Pregunta di Lektor

Te na ki grado e restrikshonnan pa matrimonio entre miembronan di famia ku e Lei di Moises ta papia di dje ta konta pa kristiannan awe?

E Lei ku Yehova a duna e pueblo di Israel no ta duna masha detaye en kuanto seremonia i proseduranan di kasamentu. Sin embargo, loke sí e ta deskribí ta prohibishon kontra sierto relashonnan di matrimonio. Por ehèmpel na Levítiko 18:6-20, nos ta haña un lista di relashon prohibí ku tin di haber ku “famia yegá.” E pasashi aki di Beibel ta deskribí en detaye kua miembronan di famia no mester tene relashon seksual ku otro. Klaro ku kristiannan no ta kai bou dje Lei di Moises ni nan no ta mará na su dekretonan. (Efesionan 2:15; Kolosensenan 2:14) Pero, esaki no ta nifiká ku kristiannan por simplemente ignorá esaki ora nan ta skohe un persona pa kasa kuné. Tin hopi motibu pa esei.

Pa kuminsá, tin hopi lei di gobièrnu ku ta regulá matrimonio entre miembronan di famia yegá, i básikamente kristiannan ta bou di obligashon pa obedesé e leinan dje pais kaminda nan ta biba. (Mateo 22:21; Romanonan 13:1) Klaro ku e leinan ei ta varia di un lugá pa otro. Mayoria dje leinan moderno aki ta basá primeramente riba faktornan genétiko. Ta bon konosí ku matrimonio entre miembronan di famia hopi yegá tin hopi chèns di hiba na yunan ku ta nase ku defekto genétiko i malesa. Pa e motibu ei i pasobra nan ta “someté nan mes na e outoridatnan ku ta goberná,” kristiannan ta obedesé leinan lokal pa matrimonio ora nan ta kasa.

Ademas, tin e asuntu di kiko ta aseptabel i kiko no ta aseptabel den e komunidat kaminda un persona ta biba. Kasi tur kultura tin regla i kustumbernan ku ta sensurá matrimonio entre hendenan ku ta famia hopi yegá di otro. Hopi bes nan ta konsiderá e unionnan aki komo insesto i p’esei algu prohibí. Maske e relashonnan prohibí por varia hopi den diferente kultura, “generalmente, mas serka e relashon genétiko entre e dos personanan ta, mas fuerte i hopi mas vigoroso e prohibishon i desaprobashon pa nan tene relashon seksual ta bira,” segun The Encyclopædia Britannica. Pues, asta ora no ta trata di relashon di insesto, kristiannan no kier aktua sin tene kuenta ku kustumbernan establesí òf ku sintimentunan rasonabel dje komunidat. Asina nan ta evitá di trese reproche riba e kongregashon kristian òf riba e nòmber di Dios.—2 Korintionan 6:3.

Nos no mester pasa por haltu dje konsenshi ku Dios a duna nos. Tur hende a nase ku un sentido di loke ta korekto i inkorekto, di bon i malu. (Romanonan 2:15) A ménos ku nan konsenshi a bira sin heful i a kria kayo dor di práktikanan perverso, e ta bisa nan kiko ta normal i korekto, i kiko ta apnormal i ofensivo. Yehova a referí na e echo aki ora el a duna e israelitanan su lei kontra matrimonio entre famia yegá. Nos ta lesa: “Boso no mester hasi manera nan ta hasi na tera di Egipto, kaminda boso tabata biba, ni hasi loke nan ta hasi na tera di Kanan, kaminda mi ta hiba boso; boso no mester kana den nan statutonan.” (Levítiko 18:3) Kristiannan ta duna balor na nan konsenshi basá riba Beibel i nan no ta pèrmití e sentido trosí di loke ta bon i malu ku e nashonnan tin, korumpí nan konsenshi.—Efesionan 4:17-19.

Na ki konklushon nos por yega anto? Maske kristiannan no ta bou di e Lei di Moises, nan konsenshi sí ta bisa nan bon kla ku matrimonio entre famia yegá—manera tata ku yu muhé, mama ku yu hòmber, ruman ku ruman—ta totalmente inaseptabel den e komunidat kristian. * Segun ku e sírkulo di famia ta ekspandé, kristiannan ta rekonosé ku tin lei i statutonan ku ta regla matrimonio legal i ku tin normanan ku sosialmente i kulturalmente ta aseptabel. Nos mester tene debido kuenta ku esakinan pa asina nos por kumpli ku e mandamentu di Beibel: “Laga matrimonio wòrdu onrá pa tur hende.”—Hebreonan 13:4.

[Nota]