Hóbennan Ku Ta Hasi Yehova Su Kurason Kontentu

E artíkulonan di studio aki a ser prepará spesialmente pa hóbennan Testigu di Yehova. P’esei, nos ta animá hóbennan pa studia e informashon aki bon i partisipá libremente i ku smak ora e wòrdu konsiderá durante e Studio di Toren di Vigilansia di kongregashon.

“Sea sabí, mi yu, i hasi mi kurason kontentu, pa mi por kontestá esun ku reprochá mi.”—Proverbionan 27:11.

1, 2. (a) Splika dikon si bo djis sinti ku mundu ta trèk bo, no ta nifiká ku bo no ta sirbi pa ta un kristian. (Romanonan 7:21) (b) Ki lès bo ta saka for dje ehèmpel di Asaf? (Wak e kuadro na página 13.)

IMAGINÁ ku bo ta buskando paña pa kumpra. Ora bo ta pasando dor dje rèkinan, bo bista ta kai riba un bistí ku bo ta gusta mesora. I ta parse ku e koló i e stail ta pas nèt pa bo, i e preis ta indiká ku ta un bon ganga bo a haña. Pero despues bo ta wak e bistí mas djaserka. Pa bo gran sorpresa, bo ta ripará ku e tela ta frañá na rant i ku e steknan ta un tiki slòns. Ounke e bistí ta great, e no ta di masha bon kalidat. Lo bo gasta bo plaka na un paña inferior asina?

² Awor, kompará e situashon ei ku esun ku abo komo un hóben kristian lo por haña bo konfrontá kuné. Meskos ku e bistí, na promé bista, e kosnan ku mundu ta ofresé por parse masha atraktivo. Por ehèmpel, bo kompañeronan di skol kisas ta bai fiestanan great, nan ta usa droga, bebe, sali ku otro sin ningun kompromiso i tene relashon seksual sin ku nan ta kasá. Bo sa sinti gana di hiba un bida asina? Bo ta anhelá pa purba djis un tiki di nan supuesto libertat? Si esei ta e kaso, no pensa mesora ku definitivamente bo ta un malbado i ku bo no ta sirbi pa ta un kristian. Pasobra en realidat, Beibel ta rekonosé ku mundu por ta un tentashon fuerte—asta pa un persona ku kier agradá Dios.—2 Timoteo 4:10.

3. (a) Dikon no ta bale la pena pa bai tras di e kosnan di mundu? (b) Kon un kristian a deskribí e banidat di bai tras di mundu?

³ Awor, meskos ku lo bo hasi ku un paña ku bo kier kumpra, tira un bista mas djaserka riba e kosnan ku mundu ta ofresé. Puntra bo mes: ‘E tela i stek di e sistema di kosnan aki ta di bon kalidat?’ Beibel ta bisa ku “mundu ta pasa bai.” (1 Juan 2:17) Asta si bo por haña algun plaser den dje, esei lo ta pa un tempu so. Fuera di eseinan, e preis ku bo tin ku paga pa un kondukta kontra prinsipionan bíbliko ta haltu. Esaki sigur no ta un ganga. Un kristian ku mester a soportá loke el a yama “e resultadonan doloroso di un hubentut desperdisiá,” a bisa: “Mundu por ta parse eksitante i atraktivo. I e kier laga bo kere  ku bo por haña e plaser ku e ta ofresé, sin doló. Pero esei simplemente ta imposibel. Mundu ta usa bo i ora e ta kla ku bo, e ta tira bo un banda.” * Pakiko desperdisiá bo hubentut dor di hiba un bida asina inferior?

Protekshon Kontra “e Malbado”

4, 5. (a) Djis promé ku Hesus a muri, kiko el a resa pidi Yehova? (b) Dikon e petishon ei tabata na su lugá?

⁴ Dor ku hóbennan Testigu di Yehova ta realisá ku e sistema di kosnan aki no tin nada di kalidat pa ofresé, nan ta trata pa evitá amistat ku e mundu aki. (Santiago 4:4) Abo ta un di e hóbennan fiel aki? Si ta asina, nos ta elogiá bo p’esei. Ta sierto ku no ta fásil pa resistí preshon di pareu ni pa resaltá komo diferente, pero tin un persona ku por yuda bo.

⁵ Djis promé ku Hesus su morto, el a resa pidi Yehova p’e “warda” su disipelnan for “di e malbado.” (Juan 17:15) Hesus tabatin bon motibu pa hasi e petishon aki. E tabata sa ku, sin importá e edat di su disipelnan, lo no tabata fásil pa nan keda fiel. Dikon? Un dje motibunan ta, manera Hesus mes a rekonosé, ku su disipelnan lo tin ku enfrentá un enemigu poderoso i invisibel ku ta “e malbado,” esta, Satanas e Diabel. Beibel ta bisa ku e kriatura spiritual malbado aki “ta kana rònt manera un leon ku ta gruña, buskando ken e por devorá.”—1 Pedro 5:8.

6. Kon nos por sa ku Satanas no ta tene kompashon ku hóbennan?

⁶ Atraves di historia, Satanas a gosa ora ku hende a sufri di e krueldatnan ku el a kousa nan. Pensa riba e kalamidatnan horibel ku Satanas a trese riba Jòb i su famia. (Jòb 1:13-19; 2:7) Kisas abo ta kòrda susesonan di notisia ku ta reflehá e karakterístika di Satanas su spiritu violento. Diabel ta en buska di víktima p’e devorá, i den su búskeda, e no ta tene miserikòrdia ku hóbennan. Por ehèmpel, na prinsipio di e promé siglo di nos era, Herodes a trama un plan pa laga mata tur mucha hòmber den Bètlehèm di dos aña bai abou. (Mateo 2:16) Probablemente ta Satanas a motivá Herodes. El a hasi tur esaki den un intento pa mata e yu ku un dia lo a bira e Mesias primintí di Dios i ku lo ehekutá Dios su huisio riba Satanas! (Génesis 3:15) Ta klaru anto ku Satanas no tin ningun kompashon ku hóbennan. Su úniko propósito ta pa  devorá mas tantu hende posibel. Esaki ta sierto spesialmente awor, pasobra Satanas a ser saká for di shelu i tirá abou den bisindario di tera, “ku gran furia, sabiendo ku ta ked’é solamente un poko tempu mas.”—Revelashon 12:9, 12.

7. (a) Den ki sentido Yehova ta na kontraste skèrpi ku Satanas? (b) Kon Yehova kier pa bo gosa di bida?

⁷ Na kontraste skèrpi ku Satanas, kende tin un “gran furia,” Yehova tin “miserikòrdia tierno.” (Lukas 1:78) E ta e personifikashon mes di amor. De echo, nos Kreadó ta desplegá e kualidat aki te n’e grado ku Beibel ta bisa: “Dios ta amor.” (1 Juan 4:8) Pues, tin un gran diferensia entre e dios di e sistema di kosnan aki i e Dios ku abo tin e privilegio di adorá! Miéntras Satanas ta buska nos pa devorá, Yehova “no kier pa ningun hende bai pèrdí.” (2 Pedro 3:9) Pa Yehova, bida di tur hende ta presioso, bo bida tambe. Ora Yehova ta hasi un apelashon na bo via su Palabra pa no bira parti di mundu, no pensa ku e ta purba stroba bo di gosa di bida ni restringí bo libertat. (Juan 15:19) Al kontrario, e ta protehando bo di e malbado. Bo Tata selestial kier pa bo tin algu muchu mas mihó ku e plasernan pasahero di e mundu aki. E ta deseá pa bo optené e “bida berdadero,” esta, bida eterno den paradeis riba tera. (1 Timoteo 6:17-19) Yehova kier pa bo logra e meta ei, i e ta animá bo pa traha pa esei. (1 Timoteo 2:4) Ademas di esei, Yehova ta ekstendé un invitashon speshal na bo. Kua invitashon?

“Hasi Mi Kurason Kontentu”

8, 9. (a) Kiko bo por regalá Yehova? (b) Manera e kaso di Jòb ta ilustrá, kon Satanas ta desafiá Yehova?

⁸ Bo a yega di kumpra un regalo pa un bon amigu i despues wak kon e ta kuminsá smail di sorpresa i di gratitut ora e hañ’é? Probablemente bo a tuma bo tempu pa pensa ki tipo di regalo lo ta bon pa e persona ei. Awor pensa riba e pregunta aki: Ki sorto di regalo abo por duna Yehova Dios, bo Kreadó? Na promé instante, e idea so kaba por parse algu apsurdo. Kiko e Todopoderoso tin mester di un simpel hende? Kiko lo bo por dun’é ku e no tin kaba? Beibel ta kontestá na Proverbionan 27:11: “Sea sabí, mi yu, i hasi mi kurason kontentu, pa mi por kontestá esun ku reprochá mi.”

⁹ Manera probablemente bo a haña sa for di bo studio di Beibel, ta Satanas e Diabel ta esun ku ta reprochá òf desafiá Yehova. E ta pretendé ku ken ku ta sirbi Dios ta hasi esei pa motibunan egoista i no pa amor. Segun Satanas, si Dios permití su sirbidónan haña nan ku problema òf sufrimentu, mesora nan ta bandoná adorashon berdadero. Tuma por ehèmpel, loke Satanas a bisa Yehova tokante e hòmber hustu Jòb: “Bo no a traha un trankera rònt di dje, rònt di su kas, i rònt di tur loke e tin na tur banda? Bo a bendishoná e trabou di su man, i su propiedatnan a oumentá den e tera. Ma saka bo man awor i mishi ku tur loke e tin; siguramente e lo maldishoná bo den bo kara.”—Jòb 1:10, 11.

10. (a) Kon nos por sa ku no ta e integridat di Jòb so Satanas a kuestioná? (b) Kon abo ta enbolbí den e kuestion di soberania?

¹⁰ Manera e relato bíbliko ta revelá, no ta e lealtat di Jòb so Satanas a kuestioná, sino tambe e lealtat di tur otro hende ku ta sirbi Dios. Esun di bo tambe. De echo, papiando di humanidat en general, Satanas a bisa Yehova: “Tur loke un hende [pues no ta Jòb so, sino tur hende] tin e lo duna pa su bida.” (Jòb 2:4) Bo a ripará ki papel bo ta hunga den e kuestion vital aki? Manera Proverbionan 27:11 ta indiká, Yehova ta mustra ku tin algu ku bo por dun’é: un base pa e por kontestá Satanas, esun ku ta desafi’é. Imaginá bo, e Soberano Universal ta hasi un apelashon na bo pa duna bo aporte pa resolvé e kuestion di mas grandi ku a yega di eksistí. Esta un responsabilidat i privilegio asombroso bo tin! Abo por kumpli ku loke Yehova ta pidi bo? Jòb a kumpli. (Jòb 2:9, 10) Hesus tambe a kumpli ku esei i atraves di tempu un kantidat inkontabel di otro hende, inkluso hopi hóben, tambe a hasié.  (Filipensenan 2:8; Revelashon 6:9) Abo por hasi meskos. Sin embargo, no ekiboká bo mes. Den e asuntu aki bo no por ta neutral. Pa medio di bo echonan lo bo mustra si bo ta apoyá sea Satanas su reproche òf Yehova su kontesta. Kua di nan lo bo apoyá?

Yehova Ta Interesá den Bo!

11, 12. Ta importá Yehova si bo skohe pa sirbié òf laga? Splika.

¹¹ E eskoho ku bo hasi ta importá Yehova realmente? No tin sufisiente hende kaba ku a keda fiel pa e por duna un kontesta apropiá na Satanas? Sí, e akusashon di Diabel di ku ningun hende no ta sirbi Yehova pa motibu di amor, ya kaba a proba di ta falsu. Pero apesar di esei, Yehova kier pa abo skohe su banda den e kuestion di soberania pasobra e ta interesá den abo komo persona individual. Hesus a bisa: “No ta e boluntat di boso Tata ku ta den shelu pa ún di e chikitunan aki peresé.”—Mateo 18:14.

¹² Ta klaru anto ku Yehova ta interesá den e kaminda ku bo ta skohe. Mas importante ainda, loke bo skohe tin efekto riba dje. Beibel ta mustra bon kla ku Yehova tin sintimentunan profundo ku ta lanta ora hende hasi loke ta bon òf loke ta malu. Por ehèmpel, ora e israelitanan a rebeldiá bes tras bes, Yehova a sinti “doló.” (Salmo 78:40, 41, NW) Promé ku e Diluvio den tempu di Noé, ora “maldat di hende tabata grandi,” Yehova “tabata tristu den su kurason.” (Génesis 6:5, 6) Pensa riba e nifikashon di esaki. Si bo skohe un kaminda robes, lo bo por pone bo Kreadó sinti doló. Esaki no ta nifiká ku Dios ta suak òf emoshonal. Mas bien, e ta stima bo i ta interesá den bo bienestar. Di otro banda, ora bo hasi loke ta bon, Yehova su kurason ta bira kontentu. E no ta felis solamente pasobra e tin un kontesta mas ku e por duna Satanas, sino pasobra awor e por bira Esun ku ta rekompensá bo. I ta esei ta loke e kier bira. (Hebreonan 11:6) Esta un Tata amoroso Yehova Dios ta pa bo!

Bendishon Abundante Awor

13. Den ki manera sirbi Yehova ta trese bendishon asta awor?

¹³ Bendishon ku ta bini dor di sirbi Yehova no ta pa den futuro so. Hopi hóben Testigu di Yehova ta ser bendishoná ku goso i satisfakshon aworakí mes, i ku bon motibu. E salmista a skirbi: “E preseptonan di SEÑOR ta  korekto, nan ta alegrá kurason.” (Salmo 19:8) Yehova sa mihó ku tur hende kiko ta bon pa nos. Mediante profeta Isaías, Yehova a deklará: “Ami ta SEÑOR bo Dios, Kende ta siña bo, pa bo prosperá, Kende ta guia bo den e kaminda ku bo mester kana. Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.”—Isaías 48:17, 18.

14. Kon prinsipionan di Beibel por yuda bo evitá e doló di debe?

¹⁴ Biba segun prinsipionan di Beibel lo yuda bo evitá hopi doló i sufrimentu. Por ehèmpel, Beibel ta bisa ku esnan ku a desaroyá un amor pa plaka “a traspasá nan mes ku hopi doló.” (1 Timoteo 6:9, 10) Algun di bo pareunan a pasa den e realidat amargo ku e tekstonan aki ta papia di dje? Sierto hóbennan a hinka nan kurpa den debenan grandi djis pasobra nan ta pensa ku nan mester tin e pañanan di marka di último moda i artefaktonan elektróniko di mas moderno. Ora bo ta kargá ku debenan ku interes haltu pa largu tempu pa kosnan ku eigenlijk bo no por afòrt, bo ta den un forma di sklabitut doloroso!—Proverbionan 22:7.

15. Den ki maneranan prinsipionan di Beibel ta protehá bo di e doló ku inmoralidat seksual ta trese?

¹⁵ Pensa tambe riba e asuntu di inmoralidat seksual. Rònt mundu tur aña un kantidat grandi di teenager ta sali na estado sin ku nan ta kasá. Algun di nan ta duna lus na un yu ku nan no tin ni deseo ni kapasidat pa kria. Otronan ta kometé aborto i ta paga e preis di un konsenshi ku ta tormentá nan. Tin tambe e hóbennan ku ta haña malesanan transmití seksualmente, manera AIDS. Klaru ku pa un hóben ku konosé Yehova, e mayor konsekuensia ta e echo ku e ta daña su relashon ku Yehova. * (Galationan 5:19-21) P’esei, ta ku bon motibu Beibel ta bisa: “Hui for di inmoralidat.”—1 Korintionan 6:18.

Sirbi “e Dios Felis”

16. (a) Kon bo por sa ku Yehova kier pa bo disfrutá di bo hubentut? (b) Di kon Yehova ta establesé prinsipionan pa bo sigui?

¹⁶ Beibel ta deskribí Yehova komo “e Dios felis.” (1 Timoteo 1:11, NW) E kier pa abo tambe ta felis. De echo, su Palabra mes ta  bisa: “Gosa di bo hubentut, gosa tanten bo ta hóben ainda.” (Eklesiastés 11:9, Beibel na papiamentu koriente) Pero Yehova ta wak mas aleu ku e momentu aktual, i e por mira e konsekuensianan di largu alkanse di tantu bon komo mal kondukta. P’esei e ta spièrta bo: “Kòrda tambe riba bo Kreadó den e dianan di bo hubentut, promé ku e dianan malu bin i e añanan yega serka, di kualnan lo bo bisa: ‘Mi no tin goso den nan.’”—Eklesiastés 12:1.

17, 18. Kon un hóben kristian a mustra ku e ta felis den su sirbishi na Yehova, i kon abo por haña e mesun goso?

¹⁷ Awe, hopi hóben ta sinti nan masha felis den nan sirbishi na Yehova. Por ehèmpel, Lina di 15 aña a bisa: “Mi por kana ku mi kara na laira. Mi tin un kurpa salú pasobra mi no ta huma ni usa droga. E guia balioso ku mi ta haña mediante e kongregashon ta yuda mi resistí e preshon fuerte di Satanas. Mi kara ta bria di felisidat debí n’e asosiashon edifikante ku tin na Salòn di Reino. I e mihó kos ku mi tin ta un speransa invensibel di bida eterno riba tera.”

¹⁸ Meskos ku Lina, hopi hóben kristian ta hiba un lucha fuerte di fe, i esaki ta duna nan goso. Nan sa ku nan bida—ounke yen di problema i preshon de bes en kuando—tin un berdadero propósito i un futuro real. P’esei, sigui sirbi e Dios ku ta realmente interesá den bo bienestar. Hasi su kurason kontentu, i e lo laga bo gosa awor i pa semper!—Salmo 5:11.

[Nota]

Bo Ta Kòrda?

• Den ki sentido “e malbado,” Satanas, ta un peliger pa bo?

• Kon bo por hasi Yehova su kurason kontentu?

• Kon Beibel ta mustra ku Yehova ta interesá den bo?

• Kiko ta algun dje bendishonnan ku sirbi Yehova ta trese kuné?

[Preguntanan di Estudio]

[Kuadro/Plachi na página 13]

Un Hòmber Hustu Ta Hera di Trompeká

Asaf tabata un músiko levita prominente den e tèmpel di Yehova den Israel di antigwedat. El a asta komponé kantikanan ku a ser usá den adorashon públiko. Pero apesar di e privilegionan úniko ei, tabatin un tempu ku e kondukta malbado di Asaf su pareunan a atra’é. A parse ku su pareunan tabata kibra lei di Dios sin haña kastigu. Asaf a atmití despues: “Mi pia a hera di trompeká; parumpinga mi pasonan a slep. Pasobra mi tabata envidioso di e arogantenan, ora mi a mira e prosperidat di e malbadonan.”—Salmo 73:2, 3.

Despues, Asaf a bai n’e santuario di Dios i a hasi orashon tokante e asuntu. Una bes ku e por a mira asuntunan desde un punto di bista spiritual atrobe, el a komprondé ku Yehova ta odia maldat i ku na e debido tempu, tantu e malbado komo e hustu lo kosechá loke nan ta planta. (Salmo 73:17-20; Galationan 6:7, 8) Realmente e malbadonan ta riba flur ku ta slep. Finalmente, nan lo kai ora Yehova destruí e sistema malbado aki.—Revelashon 21:8.

[Plachi na página 15]

Yehova ta interesá den bo bienestar, miéntras ku Satanas su meta ta pa devorá bo

[Plachi na página 16]

Hopi hóben ta haña e mayor felisidat dor di sirbi Yehova huntu ku nan kompañeronan kristian