Ta Apropiado pa Kristiannan Balsamá Nan Mortonan?

Ora e fiel patriarka Yakòb a sinti ku e tabata serka di muri, el a ekspresá su último deseo: “Dera mi serka mi tatanan den e kueba ku ta keda den e kunuku di Efron e heteo, den e kueba ku ta keda den e kunuku di Makpelá, kual ta keda dilanti di Mamre na tera di Kanan.”—Génesis 49:29-31.

PA Yosef por a kumpli ku e deseo di su tata, el a sigui un kustumber ku a eksistí na Egipto e tempu ei. El a duna òrdu na “su sirbidónan, e dòkternan, pa balsamá su tata.” Di akuerdo ku e relato na Génesis kapítulo 50, e dòkternan a tuma e 40 dianan akustumbrá pa prepará e kadaver. Ta dor ku a balsamá e kurpa di Yakòb, e karavana di miembronan di famia i dignatarionan di Egipto por a hiba e restunan di Yakòb na Hébron pa su entiero. Un biahe lento di 400 kilometer.—Génesis 50:1-14.

Ta posibel ku lo haña e kurpa balsamá di Yakòb un dia? Asta bou di e sirkunstansianan di mas faborabel, e chèns ta masha chikitu. Israel tabata un region di hopi awa, i esei ta pone ku e variedat di artefaktonan arkeológiko ku hende a deskubrí einan ta masha limitá. (Éksodo 3:8) Nan a haña masha hopi metal i piedra di antigwedat, pero mayoria di kosnan frágil manera paña, kueru i kurpanan balsamá no a wanta e humedat i e rigornan di tempu.

Pero kiko presis e proseso di balsamá ta enserá? Dikon hende tabata hasié? E ta apropiado pa kristiannan?

Unda e Kustumber A Originá?

Balsamá kier men simplemente konserbá un kadaver di hende òf di bestia. Historiadónan en general ta kere ku e proseso di balsamá a kuminsá na Egipto, pero ku asirio, perso i skitanan di antigwedat tambe tabata praktik’é. Kisas na prinsipio hende su interes den e proseso di balsamá a lanta ora nan a deskubrí kurpanan ku a ser derá den santu di desierto i ku a keda konserbá dor di naturalesa. E manera ei di dera un kadaver a pone ku el a putri ménos, ya ku e kadaver no a muhá ni haña aire. E teoria di algun historiadó ta ku e kustumber di balsamá a kuminsá ora hende a haña kurpanan ku a keda konserbá den nátron (karbonato di sodio), un tipo di soda ku bo ta haña tur kaminda na Egipto.

Ta balsamá kadaver simplemente pa stroba e bakterianan di kuminsá traha kuné i pon’é  putri. Eseinan sa ataká e kurpa djis despues ku e muri. Si logra stòp e proseso aki, e putrimentu lo stòp òf por lo ménos lo e bai masha slow mes. Tres kos ta nesesario: konserbá e kadaver den un estado natural, evitá ku e ta putri i hasi e kurpa resistente kontra atake di insekto.

E antiguo egipsionan a balsamá nan mortonan prinsipalmente pa motibu religioso. Nan deseo di keda den kontakto ku e mundu di hende bibu tabata basá riba nan kreensia ku tin bida despues di morto. Nan tabata kere ku nan kurpa lo ser usá pa eternidat i ku nan lo haña bida atrobe. Ounke tabata un kustumber komun pa balsamá morto, te awe no a haña ningun relato egipsio ku ta mustra kon nan tabata hasié. E mihó registro ku tin ta esun di Herodoto, un historiadó griego di siglo 5 promé ku Era Komun. Sin embargo, informenan ta mustra ku hende no a haña e mesun resultado ora nan a sigui e instrukshonnan ku Herodoto a skirbi.

E Ta Apropiado pa Kristiannan?

E hendenan ku a balsamá Yakòb no tabatin mesun kreensia religioso kuné. Probablemente e proseso di balsamá morto ku hende a hasi den Egipto a bai kompañá ku orashon i rito. Sin embargo, ta difísil pa nos imaginá ku Yosef a pidi e dòkternan pa sigui esakinan ora ku el a entregá nan e kurpa di su tata. Tantu Yakòb komo Yosef tabata hòmber di fe. (Hebreonan 11:21, 22) Ounke no ta parse ku ta Yehova a manda pa konserbá e kadaver di Yakòb, e Skritura no ta menshoná esaki ku desaprobashon. No a balsamá e kadaver di Yakòb komo un ehèmpel pa e nashon di Israel ni p’e kongregashon kristian sigui. Bon mirá, e Palabra di Dios no ta duna instrukshon spesífiko tokante e tópiko aki. Despues ku nan a balsamá Yosef mes na Egipto, e Skritura no ta menshoná e práktika ei mas.—Génesis 50:26.

Den grafnan na Palestina, nan a haña kadavernan humano den un estado di deskomposishon. Esaki ta indiká ku e hebreonan no tabatin kustumber di balsamá morto, a lo ménos, no pa konserb’é pa un temporada largu. Lázaro por ehèmpel, no tabata balsamá. Maske e tabata lorá den paña, opservadónan tabata preokupá ora mester a kita e piedra ku tabata sera su graf. Dor ku Lázaro a muri kuater dia promé, su ruman muhé a pensa ku sigur mal holó lo a sali ora habri e graf.—Huan 11:38-44.

Nan a balsamá Hesus? E relatonan di Evangelio no ta indiká esei. E tempu ei, hudiunan tabatin e kustumber di prepará kadaver ku speserei i zeta perfumá promé ku nan der’é. Por ehèmpel, pa trata e kurpa di Hesus, Nikodemo a trese un gran kantidat di speserei ku ta ser usá pa e propósito ei. (Huan 19:38-42) Dikon asina hopi speserei? Amor i rèspèt sinsero pa Hesus kisas a impuls’é pa mustra e generosidat ei. Nos no mester konkluí ku nan a usa hopi speserei pa konserbá e kurpa.

Un kristian mester ta kontra e kustumber di balsamá morto? Desde un punto di bista realístiko, e úniko kos ku e proseso di balsamá ta hasi ta posponé loke ta inevitabel. Nos a bini di stòf, i ora nos muri nos ta bolbe na stòf. (Génesis 3:19) Pero kuanto tempu despues ku e persona muri lo der’é? Si tin miembronan di famia ku ta bini djaleu i nan kier mira e defuntu, sin duda lo mester balsamá e kadaver te na sierto grado.

 P’esei anto, for di un punto di bista di Beibel no ta nesesario pa preokupá si lokalmente outoridatnan ta manda pa balsamá e kadaver òf si miembronan di famia kier pa esei tuma lugá. E mortonan “no sa nada.” (Eklesiástes 9:5) Si nan ta den Dios su memoria, lo e lanta nan den su mundu nobo ku el a primintí.—Job 14:13-15; Echonan 24:15; 2 Pedro 3:13.

[Kuadro/Plachi na página 31]

BALSAMÁ MORTO—ÁNTES I AWOR

Den Egipto di antigwedat, e manera ku nan a balsamá un kadaver a dependé di e posishon ku e famia tabatin den sosiedat. Probablemente, un famia riku lo a skohe e siguiente prosedura:

Ku un instrumento di metal nan ta saka e sesunan via di nanishi. Despues di esei ta trata e kráneo ku sierto supstansianan apropiado. E siguiente paso ta enserá saka tur e órganonan interno ku eksepshon di e kurason i e nirnan. Pa yega n’e stoma mester a kòrta e kurpa, pero nan a konsiderá esaki un piká. Pa solushoná e kuestion kontroversial aki, dòkternan egipsio ku tabata balsamá morto a asigná un persona ku nan a yama “kòrtadó,” pa e habri e kadaver. Asina ku el a kaba e tabata hui bai pasobra tabatin kastigu di maldishon i piedramentu pa e supuesto krímen aki.

Despues di saka tur kos for di den e barika, nan ta lab’é bon. E historiadó Herodoto a skirbi: “Nan ta yena e bashí ku mirra puru machiká i kasia [un tipo di kané], i tur sorto di otro speserei ku eksepshon di olíbano, i ta kos’é sera.”

Siguientemente, nan ta seka e kadaver dor di hink’é den nátron pa 70 dia. Despues di esei nan tabata laba e kadaver i lor’é ábilmente den paña di lenen. Anto nan ta kubri e lenen ku un hars òf un tipo di supstansia pegahoso ku a sirbi komo leim, i tabata pone e momia den un kaha di palu bunita dekorá, ku tabatin forma di hende.

Awe por balsamá un kadaver den un par di ora. Generalmente nan ta hasi esaki dor di basha un sierto kantidat di líkido pa balsamá den e bena i adernan i tambe den e barika i pechu ku nan a hasi bashí. Atraves di añanan nan a desaroyá i usa vários líkido. Sin embargo, e líkido ku mas nan ta usa, pa motibu di gastu i siguridat, ta formaldehido.

[Plachi]

E kaha di morto di oro di Rei Tutankamon