“Bini Serka Mi, . . . i Lo Mi Refreská Boso”

“Laga Nos Hasi Bon na Tur Hende”

E AKTIVIDAT prinsipal di Hesus tabata di siña i prediká e evangelio dje Reino di Dios. (Marko 1:14; Lukas 8:1) Dor ku e siguidónan di Kristu kier imit’é, nan ta mira e trabou di siña hende loke Beibel ta bisa tokante e Reino di Dios komo e aktividat di mas importante. (Lukas 6:40) Ora Testigunan di Yehova mira kon e mensahe di Reino awe tambe ta trese refreskamentu duradero pa esnan ku ta asept’é, meskos ku den e tempu ku Hesus tabata riba tera, esei en bèrdat ta alegrá nan kurason.—Mateo 11:28-30.

Ademas di siña hende e Palabra di Dios, Hesus a efektuá otro bon obranan tambe. Entre otro kosnan, el a kura e enfermonan i alimentá esnan ku tin hamber. (Mateo 14:14-21) Di igual manera, Testigunan di Yehova ta komplementá nan trabou di siña hende Beibel ku obranan ku ta yuda hende den nesesidat. De echo, e Skritura ta ekipá kristiannan “pa tur bon obra” i ta urgi nan pa “hasi bon na tur hende.”—2 Timoteo 3:16, 17; Galationan 6:10.

“Nos Rumannan A Presentá”

Na sèptèmber 1999, un temblor devastador a sagudí Taiwan. Un par di luna despues, áwaseru torensial i lawina (avalancha) a kousa un dje pió desasternan natural den historia di Venezuela. Mas resien, inundashonnan fuerte a kousa hopi daño n’e pais Mozambique. Den tur e tres kasonan aki, Testigunan di Yehova a presentá mesora ku kuminda, awa, remedi, paña, tènt i kos di kushiná kuné pa e víktimanan. Boluntarionan riba tereno médiko a lanta hospitalnan improvisá pa trata esnan heridá, i trahadónan di konstrukshon boluntario a traha kas nobo pa esnan ku a keda desampará.

E yudansa oportuno ku e víktimanan a risibí a konmové nan. “Den nos momentonan di mayor desesperashon, nos rumannan a presentá,” segun Malyori, kende su kas a ser destruí dor di un avalancha na Venezuela. Despues ku boluntarionan a konstruí un kas nobo-nobo pa su famia, Malyori a  bisa tur emoshoná: “Nos no por kaba di gradisí Yehova pa tur loke el a hasi pa nos!” I ora e víktimanan di inundashon na Mozambique a risibí yabi di nan kasnan resien konstruí, henter e grupo a kuminsá kanta e kantika di Reino “Yehova Ta Nos Refugio.” *

E echo ku e boluntarionan por a yuda hende den nesesidat a pone ku nan mes tambe a sinti nan refreská. “Mi tabata kontentu di por a yuda e rumannan aki ku a sufri hopi,” segun Marcelo, kende a sirbi komo bruder den un kampamentu di refugiado na Mozambique. Huang, boluntario na Taiwan, a remarká: “Mi a sinti un gran goso di por a yuda entregá kuminda i tènt n’e rumannan den nesesidat. Esei a fortalesé mi fe.”

Un Programa di Boluntario Ku Ta Duna Resultado

Trabou di boluntario tabatin efekto refreskante den sentido spiritual tambe pa desena di míles di prezu rònt mundu. Kon asina? Den añanan resien, Testigunan di Yehova a perkurá literatura di Beibel pa mas ku 30.000 persona detené den mas o ménos 4.000 prizòn na Merka so. Ademas, kaminda ta posibel, Testigunan ta bishitá e prizònnan ei personalmente pa studia Beibel ku e prezunan i pa kondusí reunionnan kristian. E prezunan ta saka benefisio?

Algun prezu ku ta studia Beibel ta kuminsá kompartí e siñansanan refreskante di e Palabra di Dios ku otro prezu. Komo resultado, rònt mundu den un kantidat di prizon tin gruponan di prezu ku awor ta adorá Yehova huntu. “Nos grupo ta kresiendo,” un prezu na Oregon, Merka, a informá na 2001. “Nos tin 7 publikadó di Reino i nos ta kondusiendo 38 studio di Beibel. Mas ku 25 persona ta asistí n’e diskurso públiko i Studio di Toren di Vigilansia i 39 persona a asistí n’e Konmemorashon [dje morto di Kristu]. Dentro di poko tres persona mas lo batisá!”

Benefisio i Goso

Funshonarionan di prizòn a ripará ku e trabou boluntario aki ta duna resultado. Loke ta impreshoná e funshonarionan aki mas tantu ta e benefisionan duradero dje programa di boluntario aki. Un informe ta remarká: “Den e dies añanan ku e programa aki ta andando, niun eks-prezu ku a ser batisá den prizòn komo Testigu di Yehova a kai prezu atrobe. Di otro gruponan sí un 50 pa 60 porshento ta bini bèk.” Motivá p’e resultadonan ku boluntarionan Testigu a logra, un pastor di prizòn na Idaho a bisa den un karta n’e sede mundial di Testigunan di Yehova: “Ounke personalmente mi no ta di akuerdo ku boso kreensianan religioso, mi ta masha impreshoná ku boso organisashon.”

P’e boluntarionan mes tambe ta un plaser ku nan por yuda e prezunan. Despues di a kondusí un reunion ku un grupo di prezu ku a kanta un kantika di Reino pa promé bes, un boluntario a skirbi: “Tabata un animashon pa mira 28 hòmber kanta kantika di alabansa na Yehova. I nan a kanta na bos haltu! Mi tabatin e privilegio di ta presente n’e okashon ei!” Un boluntario ku ta bishitá prizònnan na Arizona a bisa: “Tabata un bendishon grandi pa partisipá den e trabou spesial aki!”

Testigunan boluntario di rònt mundu gustosamente ta bisa meskos ku Hesus: “Ta mas bendishoná pa duna ku pa risibí.” (Echonan 20:35) Tambe nan ta konfirmá ku ta refreskante bèrdat pa sigui e konseho di Beibel di hasi bon na tur hende.—Proverbionan 11:25.

[Nota]

[Plachi na página 8]

Venezuela

[Plachi na página 8]

Taiwan

[Plachi na página 8]

Mozambique