Skol di Galaad 60 Aña Entrenando Misionero

“NOS estudio intensivo di Beibel a yuda nos hala mas serka Yehova i siña mas tokante su organisashon. Esaki a prepará nos pa biba den estranheria.” Asina un graduado di e promé klas a deskribí e kurso di estudio ku el a sigui n’e Skol Bíbliko di Galaad di Watchtower. For di tempu ku e Skol di Galaad a kuminsá 60 aña pasá, e ta mandando misionero afó. Dia 8 di mart 2003, graduashon di e di 114 klas a tuma lugá n’e Sentro Edukativo di Watchtower na Patterson, New York. E 6.404 personanan ku a bini huntu den e sala i na otro sitionan kaminda e presentenan por a sigui un transmishon di e programa, a skucha ku atenshon n’e programa aki ku a konsistí di diskurso, entrevista i un seshon den kua e graduadonan a konta nan eksperensianan.

Theodore Jaracz, miembro di e Kuerpo Gobernante, a fungi komo presidente di e programa. Su komentarionan di introdukshon a hala atenshon n’e karakter internashonal di e ouditorio, ku tabata konsistí di bishitantenan for di Asia, Karibe, Sentro- i Suramérika i Europa. Ruman Jaracz a basa su komentarionan riba 2 Timoteo 4:5, i el a enfatisá kiko ta e trabou prinsipal di un misionero entrená na Galaad: ‘Hasi e trabou di evangelisá.’ E misioneronan ta duna testimonio di e bèrdat dor di siña e hendenan Beibel.

Instrukshon Final p’e Studiantenan

Pa kuminsá ku un seri di diskurso kòrtiku, John Larson, miembro di e Komité di Sukursal di Merka, a papia riba un tema ku ta fortalesé fe: “Si Dios Ta pa Nos, Ken Por Ta Kontra Nos?” (Romanonan 8:31) E oradó a duna e motibunan bíbliko pakiko e studiantenan por tin konfiansa apsoluto den e poder di Yehova pa yuda nan vense kualkier opstákulo ku por presentá den nan asignashon. Usando Romanonan 8:38 i 39, Ruman Larson a konsehá e studiantenan: “Para un ratu i pensa kon Dios ta usando su poder na fabor di boso, i kòrda ku nada no por stroba Yehova di mustra interes personal den boso.”

Despues a sigui Guy Pierce, miembro di Kuerpo Gobernante. El a skohe e tema “Mantené Boso Wowonan Felis!” (Lukas 10:23, NW) El a splika ku berdadero felisidat ta enserá konosé Yehova i komprondé su propósito eterno i tambe mira e kumplimentu di profesia di Beibel. Unda ku e studiantenan bai, nan por mantené berdadero felisidat dor di mantené nan wowo felis. Ruman Pierce a animá e graduadonan pa meditá profundamente riba e bondat di Yehova i mantené nan mente i kurason enfoká riba Su boluntat. (Salmo 77:12) Dor di keda ku un aktitut positivo, e graduadonan por vense kualkier problema ku por presentá den nan kaminda.

Despues, dos di e rumannan ku a sirbi komo instruktor riba un base diario a duna e klas palabranan di estímulo komo despedida. E título di Lawrence Bowen su diskurso  tabata “Bo Ta Buskando Gloria?” Mayoria hende ku ta pensa riba e palabra gloria ta konektá esei ku alabansa, onor i distinshon pa nan mes. Sin embargo, e salmista Asaf a bin komprondé kiko ta berdadero gloria; esei ta e tesoro presiosísimo di un relashon bendishoná ku Yehova. (Salmo 73:24, 25) E oradó a animá e graduadonan pa mantené un relashon íntimo ku Yehova mediante un estudio di Beibel profundo i kontinuo. E angelnan “ta anhelá di mira” kon e detayenan relashoná ku e realisashon di Yehova su propósito mediante Kristu lo kumpli. (1 Pedro 1:12) Nan kier siña mas tantu posibel tokante nan Tata pa por reflehá su gloria. E ora ei e oradó a animá e studiantenan pa glorifiká Yehova den nan asignashon komo misionero dor di yuda otro hende haña e tesoro di balor inkalkulabel.

E sekretario di e skol, Wallace Liverance, a konkluí e promé seri di diskurso ku e tema “Papia e Sabiduria di Dios den un Sekreto Sagrado.” (1 Korintionan 2:7, NW) Kiko ta e sabiduria di Dios aki ku apòstel Pablo a papia di dje durante su sirbishi komo misionero? Esei ta e medio sabí i poderoso ku Yehova lo usa pa trese pas i union universal. E sabiduria aki ta enfoká riba Hesus. Pablo no a prediká un evangelio sosial, mas bien el a yuda e hendenan mira  kon Dios lo eliminá e konsekuensianan di e piká di Adam. (Efesionan 3:8, 9) E oradó a hasi un apelashon n’e studiantenan: “Usa boso privilegio di sirbishi meskos ku Pablo, kende a mira su asignashon komo misionero komo un oportunidat pa yuda hende mira kon Yehova ta bai kumpli ku su propósito.”

Despues di esaki, Mark Noumair, otro instruktor di Galaad, a dirigí un seshon animá ku vários studiante di e klas. E tema “Un Estudio di e Palabra di Dios Ta Produsí Predikadónan Seloso” a resaltá Pablo su palabranan na Romanonan 10:10. E klas a relatá vários eksperensia di sirbishi di vèlt ku nan tabatin durante e tempu ku nan a asistí n’e skol. Nan eksperensianan a demostrá ku ora nos studia e Palabra di Dios i meditá riba dje, e bon kosnan relashoná ku Yehova Dios i su Reino lo yena nos kurason. I ta di e kosnan ei nos lo papia. Durante e sinku lunanan ku e studiantenan a pasa n’e Sentro Edukativo di Watchtower, nan a kuminsá mas ku 30 studio di Beibel ku personanan interesá den e teritorionan ku e kongregashonnan eibanda ta traha ku frekuensia.

Bos di Eksperensia Ta Duna Konseho Sano

Durante e kurso, e studiantenan a benefisiá di e asosiashon ku miembronan di e famia di Bètel di Merka. Miembronan di e personal di sukursal, Robert Ciranko i Robert P. Johnson, a entrevistá vários fiel sirbidó di Yehova ku hopi aña di sirbishi, entre kua superintendentenan biahero ku aktualmente ta risibiendo entrenamentu spesial n’e Sentro Edukativo di Watchtower. Tur e personanan entrevistá tabata graduadonan di Galaad ku un tempu a yega di traha komo misionero. Tabata un bunita animashon p’e studiantenan, i nan famia- i amigunan, tende palabranan di sabiduria di e hòmbernan spiritual i eksperensiá aki.

Algun dje konsehonan tabata: “Keda mas okupá posibel den sirbishi i den kongregashon.” “No tuma bo mes muchu na serio. Keda enfoká riba bo propósito komo misionero, i mira bo asignashon komo bo hogar.” Otro komentarionan balioso a ilustrá kon entrenamentu di Galaad ta prepará un minister pa bon obra, sin importá unda e ta asigná. Ata algun di e komentarionan aki: “Nos a siña koperá i traha huntu.” “E skol a yuda nos aseptá kulturanan nobo.” “Nos a siña usa e Skritura for di un otro ángulo.”

John E. Barr, miembro di hopi tempu di e Kuerpo Gobernante, a duna e diskurso prinsipal di e programa. Su tema bíbliko tabata “Nan Bos A Sali Bai den Henter e Tera.” (Romanonan 10:18) El a lansa e pregunta: E pueblo di Dios por a kumpli ku e tarea difísil aki awe? Sigur ku sí! For di 1881, e revista Toren di Vigilansia a puntra su lektornan: “Abo ta prediká?” Anto e oradó a rekordá tur e presentenan di e yamada históriko n’e kongreso di 1922 na Cedar Point, Ohio, Merka: “Anunsiá e Rei i su Reino!” Den transkurso di añanan, e selo di Dios su fiel sirbidónan a impulsá nan pa deklará e bèrdatnan maravioso di Reino na tur nashon. Ku boka i mediante literatura, e ekspreshonnan di e bon nobo a alkansá tur skina di e tera habitá—tur esei pa e onor i gloria di Yehova. Den un konklushon konmovedor, Ruman Barr a stimulá e graduadonan pa konta nan bendishonnan. El a bisa nan: “Tur dia, ora bo ta na e lugá kaminda nos a manda bo i bo ta hasi orashon na Dios, gradisié di henter bo kurason ku el a permití bo kontribuí na kumplimentu di e palabranan, ‘nan bos a sali bai den henter e tera.’”

Despues di e diskurso aki, a lesa saludonan, i e presidente a entregá diploma na kada graduado. Despues, ku sintimentunan miksto di goso i tristesa pa motibu ku nan ta bai laga e skol tan stimá, un representante di e klas a lesa un resolushon di kurason dirigí n’e Kuerpo Gobernante i e famia di Bètel, ekspresando e determinashon di e graduadonan pa alabá Yehova “for di awor i pa semper.”—Salmo 115:18.

Nos ta pidi Yehova yuda e graduadonan aki ahustá nan mes na nan hogar nobo i duna un kontribushon ekselente n’e progreso di e trabou di prediká rònt mundu, meskos ku esnan ku a bai promé ku nan ta hasiendo pa 60 aña kaba.

[Kuadro na página 23]

ESTADÍSTIKANAN DJE KLAS

Kantidat di pais representá: 12

Kantidat di pais na kua a asigná nan: 16

Kantidat di studiante: 48

Edat promedio: 34,4

Promedio di aña den e bèrdat: 17,6

Promedio di aña den sirbishi di tempu kompletu: 13,5

[Plachi na página 24]

E di 114 Klas di Graduadonan dje Skol Bíbliko di Galaad di Watchtower

Den e lista aki bou, e reinan ta numerá di dilanti bai patras, i e nòmbernan ta bai di robes pa drechi den kada rei.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.