Kon Importante Bondat Amoroso Ta?

“LOKE ta deseabel den un hende ta su kariño [“bondat amoroso,” NW]” segun Beibel. (Proverbionan 19:22) Sí, aktonan di bondat motivá pa amor ta realmente deseabel. Sin embargo, e palabra “bondat amoroso” ku Beibel ta papia di dje ta referí na un bondat ku hende ta mustra a base di un relashon ku ta eksistí kaba. Kisas, e relashon ei a resultá for di aktonan anterior di bondat ku e otro persona a mustra na nan. Pues, e ta duna idea di lealtat.

Rei Joas di Huda no a kultivá e kualidat deseabel aki. E mester tabata hopi gradisidu na su tanta i tambe na su tio Joiada. Tempu ku Joas no tabatin ni un aña ainda, su wela malbado a hasi su mes reina i a mata tur Joas su ruman hòmbernan, e herederonan di e trono. Sin embargo, e wela no por a mata Joas pasobra su tanta i tio a skond’é hopi bon. Tambe nan a siñ’é e Lei di Dios. Ora Joas tabatin shete aña, su tio a usa su outoridat komo sumo saserdote pa laga mata e reina malbado i koroná Joas komo rei.—2 Krónikanan 22:10–23:15.

E rei hóben Joas a goberná di un manera ekselente te na morto di su tio. Pero despues di esei, el a kuminsá adorá ídolo. Dios a manda Zakarias, yu hòmber di Joiada, pa atvertí Joas di su apostasia. Joas a laga piedra Zakarias mata. Esta un akto kruel di deslealtat pa ku un famia ku a hasi asina hopi p’e!—2 Krónikanan 24:17-21.

Beibel ta deklará: “Joas no a kòrda e kariño [“bondat amoroso,” NW] ku [Zakarias su] tata Joiada a mustr’é, ma el a mata su yu hòmber.” I ora Zakarias tabata muriendo, el a bisa: “Ku SEÑOR mira i tuma vengansa!” E palabranan di Zakarias a kumpli ora Joas a bira hopi malu i su mes sirbidónan a mat’é.—2 Krónikanan 24:17-25.

En bes di bira manera Rei Joas, tur hende ku sigui e siguiente konseho aki lo ser bendishoná den futuro: “No laga miserikòrdia [“bondat amoroso,” NW] i bèrdat bandoná bo. . . . Asina lo bo haña grasia i aprobashon den bista di Dios i hende.”—Proverbionan 3:3, 4.