt na página 32]

Henry VIII: Pintura den e Galeria Real na Kensington, for dje buki The History of Protestantism (Vol. I)