Alehandro VI—Un Papa Ku Roma No Ta Lubidá

“FOR di un punto di bista katóliko, no tin sufisiente palabra pa kondená Alehandro VI.” (Geschichte der Päpste seit dem Ausgang des Mittelalters [Historia di Papanan na Final di Edat Medio]) “No tin nada pa hustifiká su bida privá . . . Nos tin ku atmití ku e pontifikado aki no a trese onor pa Iglesia. E kontemporáneonan di famia Borgia tabata kustumbrá di mira aktonan bergonsoso. Pero loke nan a mira e famia aki hasi ta krímennan sumamente horibel. Kuater siglo despues ainda e konsekuensianan di loke nan a hasi no a disparsé por kompletu.”—L’Église et la Renaissance (1449-1517)(Iglesia i Renaissance).

Dikon obranan históriko respetá ku ta papia di Iglesia Katóliko Romano ta duna komentarionan asina severo tokante un papa i su famia? Kiko nan a hasi ku nan ta meresé di wòrdu krítika di e manera ei? Un eksposishon ku tabatin na Roma (òktober 2002–febrüari 2003), titulá I Borgia—l’arte del potere (Famia Borgia—E Arte di Poder), a duna hende un oportunidat pa reflekshoná riba e poder eksklusivo ku papanan ta afirmá di tin, partikularmente e manera ku e poder aki a wòrdu usá dor di Rodrigo Borgia, esta, Alehandro VI (papa di aña 1492 pa 1503).

Kon El A Bini na Poder

Rodrigo Borgia a nase na 1431 i a bin di un famia prominente na Játiva, den e reino di Aragon, ku awor ta keda na Spaña. Su tio Alfonso de Borgia, obispu di Valencia, a supervisá e edukashon di su subrino i a perkurá pa ora Rodrigo tabata teenager ainda, e risibí puestonan saserdotal ku a trese benefisio finansiero. Rodrigo ku 18 aña, bou di protekshon di Alfonso ku e tempu ei ya tabata kardinal, a bai biba na Italia i a studia ei pa abogado. Ora Alfonso a bira Papa Calixto III, el a nombra Rodrigo i un otro subrino ku yama Pere Lluís Borgia, komo kardinal. Pere Lluís Borgia a bira gobernadó di vários stat. Poko despues Rodrigo a ser nombrá visekansier di iglesia, un posishon ku el a mantené bou di reinado di vários papa. E posishon aki a yud’é haña vários puesto saserdotal kompañá ku hopi propiedat, i tambe akumulá un enorme rikesa, ehersé inmenso poder i biba na grandi manera un prens.

Rodrigo tabata inteligente, un oradó elokuente, un patrosinadó di arte i tabata sa kiko pa hasi p’e logra su metanan. Sin embargo, e tabatin vários relashon inmoral, anto a haña kuater yu ku e amante ku e tabatin henter su bida, i mas yu ku otro hende muhé. Apesar ku  Papa Pio II a skual e pa su inklinashon di partisipá den dibertishon “sumamente inmoral” i “plaser desenfrená,” Rodrigo no a kambia.

Despues di morto di Papa Inosensio VIII na 1492, e kardinalnan di iglesia a reuní pa eligí un susesor. Ta bon konosí ku Rodrigo Borgia a usa ofertanan di rikesa material i puesto saserdotal i tambe sarkasmo abierto pa kumpra sufisiente voto for di e otro kardinalnan p’e sali komo Papa Alehandro VI for di e reunion privá ei. Kon el a paga e kardinalnan pa nan voto? Dor di duna nan posishonnan eklesiástiko, palasio, kastel, stat, konbento i obispado ku entradanan inmenso. Bo por komprondé dikon un historiadó di iglesia a yama e reinado di Alehandro VI “dianan bergonsoso i skandaloso pa Iglesia Romano.”

E No Tabata Mihó Ku e Prensnan

Mediante e outoridat spiritual ku e tabatin komo kabes di iglesia, Alehandro VI a yuda resolvé e diskushon ku tabatin entre Spaña i Portugal tokante e teritorionan nobo ku nan a deskubrí na Amérika. Su poder polítiko a hasié kabes di e estadonan di iglesia ku teritorionan na Italia sentral, i el a goberná su reino kasi meskos ku otro soberanonan di e periodo di Renaissance. Alehandro VI su reinado, meskos ku reinado di papanan ku tabatin promé kuné i despues di dje, tabata karakterisá pa soborno, nepotismo (favoritismo na famia) i vários sospecho di asesinato.

Podernan rival tabata lucha pa teritorionan italiano durante e tempu turbulento ei, i e papa no a sinta wak ku man krusá. Su táktikanan i kombenionan polítiko—ku el a sera i kibra—tabata diseñá p’e logra haña mas tantu poder posibel, pa su yunan bai dilanti den nan karera i pa elevá famia Borgia riba tur otro famia. Su yu Juan, a kasa ku prima di e rei di Castilla i a bira duke di Gandía, Spaña. Jofré, un otro yu, a kasa ku nieta di e rei di Nápoli.

Ora e papa tabatin mester di un aliado pa fortalesé su relashon ku Fransia, el a kibra un promesa di duna su yu muhé Lucrezia di 13 aña den matrimonio na un noble di Aragon i na lugá di esei a dun’é na un famia di e duke di Milan. Ora ku polítikamente e matrimonio ei no a kumbinié mas, el a buska un preteksto pa anul’é, i el a kasa Lucrezia ku un miembro di un dinastia rival, Alfonso di Aragon. Miéntras tantu, Lucrezia su ruman hòmber ambisioso i kruel, Cesare Borgia, a sera un pakto ku Louis XII di Fransia, i e matrimonio resien di su ruman muhé ku Alfonso di Aragon a hinka nan den un situashon prekario. Kiko tabata e solushon? Un fuente ta bisa ku Alfonso, e esposo desafortuná di Lucrezia, “a keda heridá dor di kuater hòmber ku a purba mat’é riba trapi di e Basílika di San Pedro. I ora e tabata rekuperando, un di Cesare su sirbidónan a strangul’é.” Debí ku e papa tabata deseá aliadonan stratégiko nobo, el a hasi areglo pa Lucrezia, ku e ora ei tabatin 21 aña, kasa ku yu di un duke poderoso di Ferrara.

Cesare su karera a wòrdu deskribí komo “un relato di komportashon sin eskrúpulo, kòrá-kòrá di sanger.” Maske Cesare su tata a nombr’é komo kardinal ora e tabatin 17 aña, e tabata mas adekuá pa guera ku pa asuntunan di iglesia, ya ku e tabata astuto, ambisioso i korupto manera su so. Despues ku el a entregá su puesto eklesiástiko, el a kasa ku un prinsesa franses, i di e manera ei el a bira duke di Valentinois. Anto ku sosten di ehérsito franses, el a kuminsá  un kampaña di sitiamentu i asesinato pa trese parti nort di Italia bou di su kontròl.

Pa hasi sigur ku Cesare lo tin e sosten militar di Fransia p’e logra su metanan, papa a bai di akuerdo pa Louis XII di Fransia haña un divorsio ku tabata kumbiniente pero skandaloso i ku lo a permitié kasa ku Anne di Bretagne i asina a agregá Anne su teritorio di dukesa na su reino. Segun un buki di referensia, e papa en efekto “a sakrifiká e prestigio di Iglesia i prinsipionan estrikto p’e haña bentahanan polítiko pa miembronan di su famia.”

Krítika Kontra e Komportashon Desenfrená di Papa

E komportashon desenfrená di famia Borgia a pone ku nan a haña enemigu i a wòrdu kritiká. Básikamente e papa a ignorá esnan ku a kritik’é, pero un hende ku e no por a ignorá tabata Girolamo Savonarola. E tabata un mònik dominikano, un predikadó seloso, i un lider polítiko di Florensia. El a kondená tantu e bisionan di e famia di papa komo e akshonnan i e polítika di e papa mes, hasiendo un yamada pa kita su puesto for di dje i pa trese reforma eklesiástiko. Savonarola a bisa ku un bos fuerte: “Lidernan di iglesia, . . . anochi boso ta bai serka boso amantenan i mainta na boso sakramentunan.” Despues el a bisa: “[E lidernan ei] tin kara di prostituta, nan reputashon ta hasi daño na Iglesia. Mi ta bisa boso, nan no ta kere den e fe kristian.”

Den un intento pa silensiá Savonarola, papa a ofres’é e posishon di kardinal, pero el a rechasá esei. Sea ku ta Savonarola su polítika antipapa òf ta su predikamentu a kousa su kaida, finalmente nan a èkskomunik’é, arest’é, tortur’é p’e konfesá, anto kaba nan a hork’é i kim’é.

Preguntanan Serio

E susesonan históriko aki ta lanta preguntanan importante. Kon por splika e klase di intriganan ei i komportashon di un papa? Kon historiadónan ta splika nan? Nan tin diferente argumentu.

Hopi hende ta kere ku mester mira Alehandro VI den e konteksto di e tempu ku e tabata biba. Su aktividatnan polítiko i eklesiástiko supuestamente tabata wòrdu determiná dor di su deseo pa salbaguardiá pas, mantené ekilibrio entre estadonan rival, fortalesé lasonan di amistat entre aliadonan ku lo defendé e reinado di papa i mantené monarkanan di kristiandat uní kontra e menasa turko.

Pero kiko di su kondukta? Un eksperto a bisa: “Tur époka di Iglesia a mira mal kristiannan i saserdotenan indigno. Pa ningun hende no keda pasmá pa motibu di esaki, Kristu mes a predesí esaki; asta el a kompará su Iglesia ku un kunuku den kua bon yerba i mal yerba ta krese, òf ku un reda den kua tin bon piská i mal piská, meskos ku el a asta tolerá un Hudas entre su apòstelnan.” *

E mesun eksperto a sigui bisa: “Meskos ku un hoya ku tin defekto no ta baha balor di un stenchi ku tin den dje, asina e pikánan ku un saserdote kometé, básikamente no por afektá . . . e doktrina ku e ta siña. . . . Oro ta keda oro, sea ku ta man puru òf impuru ta suministr’é.” Un historiadó katóliko ta argumentá ku e norma ku katóliko sinsero mester a sigui den e  kaso di Alehandro VI ta e konseho ku Hesus a duna su disipelnan tokante e eskriba- i fariseonan: ‘Hasi loke nan ta bisa, ma no segun loke nan ta hasi.’ (Mateo 23:2, 3) Pero onestamente, e rasonamentu ei ta konvensé bo?

Esaki Ta Kristianismo Berdadero?

Hesus a laga un guia simpel atras pa tèst e kalidat di hende ku ta bisa ku nan ta kristian: “Na nan fruta boso lo konosé nan. Hende sa kita wendrùif for di mata di sumpiña anto, òf figu for di bringamosa? Asina tur bon palu ta duna bon fruta; ma e palu malu ta duna mal fruta. Un bon palu no por duna mal fruta, ni un palu malu no por duna bon fruta. Asina anto, na nan fruta boso lo konosé nan.”—Mateo 7:16-18, 20.

En general, kon lidernan religioso a kumpli ku e normanan rekerí atraves di siglonan, i kon nan ta kumpliendo awor ku e patronchi di kristianismo berdadero ku Hesus a establesé i ku su berdadero sirbidónan ta imitá? Laga nos konsiderá djis dos área: metementu den polítika i estilo di bida.

Hesus no tabata un prens mundano. El a hiba un bida asina simpel ku, manera el a atmití, e no tabatin ni sikiera un “lugá pa pone su kabes.” Su Reino no tabata parti “di mundu,” i su disipelnan tampoko no mester tabata parti “di mundu, meskos ku [e no tabata] di mundu.” Kier men ku Hesus a nenga di mete den asuntunan polítiko di su dia.—Mateo 8:20; Juan 6:15; 17:16; 18:36.

Sin embargo, no ta bèrdat ku pa siglonan organisashonnan religioso a krea e kustumber di asosiá ku lidernan polítiko pa nan haña poder i bentahanan material, maske esaki a resultá den sufrimentu di e pueblo komun? No ta bèrdat tambe ku hopi di nan kleronan ta biba den luho, maske ku un gran kantidat di hende ku supuestamente nan mester sirbi, kisas ta biba den pobresa ekstremo?

Hesus su mitar ruman Santiago a bisa: “Adúlteronan, boso no sa ku amistat ku mundu ta enemistat pa ku Dios? P’esei, ken ku kier ta amigu di mundu ta hasi su mes enemigu di Dios.” (Santiago 4:4) Dikon e ta bisa “enemigu di Dios”? Promé Juan 5:19 ta splika: “Henter mundu ta bou di kontròl di e malbado.”

Un historiadó di Borgia su tempu a skirbi tokante e moral di Alehandro VI: “Su manera di biba tabata desenfrená. E no tabatin ni bèrgwensa ni sinseridat, ni fe ni religion. E tabata dominá pa golosidat insasiabel, ambishonnan inmoderá, krueldat bárbaro i un pashon masha fuerte pa e adelanto di e tantísimo yunan ku e tabatin.” Naturalmente, Borgia no tabata e úniko miembro di e herarkia eklesiástiko ku a aktua di e forma ei.

Kiko e Skritura ta bisa di tal komportashon? “Boso no sa ku e inhustunan lo no heredá e reino di Dios?” apòstel Pablo a puntra. “No laga nan gaña boso; ni fornikadó, ni . . . adúltero, ni . . . esnan golos pa plaka . . . lo no heredá e reino di Dios.”—1 Korintionan 6:9, 10.

Un di e ophetivonan di e ekshibishon ku resientemente a tuma lugá na Roma tokante famia Borgia tabata “pa komprondé e personahenan grandi aki den e konteksto di e tempu ku nan a biba . . . , pa komprondé pero siguramente no pa apsolvé ni pa kondená.” En realidat, nan a laga bishitantenan saka nan propio konklushonnan. Pues ki konklushon abo a saka?

[Nota]

[Plachi na página 26]

Rodrigo Borgia, Papa Alehandro VI

[Plachi na página 27]

E tata di Lucrezia Borgia a us’é p’e logra haña mas tantu poder posibel

[Plachi na página 28]

Cesare Borgia tabata ambisioso i korupto

[Plachi na página 29]

Dor ku Girolamo Savonarola no kier a keda ketu, nan a hork’é i kim’é