Bo Konosé e Historia di Safan i Su Famia?

DURANTE bo lesamentu di Beibel bo a yega di lesa tokante Safan i algun miembro di su famia prominente? Ken nan tabata? Kiko nan a hasi? Ki lès nos por siña for di nan?

Beibel ta kuminsá papia di “Safan, yu hòmber di Azalía, yu hòmber di Mesulam,” en konekshon ku e restorashon di adorashon berdadero ku Josias [Hosías] a hasi rònt di aña 642 promé ku nos era. (2 Reinan 22:3) Durante e siguiente 36 añanan, te na destrukshon di Yerúsalèm na aña 607 promé ku nos era, nos ta bin haña sa ken ta su kuater yu hòmbernan, Ahikam, Elasa, Gemarias i Jaazanias, i tambe su dos nietunan ku ta Mikaias i Gedalias. (Wak e mapa.) Segun Encyclopaedia Judaica, “e famia di Safan tabatin un posishon dominante den gobièrnu [e reinado di Huda] i a okupá e funshon di skriba di rei for di tempu di Josias te na e Eksilio.” Un análisis di loke Beibel ta bisa tokante Safan i su famia lo yuda nos komprondé kon nan a apoyá profeta Yeremías i tambe e adorashon berdadero di Yehova.

Safan Ta Apoyá Adorashon Berdadero

Ora Rei Josias tabatin rònt di 25 aña di edat na aña 642 promé ku nos era, Safan tabata sirbi komo skriba, esta, sekretario i kopista, di rei. (Yeremías 36:10) Kiko e trabou aki a enserá? E ensiklopedia menshoná anteriormente ta deklará ku un skriba i sekretario den kas real tabata un konsehero hopi yegá di rei, ku tabata enkargá ku asuntunan finansiero, bon intermediadó, bon na haltura di leinan internashonal i tratadonan komersial. Pues, komo sekretario di kas real, Safan tabata un di e personanan mas prominente den e reinado.

Dies aña mas promé, e hóben Josias “a kuminsá buska e Dios di su tata David.” Dor ku Safan aparentemente tabata hopi mas grandi ku Josias, e por a sirbi komo un bon konsehero spiritual p’e i tambe e por a apoyá Josias su promé kampaña pa restorá adorashon berdadero. *—2 Krónikanan 34:1-8.

Ora nan tabata drecha e tèmpel, nan a haña “e buki di lei,” i Safan “a les’é den presensia di rei.” E kontenido a shòk Josias i el a manda un delegashon di hòmbernan di konfiansa serka e profeta muhé Hulda pa konsultá Yehova tokante e buki. E rei a mustra su konfiansa den Safan i su yu hòmber Ahikam dor di inkluí nan tambe den e delegashon.—2 Reinan 22:8-14; 2 Krónikanan 34:14-22.

Esaki ta e úniko kaminda ku Beibel ta menshoná kiko Safan mes a hasi. Den otro versíkulonan, Beibel ta referí na dje solamente komo tata òf tawela. Desendientenan di Safan tabatin kontakto estrecho ku profeta Yeremías.

Ahikam i Gedalias

Manera a nos a ripará kaba, Safan su yu hòmber Ahikam ta e promé ku ta ser menshoná relashoná ku e delegashon ku a ser mandá  serka e profeta muhé Hulda. Un dikshonario bíbliko ta bisa: “Ounke e Beibel hebreo no ta menshoná e título di Ahikam, ta bisto ku e tabatin un posishon haltu.”

Rònt di 15 aña despues di e insidente ei, Yeremías su bida tabata den peliger. Ora el a spièrta e pueblo ku Yehova tin intenshon di destruí Yerúsalèm, “e saserdotenan, e profetanan i henter e pueblo a gar’é, bisando: ‘Bo mester muri!’” Kiko a sosodé e ora ei? E relato ta sigui bisa: “Ahikam, yu hòmber di Safan, a protehá Yeremías, asina ku nan no a entreg’é den man di pueblo pa mat’é.” (Yeremías 26:1-24) Kiko esaki ta mustra? Segun The Anchor Bible Dictionary: “E insidente aki no solamente ta mustra kuantu influensia Ahikam tabatin, sino tambe kon e, meskos ku e otro miembronan di e famia di Safan, a trata Yeremías bon.”

Rònt di 20 aña despues, ora ku e babilonionan a destruí Yerúsalèm na 607 promé ku nos era, i a hiba mayoria di hende den eksilio, nan a nombrá Safan su nietu Gedalias, yu di Ahikam, komo gobernante riba e hudiunan ku a resta. E tambe a perkurá pa Yeremías meskos ku e otro miembronan di famia di Safan? E registro bíbliko ta bisa: “E ora ei Yeremías a bai Mizpa, serka Gedalias, yu hòmber di Ahikam, i a keda serka dje.” Despues di un par di luna, nan a mata Gedalias, i e sobrá hudiunan a hiba Yeremías huntu ku nan ora nan a muda bai Egipto.—Yeremías 40:5-7; 41:1, 2; 43:4-7.

Gemarias i Mikaias

Safan su yu hòmber Gemarias i su nietu Mikaias a hunga un papel importante den e susesonan ku Yeremías kapítulo 36 ta deskribí. Tabata rònt di aña 624 promé ku nos era, e di sinku aña di gobernashon di Rei Joakim. Baruk, sekretario di Yeremías, a lesa na bos haltu e palabranan di Yeremías for dje buki den e kas di Yehova, “den sala di Gemarias, yu hòmber di Safan.” P’esei, “Mikaias, yu hòmber di Gemarias, yu hòmber di Safan, a tende tur e palabranan di SEÑOR for di e buki.”—Yeremías 36:9-11.

Mikaias a notifiká su tata i tur e otro ofisialnan di e ròl, i nan tur kier a tende loke e ròl aki a bisa. Kon nan a reakshoná? “Awor a sosodé ku ora nan a tende tur e palabranan, un a bira wak otro tur spantá, i a bisa Baruk: ‘Siguramente nos lo reportá tur e palabranan aki na rei.’” Sin embargo, promé ku nan a bai papia ku rei, nan a konsehá Baruk: “Abo i Yeremías, bai skonde, i no laga ningun hende sa unda boso ta.”—Yeremías 36:12-19.

Manera nan a antisipá, e rei a rechasá e mensahe di e ròl i a kim’é kompletamente.  Ounke algun dje ofisialnan, inkluso Safan su yu hòmber Gemarias, “a roga rei pa no kima e ròl, e no kier a skucha nan.” (Yeremías 36:21-25) E buki Jeremiah—An Archaeological Companion ta konkluí: “Gemarias tabata un bon ayudante di Yeremías den e palasio di Rei Joakim.”

Elasa i Jaazanias

Na aña 617 promé ku nos era, Babilonia a tuma mando di e reinado di Huda. Míles di hudiu, “tur e kapitannan i tur e hòmbernan poderoso i balente . . . i tur artesano i smet,” a ser hiba den eksilio, inkluso profeta Ezekiel. Matanias, kende su nòmber e babilonionan a kambia pa Zedekias, a bira e rei subordiná nobo. (2 Reinan 24:12-17) Despues Zedekias a manda un delegashon Babilonia, i Elasa, yu di Safan, tambe tabata den dje. Yeremías a konfia Elasa ku un karta ku a kontené un mensahe importante ku Yehova a manda pa e hudiunan den eksilio.—Yeremías 29:1-3.

Pues Beibel ta mustra ku Safan, tres di su yu hòmbernan, i dos di su nietunan a usa nan posishon di outoridat pa apoyá adorashon berdadero i tambe Yeremías, e profeta fiel. Kiko di Safan su di kuater yu hòmber, Jaazanias? Distinto for di e otro miembronan di e famia di Safan, aparentemente e sí a partisipá den adorashon di dios falsu. Den e di seis aña di Ezekiel su eksilio den Babilonia, òf rònt di aña 612 promé ku nos era, e profeta a haña un vishon den kua el a mira 70 hòmber ta ofresé siensia na ídolo den e tèmpel na Yerúsalem. Jaazanias tabata entre nan, i ta su nòmber so a ser menshoná. Kisas esaki ta indiká ku e tabata un miembro prominente den e grupo aki. (Ezekiel 8:1, 9-12) Jaazanias su ehèmpel ta demostrá ku e echo ku un persona a lanta den un famia deboto no ta un garantia ku e ta bira un fiel adoradó di Yehova. Kada ken ta responsabel pa su propio akshonnan.—2 Korintionan 5:10.

Echonan Históriko di Safan i Su Famia

Durante e tempu ku Safan i su famia a hunga un papel den e susesonan ku a tuma lugá den Yerúsalèm, uso di seyo a bira masha komun den Huda. Nan a usa seyo pa seya òf firma dokumento, i nan tabata traha e seyonan aki di piedra presioso, metal, ivor òf glas. Por lo general nan tabata laga graba riba nan e nòmber dje doño, su fam, i de bes en kuando, su título.

 Hende a haña míles di grabashon di seyo na hebreo riba klei. Profèser Nahman Avigad, eksperto di epigrafia hebreo, e estudio di inskripshonnan antiguo, a bisa: “Inskripshonnan di seyo ta e úniko fuente di epigrafia hebreo ku ta menshoná personahenan konosí di Beibel.” Nan a haña inskripshon di seyo di Safan òf di miembronan di su famia? Sí, nòmber di Safan i di su yu hòmber Gemarias ta aparesé riba e seyo ku tin na página 19 i 21.

Ekspertonan ta bisa tambe ku posiblemente tin grabashonnan di seyo ku ta referí na kuater otro miembro di e famia. Nan ta Azalía, tata di Safan, Ahikam yu hòmber di Safan, Gemarias yu hòmber di Safan i Gedalias, na kende aparentemente un seyo a referí komo esun ku tin posishon di outoridat “riba e Kas.” Nan ta pensa ku e di kuater seyo a pertenesé na Gedalias, nietu di Safan, ounke su tata, Ahikam, no ta ser menshoná. Su título riba e inskripshon di e seyo ta indiká ku e tabata un di e ofisialnan mas haltu di estado.

Kiko Nos Por Siña for di Tur Esaki?

Safan i su famia sí a pone un bon ehèmpel! Nan a usa nan posishon prominente pa apoyá tantu e adorashon berdadero komo fiel Yeremías. Nos tambe por usa nos rekursonan i nos influensia pa apoyá Yehova su organisashon i nos kompañeronan di adorashon.

Nos ta enrikesé i oumentá nos fe, ora nos no ta djis lesa Beibel regularmente ma tambe eksamin’é profundamente i sera konosí ku Yehova su testigunan di ántes manera Safan i e miembronan di su famia. Pasobra e personanan aki tambe ta forma parti di e “nubia asina grandi di testigunan” kende nan ehèmpelnan nos por imitá.—Hebreonan 12:1.

[Nota]

[Kuadro na página 22]

Hulda—Un Profeta Muhé Prominente

Despues ku Rei Josias a tende e lesamentu di “e buki di lei” ku nan a haña den tèmpel, el a manda Safan i kuater otro ofisial di rango haltu pa “konsultá ku SEÑOR” tokante e buki. (2 Reinan 22:8-20) Unda e delegashon por a haña kontesta? E tempu ei tur e profeta- i eskritornan di Beibel, inkluso Yeremías i kisas Nahum i Sofonías, tabata biba na Huda. Sin embargo, e delegashon a bai serka Hulda e profeta muhé.

Segun e buki Jerusalem—An Archaeological Biography: “E kos remarkabel di e episodio aki ta ku no tabatin niun komentario riba e aspekto maskulino i femenino di e historia aki. Niun persona no a ni puntra nan mes si tabata korekto pa un komité ku a konsistí di hende hòmber so bai ku e Ròl di e Lei serka un hende muhé pa haña sa kiko e ta nifiká. Ora ku Hulda a bisa ku e tabata e palabra di Señor, ningun hende no a duda ku e tabatin outoridat pa determiná e asuntu. Hopi bes ekspertonan ku ta determiná e papel di hende muhé den Israel di ántes ta pasa por haltu di e episodio aki.” Ta klaru ku el a risibí e mensahe for di Yehova.

[Diagram/Plachi na página 21]

(Pa e teksto den su formato kompleto, wak e publikashon)

Genealogia di Safan

Mesulam

↓

Azalía

↓

Safan

↓ ↓ ↓ ↓

Ahikam Elasa Gemarias Jaazanias

↓ ↓

Gedalias Mikaias

[Plachi na página 20]

Gemarias i otro hende a roga Joakim pa no kima e ròl di Yeremías

[Plachi na página 22]

Ounke Jaazanias tabata miembro di e famia di Safan, den vishon Ezekiel a mir’é ta adorá dios falsu

[Rekonosementu pa Potrèt na página 19]

Kortesia di Israel Antiquities Authority

[Rekonosementu pa Potrèt na página 21]

Kortesia di Israel Antiquities Authority