Pregunta di Lektor

Tin algun areglo ku por hasi pa un kristian ungí ku ta malu i ku no por asistí n’e konmemorashon ku e kongregashon ta tene di e Sena di Señor?

Sí. Ta posibel i importante pa hasi areglo ku ta tene kuenta ku e situashon di un kristian ungí enfermo ku kisas ta na kama, i dor di esei no por ta presente ora e kongregashon ta selebrá e Memorial di e morto di Kristu. Den un kaso asina, e kuerpo di ansiano por hasi areglo pa un ansiano òf un otro ruman hòmber maduro hiba un parti di e emblemanan, esta, e pan i biña, p’e kompañero kreyente ei riba e mesun anochi, promé ku solo sali e siguiente dia.

Dependiendo di e sirkunstansia, e ansiano òf e otro ruman hòmber ku bishitá e ruman ungí por duna algun komentario breve i lesa algun teksto ku ta pas ku e okashon. E por sigui e ehèmpel ku Hesus a pone ora el a instituí e Sena di Señor. Por ehèmpel, e por lesa Mateo 26:26 i despues di hasi orashon, duna e ruman e pan sin zürdeg. Kaba e ruman di bishita por lesa Mateo kapítulo 26 versíkulo 27 i 28, hasi un orashon mas i pasa e biña. E por komentá brevemente riba e nifikashon di kada emblema i na konklushon e mester hasi orashon.

Klaru ku nos mester hasi tur esfuerso posibel pa ta presente n’e selebrashon di e Sena di Señor ku e kongregashon ta tene. Pero kiko mester hasi den un kaso ekstremo kaminda un kristian ungí ta hopi malu, den hòspital òf strobá di un òf otro manera pa selebrá e Memorial despues ku solo baha dia 14 di nísan? Den un kaso asina e ruman ungí por hasi uso di loke e Lei di Moises a permití, esta, di selebrá e Memorial den privá 30 dia despues.—Numbernan 9:9-14.