Kon Hesus A Nase, i Pakiko?

“IMPOSIBEL!” Esei ta loke hopi hende ku no ta kristian ta bisa ora nan tende e relato dje nasementu di Hesus. Nan ta haña ku for di e punto di bista sientífiko ta imposibel ku un mucha muhé bírgen por a sali na estado i duna lus na un yu, sin ku tabatin un tata humano. Kiko abo ta kere?

Na 1984, The Times di Lònden a publiká un karta ku a rasoná riba e tema aki dje siguiente manera: “No ta lógiko pa usa siensia komo argumento pa bisa ku milager no por sosodé. Si un hende ta kere ku milager no por sosodé, esei ta su fe, meskos ku un otro hende por tin fe ku sí nan por sosodé.” E karta tabata firmá dor di 14 profèser di siensia na universidatnan britániko. Nan a bisa: “Ku goso nos ta aseptá e nasementu for di un bírgen, e milagernan den Evangelio i e resurekshon di Kristu komo susesonan real di historia.”

Sin embargo, ta di komprondé ku un hende por keda babuká ora e tende pa promé bes e relato di ku Hesus a nase for di un bírgen. Asta e mama di Hesus mes a keda babuká ora e angel di Dios a bis’é: “Mira, lo bo konsebí den bo matris i duna lus na un yu hòmber, i lo bo yam’é Hesus.” Maria a puntr’é: “Kon esaki por ta, siendo ku mi ta un bírgen?” E ora ei e angel a splika ku Dios lo hasi e milager ei pa medio di Su spiritu santu. Despues e angel a bis’é: “Pa Dios nada lo no ta imposibel.” (Lukas 1:31, 34-37) Sin duda, Esun ku a krea e proseso asombroso ku ta permití hende haña yu mester por a laga Maria sali na estado i duna lus na Hesus, maske e tabata un bírgen desente. Si Dios a krea universo i tur su leinan eksakto, e por a laga un eicel den ovario di Maria produsí un Yu humano perfekto tambe.

Dikon E Tabata Nesesario

Hosé, un hòmber deboto, tabata komprometí ku Maria tempu ku el a sali na estado. Den un soño un angel di Dios a splika Hosé pa ki motibu maravioso su komprometida bírgen tabata na estado. E angel a bisa: “No tene miedu di tuma Maria komo bo esposa; pasobra loke a wòrdu konsebí den dje ta di spiritu santu. I e lo haña un yu hòmber; i lo bo dun’é e nòmber Hesus, pasobra ta e ta esun ku lo salba su pueblo di nan pikánan.” (Mateo 1:20, 21) Na hebreo e nòmber Hesus ta nifiká “Yehova Ta Salbashon.” Esei ta kòrda  nos ku nos tur tin mester di salbashon for di piká i morto, i tambe ku Yehova a pèrkurá tal salbashon pa medio di Hesus.

Debí ku Adam e promé hòmber a hasi piká, tur su yunan a nase imperfekto, ku tendensia di kibra leinan di Dios. (Romanonan 5:12) Kon Adam su yunan lo por a skapa for di piká i logra haña perfekshon? Lo mester a paga e piká ei ku un otro bida humano perfekto, unu ku tabatin mes tantu balor ku e bida di Adam, pa asina kumpli ku loke hustisia a eksigí. Ta p’esei Dios a pone Hesus nase milagrosamente komo hende perfekto, i ta p’esei Hesus a laga su enemigunan mat’é. (Huan 10:17, 18; 1 Timoteo 2:5, 6) Despues ku Hesus a resusitá i subi na shelu, ku konfiansa e por a bisa: “Mi tabata morto, i mira, mi ta bibu pa semper, i mi tin e yabinan di morto i di Hades [graf di humanidat].”—Revelashon 1:18.

Hesus ta usa e yabinan simbóliko di morto i Hades pa habri kaminda pa hende pekadó por rekobrá loke Adam a pèrdè. Hesus a splika: “Ami ta e resurekshon i e bida; esun ku kere den mi lo biba, maske e muri, i tur esnan ku ta biba i ta kere den mi lo no muri nunka.” (Huan 11:25, 26) Esta un bunita promesa! I sin embargo, tin un motibu asta mas grandi pakiko Hesus a nase.

E Motibu Prinsipal

No ta ora Maria a sali na estado Hesus a kuminsá eksistí. El a bisa bon kla: “Mi a baha for di shelu.” (Huan 6:38) Hesus a biba den shelu ku su Tata selestial for di komienso di kreashon. De echo, Beibel ta yam’é “e prinsipio di e kreashon di Dios.” (Revelashon 3:14) For di shelu Hesus a mira kon un angel malbado a rebeldiá i hasi e promé dos sernan humano bai kontra Dios su mando. Esei ta loke a duna Hesus e motibu mas importante pa deseá di nase komo un Yu humano perfekto di Dios. Kiko e motibu ei tabata?

Hesus kier a proba ku su Tata selestial tin derecho di goberná universo. Dor di keda fiel for di ora ku el a nase te ora ku el a muri riba tera, Hesus a duna prueba ku e tabata dispuesto di koperá obedientemente ku e manera ku Yehova ta goberná Su kriaturanan. Promé ku Hesus a muri na man di enemigunan di Dios, el a spliká bon kla dikon e tabata dispuesto di duna su bida komo sakrifisio. El a bisa ku ta pa mundu por sa ku el a stima e Tata. (Huan 14:31) Si Adam ku Eva, e promé dos hendenan, a desaroyá un amor asina, nan lo mester por a keda fiel, pasobra nan prueba tabata muchu mas leve.—Génesis 2:15-17.

Ademas, e echo ku Hesus a keda fiel a saka na kla ku Satanas ta un gañadó. Satanas a lanta kalumnia kontra Dios i hende dor di bisa dilanti e angelnan den shelu: “Tur loke un  hende tin e lo duna pa su bida.” (Jòb 2:1, 4) Satanas a akusá tur hende falsamente, bisando ku nan tur lo desobedesé Dios pa skapa nan bida.

E kuestionnan aki a lanta duda tokante si Dios ta goberná na un manera hustu, i si pues e tin derecho di goberná. Hesus tabata dispuesto di nase komo hende i keda fiel te na morto, pa resolvé e kuestionnan.

Pues, e motibu prinsipal ku Hesus a nase na mundu tabata, manera e mes a bisa, “pa duna testimonio di e bèrdat.” (Huan 18:37) El a hasi esei dor di mustra ku palabra i ku echo ku e gobernashon di Dios ta kompletamente hustu, i ku esnan ku obedes’é ta haña felisidat duradero. Tambe Hesus a splika ku el a bini na mundu pa duna su bida komo “preis di reskate pa hopi.” (Marko 10:45) El a habri kaminda pa hende pekadó por logra haña perfekshon i biba pa semper. Pa hende por komprondé e asuntunan vital aki, nan mester sa kon i pakiko Hesus a nase. P’esei mester a skirbi e historia di su nasementu un kaminda. Ademas, algun suseso ku tin di haber ku e nasementu di Hesus ta kontené otro lèsnan importante. E siguiente artíkulo lo mustra esei.

[Plachi na página 4]

Kon Adam su yunan por a skapa for di piká?