Sigui e Patronchi di Reinan

“E mester skirbi pa su mes un kopia di e lei aki riba un ròl . . . I e mester tin esaki huntu kuné i mester les’é tur e dianan di su bida.”—DEUTERONOMIO 17:18, 19.

1. Manera ken un kristian lo kier ta?

LO BO no kompará bo mes fásilmente ku un rei òf un reina. Kua kristian fiel i studiante di Beibel lo imaginá su mes ta aktua ku outoridat real, manera e bon reinan David, Hosías, Ezekías òf Yehósafat? Tòg, den por lo ménos un manera spesial, bo por i bo mester ta manera nan. Den ki manera? I pakiko lo bo mester kier ta manera nan den e sentido ei?

2, 3. Kiko Yehova a premirá relashoná ku un rei humano, i kiko un rei asina mester a hasi?

² Den e dianan di Moises, hopi tempu promé ku Dios aprobá p’e israelitanan haña un rei humano, El a premirá ku den su pueblo lo lanta e deseo pa nan haña un rei. P’esei el a inspirá Moises pa inkluí instrukshonnan ku tin di haber ku esei, esta, instrukshonnan pa un rei, den e pakto di Lei.

³ Dios a bisa: “Ora bo drenta e tera ku SEÑOR bo Dios ta duna bo, . . . i bo bisa: ‘Lo mi pone un rei riba mi, manera tur e nashonnan ku tin rònt di mi,’ e ora ei siguramente bo mester pone un rei riba bo ku SEÑOR bo Dios skohe. . . . Awor lo sosodé ku ora e sinta riba trono di su reino, e mester skirbi pa su mes un kopia di e lei aki . . . I e mester tin esaki huntu kuné i mester les’é tur e dianan di su bida, pa e siña teme SEÑOR su Dios, dor di pèrkurá di kumpli ku tur e palabranan di e lei i di e statutonan aki.”—Deuteronomio 17:14-19.

4. Kiko tabata un dje instrukshonnan ku Dios a duna reinan?

⁴ Sí, e rei ku Yehova lo a skohe pa su adoradónan mester a traha un kopia personal di skrituranan ku abo por haña den bo Beibel. Anto, e rei mester a lesa for di e kopia ei tur dia, bes tras bes. No tabata djis pa siña esakinan fo’i kabes. E mester a studi’é ku un bon meta. E rei ku lo tabatin e aprobashon di Yehova mester a studia e skrituranan inspirá p’e por a desaroyá i keda ku un aktitut korekto di kurason. Tambe e mester a studia nan p’e por a bira un rei sabí i eksitoso.—2 Reinan 22:8-13; Proverbionan 1:1-4.

Siña Manera un Rei

5. Ki parti di Beibel Rei David tabatin ku kopia i lesa, i kiko el a pensa di esaki?

⁵ Kiko bo ta kere esei lo a nifiká pa David ora el a bira rei riba Israel? Wèl, lo e tabatin ku traha un kopia dje bukinan di e Pentateuko (Génesis, Éksodo, Levítiko, Numbernan, Deuteronomio). Ora David a traha un kopia di e Lei ku su propio bista i mannan, esei lo mester a hasi un impreshon profundo riba su mente i kurason. Probablemente, Moises a skirbi tambe e buki di Job i tambe Salmo 90 i 91. David lo a kopia esakinan tambe? Tal bes. Ademas, ku tur probabilidat e tabata disponé di e bukinan di Hosué, Huesnan i Rut. Pues bo por mira ku Rei David lo tabatin un parti grandi di Beibel pa  lesa i apsorbá. I bo tin motibu pa kere ku ta esei el a hasi tambe, foral ora bo lesa su komentarionan tokante e Lei di Dios na Salmo 19:7-11.

6. Kon nos por ta sigur ku Hesus tabatin mesun interes den e Skritura ku su antepasado David?

⁶ E David Mayor—Hesus, Yu di David—a sigui e mesun patronchi. Hesus tabatin e kustumber di bai n’e snoa lokal tur siman. Ei e tabata tende nan lesa i splika e Skritura. Mas ku esei, na algun okashon Hesus mes a lesa públikamente na bos haltu for dje Palabra di Dios i a splika su aplikashon. (Lukas 4:16-21) Bo por mira mesora ku e tabata konosé e Skritura hopi bon. Djis lesa e relatonan di Evangelio, i ripará kuantu bes Hesus a bisa “ta pará skirbí” òf a referí den otro maneranan na pasashinan spesífiko di e Skritura. Un ehèmpel ta su Sermon Riba Seru ku Mateo a skirbi. Den e parti aki Hesus a sita 21 biaha for dje Skritura Hebreo.—Mateo 4:4-10; 7:29; 11:10; 21:13; 26:24, 31; Huan 6:31, 45; 8:17.

7. Kon distinto Hesus tabata for di lidernan religioso?

⁷ Hesus a sigui e konseho na Salmo 1:1-3: “Bendishoná ta e hende ku no ta kana den e konseho di malbadonan, . . . Ma su delisia ta den e lei di SEÑOR, i den su lei e ta meditá di dia i anochi. . . . Tur loke ku e hasi ta prosperá.” Esei tabata na kontraste skèrpi ku e lidernan religioso di su tempu, kendenan a “sinta riba stul di Moises” pero a ignorá “e lei di SEÑOR.”—Mateo 23:2-4.

8. Pakiko ta pòrnada e lidernan religioso hudiu tabata lesa i studia Beibel?

⁸ Sin embargo, tin un pasashi den Beibel ku lo por konfundí algun hende pasobra nan ta interpret’é komo si fuera Hesus a desanimá hende pa studia Beibel. Na Huan 5:39 i 40 nos ta lesa loke Hesus a bisa algun hende den su tempu: “Boso ta skrudiñá e Skrituranan, pasobra boso ta kere ku ta den nan boso tin bida eterno; i ta esakinan ta duna testimonio di mi; i boso no kier bin serka mi pa boso por tin bida.” Ku e komentario ei Hesus no a desanimá su oyentenan hudiu pa studia e Skritura. Mas bien, el a saka na kla kon insinsero i inkonsistente nan tabata. Nan a realisá ku e Skritura lo por a guia nan na bida eterno, pero e mesun Skritura ku nan tabata investigá lo mester a dirigí nan tambe na e Mesias, Hesus. Tòg nan a nenga di asept’é. Pues ta pòrnada nan tabata studia pasobra nan no tabata sinsero ni dispuesto pa siña.—Deuteronomio 18:15; Lukas 11:52; Huan 7:47, 48.

9. Ki bon ehèmpel e apòstelnan i e profetanan mas promé a pone?

⁹ E situashon tabata kompletamente diferente sí serka Hesus su disipelnan, entre kua e apòstelnan! Nan a studia “e skrituranan santu, kualnan por duna [hende] e sabiduria ku ta hiba na salbashon.” (2 Timoteo 3:15) Den esaki nan tabata manera e profetanan mas promé ku “a hasi búskeda i investigashon ku tur diligensia.” E profetanan ei no a mira e investigashon ei komo un solo periodo di estudio intenso pa un par di luna òf un aña. Apòstel Pedro ta bisa ku nan tabata “buskando,” partikularmente tokante e Kristu i kon su papel komo salbadó di humanidat a resultá den gloria p’e. Den su promé karta Pedro ta sita 34 biaha for di dies buki di Beibel.—1 Pedro 1:10, 11.

10. Pakiko kada un di nos mester ta interesá den un studio di Beibel?

¹⁰ Klaramente anto, e reinan di Israel di  antigwedat tabatin e tarea pa studia e Palabra di Dios kuidadosamente. Ta e patronchi aki Hesus a sigui. I esnan ku lo goberná ku Kristu komo rei den shelu tambe tin ku studia e Palabra di Dios. (Lukas 22:28-30; Romanonan 8:17; 2 Timoteo 2:12; Revelashon 5:10; 20:6) Awe, tur hende ku ta anhelá pa risibí e bendishonnan riba tera bou di gobernashon di Reino tin ku sigui e mesun patronchi aki di reinan.—Mateo 25:34, 46.

Instrukshon p’e Reinan Ta Konta pa Abo Tambe

11. (a) Pa loke ta studiamentu di Beibel, ki peliger kristiannan ta kore? (b) Kiko nos tin ku puntra nos mes?

¹¹ Nos por bisa enfátikamente i ku tur sinseridat ku kada kristian berdadero mester eksaminá Beibel personalmente. Esei no ta algu ku bo tabatin ku hasi solamente ora bo a studia Beibel ku Testigunan di Yehova pa promé biaha. Kada un di nos mester ta determiná pa evitá di bira manera algun persona den tempu di apòstel Pablo ku despues di poko tempu a kuminsá neglishá nan studio personal. Nan a siña “e prinsipionan elemental di e palabra di Dios,” manera “siñansa elemental tokante di e Kristu.” Pero nan no a sigui studia i p’esei no a “sigui padilanti pa yega na madures.” (Hebreonan 5:12–6:3) P’esei, nos por puntra nos mes: ‘Sea ku mi ta asosiando ku e kongregashon kristian pa un poko tempu òf pa hopi aña kaba, kiko mi ta pensa di un studio personal di e Palabra di Dios? Pablo a pidi den orashon pa e kristiannan den su tempu “krese den e konosementu di Dios.” Mi ta mustra ku mi tin e mesun deseo ei?’—Kolosensenan 1:9, 10.

12. Pakiko ta importante pa nos kultivá un amor kontinuo pa e Palabra di Dios?

¹² Pa bo por haña bon kustumbernan di studia ta importante pa bo siña stima e Palabra di Dios. Salmo 119:14-16 ta mustra ku loke por yuda bo haña delisia den e Palabra di Dios ta ora bo ta meditá regularmente riba dje ku un propósito na mente. I maske kuantu aña bo tin komo kristian, esei ta konta pa bo tambe. E ehèmpel di Timoteo ta enfatisá esei. Kòrda ku ounke e ansiano kristian aki tabata sirbiendo kaba komo “un bon sòldá di Kristu Hesus,” tòg Pablo a urgié p’e hasi tur su esfuerso p’e “parti e palabra di bèrdat na un manera korekto.” (2 Timoteo 2:3, 15; 1 Timoteo 4:15) Sin duda, bo máksimo “esfuerso” ta enserá tambe desaroyá un bon kustumber di studia.

13. (a) Kon bo por saka mas tempu pa studia Beibel? (b) Ki kambionan lo bo por hasi pa saka mas tempu pa studia?

¹³ Pa bo logra desaroyá un bon kustumber di studia, bo tin ku apartá tempu regularmente pa studia Beibel. Kon ta bai ku esei? Sea kual sea bo kontesta franko, bo no ta kere ku ta kumbiní bo dediká mas tempu na studio personal? Kisas bo ta puntra: ‘Unda mi ta saka tempu pa esei?’ Wèl, algun persona a logra gana mas tempu pa studia Beibel bon dor di lanta un tiki mas trempan mainta. Tal bes nan ta lesa Beibel pa 15 minüt òf traha riba un proyekto di studio personal. Tin posibilidat tambe pa bo hasi un ahuste chikitu den bo programa semanal? Por ehèmpel, si bo tin e kustumber di lesa korant kasi tur dia òf wak notisia anochi na televishon, ta posibel pa bo salta esei maske ta un dia pa siman? Lo bo por usa e tempu riba e dia ei pa studia Beibel mas tantu. Si bo usa e tempu di lesa òf wak notisia di un dia i dediká un 30 minüt asina na studio personal, lo bo gana mas ku 25 ora pa aña. Imaginá bo e benefisionan di 25 ora mas na lesa òf studia Beibel! Ata un otro sugerensia aki: Den kurso di otro siman, analisá bo aktividatnan na fin di kada dia. Wak si bo por haña algu ku no ta indispensabel òf ku bo por dediká ménos tempu na dje pa asina bo sobra mas tempu pa lesa i studia Beibel.—Efesionan 5:15, 16.

14, 15. (a) Pakiko ta importante pa pone meta ora ta trata di studio personal? (b) Kiko ta e posibel metanan relashoná ku lesamentu di Beibel?

¹⁴ Kiko lo hasi studiamentu mas fásil i mas interesante pa bo? Pone meta. Ki metanan rasonabel di studio lo bo por pone? Pa hopi  hende, un dje promé bon metanan ta esun di lesa Beibel kompleto. Talbes te awor, bo a lesa sekshonnan di Beibel na algun okashon i bo a benefisiá di dje. Pakiko no sea determiná awor pa lesa Beibel kompleto? Pa bo logra den esei, bo por kuminsá na lesa e kuater evangelionan, despues bo por pone bo pa lesa e resto di e Skritura Griego Kristian. Una bes bo a haña e satisfakshon den esei i e benefisionan ku e ta trese kuné, bo siguiente paso lo por ta pa lesa un pa un e bukinan di Moises i e bukinan históriko i yega te Èster. Ora bo logra esei, lo bo mira ku ta realístiko pa kompletá e resto di Beibel. Un señora ku a bira kristian tempu ku e tabatin rònt di 65 aña di edat, a skirbi riba e kaft paden di su Beibel e fecha ku el a kuminsá lesa i despues e fecha ku el a kaba. Awor e tin sinku par di fecha! (Deuteronomio 32:45-47) I en bes di lesa riba monitor di kòmpiuter òf papel di print, el a lesa dirèkt for di Beibel.

¹⁵ Algun persona ku ya a kumpli ku e meta di lesa Beibel kompleto ta dal otro stap pa hasi nan estudio kontinuo mas produktivo i mas plasentero. Un manera ku nan ta hasi esei ta dor di studia informashon tokante e buki di Beibel promé ku nan lesa e buki mes. Den “Tur Skritura Ta Inspirá pa Dios i Ta Benefisioso” i Perspikasia pa Komprendé e Skritura, bo por haña ekselente informashon tokante e marko históriko, estilo i e benefisionan ku bo por saka for di kada buki di Beibel. *

16. Ken su ehèmpel nos mester evitá ora nos ta studia Beibel?

¹⁶ Durante bo estudio, evitá e método komun di e asina yamá eruditonan òf analistanan di Beibel. Nan ta pone demasiado atenshon riba analisá tekstonan komo si fuera Beibel ta di orígen humano. Algun di nan ta purba saka afó ta pa ken sierto buki a ser skirbí, òf ta imaginá nan ki meta òf punto di bista e outor humano di kada buki lo tabatin na mente. Dor di tal rasonamentu humano nan ta rebahá Beibel na un simpel buki di historia òf nan ta konsider’é komo e fuente di kambio den religionnan di mundu. Otro eruditonan ta dediká nan na estudio di palabra, manera e aspektonan lingwístiko di literatura di Beibel. Nan ta okupá nan mes mas ku studiamentu di orígen di palabra i nifikashonnan hebreo i griego, ku e mensahe di Dios mes. Abo ta kere ku un método asina lo por duna bo un fe motivador i profundo?—1 Tesalonisensenan 2:13.

17. Pakiko nos mester mira Beibel komo un buki ku tin un mensahe pa tur hende?

¹⁷ E konklushonnan ku e eruditonan ta saka ta sikiera válido? Akaso kada buki di Beibel tin un punto klave so òf ta intenshoná pa un solo ouditorio? (1 Korintionan 1:19-21) Echo ta ku e bukinan di e Palabra di Dios tin un balor permanente pa hende di tur edat i antesedente. Asta si un buki a ser dirigí inisialmente na un solo persona, manera Timoteo òf Tito, òf na un grupo partikular, tal bes e galationan òf e filipensenan, nos tur por i mester studia e bukinan ei. Nan ta importante pa kada un di nos, i kisas un buki en partikular ta trata vários tema ku ta na benefisio di vários ouditorio. Sí, e mensahe di Beibel ta universal, i esaki ta yuda nos komprendé pakiko el a ser  tradusí den e idiomanan di hende rònt mundu.—Romanonan 15:4.

Benefisioso pa Abo i pa Otro Hende

18. Riba kiko bo tin ku meditá ora bo ta lesa e Palabra di Dios?

¹⁸ Ora bo ta studia, lo bo haña ku ta masha benefisioso pa trata na komprendé Beibel i tambe pa purba mira kon tur e detayenan ta relashoná ku otro. (Proverbionan 2:3-5; 4:7) Loke Yehova a revelá mediante su Palabra ta estrechamente ligá ku su propósito. Pues segun ku bo ta lesa, relashoná e echonan i e konseho ku bo ta haña den Beibel ku e propósito di Dios. Bo por puntra bo mes kon un insidente, idea òf profesia ta relashoná ku e propósito di Yehova. Puntra bo mes: ‘Kiko esaki ta siña mi di Yehova? Kon e ta relashoná ku e propósito ku e Reino di Dios lo kumpli kuné?’ Tambe bo por meditá riba: ‘Kon mi por usa e informashon aki? Mi por us’é pa siña òf konsehá otro hende basá riba e Skritura?’—Hosué 1:8.

19. Ken ta benefisiá ora bo ta konta otronan dje kosnan ku bo a siña? Splika.

¹⁹ E benefisionan di pensa riba otro hende ta hopi. Ora bo ta lesa i studia Beibel, lo bo siña kosnan nobo i haña un komprendimentu mas profundo. Purba inkluí esakinan den bo kòmbersashonnan edifikante ku miembronan di bo famia òf ku otro hende. Si bo hasi esei na oranan apropiá i na un manera modesto, sin duda e kòmbersashonnan ei lo ta plasentero. Ora bo ta konta na un manera sinsero i entusiasmá tokante loke bo a siña òf e aspektonan ku bo a haña interesante, probablemente e informashon ei lo hasi un impreshon riba otro hende. Mas ku esei, lo bo saka benefisio personal tambe. Den ki manera? Ekspertonan a remarká ku un persona lo kòrda loke el a siña òf studia mihó ora e ta usa òf ripití loke ta fresku ainda den su mente; por ehèmpel, ora e ta papia ku otro hende tokante eseinan. *

20. Pakiko ta probechoso pa lesa Beibel bes tras bes?

²⁰ Kada bes ku bo pasa dor di un buki di Beibel, sigur lo bo siña algu nobo. Sierto pasashinan  ku anteriormente no tabata nifiká muchu pa bo, awor ta impreshoná bo mas. Nan lo haña un nifikashon nobo. Esaki mester suprayá e echo ku e bukinan di Beibel no ta simplemente literatura humano, sino tesoronan riku pa bo studia bes tras bes i saka benefisio. Kòrda ku asta un rei, manera David, mester a “les’é tur e dianan di su bida.”

21. Ki rekompensa bo por spera di risibí ora bo dediká mas tempu na studia e Palabra di Dios?

²¹ Sí, esnan ku ta saka tempu pa studia Beibel a fondo ta saka masha hopi probecho. Nan ta gana tesoro i komprendementu spiritual. Nan relashon ku Dios ta bira mas fuerte i mas íntimo. Tambe nan lo por ta un gran yudansa pa miembro di famia, pa e rumannan den e kongregashon kristian i pa esnan ku ainda tin ku bira adoradó di Yehova.—Romanonan 10:9-14; 1 Timoteo 4:16.

[Nota]

Bo Ta Kòrda?

• Kiko e reinan di Israel mester a hasi?

• Ki ehèmpel Hesus i e apòstelnan a pone pa loke ta studiamentu di Beibel?

• Ki ahustenan bo por hasi pa oumentá e tempu ku bo ta dediká na studio personal?

• Ku ki aktitut mental bo tin ku studia e Palabra di Dios?

[Preguntanan di Estudio]

[Kuadro na página 15]

“Den Nos Man”

“Si nos kier haña . . . un konkordansia di Beibel, no tin mihó instrumento ku Internet. Pero si nos kier lesa Beibel, studi’é, pensa riba dje, meditá riba dje, nos mester tin e den nos man, pasobra esei ta e úniko forma pa nos logra hañ’é den nos mente i kurason.”—Gertrude Himmelfarb, distinguido profesor penshoná di City University, New York.