Bo Sa Puntra: “Unda Yehova Ta?”
Bo Sa Puntra: “Unda Yehova Ta?”
“Nan a alehá for di mi . . . I nan no a bisa: ‘Unda Yehova ta?’”—JEREMIAS 2:5, 6, NW.
1. Kiko hende por tin na mente ora nan puntra: “Unda Dios ta”?
“UNDA Dios ta?” Hopi hende a yega di hasi e pregunta ei. Tin di nan simplemente kier a komprondé un echo básiko di e Kreadó, esta, na unda presis e ta biba? Otronan a hasi e pregunta ei despues di un kalamidat grandi òf ora nan personalmente a haña nan ku hopi difikultat i no por a komprondé dikon Dios no a kai aden. Sin embargo, tin hende ku no ta hasi e pregunta ei mes, pasobra nan ta rechasá e idea ku Dios ta eksistí.—Salmo 10:4.
2. Ken tabatin éksito den nan búskeda di Dios?
2 Klaru ku tin hopi hende ku sí ta keda konvensí a base di e tantísimo pruebanan ku tin un Dios. (Salmo 19:1; 104:24) Algun di e hendenan aki ta keda satisfecho ku kualkier forma di religion. Pero amor intenso pa e bèrdat a motivá miónes di hende, den tur pais, pa buska e Dios berdadero. Nan esfuerso no tabata enbano, ya ku e “no ta leu di kada un di nos.”—Echonan 17:26-28.
3. (a) Unda Dios ta biba? (b) Kiko e pregunta bíbliko “Unda Yehova ta,” ta indiká indirektamente?
3 Ora un persona realmente haña Yehova, e ta realisá ku “Dios ta Spiritu,” invisibel pa bista humano. (Juan 4:24) Hesus a referí na e Dios berdadero komo “mi Tata ku ta den shelu.” Kiko esei kier men? Ku den un sentido spiritual, nos Tata selestial ta biba den un lugá elevá, meskos ku e shelu literal ta hopi haltu for di tera. (Mateo 12:50; Isaias 63:15) Nos no por mira Dios ku nos wowo literal, sin embargo, el a hasi posibel pa nos konos’é i siña hopi kos tokante su propósitonan. (Eksodo 33:20; 34:6, 7) E ta kontestá preguntanan di hende sinsero ku kier sa kiko ta e propósito di bida. Relashoná ku asuntunan ku ta influensiá nos bida, e ta perkurá un base konfiabel pa nos komprondé “unda Yehova ta,” loke bíblikamente por nifiká kon Yehova ta mira e asuntunan ei i si nos deseonan ta na armonia ku su propósito. E kier pa nos puntra kiko ta su punto di bista relashoná ku e kosnan ei i hasi un esfuerso sinsero pa haña kontesta. Mediante profeta Jeremias, Yehova a skual e pueblo di antiguo Israel pasobra nan no a hasi esaki. Nan tabata sa e nòmber di Dios, pero nan no a puntra: “Unda Yehova ta?” (Jeremias 2:6, NW) Yehova su propósito no tabata nan preokupashon prinsipal. Nan no tabata buska su guia. Ora abo ta konfrontá desishonnan, sea grandi òf chikí, abo sa puntra: “Unda Yehova ta?”
Esnan Ku A Buska Dios Su Guia
4. Kon nos por benefisiá di e ehèmpel ku David a pone den buska Yehova su guia?
4 Siendo un hóben ainda, David yu di Isaí (Yese) a desaroyá fe fuerte den Yehova. E tabata konosé Yehova komo “e Dios bibu.” David personalmente a eksperensiá Yehova su protekshon. Motivá pa fe i pa amor pa ‘e nòmber di Yehova,’ David a mata e gigante filisteo fuertemente armá, Goliat. (1 Samuel 17:26, 34-51) Sin embargo, David su éksito no a pon’é konfia den su mes. E no a rasoná ku awor Yehova lo dun’é éksito den kiko ku e bai hasi. Durante e añanan ku a sigui, vários bes David a buska Yehova su guia ora ku e mester a tuma desishon. (1 Samuel 23:2; 30:8; 2 Samuel 2:1; 5:19) El a sigui resa: “Hasi mi konosé bo kamindanan, o SEÑOR; siña mi bo bereanan. Guia mi den bo bèrdat i siña mi, pasobra ta abo ta e Dios di mi salbashon; riba bo mi ta spera henter dia.” (Salmo 25:4, 5) Ki un ekselente ehèmpel pa nos sigui!
5, 6. Kon Josafat a buska Yehova na vários okashon durante su bida?
5 Den tempu di Rei Josafat (Yehosafat), e di sinku rei den e liña di desendensia real di David, un ehérsito kombiná di tres nashon a bini pa bringa kontra Huda. Ora Josafat a hañ’é konfrontá ku e krísis nashonal aki, el a “disidí di buska SEÑOR.” (2 Krónikanan 20:1-3) Esaki no tabata promé bes ku Josafat a buska Yehova. Anteriormente, e rei a keda leu for di e adorashon di Baal ku Israel apóstata, e reino di nort, a práktika i a skohe pa kana den e kaminda di Yehova. (2 Krónikanan 17:3, 4) P’esei awor ku Josafat a konfrontá un krísis, kon el a ‘buska Yehova’?
6 Den un orashon públiko ku el a hasi na Yerusalèm na e momentu krítiko ei, Josafat a indiká ku el a kòrda riba Yehova su forsa todopoderoso. El a pensa profundamente riba e propósito di Yehova i kon El a revelá esei dor di kore ku otro nashonnan for di un parti di e tera i dun’é na Israel komo herensia. E rei a rekonosé ku e tabatin mester di Yehova su yudansa. (2 Krónikanan 20:6-12) Yehova a laga nan hañ’é na e okashon ei? Sigur ku sí. Via Jahaziel, un levita, Yehova a perkurá guia spesífiko, i e siguiente dia El a duna su pueblo viktoria. (2 Krónikanan 20:14-28) Kon abo por tin sigur ku Yehova lo lagá bo tambe hañ’é ora ku bo akudí na dje pa guia?
7. Ken su orashon Dios ta tende?
7 Yehova no ta hasi distinshon di persona. E ta invitá hende di tur nashon pa busk’é den orashon. (Salmo 65:2; Echonan 10:34, 35) E ta tuma nota di loke tin den kurason di esnan ku ta hasi petishon na dje. E ta sigurá nos ku e ta tende orashon di e hustunan. (Proverbionan 15:29) E ta laga su mes wòrdu hañá dor di personanan ku anteriormente no a mustra interes den dje, pero ku awor humildemente ta buska su guia. (Isaias 65:1) E ta asta tende orashon di esnan ku no a kumpli ku su lei, pero ku awor ta repentí humildemente. (Salmo 32:5, 6; Echonan 3:19) Sin embargo, ora un persona su kurason no ta sumiso na Dios, ta pòrnada e ta hasi orashon. (Marko 7:6, 7) Ban analisá algun ehèmpel.
Nan A Puntra Pero Nan No A Haña Kontesta
8. Kiko a hasi Rei Saul su orashonnan inaseptabel pa Yehova?
8 Despues ku profeta Samuel a bisa Rei Saul ku el a ser rechasá dor di Dios pa motibu di su desobedensia, Saul a kai na suela pa adorá Yehova. (1 Samuel 15:30, 31; NW) Pero esei tabata simplemente pa bista di hende. Saul su deseo no tabata pa obedesé Dios, sino ku e kier a ser onrá dilanti di e pueblo. Mas despues, ora ku e filisteonan tabata bringa kontra Israel, pa formalidat Saul a puntra Yehova kiko pa hasi. Sin embargo, ora ku e no a haña kontesta, el a konsultá un hasidó di bruha, ounke e tabata sa ku Yehova a kondená esaki. (Deuteronomio 18:10-12; 1 Samuel 28:6, 7) Resumiendo e asuntu, 1 Krónikanan 10:14 ta bisa di Saul: “[E] no a konsultá ku SEÑOR.” Dikon? Pasobra Saul su orashonnan no tabata basá riba fe. Pues, ta komo si fuera e no a hasi orashon mes.
9. Kiko tabatin di malu den Sedekias su ruego pa haña Yehova su guia?
9 Di igual manera, segun ku e fin di e reino di Huda tabata aserká, e pueblo tabata hasi mas orashon i konsultá ku e profetanan di Yehova. Pero na mesun tempu ku e pueblo a pretendé di tin rèspèt pa Yehova nan a práktika idolatria. (Sofonias 1:4-6) Pa formalidat nan a puntra Dios kiko pa hasi, ma nan no a prepará nan kurason pa someté nan mes na su boluntat. Rei Sedekias a roga Jeremias pa puntra Yehova p’e. Ma Yehova a bisa e rei kaba kiko e mester a hasi. Pero pa falta di fe i pa miedu di hende, e rei no a obedesé e bos di Yehova, i Yehova no a duna un otro kontesta ku lo tabata mas na agrado di e rei.—Jeremias 21:1-12; 38:14-19.
10. Kiko tabatin di malu den e manera ku Johanan a buska instrukshon serka Yehova, i kiko nos ta siña for di su eror?
10 Despues ku Yerusalèm a ser destruí i e ehérsito di Babilonia a bai ku e eksiliadonan hudiu, Johanan a prepará pa bai Egipto ku e grupo chikí di hudiu ku a keda na Huda. Nan a traha nan plan, pero promé ku nan a bai nan a pidi Jeremias hasi orashon pa nan i buska instrukshon serka Yehova. Sin embargo, ora nan no a haña e kontesta ku nan a deseá, nan a sigui ku loke nan tabatin planiá kaba. (Jeremias 41:16–43:7) Abo por siña algu for di e susesonan aki? Bo por saka lèsnan ku por benefisiá bo, ya asina ora bo ta buska Yehova su kara (òf, guia) lo e laga bo hañ’é?
“Sigui Hasi Sigur”
11. Pakiko nos mester apliká Efesionan 5:10?
11 Adorashon berdadero ta enserá mas ku solamente simbolisá nos dedikashon mediante boutismo den awa, asistí na reunionnan di kongregashon i partisipá den sirbishi di vèlt. E ta enbolbé henter nos bida. Diariamente nos ta eksperensiá preshon—algun di nan masha fini, algun mas bisto—ku lo por desviá nos for di e kaminda ku ta na armonia ku deboshon na Dios. Kon nos lo reakshoná riba e preshonnan aki? Ora apòstel Pablo tabata skirbi e fiel kristiannan na Efeso, el a animá nan: “Sigui hasi sigur di loke ta aseptabel pa Señor.” (Efesionan 5:10, NW) E Skritura ta informá di hopi situashon ku ta demostrá e bentaha di hasi esei.
12. Dikon Yehova a rabia ora David a laga transportá e arka di pakto pa Yerusalèm?
12 Despues ku nan a debolbé e arka di pakto na Israel i el a keda pa hopi aña na Kiriat-jearim, Rei David kier a tres’é Yerusalèm. El a konsultá ku e kabesantenan di e pueblo i a bisa ku lo hiba e Arka ‘si ta parse nan bon i si ta e boluntat di Yehova.’ Pero pa negligensia David no a buska sufisiente informashon pa hasi sigur kiko tabata Yehova su boluntat relashoná ku e asuntu. Pasobra si el a hasi esei, nunka nan lo no a pone e Arka riba un garoshi. Nan lo a laga e levitanan koatita karg’é riba nan skouder, segun e instrukshonnan bon kla ku Dios a duna. Ounke David ku frekuensia a buska Yehova su guia, na e okashon aki el a faya, i no a hasié na e manera korekto. E resultado tabata desastroso. Despues David a atmití: “E rabia di SEÑOR nos Dios a lanta kontra nos, pasobra nos no a busk’é konforme e ordenansa.”—1 Krónikanan 13:1-3; 15:11-13; Numbernan 4:4-6, 15; 7:1-9.
13. Ki rekordatorio tabatin den un kantika ku a ser kantá ora ku nan a logra transportá e Arka sin problema?
13 Ora ku finalmente e levitanan a transportá e Arka for di e kas di Obed-edòm pa Yerusalèm, e hendenan a kanta un kantika ku David a komponé. E kantika tabatin e rekordatorio sinsero aki: “Buska SEÑOR i su fortalesa; buska su kara kontinuamente. Kòrda su echonan maravioso ku el a hasi, su señalnan i e huisionan di su boka.”—1 Krónikanan 16:11, 12.
14. Ki benefisio nos por saka di Salomon su bon ehèmpel i di e erornan ku el a hasi ora el a bira bieu?
14 Promé ku e muri, David a konsehá su yu Salomon: “Si bo buska [Yehova], e lo laga bo hañ’é.” (1 Krónikanan 28:9) Ora ku Salomon a subi trono el a bai Gabaon, kaminda e tènt di reunion tabata situá, i a ofresé sakrifisio na Yehova. Einan Yehova a duna Salomon e invitashon: “Pidi loke bo kier pa mi duna bo.” Komo kontesta riba Salomon su petishon, Yehova generosamente a dun’é sabiduria i konosementu pa husga Israel, i ademas el a agregá rikesa i onor na esei. (2 Krónikanan 1:3-12) Salomon a usa e mapa di konstrukshon ku Yehova a duna David i a traha un tèmpel magnífiko. Pero relashoná ku su propio asuntunan matrimonial, Salomon no a buska e guia di Yehova. Salomon a kasa ku muhénan ku no tabata adorá Yehova. Despues ora el a bira bieu, nan a desviá su kurason for di Yehova. (1 Reinan 11:1-10) P’esei, pa prominente òf sabí ku nos por ta, òf pa kuantu konosementu ku nos por tin, ta importante pa “sigui hasi sigur di loke ta aseptabel pa Señor”!
15. Dikon ora ku Zera e etiope a bini kontra Huda, Asa por a hasi orashon ku e konfiansa ku Yehova lo libra Huda?
15 Esaki ta ser enfatisá mas aleu den e relato di e reinado di Asa, un bisañetu di Salomon. Diesun aña despues ku Asa a bira rei, Zera e etiope a enkabesá un ehérsito di un mion sòldá ku a bini kontra Huda. Yehova lo a libra Huda? Mas ku 500 aña promé, Yehova a deklará bon kla kiko su pueblo por a spera si nan a skuch’é i warda su mandamentunan, i kiko nan por a spera si nan no hasi esei. (Deuteronomio 28:1, 7, 15, 25) Na prinsipio di su reinado, Asa a eliminá for di su pais e altarnan i pilarnan usá den adorashon falsu. El a animá e pueblo pa ‘buska Yehova.’ Asa a hasi esei promé ku el a konfrontá kalamidat. P’esei ku fe den Yehova, Asa por a hasi orashon na nan fabor. E resultado? Huda tabatin un viktoria impreshonante.—2 Krónikanan 14:2-12.
16, 17. (a) Ounke Asa a sali viktorioso, ki rekordatorio Yehova a dun’é? (b) Ki yudansa Asa a haña ora el a aktua na un manera bobo, pero kon el a reakshoná? (c) Ki benefisio nos por saka dor di analisá e komportashon di Asa?
16 No opstante, ora ku Asa a regresá viktorioso, Yehova a manda Azarias bai kontra ku e rei i bis’é: “Skucha mi, Asa, i henter Huda i Benjamin: SEÑOR ta ku boso ora boso ta kuné. I si boso busk’é, e lo laga boso hañ’é; ma si boso bandon’é, e lo bandoná boso.” (2 Krónikanan 15:2) Yen di selo atrobe, Asa a promové adorashon berdadero. Pero 24 aña despues, ora ku Asa a bolbe konfrontá un guera, e no buska Yehova su guia. E no a konsultá e Palabra di Dios, i e no a kòrda kiko Yehova a hasi ora ku e ehérsito etiope a invadí Huda. El a kometé e bobedat di sera un aliansa ku Siria.—2 Krónikanan 16:1-6.
17 Pa e motibu aki Yehova a laga profeta Hanani skual Asa. Asta na e momentu ei, ora ku Yehova su punto di bista di e asuntu a wòrdu spliká, no tabata muchu lat pa Asa benefisiá. Pero en bes di esei, Asa a sintié ofendí i a laga sera Hanani den prizon. (2 Krónikanan 16:7-10) Esta tristu! Ki tal di nos? Nos ta buska Dios anto despues nenga di aseptá konseho? Ora un ansiano preokupá i amoroso ta usa Beibel pa konsehá nos pasobra nos ta birando enbolbí den mundu, nos ta mustra apresio pa e yudansa amoroso ku nos ta risibí pa haña sa “loke ta aseptabel pa Señor”?
No Lubidá di Puntra Unda Yehova Ta
18. Kon nos por benefisiá di loke Eliú a bisa Jòb?
18 Bou di strès, asta un persona ku tin un ekselente registro den e sirbishi di Yehova por faya. Ora Jòb a haña un malesa repugnante, pèrdè su yunan i su poseshonnan material, i a ser akusá falsamente dor di su kompañeronan, su pensamentunan a konsentrá solamente riba su mes. Eliú a rekord’é: “Ningun hende no ta bisa: ‘Unda Dios, Esun ku a traha mi, ta?’” (Jòb 35:10) Jòb mester a konsentrá su atenshon riba Yehova i analisá kon E a mira e situashon. Humildemente Jòb a aseptá e rekordatorio ei, i su ehèmpel por yuda nos hasi meskos.
19. Kiko e pueblo di Israel a keda sin hasi hopi biaha?
19 E pueblo di Israel tabata konosé e historia tokante e manera ku Dios a trata ku nan nashon. Pero demasiado biaha nan no a kòrda riba esei ora nan a trata ku situashonnan spesífiko den nan bida. (Jeremias 2:5, 6, 8) Ora nan mester a tuma desishon den bida, nan a sigui tras di nan propio plaser en bes di puntra: “Unda Yehova ta?”—Isaias 5:11, 12.
Sigui Puntra: “Unda Yehova Ta?”
20, 21. (a) Ken awe a demostrá e spiritu di Eliseo den nan búskeda di e guia di Yehova? (b) Kon nos por imitá i benefisiá di nan ehèmpel di fe?
20 Ora Elias su sirbishi públiko a terminá, su sirbidó Eliseo a kohe e mantel ofisial ku a kai for di Elias, bai na Riu Hordan kuné, dal e awa i puntra: “Unda SEÑOR, e Dios di Elias, ta?” (2 Reinan 2:14) Yehova a kontestá dor di demostrá ku awor su spiritu tabata riba Eliseo. Kiko nos por siña for di esaki?
21 Algu similar a sosodé den tempu moderno. Sierto kristiannan ungí ku tabata hiba delantera den e trabou di prediká a muri. Esnan ku e ora ei a ser konfiá ku e supervishon, a eksaminá e Skritura i a hasi orashon pidi Yehova su guia. Semper nan tabata puntra: “Unda Yehova ta?” Komo resultado, Yehova a sigui dirigí su pueblo i laga nan aktividat prosperá. Nos ta imitá nan fe? (Hebreonan 13:7) Si ta asina, nos lo keda pegá ku Yehova su organisashon, sigui su instrukshonnan i partisipá plenamente den e trabou ku e organisashon ta hasiendo bou di guia di Hesukristu.—Zakarias 8:23.
Kon Lo Bo Kontestá?
• Ku ki intenshon nos mester puntra: “Unda Yehova ta?”
• Kon nos awe por haña kontesta riba e pregunta: “Unda Yehova ta?”
• Dikon algun orashon ku ta pidi guia di Dios no ta haña kontesta?
• Ki ehèmpelnan bíbliko ta demostrá e nesesidat di “sigui hasi sigur di loke ta aseptabel pa Señor”?
[Preguntanan di Estudio]
[Plachi na página 9]
Kon Rei Josafat a buska Yehova?
[Plachi na página 10]
Dikon Saul a konsultá un hasidó di bruha?
[Plachi na página 12]
Hasi orashon, studia i meditá pa bo hasi sigur “unda Yehova ta”