Loke Nos Por Siña for di Para

“MIRA e paranan di shelu ku no ta sembra ni kosechá, ni ta warda den mangasina, i tòg boso Tata selestial ta alimentá nan. Boso no tin muchu mas balor ku nan?” (Mateo 6:26) Hesukristu a bisa e palabranan aki den un famoso sermon ku el a duna na barika di un seru serka di Laman di Galilea. No ta su siguidónan so tabata su ouditorio. Un multitut grandi di hende ku lo por a bira su disipel tambe tabata presente. Nan a bin for di tur parti di e pais. Hopi di nan tabata hende pober ku a trese personanan enfermo pa Hesus kura.—Mateo 4:23–5:2; Lukas 6:17-20.

Ora Hesus a kaba di kura tur e hendenan enfermo, el a duna atenshon na nesesidatnan spiritual mas importante. Entre e lèsnan ku el a siña hende tin esun menshoná ariba.

Para di shelu ta eksistí pa hopi tempu kaba. Algun para ta kome insekto, otronan ta kome fruta i simia. Si Dios a perkurá asina un abundansia di provishon pa para, anto sigur e tin e kapasidat pa yuda su sirbidónan humano haña nan pan di kada dia. E por hasi esaki dor di yuda nan haña trabou pa nan gana plaka pa por kumpra kuminda. Òf e por yuda nan haña un bon kosecha ora nan ta planta pa nan mes kome. Anto ora kos ta pèrtá, Dios por konmové kurason di bisiña- i amigunan generoso pa kompartí loke nan tin di kome ku esnan ku ta den nesesidat.

Tin mas kos ku nos por siña dor di opservá paranan ku sumo atenshon. Dios a krea para ku un instinto maravioso pa traha nèshi kaminda nan por kria nan yunan. Laga nos konsiderá dos diferente sorto di nèshi. Na man robes tin un potrèt di un nèshi di un tipo di souchi afrikano (rotszwaluw). E ta traha su nèshi den baranka òf na muraya di un kas. Loke ta fungi komo dak di un nèshi asina ta un pida baranka ku ta sali afó òf, manera bo por mira riba e potrèt aki, e rant di dak di e edifisio. E nèshi ta trahá di pipita chikitu di lodo poné pegá-pegá ku otro den forma di un kòpi. Tantu e para machu komo e hembra ta traha duru pa buska pipita di lodo, i por dura henter un luna pa nan kaba di traha nan nèshi. Despues nan ta fura e paden ku yerba i pluma. Nan tur dos ta yuda alimentá e yunan. Loke bo ta mira aki bou ta e nèshi di un para machu ku nan ta yama hiladó enmaskará (maskerwever). E para afrikano trahadó aki ta flègtu su nèshi di sprichi di yerba òf pida-pida fini di otro vegetashon. E por kaba un nèshi den un dia i por flègtu mas ku 30 den un solo temporada!

Kiko ta e lès ku nos ta saka? Si Dios a duna para tantu e abilidatnan ei komo material na abundansia pa nan traha nèshi, siguramente e por yuda su sirbidónan humano pa haña un lugá di biba. Sin embargo, Hesus a mustra ku un otro kos ta nesesario si nos kier pa Yehova Dios yuda nos haña e kosnan material básiko ku nos mester. Hesus a primintí: “Ma buska promé e reino di Dios i su hustisia, i tur e kosnan aki lo wòrdu añadí na boso.” (Mateo 6:33) Kisas bo ta puntra bo mes: ‘Kiko buska e Reino di Dios promé ta enserá?’ Testigunan di Yehova, kendenan ta distribuí e revista aki, gustosamente lo kontestá e pregunta ei.