Luchando ku “un Sumpiña den Karni”

“Mi grasia ta basta pa bo.”—2 KORINTIONAN 12:9.

1, 2. (a) Pakiko nos no mester laga e echo ku nos ta enfrentá problema i prueba tolondrá nos? (b) Pakiko nos por ta trankil apesar di prueba?

“TUR hende ku ta deseá di hiba un bida santu den Kristu Hesus lo wòrdu persiguí.” (2 Timoteo 3:12) Pakiko esei ta e kaso? Pasobra Satanas ta pretendé ku hende ta sirbi Dios solamente pa motibunan egoista, i e ta desesperá den su intento pa proba su argumento. Un biaha Hesus a spièrta su disipelnan fiel: “Satanas a pidi pèrmit pa sefta boso manera trigu.” (Lukas 22:31) Hesus tabata bon konsiente ku Dios ta pèrmití Satanas pone nos na prueba ku problemanan penoso. Klaro ku esei no ta nifiká ku tur difikultat ku nos ta enfrentá den bida ta originá direktamente for di Satanas òf su demoñonan. (Eklesiástes 9:11) Pero Satanas ta ansioso pa usa kualkier medio na su disposishon pa kibra nos integridat.

² Beibel ta bisa ku nos no mester laga prueba tolondrá nos. Nada ku bini riba nos ta algu straño òf inesperá. (1 Pedro 4:12) De echo, “[nos] rumannan den henter mundu ta pasando dor di e mesun eksperensianan di sufrimentu.” (1 Pedro 5:9) Awe, Satanas ta poniendo masha preshon riba tur sirbidó di Dios. Mas tantu problema posibel manera sumpiña tormentá nos, mas Diabel ta gosa. Pa logra esei, e ta usa su sistema di kosnan den un manera ku lo por hinka mas ‘sumpiña den nos karni’ òf hasi esnan ku nos tin kaba pió. (2 Korintionan 12:7) No opstante, e atakenan di Satanas no tin nodi kibra nos integridat. Meskos ku Yehova lo “proveé salida” pa nos wanta tentashon, asina tambe lo e hasi ora nos ta enfrentá problemanan ku ta manera sumpiña den nos karni.—1 Korintionan 10:13.

Kon pa Enfrentá un Sumpiña

3. Ora Pablo a pidi Yehova pa kita e sumpiña den su karni, kiko Yehova a kontest’é?

³ Apòstel Pablo a roga Dios pa kita e sumpiña for di su karni. “En kuanto e kos aki mi a roga Señor tres biaha pa esaki por kita for di mi.” Kon Yehova a kontestá Pablo su petishon ferviente? “Mi grasia [bondat inmeresí, NW] ta basta pa bo, pasobra mi poder ta wòrdu hasí perfekto den debilidat.” (2 Korintionan 12:8, 9) Laga nos analisá e kontesta aki i mira kon e  por yuda nos lucha ku kualkier problema ku ta hinka nos manera sumpiña.

4. Den ki maneranan Pablo a benefisiá di Yehova su bondat inmeresí?

⁴ Ripará ku Dios a animá Pablo pa e keda gradisidu p’e bondat inmeresí ku ya kaba a ser mustrá na dje mediante Kristu. Sí, Pablo a ser bendishoná rikamente den vários manera. Yehova a ekstendé su amor na Pablo dor di dun’é e privilegio di ta un disipel di Hesus, ounke e tabata un opositor fanátiko di Hesus su siguidónan. (Echonan 7:58; 8:3; 9:1-4) Despues di esei Yehova tabatin e bondat di duna Pablo hopi asignashon i privilegio emoshonante. Nos ta saka un lès masha kla. Asta ora nos no ta pasando den e mihó momentunan, ainda nos tin hopi bendishon pa kua nos mester ta gradisidu. Nunka nos pruebanan mester pone nos lubidá e gran bondat ku Yehova a mustra na nos.—Salmo 31:19.

5, 6. (a) Kon Yehova a siña Pablo ku poder divino “ta wòrdu hasí perfekto den debilidat”? (b) Kon e ehèmpel di Pablo a proba ku Satanas ta un mentiroso?

⁵ E bondat inmeresí di Yehova ta sufisiente den un otro manera tambe. E poder di Dios ta mas ku sufisiente pa yuda nos pasa dor di nos pruebanan. (Efesionan 3:20) Yehova a siña Pablo ku poder divino “ta wòrdu hasí perfekto den debilidat.” Kon asina? Amorosamente el a duna Pablo tur e forsa ku e tabatin mester pa por a lucha ku su prueba. Na su turno, Pablo su awante i konfiansa apsoluto den Yehova a revelá na tur kristian ku e poder di Dios a triunfá den e kaso dje hòmber débil i pekaminoso aki. Awor konsiderá ki efekto esaki tabatin riba Diabel, kende ta pretendé ku hende ta sirbi Dios solamente ora nan bida ta kómodo i liber di problema. Pablo su integridat tabata manera un bòftá den kara dje kalumniadó ei!

⁶ Pablo mes tabata un aliado di Satanas den su lucha kontra Dios, un persiguidó orguyoso di kristiannan, un fariseo seloso kende un tempu sin duda a biba den luho debí ku el a nase den un klase privilegiá. Awor Pablo tabata sirbi Yehova i Kristu komo “esun di mas ménos di e apòstelnan.” (1 Korintionan 15:9) Komo tal, el a someté su mes humildemente n’e outoridat dje kuerpo gobernante kristian dje promé siglo. I el a wanta fielmente apesar di su sumpiña den karni. Pa Satanas su sorpresa desagradabel, e pruebanan ku Pablo a topa den su bida no a mengua su fe. Nunka Pablo a pèrdè speransa ku un dia lo e forma parti dje Reino selestial di Kristu. (2 Timoteo 2:12; 4:18) Ningun sumpiña, pa kon doloroso ku e tabata, por a mengua su selo. Meskos tambe, laga nos selo sigui fuerte! Dor di sostené nos atraves di nos pruebanan, Yehova ta onra nos ku e privilegio di yuda proba ku Satanas ta un mentiroso.—Proverbionan 27:11.

Yehova Su Perkurashonnan Vital

7, 8. (a) Ki medio Yehova ta usa pa duna su sirbidónan poder awe? (b) Pakiko studia i lesa Beibel tur dia ta asina vital pa nos por lucha ku un sumpiña den karni?

⁷ Awe, Yehova ta duna poder na kristiannan fiel pa medio di su spiritu santu, su Palabra i un hermandat kristian. Meskos ku apòstel Pablo, nos por tira nos karga riba Yehova den orashon. (Salmo 55:22) Ounke kisas Dios no ta kita nos pruebanan, e por duna nos sí e sabiduria pa lucha ku nan, asta esnan ku ta hopi difísil pa soportá. Tambe Yehova por duna nos forsa, esta, “poder mas ayá di loke ta normal,” pa yuda nos soportá.—2 Korintionan 4:7, NW.

⁸ Kon nos ta risibí tal yudansa? Nos mester studia e Palabra di Dios diligentemente, pasobra den dje nos lo haña su konsuelo sigur. (Salmo 94:19) Den Beibel nos ta lesa e palabranan konmovedor di Dios su sirbidónan ora nan tabata roga Dios pa su yudansa. Ta bon pa nos meditá riba e manera ku Yehova a kontestá nan, hopi bes ku palabranan di konsuelo. Un estudio dje Palabra di Dios lo fortifiká nos “p’e poder mas ayá di loke ta normal sea di Dios i no loke ta bini di nos mes.”  Meskos ku nos tin ku kome tur dia pa alimentá nos kurpa i haña energia, asina nos tin ku alimentá nos mente ku e palabranan di Dios regularmente. Nos ta hasi esaki? Si ta asina, e ora ei nos lo mira kon e “poder mas ayá di loke ta normal” ku nos ta risibí ta yuda nos wanta kualkier sumpiña figurativo ku por ta molestiando nos awor.

9. Kon ansianonan por sostené esnan ku ta lucha ku problema?

⁹ Ansianonan kristian ku ta teme Dios por “ta manera un refugio kontra bientu” di angustia, “un protekshon kontra tempestat” di problema. Ansianonan ku kier kuadra ku e deskripshon inspirá ei, ta pidi Yehova humildemente i sinseramente pa duna nan “un lenga ku a wòrdu siñá” pa asina nan por sa kon pa kontestá esnan ku ta sufri, ku e palabranan korekto. E palabranan di ansiano por ta manera un yobida suave ku ta refreská nos i trankilisá nos estado di ánimo durante difikultat den bida. Dor di “enkurashá esnan ku ta falta ánimo,” ansianonan ta ègt sostené nan rumannan spiritual ku lo por ta kansá òf kibrá pa motibu di un ke otro sumpiña den karni.—Isaías 32:2; 50:4; 1 Tesalonisensenan 5:14.

10, 11. Kon Dios su sirbidónan por animá otronan ku ta pasando den pruebanan severo?

¹⁰ Tur sirbidó di Yehova ta parti di su famia kristian uní. Sí, nos ta “miembro” ku ta pertenesé na otro i nos “mester stima otro.” (Romanonan 12:5; 1 Huan 4:11) Kon nos ta kumpli ku e obligashon di stima otro? Segun 1 Pedro 3:8, nos ta hasi esei dor di ‘tene kompashon ku otro, stima manera ruman, i sea miserikòrdioso’ ku tur esnan ku ta relashoná ku nos den fe. Pa loke ta esnan ku ta lucha ku un sumpiña partikularmente doloroso den karni, sea hóben òf bieu, nos tur por mustra un interes spesial den nan. Kon asina?

¹¹ Nos mester hasi esfuerso pa biba ku nan den nan sufrimentu. Si nos no ta sinti pa nan òf si nos ta indiferente, sin ku nos sa nos por ta hasiendo nan sufrimentu pió. E echo ku nos ta konsiente di nan pruebanan ta yuda nos tene kuidou kiko nos ta papia, kon nos ta papia i kon nos ta aktua. E echo ku nos ta optimista i positivo por yuda fria algu dje doló intenso di kualkier sumpiña ku por ta hinkando nan. Asina nos lo por ta un fuente di estímulo pa nan.—Kolosensenan 4:11.

Kon Algun a Vense den e Lucha

12-14. (a) Kiko un kristian a hasi pa lucha ku su malesa di kanser? (b) Kon e rumannan spiritual dje señora aki a sosten’é i anim’é?

¹² Segun ku nos ta aserká e fin di e último dianan aki, e ‘dolónan di angustia’ ta oumentando tur dia. (Mateo 24:8, NW) Pues, tur hende riba tera tin chèns di haña nan ku  prueba, foral Yehova su fiel sirbidónan ku ta hasi esfuerso pa kumpli ku su boluntat. Tuma por ehèmpel un kristian ku ta sirbiendo den e ministerio di tempu kompleto. Dòkter a diagnostiká ku e tabatin kanser i ku e mester a laga saka klir di skupi i linfátiko for di su kurpa. Ora e ku su kasá a haña sa ku e tabatin e malesa aki, mesora nan a akudí na Yehova den un orashon largu den forma di ruego. Mas despues el a bisa ku nan a sinti un pas inkreibel bini riba nan. Tòg el a soportá bastante difikultat, spesialmente ora el a haña su mes ku e efektonan sekundario di su tratamentu.

¹³ Pa e por a trata ku su situashon, e ruman muhé aki a purba haña mas tantu informashon posibel tokante kanser. El a konsultá ku su dòkternan. Den E Toren di Vigilansia, Spièrta! i otro publikashonnan kristian, el a haña eksperensianan di bida real ku ta mustra kon otronan a lucha emoshonalmente ku e enfermedat aki. Tambe el a lesa pasashinan relevante di Beibel ku ta mustra kon Yehova por sostené su pueblo den tempu difísil, i otro informashon balioso.

¹⁴ Un artíkulo ku a papia tokante e problema di desesperashon a sita e palabranan sabí aki: “Esun ku isolá su mes ta buska su mes deseo.” (Proverbionan 18:1) P’esei e artíkulo a duna e konseho aki: “No isolá bo mes.” * E ruman muhé ta konta: “Hopi ruman a bisa mi ku nan ta hasi orashon pa mi; otronan tabata yama mi na telefon. Dos ansiano tabata yama mi regularmente pa wak kon ta bai ku mi. Mi tabata risibí flor i hopi tarheta. Algun asta tabata kushiná pa mi. Tambe, hopi ruman a ofresé pa hiba mi dòkter.”

15-17. (a) Kon un kristian a lucha ku e difikultatnan ku a presentá despues di aksidente di outo? (b) Kon e rumannan den kongregashon a apoy’é?

¹⁵ Un sirbidó di Yehova pa hopi aña na New Mexico, Merka, a haña dos aksidente di outo. El a frakturá su garganta i skouder. Dor di esei, e artrítis ku e tabata lucha kuné pa mas ku 25 aña a bira pió. E ta konta: “Mi tabatin hopi difikultat pa hisa mi kabes i karga un kos ku ta pisa mas ku dos kilo. Pero orashon ferviente na Yehova a sostené mi masha tantu. E artíkulonan den E Toren di Vigilansia ku nos tabata studia tambe a yuda mi hopi. Un di nan a papia di Mikéas 6:8, i a mustra ku ser modesto den kana ku Dios ta nifiká konosé bo limitashonnan. Esaki a yuda mi realisá ku apesar di mi kondishon, mi no mester pèrdè ánimo, ounke e tempu ku mi tabata dediká den e ministerio tabata ménos ku mi a deseá. Loke ta konta na promé lugá ta sirbi Yehova ku motibunan puru.”

¹⁶ El a sigui bisa: “Semper e ansianonan ta elogiá mi p’e esfuersonan ku mi ta hasi pa asistí na reunion i sali den sirbishi di vèlt. E hóbennan ta kumindá mi ku un brasa. E pioneronan tin hopi pasenshi ku mi i hopi bes nan ta adaptá nan orario riba e dianan ku mi enfermedat no ta pèrmití mi sali ku nan. Ora wer ta malu, nan ta bai rebishita ku mi òf invitá mi pa kompañá nan na nan studionan di Beibel. I dor ku mi no por karga tas ku buki, otro publikadónan ta pone mi literatura den nan tas ora mi ta sali prediká.”

¹⁷ Ripará kon e ansianonan di kongregashon i otro kompañeronan di kreensia a yuda e dos ruman muhénan aki enfrentá nan enfermedatnan ku ta manera sumpiña den karni. Nan a ofresé yudansa práktiko i bondadoso ku e propósito di satisfasé nesesidatnan spesífiko riba tereno spiritual, físiko i emoshonal. Esei no ta animá bo pa duna yudansa na otro rumannan ku ta pasando den problema? Hóbennan, boso tambe por yuda e rumannan den boso kongregashon ku ta luchando ku sumpiña den karni.—Proverbionan 20:29.

18. Ki animashon nos por haña den e eksperensianan di bida real publiká den e revistanan Toren di Vigilansia i Spièrta!?

¹⁸ E revistanan Toren di Vigilansia i Spièrta!  a publiká hopi historia di bida i eksperensia di Testigunan ku a lucha, i ku ainda ta luchando, ku problema den bida. Segun ku bo ta lesa e artíkulonan ei regularmente, lo bo mira ku hopi di bo rumannan spiritual rònt mundu a wanta difikultat ekonómiko, pèrdida di ser kerí den desaster i kondishonnan peligroso den tempu di guera. Otronan ta biba ku enfermedatnan ku ta stroba nan di move. Hopi no por hasi ni algun dje kosnan simpel den bida ku pa hende salú ta masha gewoon. Nan enfermedatnan ta un prueba severo pa nan, spesialmente ora nan no por partisipá den aktividatnan kristian manera nan lo a deseá. Nan ta apresiá mashá e yudansa i sosten ku nan rumannan, hóben i bieu, ta duna nan!

Awante Ta Trese Felisidat

19. Kon bin Pablo tabata kapas pa alegrá apesar di su pruebanan i debilidatnan semehante na sumpiña?

¹⁹ Pablo a alegrá ora el a mira kon Dios a fortales’é. El a bisa: “Gustosamente lo mi preferá di gaba den mi debilidatnan, pa e poder di Kristu por biba den mi. P’esei, pa kousa di Kristu mi tin plaser den debilidat, den insulto, den sufrimentu, den persekushon, den problema; pasobra ora mi ta débil, e ora ei mi ta fuerte.” (2 Korintionan 12:9, 10) Pablo su eksperensianan personal a pone ku e por a deklará ku konfiansa: “No ku mi ta papia pasobra mi tin nesesidat; pasobra mi a siña di ta kontentu den ki sirkunstansia ku mi haña mi aden. Mi sa di biba humilde, i mi sa tambe di biba den prosperidat; den kualkier i den tur sirkunstansia mi a siña e sekreto di ta barika yen i di pasa hamber, tantu di tin abundansia komo di pasa nesesidat. Tur kos mi por den [esun, NW], kende ta duna mi fortalesa.”—Filipensenan 4:11-13.

20, 21. (a) Pakiko nos por haña goso ora nos meditá riba e ‘kosnan ku no ta wòrdu mirá’? (b) Kiko ta algun di e ‘kosnan ku no ta wòrdu mirá’ ku bo ta spera di mira den e Paradeis terenal?

²⁰ Pues anto, dor di wanta kualkier sumpiña figurativo den nos karni, nos por haña hopi felisidat den mustra tur hende ku Yehova su poder ta ser hasí perfekto den nos debilidat. Pablo a skirbi: “Nos no ta pèrdè ánimo . . . Nos hende interior ta wòrdu renobá dia pa dia. Pasobra nos aflikshon leve, ku ta pa un momentu so, ta obra pa nos un peso di gloria muchu mas grandi i eterno, miéntras ku nos . . . ta wak e kosnan . . . ku no ta wòrdu mirá. Pasobra e kosnan . . . ku no ta wòrdu mirá ta eterno.”—2 Korintionan 4:16-18.

²¹ Mayoria sirbidó di Yehova awe ta spera di biba den su Paradeis terenal i disfrutá dje bendishonnan ku el a primintí. Nos por konsiderá e bendishonnan komo ‘kosnan ku nos no ta mira’ awe. Sin embargo, e tempu ta aserkando rápidamente ora nos lo mira e bendishonnan ei ku nos propio bista, sí, i disfrutá di nan pa semper. Un dje bendishonnan ei ta ku nos lo ser aliviá pa semper di kualkier problema ku ta manera sumpiña! E Yu di Dios lo “destruí e obranan di Diabel” i “destruí esun ku tabatin poder riba morto.”—1 Huan 3:8; Hebreonan 2:14.

22. Ki konfiansa i determinashon nos mester tin?

²² P’esei, sea kual sea e sumpiña ku por ta hinkando nos awe, laga nos sigui lucha kuné. Yehova lo duna nos e forsa pa hasi esei meskos ku el a duna Pablo p’e lucha ku su sumpiña. Ora nos ta bibando den e Paradeis terenal, nos lo bendishoná Yehova nos Dios tur dia pa tur e kosnan maravioso ku e ta hasi na nos fabor.—Salmo 103:2.

[Nota]

Kon Lo Bo Kontestá?

• Pakiko i kon Diabel ta purba kibra e integridat di kristiannan berdadero?

• Kon Yehova su poder ta ser “hasí perfekto den debilidat”?

• Kon ansianonan i otro rumannan por animá esnan ku ta lucha ku problema?

[Preguntanan di Estudio]

[Plachi na página 18]

Tres biaha Pablo a pidi Dios p’e kita e sumpiña den su karni