Pregunta di Lektor

Ki ora un muhé kristian mester tapa su kabes pa motibunan religioso?

Apòstel Pablo a skirbi: “Tur muhé ku ta hasi orashon òf ta profetisá sin tapa kabes, ta desonrá su kabes.” Dikon? Pa motibu di e prinsipio bíbliko di hefatura ku ta bisa: “E hòmber ta e kabes di e muhé.” Den e kongregashon kristian normalmente ta hende hòmber tin e responsabilidat di hasi orashon i prediká. P’esei, ora un muhé kristian ta atendé ku asuntunan di adorashon ku normalmente su kasá òf un otro hòmber batisá lo mester atendé, e mester tapa su kabes.—1 Korintionan 11:3-10.

Situashonnan den kua un muhé kristian tin ku tapa su kabes por surgi den su matrimonio. Por ehèmpel, ora e famia bini huntu pa studia Beibel òf pa kome, normalmente ta e esposo ta dirigí e studio i representá nan den orashon na Dios. Sin embargo, si e esposo no ta Testigu, e responsabilidat aki ta kai riba su kasá. P’esei, ora e ruman muhé kristian ta hasi orashon na bos haltu pa su mes i pa otronan òf e ta kondusí un studio di Beibel ku su yunan den presensia di su kasá, ta apropiá p’e tapa su kabes. Si su esposo no ta presente, e no tin nodi tapa su kabes pasobra Dios a dun’é outoridat pa siña su yunan.—Proverbionan 1:8; 6:20.

Pero kiko si un yu hòmber yòn dje famia ta un sirbidó dediká i batisá di Yehova Dios? Siendo ku e yu hòmber ta un miembro dje kongregashon  kristian, e mester risibí instrukshon di e miembronan maskulino dje kongregashon. (1 Timoteo 2:12) Si e tata ta un kreyente, ta e mester siña su yu hòmber. Sin embargo, si e tata no ta ku e famia, e ora ei e mama mester tapa su kabes si e ta kondusí un studio di Beibel ku e yu hòmber batisá i e otro yunan. Ta keda na e mama pa disidí si e ta pidi e yu hòmber batisá pa hasi orashon na okashonnan manera un studio di Beibel òf ora di kome. Kisas e no ta haña ku e yu hòmber ta sufisiente kapas ainda pa hasi esei, i e ta disidí ku e mes ta hasi orashon. Si e disidí di hasi orashon na e okashonnan ei, e tin ku tapa su kabes.

Pa un ruman muhé por realisá sierto tareanan den kongregashon, lo e tin ku tapa su kabes. Por ehèmpel, na un reunion di sirbishi den siman kisas no tin ruman hòmber batisá presente, sino ruman muhé so. Tambe por sosodé ku no tin hende hòmber batisá na un reunion di kongregashon. Si un ruman muhé tin ku kumpli ku responsabilidatnan ku normalmente un ruman hòmber lo a hasi na un reunion di kongregashon òf reunion di sirbishi ku ta un areglo dje kongregashon, e tin ku tapa su kabes.

Kristiannan muhé mester tapa nan kabes ora nan ta tradusí un diskurso bíbliko na un otro idioma òf na idioma di seña, òf ora nan ta lesa na bos haltu e paragrafnan for di un publikashon basá riba Beibel ku ta ser usá na un reunion di kongregashon? Nò. Den e kasonan ei, no ta e ruman muhé ta hibando delantera ni dunando siñansa. Meskos tambe, ruman muhé no tin nodi tapa kabes ora nan ta partisipá den demostrashon, ta konta un eksperensia òf ta duna un parti den e Skol di Ministerio Teokrátiko.

Ounke ta hòmbernan batisá so ta duna siñansa den e kongregashon, tantu hende hòmber komo hende muhé tin e responsabilidat di prediká i siña pafó di e kongregashon. (Mateo 24:14; 28:19, 20) Pues, ora un muhé kristian ta papia ku hende ku no ta Testigu tokante e Palabra di Dios den presensia di un Testigu di Yehova maskulino, e no tin nodi tapa kabes.

Sin embargo, e situashon ta diferente ora e tin ku kondusí un studio di Beibel na un kas kaminda tin un hòmber dediká i batisá presente. Esaki ta un areglo hasí di antemano pa duna siñansa kaminda esun ku ta kondusí e studio en realidat ta hiba delantera. Den e kaso aki e areglonan di kongregashon ta konta pa e studio. Si un Testigu femenino ta kondusí e studio ei miéntras tin un Testigu maskulino batisá presente, ta korekto p’e ruman muhé tapa su kabes. Sin embargo, ta e ruman hòmber dediká mester hasi orashon. Un ruman muhé no ta hasi orashon den presensia di un ruman hòmber dediká, a ménos ku tin motibunan eksepshonal, manera den kaso ku e ruman hòmber no por papia.

De bes en kuando sa sosodé ku un publikadó di Reino maskulino ku no a batisá ainda ta bai studio di Beibel huntu ku un ruman muhé kristian. Si e ruman muhé ta deseá e por pidi e publikadó pa kondusí e studio. Pero siendo ku no ta korekto pa e representá e ruman muhé batisá den orashon na Yehova, ta apropiá pa e ruman muhé hasi orashon na e studio. Ora e ruman muhé ta kondusí e studio òf ta hasi orashon na e okashonnan aki, e mester tapa su kabes. Maske e publikadó hòmber no ta batisá ainda, dor ku e ta prediká, hende pafó dje kongregashon ta identifik’é ku e kongregashon.

Apòstel Pablo a skirbi: “E muhé mester tin un símbolo di outoridat riba su kabes, pa motibu di e angelnan.” Sí, ruman muhénan kristian tin e privilegio di sirbi komo bon ehèmpel pa miónes di angel ku lealmente ta sigui someté nan mes na Yehova. Ta masha bon pa un muhé deboto na Dios kumpli debidamente ku e rekisito di tapa kabes ora ku esaki ta nesesario!

[Plachi na página 26]

Hende muhé ta tapa kabes komo un señal di rèspèt p’e prinsipio di hefatura