Kompletamente Ekipá Komo Siñadónan dje Palabra di Dios

“Dios . . . a hasi nos kompetente pa ta sirbidónan.”—2 KORINTIONAN 3:5, 6.

1, 2. Ki esfuerso hende a yega di hasi pa prediká, pero dikon generalmente nan esfuersonan ta frakasá?

KON lo bo sinti bo si nan duna bo un trabou ku bo no ta kapasitá pa hasi? Imaginá bo lo siguiente. E material ku bo tin mester ta poné bo dilanti, i e hèrmèntnan ta na bo disposishon. Pero bo no tin e mínimo idea kon pa kumpli ku e tarea. Pió ainda, e trabou en partikular aki, ta un trabou urgente. Hende ta dependé riba bo. Esei lo ta hopi frustrante!

² Un dilema asina no ta kompletamente imaginario. Konsiderá un ehèmpel. A yega di sosodé ku un dje iglesianan di kristiandat a purba organisá i efektuá un ministerio di kas pa kas. Generalmente nan esfuersonan a frakasá. Denter di un par di siman òf luna nan a kaba na nada. Dikon? Debí ku kristiandat no a yuda su siguidónan pa nan ta kapasitá pa e trabou. Ni e miembronan di klero mes no ta kapasitá pa e obra di prediká ei, apesar di añanan largu di edukashon ku nan a risibí na skol i na seminario. Dikon nos por bisa un kos asina?

3. Ki ekspreshon ta ser usá tres bes na 2 Korintionan 3:5 i 6, i kiko e ta nifiká?

³ E Palabra di Dios ta splika kiko ta loke ta kapasitá un berdadero predikadó dje bon nobo kristian. Dios a inspirá apòstel Pablo pa skirbi: “No ku di nos mes nos ta adekuadamente kapasitá pa konsiderá ku algu ta bini di nos mes, mas bien e echo ku nos ta adekuadamente kapasitá ta bini di Dios, kende en bèrdat a kapasitá nos adekuadamente pa ta ministernan.” (2 Korintionan 3:5, 6, NW) Paga tinu riba e ekspreshon ku ta aparesé tres biaha den e teksto aki: “adekuadamente kapasitá.” Kiko e kier men? E Dikshonario di Palabranan Bíbliko di Vine (Vine’s Expository Dictionary of Biblical Words) ta bisa: “Ora e ser usá relashoná ku opheto [e palabra griego original aki] ta nifiká ‘sufisiente’ . . . ; ora e ser usá relashoná ku persona, e kier men ‘kompetente,’ ‘digno.’” Pues, un hende ku ta “adekuadamente kapasitá” ta un hende kompetente i digno di efektuá e tarea ku el a haña. Sí, ministernan berdadero dje bon nobo ta kapasitá pa hasi e trabou aki. Nan ta kompetente, bon prepará, òf digno pa prediká.

4. (a) Kon e ehempel di Pablo ta mustra ku no ta un grupito privilegiá so por kualifiká pa e ministerio kristian? (b) Kua ta tres medio ku Yehova ta usa pa kapasitá nos komo minister?

⁴ Pero kon bini nan ta kapasitá? Dor di nan talentonan? Superioridat intelektual? Edukashon spesialisá na skolnan prestigioso? Ta bisto ku apòstel Pablo tabatin tur e kosnan ei. (Echonan 22:3; Filipensenan 3:4, 5) Sin embargo, el a rekonosé humildemente ku su kapasitashon komo minister no a bini di skol òf siñansa avansá, sino di Yehova Dios. E kapasitashon ei ta pa un grupito privilegiá so? Pablo a skirbi e kongregashon  di Korintio tokante e echo ku ‘nos ta kompetente.’ Esei sigur ta indiká ku Yehova ta perkurá pa tur su fiel sirbidónan ta kompetente, kapas pa hasi e trabou ku el a asigná nan. Kon Yehova ta kapasitá kristiannan berdadero awe? Laga nos papia riba tres medio ku e ta usa: (1) su Palabra, (2) su spiritu santu, i (3) su organisashon riba tera.

E Palabra di Yehova Ta Kapasitá Nos

5, 6. Ki efekto e Skritura Santu tin riba kristiannan berdadero?

⁵ Di promé, kon e Palabra di Dios ta yuda nos bira kompetente komo minister? Pablo a skirbi: “Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia, pa e hende di Dios por ta perfekto [plenamente kompetente, kompletamente, NW] ekipá pa tur bon obra.” (2 Timoteo 3:16, 17) Pues, e Skritura Santu ta yuda hasi nos “plenamente kompetente, kompletamente ekipá” pa efektuá e “bon obra” di siña hende tokante e Palabra di Dios. Pero kon ta pará ku tur e hendenan ku ta afiliá na iglesianan di kristiandat? Nan tin akseso na Beibel. Kon por ta ku e mesun buki ku ta yuda sierto hende bira minister kompetente no ta yuda otronan? E kontesta ta sinta den e aktitut ku nos tin pa ku Beibel.

⁶ Lamentablemente, hopi hende ku ta bai misa no ta aseptá e mensahe di Beibel komo “loke e ta berdaderamente, e palabra di Dios.” (1 Tesalonisensenan 2:13) Kristiandat a forma un historia bergonsoso pa su mes den e aspekto aki. Miembronan di klero ta ekipá komo maestro dje Palabra di Dios despues ku nan pasa vários aña ta studia den institushonnan teológiko? Bon mirá, nò. Asta tin studiante ta kuminsá nan estudio na seminario komo kreyente di Beibel, i pa tempu ku nan gradua, nan a bira sképtiko! Despues, na lugá di prediká e Palabra di Dios—ku hopi di nan no ta kere aden mas—nan ta dirigí nan ministerio den otro direkshon: nan ta tuma parti den kuestionnan polítiko, promové evangelio sosial, òf hala atenshon na filosofianan humano den nan sermonnan. (2 Timoteo 4:3) Na kontraste, kristiannan berdadero ta sigui e ehèmpel di Hesukristu.

7, 8. Den ki manera Hesus su aktitut pa ku e Palabra di Dios tabata diferente for di esun dje lidernan religioso di su tempu?

⁷ Hesus no a pèrmití e lidernan religioso di su tempu moldia su manera di pensa. Sea ku e tabata siña un grupo chikitu di hende, por ehèmpel su apòstelnan, òf un multitut enorme, semper Hesus a hasi bon uso dje skrituranan santu. (Mateo 13:10-17; 15:1-11) Esaki ta algu ku a  distinguié for dje lidernan religioso di su tempu. Nan tabata deskurashá e pueblo komun fuertemente di investigá e kosnan profundo di Dios. De echo, tabata normal pa un maestro den e tempu ei opiná ku algun pasashi di Beibel tabata simplemente muchu profundo pa trata ku personanan ku no ta su alumno di mas pegá. Anto asta ku e alumno ei, nan lo a hasié únikamente ku stèm abou, i ku kabes tapá. E lidernan religioso ei tabata kasi mes superstisioso tokante trata sierto partinan di Beibel, ku nan tabata pa pronunsiá e nòmber divino!

⁸ Kristu no tabata asina. El a kere ku no ta djis un grupito selekto, sino hende en general mester a konsiderá “tur palabra ku ta sali for di boka di Dios.” Hesus no tabata interesá pa otorgá niun yabi di konosementu na un grupito privilegiá di erudito. El a bisa su disipelnan: “Loke mi bisa boso den skuridat, papia esei den klaridat; i loke boso tende papiá ketu-ketu den orea, proklamá esei for di riba dak di kas.” (Mateo 4:4; 10:27) Hesus tabatin un deseo intenso pa kompartí e konosementu di Dios ku mas tantu hende posibel.

9. Kon kristiannan berdadero ta usa Beibel?

⁹ E Palabra di Dios mester ta é enfoke di nos siñansa. Por ehèmpel, ora nos ta duna un diskurso na Salon di Reino di Testigunan di Yehova, generalmente no ta basta pa nos djis lesa sierto versíkulonan selektá for di Beibel. Kisas nos mester splika, ilustrá i duna aplikashon n’e teksto den su konteksto. Na moda di papia, nos meta ta pa hisa e mensahe di Beibel for dje papel i enk, anto hink’é den kurason di nos skuchadónan. (Nehemías 8:8, 12) Tambe mester usa Beibel ora ta nesesario pa duna konseho òf duna disiplina komo korekshon. Maske Yehova su pueblo ta papia diferente idioma i ta bini di un variedat di antesedensia, nan tur ta respetá e Buki di tur buki: Beibel.

10. Ki efekto e mensahe inspirá di Beibel por tin riba nos?

¹⁰ Ora Beibel ser usá ku un rèspèt asina, su mensahe tin poder. (Hebreonan 4:12) E ta motivá hende pa hasi kambio den nan bida, manera bandoná e práktikanan no-bíbliko di fornikashon, adulterio, idolatria, buracheria i ladronisia. El a yuda masha hopi hende kita “e hende bieu,” esta e personalidat bieu, i bisti esun nobo. (Efesionan 4:20-24) Sí, si nos respet’é mas ku kualkier opinion òf tradishon di hende i us’é fielmente, Beibel por yuda nos bira berdaderamente kompetente, kompletamente ekipá komo maestro dje Palabra di Dios.

E Spiritu di Yehova Ta Kapasitá Nos

11. Pakiko ta na su lugá ku Hesus a referí na Yehova su spiritu santu komo “e yudante”?

¹¹ Di dos, laga nos trata e papel ku Yehova su spiritu santu, esta, su forsa aktivo, ta hunga den hasi nos kompletamente ekipá. Nos no mester lubidá nunka ku Yehova su spiritu ta e forsa di mas poderoso ku ta eksistí. Yehova a outorisá su Yu stimá pa ehersé e poder inmenso aki na fabor di tur kristian berdadero. P’esei, ta na su lugá ku Hesus a referí na e spiritu santu komo “e yudante.” (Huan 16:7, NW) El a urgi su siguidónan pa nan pidi Yehova p’e spiritu ei, i el a sigurá nan ku Yehova lo duna nan e generosamente.—Lukas 11:10-13; Santiago 1:17.

12, 13. (a) Pakiko ta importante pa nos resa pidi Dios pa su spiritu santu yuda nos den nos ministerio? (b) Kon e fariseonan a mustra ku spiritu santu no tabata obra den nan?

¹² Nos mester resa pidi Dios pa su spiritu santu tur dia, spesialmente p’e yuda nos den nos ministerio. Ki efekto e forsa aktivo ei por tin riba nos? E por traha riba nos mente i nos kurason pa yuda nos hasi kambio, krese spiritualmente i remplasá e hende bieu ku esun nobo. (Kolosensenan 3:9, 10) E por yuda nos kultivá kualidatnan presioso, manera esnan ku Kristu a desplegá. Hopi di nos por ripití Galationan 5:22 i 23 fo’i kabes. E versíkulonan ei ta menshoná fruta dje spiritu di Dios. E promé ta amor. E kualidat ei ta esensial den nos ministerio. Dikon?

¹³ Amor ta e fuente prinsipal di motivashon. Amor pa Yehova i pa próhimo ta motivá kristiannan berdadero pa kompartí e bon nobo ku hende. (Marko 12:28-31) Sin tal amor nos lo no  por bira ègt kapasitá komo siñadó dje Palabra di Dios. Wak e diferensia ku tabatin entre Hesus i e fariseonan. Mateo 9:36 ta bisa di Hesus: “Ora ku el a mira e multitutnan, el a sinti kompashon pa nan, pasobra nan tabata kansá i plamá, manera karné sin wardadó.” Ki aktitut e fariseonan tabatin pa ku e pueblo komun? Nan a bisa: “E multitut aki, ku no konosé e Lei, ta maldishoná.” (Huan 7:49) E fariseonan ei no a sinti niun tiki amor p’e pueblo, mas bien despresio. Klaramente Yehova su spiritu no a obra den nan.

14. Kon Hesus su ehèmpel di mustra amor den su ministerio mester motivá nos?

¹⁴ Hesus tabatin empatia pa hende. E tabata konsiente di nan doló. E tabata sa ku hende a abusá di nan, soya nan i plama nan manera karné sin wardadó. Huan 2:25 ta bisa nos ku Hesus “tabata sa kiko tabatin den hende.” Debí ku e tabata Yehova su Obrero Maestro durante kreashon, Hesus tabatin un komprendementu profundo di naturalesa humano. (Proverbionan 8:30, 31) E komprendementu ei a profundisá su amor. Laga ku semper e amor ei por ta e forsa motivador tras di nos aktividat di prediká! Si nos ta sinti ku nos tin kaminda pa mehorá den e área aki, laga nos pidi Yehova pa su spiritu santu, anto obra na armonia ku nos orashonnan. Yehova lo kontestá nos. Lo e manda e forsa iresistibel aki pa yuda nos pa nos por ta mas manera Kristu, kende tabata kompletamente kapasitá pa prediká e bon nobo.

15. Kon e palabranan di Isaías 61:1-3 ta apliká na Hesus i na mesun momentu ta desenmaskará e eskriba i fariseonan?

¹⁵ Di unda e kapasitashon di Hesus a bini? “E spiritu di SEÑOR ta riba mi,” el a bisa. (Lukas 4:17-21) Sí, Yehova mes a nombra Hesus pa medio di su spiritu santu. Hesus no tabatin mester di mas kualifikashon. Ta spiritu santu a nombra e lidernan religioso di su tempu? Nò. Ni nan no tabata ekipá pa kumpli ku e profesia di Isaías 61:1-3 ku Hesus a lesa na bos haltu i a apliká na su mes. Por fabor, lesa e versíkulonan ei i mira pa bo mes ku e eskribanan i fariseonan hipókrita no tabata kualifiká. Nan no tabatin bon nobo pa deklará na hende pober. Anto kon nan por a prediká liberashon na hende prezu i rekobramentu di bista na hende siegu? Den sentido spiritual, nan mes tabata siegu i katibu di tradishon di hende! Na kontraste ku e hendenan ei, nos sí ta kapasitá pa siña pueblo?

16. Ki konfiansa e pueblo di Yehova awe por tin pa ku nan kualifikashon komo minister?

¹⁶ Ta bèrdat ku nos no a studia na skolnan di siñansa avansá di kristiandat. Ningun seminario teológiko no a nombra nos komo maestro. Esei kier men ku nos no ta kapasitá? Klaro ku nò! Nos nombramentu komo su Testigunan ta bini di Yehova. (Isaías 43:10-12) Si nos pidié su spiritu santu den orashon i obra na armonia kuné, nos tin e kualifikashon di mas haltu. Klaro ku nos ta imperfekto i ta leu di logra sigui e ehèmpel ku e Gran Maestro Hesus a pone pa nos, den un sentido kompleto. Pero apesar di esei, nos no ta gradisidu na Yehova ku e ta usa su spiritu pa kapasitá nos i ekipá nos komo siñadó di su Palabra?

E Organisashon di Yehova Ta Kapasitá Nos

17-19. Kon e sinku reunionnan semanal ku Yehova su organisashon ta perkurá ta yuda kapasitá nos komo minister?

¹⁷ Awor laga nos trata un di tres manera ku Yehova ta ekipá nos komo siñadó di su Palabra: su kongregashon, òf organisashon riba tera ku ta entrená nos pa ta minister. Kon? Djis pensa riba e programa di instrukshon ku nos ta gosa di dje! Normalmente den un siman nos ta asistí na sinku reunion kristian. (Hebreonan 10:24, 25) Nos ta reuní den grupo chikitu n’e Studio di Buki di Kongregashon pa disfrutá di un studio di Beibel profundo mediante un buki ku Yehova su organisashon a perkurá. Dor di skucha i duna komentario nos ta siña di otro i ta kurashá otro. Ademas nos ta risibí instrukshon i atenshon personal serka e superintendente di studio di buki. N’e Reunion Públiko i e Studio di Toren di Vigilansia, nos ta risibí mas kuminda spiritual nutritivo.

 ¹⁸ Nos Skol di Ministerio Teokrátiko ta diseñá pa instruí nos kon pa siña hende. Dor di prepará e partinan pa studiante, nos ta siña kon pa usa e Palabra di Dios pa siña hende un variedat amplio di tema. (1 Pedro 3:15) Bo a yega di haña un asignashon pa duna un parti riba un tema ku a parse bo bon konosí, anto deskubrí ku bo a siña algu nobo tokante dje? E eksperensia ei ta komun. No tin nada ku ta mehorá nos konosementu di un tema mas ku si nos siña otro hende tokante dje. Asta si no ta nos mes tin ku duna un presentashon, tòg nos por siña pa bira mihó maestro. Nos ta nota bon kualidat di kada studiante, i por pensa kon nos por imitá e kualidatnan ei.

¹⁹ E Reunion di Sirbishi tambe ta diseñá pa ekipá nos komo maestro dje Palabra di Dios. Tur siman nos ta disfrutá di diskurso, konsiderashon, i demostrashonnan animá, diseñá pa yuda nos den nos ministerio. Ki presentashon nos lo usa? Kon nos por trata ku e retonan partikular di nos ministerio públiko? Ki rasgonan di predikashon ta posibel pa nos eksplorá mas ainda? Kiko lo yuda hasi nos maestronan mas efikas ora di hasi rebishita i kondusí studio di Beibel? (1 Korintionan 9:19-22) E tipo di preguntanan ei ta ser tratá detayadamente den e Reunion di Sirbishi. Hopi parti dje reunion ta basá riba artíkulonan di Nos Ministerio di Reino, un otro hèrmènt ku Yehova su organisashon ta perkurá pa ekipá nos pa nos trabou vital.

20. Kon nos por benefisiá plenamente dje reunionnan i asambleanan?

²⁰ Dor di prepará pa nos reunionnan, asistí na nan, anto pone loke nos a siña na práktika den nos trabou komo maestro, nos ta risibí entrenamentu ekstenso. Pero esei no ta tur. Nos tin reunionnan mas grandi tambe—asamblea i kongresonan—ku ta ser prepará pa ekipá nos komo maestronan dje Palabra di Dios. I nos ta anhelá mashá pa skucha ku atenshon i pone e konsehonan ei na práktika!—Lukas 8:18.

21. Ki evidensia ta mustra ku nos entrenamentu ta efektivo, i pa ken e mérito ta bai?

²¹ E entrenamentu ku Yehova a perkurá a resultá di ta efikas? Laga e echonan papia pa nan mes. Tur aña, nos ta yuda sientos di míles di hende siña doktrinanan bíbliko básiko i biba na armonia ku loke Dios ta rekerí di nan. Nos ta oumentá na kantidat, pero niun di nos no por tuma e mérito pa e oumento ei. Nos mester mira e asuntunan di manera realístiko, meskos ku Hesus. El a bisa: “Ni un hende no por bin serka mi, si no ta e Tata ku a manda mi a hal’é.” Manera e apòstelnan di ántes, mayoria di nos ta hende komun i sin hopi edukashon. (Huan 6:44; Echonan 4:13) Nos éksito ta dependé di Yehova, ku ta atraé hende sinsero n’e bèrdat. Pablo a ekspresá e asuntu bon: “Ami a planta, Apólos a muha, ma ta Dios a duna kresementu.”—1 Korintionan 3:6.

22. Pakiko nos nunka mester bira demasiado deskurashá tokante partisipá plenamente den e ministerio kristian?

²² Sí, Yehova Dios ta aktivamente enbolbí den nos trabou komo maestro di su Palabra. Kisas no ta semper nos ta sinti nos mes kapasitá komo maestro. Pero kòrda, ta Yehova ta atraé hende na su mes i na su Yu. Ta Yehova ta kapasitá nos komo minister pa yuda esnan nobo pa medio di su Palabra, su spiritu santu i su organisashon riba tera. Laga nos respondé na Yehova su entrenamentu dor di apliká e bon kosnan ku e ta perkurá awor akí pa hasi nos kompletamente ekipá komo siñadónan dje Palabra di Dios!

Kon Lo Bo Kontestá?

• Kon Beibel ta ekipá nos pa e trabou di prediká?

• Ki papel spiritu santu ta hunga den kapasitá nos komo minister?

• Den ki maneranan e organisashon terenal di Yehova a yuda bo bira kapasitá komo predikadó dje bon nobo?

• Pakiko nos por tin konfiansa ora di partisipá den e ministerio?

[Preguntanan di Estudio]

[Plachi na página 25]

Komo siñadó dje Palabra di Dios, Hesus a demostrá amor pa hende