Hóbennan—Yehova Lo No Lubidá Boso Trabou!

“Dios no ta inhustu pa lubidá boso trabou i e amor ku boso a mustra pa su nòmber, dor ku boso a sirbi i ainda ta sirbi e santunan.”—HEBREONAN 6:10.

1. Kon e bukinan di Beibel di Hebreonan i Malakias ta mustra ku Yehova ta apresiá bo sirbishi?

BO A yega di hasi un kariño pa un amigu sin ku el a yama bo danki? Ora hende no mustra balor na un bondat ku bo a hasi òf asta lubidá riba dje, e por hasi hopi doló. Sin embargo, ora nos ta rindi sirbishi di henter nos kurason na Yehova, esei ta kompletamente otro! Beibel ta bisa: “Dios no ta inhustu pa lubidá boso trabou i e amor ku boso a mustra pa su nòmber, dor ku boso a sirbi i ainda ta sirbi e santunan.” (Hebreonan 6:10) Pensa riba e nifikashon di e palabranan ei. Si Yehova mester lubidá loke bo a hasi i ta sigui hasi den su sirbishi, e ta konsiderá esei komo un inhustisia—un piká—di su parti. Yehova sí ta un Dios gradisidu!—Malakias 3:10.

2. Kiko ta hasi sirbishi na Yehova algu realmente spesial?

 ² Bo tin un oportunidat spesial pa adorá i sirbi e Dios gradisidu aki. Na komparashon ku e rònt di seis mil mion hende ku tin rònt mundu, bo kompañeronan di fe ta un seis mion hende so. P’esei en bèrdat bo tin un privilegio úniko. Ademas, e echo ku bo ta skucha i reakshoná riba e mensahe di e bon nobo ta un evidensia ku Yehova ta interesá den bo personalmente. De echo, Hesus a bisa: “Ni un hende no por bin serka mi, si no ta e Tata ku a manda mi a hal’é.” (Juan 6:44) Sí, Yehova ta yuda hende individualmente probechá di e benefisionan di e sakrifisio di Kristu.

Apresiá Bo Gran Privilegio

3. Kon e yu hòmbernan di Koré a ekspresá nan apresio p’e privilegio di por a sirbi Yehova?

³ Manera e artíkulo anterior a mustra, bo ta den un posishon úniko pa hasi Yehova su kurason kontentu. (Proverbionan 27:11) Wak pa nunka bo no mira esaki komo algu gewoon. Den un di nan salmonan inspirá, e yu hòmbernan di Koré a ekspresá nan apresio p’e privilegio di por a sirbi Yehova. Nos ta lesa: “Un dia den bo pationan ta mihó ku mil dia pafó. Mi ta preferá di para na entrada di e kas di mi Dios ku biba den e tèntnan di maldat.”—Salmo 84:10.

4. (a) Kiko por pone algun hende pensa ku adorashon di Yehova ta restringí nan? (b) Kon Yehova ta mustra ku e mes ta ansioso pa opservá i rekompensá su sirbidónan?

⁴ Ta asina bo ta sinti tokante bo privilegio di por sirbi bo Tata selestial? Nos tin ku atmití sí, ku tin bes por parse ku adorashon di Yehova ta limitá bo libertat. Ta sierto ku pa biba di akuerdo ku prinsipionan di Beibel bo tin ku sakrifiká algu. Pero finalmente, tur loke Yehova pidi di bo ta pa bo mes bon. (Salmo 1:1-3) Ademas, Yehova ta mira bo esfuersonan i ta demostrá su apresio pa bo fieldat. De echo, Pablo a skirbi ku Yehova “ta esun ku ta rekompensá esnan ku ta busk’e” ku empeño. (Hebreonan 11:6) Yehova ta buska oportunidat pa hasi esaki. Un profeta hustu di Israel di antigwedat a deklará: “Wowo di SEÑOR ta move bai bin dor di henter tera, pa e por sostené fuertemente esnan ku nan kurason ta kompletamente di dje.”—2 Krónikanan 16:9.

5. (a) Kua ta un di e mihó maneranan ku bo por demostrá ku bo kurason ta kompletamente ku Yehova? (b) Dikon por parse difísil pa papia ku otronan tokante bo fe?

⁵ Un di e mihó maneranan ku bo por demostrá ku bo kurason ta kompletamente ku Yehova ta dor di papia ku otro hende tokante dje. Bo a yega di haña e oportunidat di papia ku algun di bo koleganan di skol tokante bo fe? Na promé instante lo bo no tin muchu smak di hasi esei, i e idea so lo por duna bo miedu. Kisas bo ta puntra: ‘Kiko si nan hari mi? Kiko si nan pensa ku mi religion ta straño?’ Hesus a rekonosé ku no ta tur hende lo  skucha e mensahe di Reino. (Juan 15:20) Pero esaki no ta nifiká ku ta henter bo bida nan lo bai tenta bo i rechasá bo. Al kontrario, hopi hóben Testigu a haña hende ku kier a skucha nan. I dor ku nan a pega firmemente na nan kreensianan, nan pareunan a haña mas rèspèt pa nan.

“Yehova Lo Yuda Bo”

6, 7. (a) Kon bin un hóben di 17 aña por a duna testimonio na su kompañeronan di klas? (b) Kiko bo a siña for di e eksperensia di Jennifer?

⁶ Pero kon bo por tuma un kurashi pa papia tokante bo fe? Pakiko no ser onesto i franko ora hende hasi bo pregunta tokante bo religion? Konsiderá e ehèmpel di Jennifer di 17 aña di edat. “Tabata den pouze na skol. E mucha muhénan na mi mesa tabata papia tokante religion i un di nan a puntra mi kua misa mi ta bai,” e ta bisa. Jennifer tabata nervioso ora e mester a kontestá? “Sí,” e ta atmití, “pasobra mi no tabata sigur kon nan lo a reakshoná.” Anto kiko Jennifer a hasi? “Mi a bisa e muchanan ku mi ta un Testigu di Yehova,” e ta sigui. “Na promé instante a parse ku nan a keda sorprendí. Aparentemente nan tabatin Testigunan di Yehova pa hende straño. P’esei, nan a kuminsá hasi mi pregunta, i mi por a klarifiká algun idea robes ku nan tabatin. Asta despues di e dia ei, algun mucha muhé tabata aserká mi de bes en kuando pa hasi pregunta.”

⁷ Jennifer a sinti duele ku el a probechá di e oportunidat pa papia tokante su kreensianan? Apsolutamente! E ta bisa: “Ora pouze a kaba, mi a sinti mi hopi bon. Awor e muchanan ei tin un mihó idea ken Testigunan di Yehova realmente ta.” Awor Jennifer tin un konseho masha simpel: “Si bo tin problema pa duna testimonio na bo kompañeronan di klas òf maestronan, hasi un orashon den purá. Yehova lo yuda bo. Lo bo sinti bo felis ku bo a probechá di bo oportunidat pa duna testimonio.”—1 Pedro 3:15.

8. (a) Kon orashon a yuda Nehemias ora el a hañ’é ku un situashon inesperá? (b) Kua ta algun okashon na skol ku lo bo tin ku hasi un orashon breve, den silensio na Yehova?

⁸ Tuma nota ku Jennifer ta rekomendá pa “hasi un orashon den purá” ora ku presentá un oportunidat pa duna testimonio tokante bo fe. Esaki ta presis loke Nehemias, kopero di Rei Artaherhes di Persia, a hasi ora el a hañ’é ku un situashon inesperá. Tabata bisto ku Nehemias tabata preokupá pasobra el a haña informe tokante e kondishon deplorabel di e hudiunan i ku e muraya i portanan di Yerusalèm tabata tur ruiná. E rei a ripará ku Nehemias tabata hopi preokupá i p’esei el a puntr’é kiko tabata su problema. Promé ku Nehemias a kontestá, el a resa pidi Yehova guia. Anto ku kurashi el a pidi rei pèrmit p’e bolbe Yerúsalèm i yuda rekonstruí e stat dekaí. Artaherhes a duna Nehemias pèrmit. (Nehemias 2:1-8) Kiko ta e lès pa bo? Si bo ta sinti bo nervioso ora un oportunidat presentá pa bo duna testimonio tokante bo fe, no keda sin hasi uso di e chèns ku bo tin pa hasi orashon den silensio. Pedro a skirbi: ‘Tira tur bo preokupashon riba [Yehova], pasobra e ta pèrkurá pa bo.’—1 Pedro 5:7; Salmo 55:22.

“Dispuesto pa Duna Kontesta”

9. Kon bin Leah di 13 aña di edat por a laga 23 buki Hovenan sa puntra?

⁹ Konsiderá un otro eksperensia. Durante pouze na skol, Leah di 13 aña di edat tabata lesa e buki Loke hovenan sa puntra—Contesta práctica. * E ta bisa: “Otro mucha tabata wak mi, i djis despues un grupo a bin para mi tras pa wak den e buki. Nan a kuminsá puntra ta over di kiko e buki ta bai.” Na fin di e dia ei, kuater mucha muhé a pidi Leah un ehemplar di e buki Hovenan sa puntra. No a dura mashá ku e muchanan aki a laga otronan wak e buki, i esakinan tambe tabata ke un ehemplar. Durante e siguiente simannan, Leah a laga 23 buki di Hovenan sa puntra serka su  kompañeronan di skol i nan amiganan. Tabata fásil pa Leah ekspresá su mes na prinsipio ora otro mucha a hasi pregunta tokante e buki ku e tabata lesa? Sigur ku nò! E ta atmití: “Na prinsipio mi tabata nervioso. Pero mi a hasi orashon, i mi tabata sa ku Yehova tabata ku mi.”

10, 11. Kon un hobensita israelita por a yuda un hefe di ehérsito sirio siña di Yehova, i ki kambio e hefe a hasi despues di esei?

¹⁰ Podisé Leah su eksperensia ta pone bo kòrda riba un situashon similar ku e hóben israelita ku tabata esklabo na Siria a haña su mes aden. Naaman, un hefe di ehérsito sirio, tabatin lepra. Por ta masha bon ku ta su esposa a kuminsá e kòmbersashon ku a impulsá e mucha chikitu pa papia tokante su fe. El a bisa: “Mara mi shon Naaman tabata serka e profeta ku ta na Samaria! E ora ei é lo a kur’é di su lepra.”—2 Reinan 5:1-3.

¹¹ Dor di e hobensita su kurashi Naaman a haña sa ku “no tin ningun Dios den henter mundu, sino solamente na Israel.” Anto asta el a disidí ku e lo “no ofresé ofrenda kimá mas, ni e lo no ofresé sakrifisio na otro diosnan, sino solamente na [Yehova].” (2 Reinan 5:15, 17) Yehova siguramente a bendishoná e kurashi di e hobensita ei. Yehova por i lo hasi  meskos pa hóbennan awe. Leah a eksperensiá esei. Ku tempu algun di su kompañeronan di skol a aserk’é i a bis’é ku e buki Hovennan sa puntra a yuda nan drecha nan kondukta. Leah a bisa: “Mi a keda kontentu pasobra mi tabata sa ku mi ta yudando otronan siña mas tokante Yehova i yuda nan kambia nan bida.”

12. Kon bo por haña fortalesa pa papia di bo fe?

¹² Bo por tin e mesun eksperensianan ku Jennifer i Leah tabatin. Sigui e konseho di Pedro, kende a skirbi ku komo kristian bo mester ta semper “dispuesto pa duna kontesta na kada un ku pidi boso pa duna kuenta di e speransa ku tin den boso, sinembargo ku suavidat i reverensia.” (1 Pedro 3:15) Kon bo por hasi esei? Dor di imitá e ehèmpel di e kristiannan di promé siglo kendenan a resa pidi Yehova yuda nan prediká “ku tur kurashi.” (Echonan 4:29, NW) Despues di esei, tuma un kurashi i papia ku otronan tokante bo kreensianan. E resultadonan por sorprendé bo. Loke ta mas importante, lo bo hasi Yehova su kurason kontentu.

Vidio i Proyektonan Spesial

13. Kua oportunidatnan algun hóben a probechá di dje pa duna testimonio? (Wak kuadronan na página 20 i 21.)

¹³ Hopi hóben a usa vidio pa splika nan fe na nan kompañero- i maestronan di skol. Tin bes, proyektonan di skol tambe a habri oportunidat pa trese alabansa na Yehova. Por ehèmpel, dos mucha hòmber di 15 aña di edat, tur dos Testigu di Yehova, a haña e tarea komo parti di nan lès di historia di mundu, pa skirbi un informe tokante un dje religionnan na mundu. Nan dos a plania pa skirbi un informe tokante Testigunan di Yehova, usando e buki Testigunan di Yehova—Proklamadónan dje Reino di Dios komo nan fuente di informashon. * Tambe nan mester a duna un informe oral di sinku minüt. Despues di esei, e maestro i e studiantenan tabatin asina  tantu pregunta ku e hóbennan a haña nan ta keda un 20 minüt mas dilanti klas. Pa vários siman despues di esei, nan kompañeronan di klas a sigui hasi pregunta tokante Testigunan di Yehova!

14, 15. (a) Dikon miedu di hende ta un trampa? (b) Pakiko bo por tin konfiansa ora bo ta papia tokante bo kreensianan ku otro hende?

¹⁴ Manera e eksperensianan menshoná anteriormente ta ilustrá, bo por haña hopi bendishon ora bo ta konta otronan tokante bo kreensianan i konvikshon komo Testigu di Yehova. No laga miedu di hende privá bo di bo privilegio i goso di por yuda otro hende konosé Yehova. Beibel ta deklará: “Temor pa hende ta pone un trampa, ma esun ku konfia den SEÑOR lo ta halsá.”—Proverbionan 29:25.

¹⁵ Kòrda, komo un hóben kristian, bo tin algu ku bo pareunan tin hopi mester di dje: e mihó manera di biba awor i e promesa di bida eterno den futuro. (1 Timoteo 4:8) Ta interesante pa nota ku na Merka—kaminda lo bo pensa ku hende en general ta mas inkliná na kos di mundu i indiferente pa ku religion—un enkuesta a mustra ku por lo ménos mitar dje hóbennan ta tuma e asuntu di religion masha na serio. I un tersera parti a bisa ku fe religioso ta “e influensia di mas importante” den nan bida. Probablemente e situashon ta meskos na hopi otro partinan di mundu. P’esei, por ta masha bon ku bo pareunan na skol lo ta kontentu pa skucha loke bo tin di bisa di Beibel.

Komo un Hóben, Hala Serka Yehova

16. Ademas di papia ku otronan tokante Yehova, kiko mas bo tin ku hasi pa alegrá su kurason?

¹⁶ Klaru ku pa bo hasi Yehova su kurason kontentu, bo tin ku hasi muchu mas ku djis papia di dje. Bo kondukta tambe mester ta na armonia ku su normanan. Apòstel Juan a skirbi: “Esaki ta e amor di Dios, ku nos ta warda su mandamentunan; i su mandamentunan no ta pisá.” (1 Juan 5:3) Lo bo ripará ku esaki ta sierto ora bo hala serka Yehova. Kon bo por hasi esei?

17. Kon bo por hala serka Yehova?

¹⁷ Tuma tempu pa lesa Beibel i publikashonnan basá riba Beibel. Mas bo siña di Yehova, mas fásil lo bira pa bo obedes’é i papia ku otronan tokante dje. “E bon hende, for di e bon tesoro di su kurason, ta saka loke ta bon,” Hesus a bisa, “pasobra for di e abundansia di kurason su boka ta papia.” (Lukas 6:45) P’esei, yena bo kurason ku kos bon. Pakiko no pone meta relashoná ku esaki? Kisas bo por mehorá den preparashon pa reunionnan di kongregashon pa otro siman. Bo siguiente meta lo por ta pa partisipá den reunion ku un komentario breve pero sinsero. Klaru ku ta masha importante tambe pa bo praktiká e kosnan ku bo ta siña.—Filipensenan 4:9.

18. Asta si bo haña bo ku algun oposishon, kiko bo por ta sigur di dje?

¹⁸ E bendishonnan ku sirbi Yehova ta trese kuné ta duradero, en realidat, pa semper. Sí, bo por haña ku de bes en kuando hende ta bai kontra bo òf tenta bo pasobra bo ta un Testigu di Yehova. Pero kòrda riba Moisés. Beibel ta bisa ku “e tabatin su bista [fihá] riba e rekompensa.” (Hebreonan 11:24-26) Bo tambe por ta sigur ku Yehova lo rekompensá e esfuersonan ku bo ta hasi pa siña i papia di dje. Sí, hamas lo e ‘lubidá bo trabou i e amor ku bo a mustra pa su nòmber.’—Hebreonan 6:10.

[Nota]

Bo Ta Kòrda?

• Dikon bo por ta sigur ku Yehova ta apresiá bo sirbishi?

• Ku ki métodonan di duna testimonio na skol algun tabatin éksito?

• Kon bo por haña fortalesa pa duna testimonio na kompañeronan di skol?

• Kon bo por hala serka Yehova?

[Preguntanan di Estudio]

[Kuadro/Plachinan na página 20]

Asta Mucha Hopi Yòn Ta Alabá Yehova!

Asta mucha hopi yòn ku no ta teenager ainda por a duna testimonio na skol. Lesa e eksperensianan aki.

Amber, kende tin dies aña di edat i ta den vijfde klas, tabata lesa un buki tokante e atake di nazi riba hudiunan durante Segundo Guera Mundial. Amber a disidí di trese e vidio Triángulo Püs pa su yùfrou. E yùfrou a keda sorprendí ora el a haña sa ku e régimen nazi a persiguí Testigunan di Yehova tambe. E yùfrou a laga henter klas wak e vidio.

Ku ocho aña di edat, Alexa a skirbi un karta na su klas pa splika nan dikon e no ta partisipá na nan selebrashon di Pasku. E karta a impreshoná e yùfrou asina tantu ku el a laga Alexa lesa e karta na bos haltu pa su propio klas i tambe pa dos otro klas! Na konklushon Alexa a bisa den su karta: “Nan a siña mi pa respetá otro kreensianan ku no ta meskos ku esun di mi, i mi ta gradisí boso ku boso ta respetá mi desishon pa no selebrá Pasku.”

Djis despues ku Eric a kuminsá eerste klas, el a bai skol ku su buki Mi buki di relato bíblico i a pidi su mener pèrmit p’e mustra su kompañeronan di klas e buki. E mener di: “Mi tin un mihó idea. Dikon bo no ta lesa un relato pa e klas?” Eric a lesa. Despues di esei el a bisa pa tur hende ku kier un buki hisa nan man. Diesocho hende, inkluso e mener, a hisa man! Awor Eric ta sinti ku e tin su propio teritorio spesial p’e duna testimonio.

Whitney di nuebe aña ta masha gradisidu ku tin e foyeto Testigonan di Jehova i Educacion. * “Normalmente tur aña ta mi mama ta duna mi yùfrounan e foyeto aki,” e ta bisa, “pero e aña aki mi mes a hasié. E foyeto aki a pone ku mi yùfrou a skohe mi komo e ‘alumno di siman.’”

[Nota]

[Kuadro/Plachinan na página 21]

Situashonnan Ku Algun A Probechá di Dje pa Papia Tokante Nan Fe

Ora algun hóben a haña e tarea pa traha un spreekbeurt òf proyekto pa skol, nan a skohe un tema ku a permití nan duna testimonio

Vários hóben a duna nan maestro un vidio òf un publikashon ku tin di haber ku un tema ku nan ta konsiderá den klas

Algun hóben a lesa Beibel òf un publikashon basá riba Beibel den pouze, i otronan a aserká nan i hasi nan pregunta

[Plachi na página 18]

Rumannan ku eksperensia por yuda entrená hóbennan pa sirbi Yehova