Kon un Yu A Yuda Su Tata

JAMES, di Inglatera, tin trint’i piku aña. E ta sufri di desabilidat mental serio, i outismo leve. Tòg e tin hopi aña ta asistí na reunionnan di Testigunan di Yehova ku su mama i su ruman muhé. Su tata sí nunka no a mustra muchu interes den nan kreensianan. Un anochi, despues di un reunion den kua tabatin un demostrashon tokante kon pa invitá un hende konosí pa asistí n’e Konmemorashon dje morto di Kristu, James a bai mesora den su kamber. Su mama a kore bai su tras nervioso, i el a haña James ta buska anshá den su edishonnan bieu di E Toren di Vigilansia i Spièrta! El a skohe unu ku tabatin un invitashon di Memorial imprimí riba e último página, anto bai mesora serka su tata. El a mustra dede riba e invitashon i despues riba su tata, anto el a bisa: “Abo!” Su mama i su tata a wak otro sorprendí ora nan a realisá ku James tabata invitando su tata pa Memorial. Su tata di ku lo e bai kisas.

Riba e anochi di Memorial, James a bai den kashi di su tata i a skohe un karson. El a hib’é pa su tata i a dun’é di komprendé ku e mester bistié. E tata a bis’é ku e no ta bai e reunion. Pues, James ku su mama a sali bai Salon di Reino nan so.

Pero despues, James a kuminsá hasi kada bes mas difísil ora su mama a purba prepar’é pa bai reunion di kongregashon. E tabata preferá di keda kas serka su tata. Riba un djadumingu mainta, James a bolbe nenga di koperá ora su mama a purba prepar’é pa bai reunion. Pa e mama su gran sorpresa, e tata di James a bira bis’é: “James, si mi bai reunion awe, bo tambe ta bai?” James su kara a yena ku alegria. El a bula brasa su tata i bisa: “Sí!” i nan tur tres a bai Salon di Reino.

For dje dia ei, James su tata a keda asistí na tur reunion di djadumingu, i den poko tempu el a bisa ku si e kier hasi progreso lo e mester asistí n’e otro reunionnan tambe. (Hebreonan 10:24, 25) El a hasi esei tambe, i dos luna despues el a kuminsá studia Beibel regularmente. El a progresá lihé, i e no a tarda pa hasi e kambionan nesesario den su bida. Den poko tempu el a kuminsá partisipá den e trabou di prediká e Reino. Un aña despues ku el a kuminsá studia Beibel el a dediká su bida na Yehova i a simbolisá esaki ku boutismo bou di awa. Aktualmente e ta sirbi komo sirbidó ministerial den su kongregashon. Awor, henter e famia ta sirbi Yehova uní.