“Bo Ta un Muhé Ekselente”

E palabranan di elogio aki a ser dirigí na un muhé moabita yòn. E tabata un biuda ku yama Rut, suegra di un muhé israelita, Noemí. Rut a biba den Israel un 3.000 aña pasá, tempu ku huesnan tabata goberná, i a bin haña e fama di ta un muhé ekselente. (Rut 3:11) Kiko a dun’é e reputashon aki? Kiko nos por siña di su ehèmpel?

Komo hende ku no a kome “pan di flohedat,” Rut a traha duru pa oranan largu rekohiendo loke a sobra di kosecha den kunuku. Nan a konsider’é un muhé hopi diligente i a elogi’é pa esei. Asta ora a ofres’é un trabou mas leve, el a sigui traha duru, hasiendo mas di loke por a spera di dje. E sí a ègt kuadra ku e deskripshon ku Beibel ta duna di un esposa elogiabel, kapas i trahadó.—Proverbionan 31:10-31; Rut 2:7, 15-17.

E faktornan prinsipal ku a duna Rut su bon reputashon tabata su kualidatnan spiritual, manera su aktitut humilde di sakrifisio propio i su amor leal. Despues ku el a bandoná su mayornan i su tera natal, ku masha poko speransa di haña e seguridat ku un matrominio lo a trese, el a pega na Noemí. Na mesun tempu, Rut a ekspresá e deseo di sirbi Yehova, e Dios di su suegra. E relato bíbliko ta pone énfasis riba kuantu balor e tabatin bisando ku e tabata “mihó pa [Noemí] ku shete yu hòmber.”—Rut 1:16, 17; 2:11, 12; 4:15.

Ounke Rut su reputashon komo muhé ekselente entre e otro muhénan di su tempu tabata digno di elogio, hopi mas importante tabata e manera faborabel ku Dios a mira su kualidatnan i e manera ku el a rekompens’é ku e privilegio di bira antepasado di Hesukristu. (Mateo 1:5; 1 Pedro 3:4) Rut ta un bunita ehèmpel no solamente pa muhénan kristian sino pa tur hende ku ta bisa ku nan ta adorá Yehova.