Adorá Dios “den Spiritu”

“Ku ken boso ke kompará Dios antó, ku kua imágen boso ke represent’é?”—ISAÍAS 40:18, “BEIBEL NA PAPIAMENTU KORIENTE”

KISAS bo ta sinseramente konvensí ku ta aseptabel pa usa prenchi den adorashon di Dios. Podisé bo ta haña ku esaki ta trese bo mas serka di Esun ku ta skucha orashon, kende ta invisibel i lo por parse impersonal i difísil pa imaginá.

Pero nos ta kompletamente liber pa skohe nos propio manera di aserká Dios? No ta Dios mester ta esun ku na final di kuenta ta disidí kiko ta aseptabel i kiko nò? Hesus a splika kon Dios ta mira e asuntu ora el a bisa: “Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.” (Huan 14:6) E palabranan ei mes kaba ta prohibí uso di prenchi òf kualkier otro opheto sagrado.

Kier men anto ku tin un tipo di adorashon spesífiko ku Yehova Dios ta aseptá. I kua esei ta? Na un otro okashon Hesus a splika: “E ora lo yega, i ta awor, ku e adoradónan berdadero lo adorá e Tata den spiritu i bèrdat; pasobra ta hendenan asina e Tata ta buska pa ador’é. Dios ta spiritu, i esnan ku ta ador’é mester adorá den spiritu i bèrdat.”—Huan 4:23, 24.

Un imágen trahá por representá Dios—kende “ta spiritu”? Nò. Maske kon impreshonante un prenchi por ta, nunka e no por igualá e gloria di Dios. Pues un imágen di Dios nunka lo por ta un berdadero representashon di dje. (Romanonan 1:22, 23) Un persona lo ta rindiendo ‘adorashon den bèrdat’ si e ta aserká Dios via un prenchi ku hende a traha?

Un Siñansa Bíbliko Bon Kla

E Lei di Dios a prohibí hende di traha imágen komo opheto di adorashon. E di dos di e Dies Mandamentunan a dekretá: “No traha  ningun imágen grabá pa bo mes, ni nada semehante na loke tin ariba den shelu, ni abou riba tera, ni den e awa bou di tera. No adorá nan ni sirbi nan.” (Éksodo 20:4, 5) E Skritura Kristian inspirá tambe ta manda: “Mi stimánan, hui for di idolatria.”—1 Korintionan 10:14.

Ta sierto ku hopi hende ta insistí ku nan uso di imágen den adorashon no ta idolatria. Por ehèmpel kristiannan òrtodòks, hopi bes ta bisa ku no ta adorá nan ta adorá e prenchinan ora nan bùig, hinka rudia i resa nan dilanti. Un pastor òrtodòks a skirbi: “Nos ta venerá nan pasobra nan ta ophetonan santu, i pasobra nos tin rèspèt profundo pa loke e Prenchinan ta representá.”

Pero tòg ta keda e pregunta: Dios ta aprobá pa usa prenchi supuestamente pa vener’é indirektamente? Niun kaminda den Beibel nos no ta haña ku e ta outorisá esei. Ora e israelitanan a traha un imágen di un bisé, supuestamente pa venerá Yehova, el a desaprobá esei totalmente i a bisa ku nan a korumpí nan mes.—Éksodo 32:4-7.

E Peliger Skondí

Uso di imágen den adorashon ta un práktika peligroso. Fásilmente hende por kai den e tentashon pa adorá e opheto en bes di e Dios ku e opheto supuestamente ta representá. Ku otro palabra, e prenchi ta bira e opheto sentral pa idolatria.

 Esei a sosodé ku vários opheto den tempu di e israelitanan. Por ehèmpel, durante nan biahe dor di e desierto, Moises a traha un kolebra di bròns. Originalmente, imágen di e kolebra pegá riba un palu a sirbi komo un medio pa haña kurashon. Esnan ku a ser kastigá ku un mordé di kolebra lo por a wak e kolebra di bròns i ser kurá dor di Dios. Pero ta parse ku despues ku e pueblo a establesé nan mes den e Tera Primintí, nan a hasi e kolebra riba e palu aki un ídolo, komo si fuera ta e kolebra di bròns mes tabatin e poder pa kura. Nan tabata kima sensia p’e i asta a dun’é un nòmber, Nehustan.—Numbernan 21:8, 9; 2 Reinan 18:4.

E arka di aliansa tambe e israelitanan a purba usa komo un talisman kontra nan enemigunan, i esei tabatin resultado desastroso. (1 Samuel 4:3, 4; 5:11) I den tempu di Yeremías, e siudadanonan di Yerúsalèm tabata mas interesá den e tèmpel ku den e Dios ku nan a adorá den e tèmpel.—Yeremías 7:12-15.

E tendensia di adorá kos en bes di Dios te ainda ta tur kaminda. Investigadó Vitalij Ivanovich Petrenko a bisa: “E prenchi . . . ta bira e opheto di adorashon i ta kore peliger di ta idolatria . . . Mester atmití ku básikamente esaki ta un idea pagano ku nan a introdusí den adorashon di prenchi.” Asina tambe e pastor griego òrtodòks Demetrios Constantelos ta bisa den su buki Understanding the Greek Orthodox Church (Komprendé e Iglesia Griego Òrtodòks): “Ta posibel pa un kristian hasi un prenchi e opheto di adorashon.”

E argumento ku prenchinan ta simplemente yudansa pa adorá Dios ta un argumento sumamente kuestionabel. Dikon? Wèl, bo no a ripará ku hende ta konsiderá sierto  prenchinan di Maria òf di “santu” komo mas digno di deboshon i mas útil ku otro prenchinan di e mesun persona ku tin hopi tempu morto? Por ehèmpel, un sierto prenchi ku ta representá Maria na Tínos, Gresia, tin su propio debotonan òrtodòks ku ta siguié na komparashon ku e debotonan mesun fiel di un prenchi ku ta representá Maria na Soumela, den parti nort di Gresia. Ámbos grupo ta kere ku nan prenchi ta superior i ta hasi milagernan mas impreshonante ku e otro, maske tur dos ta representá e mesun persona ku tin hopi tempu morto. Pues den práktika, hende ta atribuí berdadero poder na sierto prenchinan i ta adorá nan.

Mester Resa na “Santu” òf na Maria?

Pero kiko di e venerashon di personanan individual, manera Maria òf un “santu”? Ora Hesus a kontestá un tentashon di Satanas, el a referí na Deuteronomio 6:13 i a bisa: “Adorá SEÑOR bo Dios, i sirbi E so.” (Mateo 4:10) Mas despues el a bisa ku adoradónan berdadero mester adorá “e Tata,” i niun otro persona. (Huan 4:23) Konsiente di esaki, un angel a skual apòstel Huan pasobra Huan a purba ador’é, i el a bisa: “No hasi e kos ei . . . adorá Dios.”—Revelashon 22:9.

Ta korekto pa resa na Hesus su mama humano, Maria, òf na sierto “santu,” pidiendo nan pa roga Dios pa nos? Beibel ta kontestá bon kla: “Ta ún Dios so tin, i ún Mediador tambe entre Dios i hende, e hende Kristu Hesus.”—1 Timoteo 2:5.

Protehá Bo Relashon ku Dios

Uso di prenchi den adorashon no por yuda hende haña Dios su aprobashon ni gana salbashon ya ku esei ta kontra di e siñansa bon kla di Beibel. Di otro banda, Hesus a bisa ku pa haña bida eterno nos mester gana konosementu di e úniko Dios berdadero, i siña konosé su personalidat inigualabel i tambe su propósito i e manera ku el a trata hende. (Huan 17:3) Prenchinan ku no ta mira, sinti ni papia no por yuda un persona siña konosé Dios i ador’é na un manera aseptabel. (Salmo 115:4-8) E edukashon sumamente importante ei ta disponibel solamente mediante un studio di e Palabra di Dios, Beibel.

Fuera ku adorashon di prenchi no ta duna ningun benefisio, e por ta peligroso tambe den sentido spiritual. Kon asina? Prinsipalmente pasobra e por kibra bo relashon ku Yehova. Dios a bisa di Israel, ‘ku a provok’é na rabia ku kosnan abominabel’: “Lo mi skonde mi kara pa nan.” (Deuteronomio 32:16, 20, 21) Pa nan por a drecha nan relashon ku Dios nan mester a ‘deshasí di nan ídolonan.’—Isaías 31:6, 7.

P’esei e siguiente konseho bíbliko ta mashá na su lugá: “Yu chikitunan, warda boso di ídolonan”!—1 Huan 5:21.

[Kuadro na página 6]

Yudá pa Adorá Dios “den Spiritu”

Olivera tabata un miembro deboto di Iglesia Òrtodòks na Albania. Ora ku na 1967 e pais a prohibí religion, Olivera a sigui praktiká su religion den sekreto. E tabata usa gran parti di su pida penshon pa kumpra prenchi di oro i plata, sensia i bela. E tabata skonde nan den su kama i hopi bes a drumi den un stul banda di e kama pasobra e tabatin miedu pa hende mira nan òf hòrta nan. Ora Testigunan di Yehova a bishitá Olivera na komienso di añanan ’90, el a rekonosé e bèrdat bíbliko den nan mensahe. El a mira ku Beibel ta bisa ku adorashon berdadero mester ta “den spiritu,” i el a siña kiko Dios ta pensa di e uso di prenchi. (Huan 4:24) E Testigu ku tabata studia Beibel kuné a ripará ku kada bes ku e bishitá Olivera tabatin ménos prenchi den kas. Finalmente no a keda niun. Despues ku Olivera a batisá el a bisa: “Awe mi tin Yehova su spiritu santu en bes di prenchinan inútil. Mi ta masha gradisidu ku mi por tin su spiritu santu sin mester usa prenchi.”

Athena, ku ta di e isla Lesbos na Gresia, tabata un miembro masha aktivo mes di Iglesia Òrtodòks. E tabata kanta den kor i a sigui tradishon religioso a pie de la letra, entre otro, e uso di prenchi. Testigunan di Yehova a yuda Athena realisá ku no ta tur loke el a siña tabata di akuerdo ku Beibel. Esaki a inkluí e uso di prenchi i krus den adorashon. Athena a insistí p’e mes investigá e orígen di e ophetonan religioso aki. Despues di a investigá vários buki di referensia, el a keda konvensí ku e ophetonan aki no a originá di e promé kristiannan. Su deseo pa adorá Dios “den spiritu” a motiv’é pa deshasí di su prenchinan, apesar ku nan tabata bal hopi plaka. Pero Athena gustosamente a hiba kualkier pèrdida basta e por a adorá Dios den un manera limpi i aseptabel.—Echonan 19:19.

[Kuadro/Plachi na página 7]

Prenchi Komo Arte?

Último añanan, hende rònt mundu a kuminsá kolekshoná prenchi òrtodòks. Por lo general kolekshonistanan ta konsiderá prenchi no komo un opheto religioso sagrado, sino komo un obra di arte ku ta reflehá e kultura di e era bizantino. Hopi bes bo por haña e prenchinan religioso aki ta dekorá kas òf ofisina di un persona ku ta bisa ku e no ta kere den Dios.

Sin embargo, kristiannan no ta lubidá e propósito prinsipal di prenchi. Prenchi ta un opheto di adorashon. Ounke kristiannan ta laga kada ken ku su derecho di tin prenchi, nan mes personalmente no tin prenchi den nan poseshon, ni sikiera komo obra di arte. Esaki ta na armonia ku e siguiente prinsipio ku ta pará skirbí na Deuteronomio 7:26: “No trese un abominashon [imágennan usá den adorashon] den bo kas, pa bo no bin bou di maldishon meskos kuné; odi’é di henter bo kurason i abores’é di henter bo kurason.”

[Plachi na página 7]

Dios no a pèrmití uso di imágen den adorashon

[Plachi na página 8]

Konosementu di Beibel ta yuda nos adorá Dios den spiritu