Historia di Bida

Sirbi Otro Hende Ta Aliviá Bo Sufrimentu

SEGUN E RELATO DI JULIÁN ARIAS

Na 1988, tempu ku mi tabatin 40 aña di edat, mi karera tabata mustra basta sigur. Mi tabata direktor regional di un kompania multinashonal. Komo kompensashon pa mi trabou mi tabatin un outo karu, un bon salario i un ofisina luhoso den sentro di Madrid, Spaña. E kompania asta a duna sierto indikashonnan ku nan lo a hasi mi nan direktor nashonal. E tempu ei mi no tabatin e mínimo idea ku mi bida tabata bai kambia drástikamente.

RIBA un dia den e aña ei, mi dòkter a bisa mi ku mi tin múltiple sklerósis, un malesa inkurabel. E notisia ei a kibra mi. Despues ora mi a lesa kiko múltiple sklerósis por hasi ku hende, mi a spanta. * A parse komo si fuera ku pa e restu di mi bida lo mi mester a biba ku e pensamentu ku un ora pa otro tur kos por kaba pa mi. Kon mi por a perkurá pa mi kasá Milagros i mi yu hòmber di tres aña, Ismael? Kon nos lo por enfrentá e situashon aki? Miéntras mi tabata buskando kontesta pa e preguntanan aki, mi a haña un otro gòlpi duru.

Mas o ménos un luna despues ku mi dòkter a bisa mi di mi malesa, mi supervisor a yama mi den su ofisina i a informá mi ku e kompania tabatin mester di hende “representabel,” i ku un persona ku un malesa degenerativo—asta si e ta den e promé fasenan—ta daña imágen di e kompania. Pues mesora mi shèf a kita mi for di trabou. Diripiente mi no tabatin karera mas!

 Dilanti mi famia mi tabata purba hasi duru, pero mi tabata anhelá di ta mi so, pa mi por a pensa riba mi sirkunstansia nobo i meditá riba mi futuro. Mi a purba bringa kontra un sintimentu kresiente di depreshon. Loke tabata duel mi mas ta e echo ku di un dia pa otro mi no tabata sirbi mas pa mi kompania.

Kon pa Saka Forsa for di Debilidat

Ménos mal ku durante e tempu difísil aki mi por a konta ku vários fuente di fortalesa. Rònt di 20 aña mas promé, mi a bira Testigu di Yehova. P’esei mi a hasi orashon sinsero na Yehova tokante mi sintimentunan i inkietutnan pa ku futuro. Mi kasá, kende tambe ta un Testigu, tabata un fuente konstante di fortalesa pa mi, i tambe mi tabatin apoyo di algun amigu será kende nan kariño i kompashon a resultá di un balor inkalkulabel.—Proverbionan 17:17.

Loke tambe a yuda mi ta e echo ku mi a sinti ku mi tin responsabilidat pa ku otro hende. Mi kier a kria mi yu bon, siñ’é, hunga kuné i entren’é den e trabou di prediká. Pues, mi no por a entregá. Ademas, mi tabata sirbi komo ansiano den un dje kongregashonnan di Testigunan di Yehova, i mi rumannan kristian tabatin mester di mi yudansa. Si mi a permití tristesa kaba ku mi fe, ki sorto di ehèmpel lo mi tabata pa otronan?

No tin duda, mi bida a kambia físikamente i ekonómikamente; den algun sentido el a bira pió i den otro sentido el a bira mihó. Un biaha mi a tende un dòkter bisa: “Malesa no ta kaba ku un hende, mas bien e ta kambi’é.” Mi a deskubrí ku no ta semper e kambionan ta negativo.

Na promé lugá, “mi sumpiña den karni” a yuda mi komprondé mihó e problemanan di salú ku otro hende tin i tene konsiderashon ku nan. (2 Korintionan 12:7) Mas ku nunka promé, mi a komprondé e palabranan di Proverbionan 3:5: “Konfia den SEÑOR ku henter bo kurason, i no dependé riba bo mes komprondementu.” I mas ku tur kos, mi sirkunstansia nobo a siña mi kiko realmente ta importante den bida i kiko ta duna berdadero satisfakshon i balor propio. Ainda tabatin hopi kos ku mi por a hasi den e organisashon di Yehova. Mi a deskubrí e berdadero nifikashon di e palabranan di Hesus: “Ta mas bendishoná pa duna ku pa risibí.”—Echonan 20:35.

Un Bida Nobo

Djis despues ku mi malesa a ser diagnostiká, mi a haña invitashon pa bai un seminario na Madrid kaminda kristiannan boluntario tabata ser siñá kon pa forma un laso di koperashon entre dòkternan i pashèntnan Testigu. Despues, a usa e boluntarionan aki pa forma diferente Komité di Kontakto ku Hospital. Pa mi, e seminario a yega nèt na tempu. Mi a deskubrí un mihó karera, unu ku lo a duna mi hopi mas satisfakshon ku kualkier otro trabou ku ta paga salario.

Na e seminario nos a siña ku e Komiténan di Kontakto ku Hospital resien formá mester a bishitá hospitalnan, entrevistá dòkternan i duna presentashon na hendenan ku ta traha den departamento di salú, tur esei ku e propósito di desaroyá un laso di koperashon i prevení konfrontashon. E komiténan ta yuda nan kompañeronan Testigu haña dòkternan ku ta dispuesto pa hasi operashon sin usa sanger. Klaru ku komo laiko mi tabatin hopi di siña tokante terminologia médiko, étika di medisina i di e manera ku hospital ta organisá. Apesar di esei, ora mi a bai kas despues di e seminario ei mi a bira manera un hende nobo, ekipá ku un reto nobo ku a entusiasmá mi.

 Bishitanan na Hospital —Un Fuente di Satisfakshon

Ounke mi malesa tabata manka mi gradualmente sin miserikòrdia, mi responsabilidatnan komo miembro di un Komité di Kontakto ku Hospital a sigui oumentá. Dor ku mi tabata haña un penshon di inválido i mi no por a traha, mi tabatin tempu ku mi por a bishitá hospitalnan. Ounke de bes en kuando mi a keda desapuntá, e bishitanan aki a resultá mas fásil i mas rekompensador ku mi a spera. Awor mi ta den ròlstul, pero esaki no ta un opstákulo importante. Semper tin un otro miembro di komité ku ta kompañá mi. Ademas, dòkternan tin kustumber di papia ku hende den ròlstul, i tin bes ta parse ku nan ta skucha ku mas rèspèt ora nan ripará kuantu esfuerso mi ta hasi pa bishitá nan.

Atraves di e último 10 añanan aki, mi a bishitá sentenáres di dòkter. Algun di nan tabata dispuesto pa yuda nos kasi for di prinsipio. Dr. Juan Duarte—un kardiólogo na Madrid kende ta masha orguyoso di por respetá e konsenshi di un pashènt—a ofresé su servisionan mesora. Desde e tempu ei el a hasi mas ku 200 operashon riba pashèntnan Testigu di vários parti di Spaña sin usa sanger. Segun ku añanan ta pasa, mas i mas dòkter a kuminsá hasi operashon sin sanger. Nos bishitanan regular a hunga un ròl den esaki, pero e progreso tabata debí tambe na avansenan den medisina i e ekselente resultadonan ku hende a logra dor di hasi operashon sin sanger. I nos ta konvensí ku Yehova a bendishoná nos esfuersonan.

Loke mas a animá mi ta e reakshon di algun kardiólogo ku a spesialisá nan mes pa trata mucha. Dos aña largu nos a bishitá un tim di dos siruhano i nan anestesiólogonan. Nos a duna nan literatura di medisina ku a splika kiko otro dòkternan ta hasi riba e tereno aki. Nos esfuersonan a keda rekompensá na 1999 durante e Konferensia Médiko Riba Operashon Kardiovaskular Infantil. E dos siruhanonan—bou di e direkshon profeshonal di un siruhano for di Inglatera ku ta koperá ku nos—a efektuá un operashon sumamente difísil riba un beibi Testigu kende su klèp di ader mayó mester a ser remediá. * Mi a alegrá huntu ku e mayornan ora un di e siruhanonan a sali for di kamber di operashon i a bisa ku e operashon a bai bon i ku nan a respetá konsenshi di e famia. Awor e dos dòkternan aki regularmente ta aseptá pashèntnan Testigu di rònt Spaña.

Loke realmente ta duna mi satisfakshon den e kasonan aki ta e echo ku mi sa ku mi por yuda mi rumannan kristian. Normalmente, ora nan tuma kontakto ku e Komité di Kontakto ku Hospital, esaki ta un di e momentunan di mas difísil den nan bida. Nan tin ku operá, i dòkternan den un hospital lokal no ta dispuesto òf no por trata nan sin sanger. Sin embargo, ora e rumannan haña sa ku tin siruhanonan ku ta koperá riba tur tereno di medisina aki na Madrid, nan ta haña un gran alivio. Mi a yega di mira kon e preokupashon riba kara di un ruman hòmber a kambia bira trankilidat djis pasobra nos tabata huntu kuné den hospital.

 E Mundu di Huesnan i Étika di Medisina

Den añanan resien, miembronan di e Komiténan di Kontakto ku Hospital a bishitá huesnan tambe. Durante e bishitanan aki nos ta duna nan un publikashon titulá Family Care and Medical Management for Jehovah’s Witnesses (Kuido di Famia i Tratamentu Médiko pa Testigunan di Yehova), ku a ser prepará spesialmente pa informá funshonarionan asina di nos posishon tokante uso di sanger i di e remedinan alternativo ku no ta kontené sanger ku tin disponibel. E bishitanan aki tabata hopi nesesario, pasobra ántes tabata masha normal pa huesnan na Spaña outorisá dòkternan pa duna transfushon na pashèntnan kontra nan boluntat.

E ofisinanan di e huesnan ta masha impreshonante, i durante mi promé bishita, mi a sinti mi masha insignifikante ora mi tabata pasa dor e gangnan den mi ròlstul. Pa kolmo, mi a haña un aksidente chikitu i bòltu for di mi ròlstul i kai riba mi rudia. Algun hues i abogado ku a mira mi den mi situashon penoso tabatin e bondat di duna mi un man, pero mi a sinti masha bèrgwensa.

Ounke e huesnan no tabata sigur di e motibunan pakiko nos tabata bishitá nan, mayoria di nan a trata nos bon. E promé hues ku mi a bishitá ya a yega di pensa riba nos posishon, i el a bisa ku lo e kier a kòmbersá ku nos mas aleu. E siguiente biaha ku mi a bai bishit’é, e mes a kore mi ròlstul hiba mi den su ofisina i el a skuchá ku atenshon. E tremendo resultado di e promé bishitá aki a animá ami ku mi kompañeronan pa vense nos miedu, i no a dura mashá ku nos a haña mas resultado bon.

Durante e mesun aña ei, nos a laga un ehemplar di Kuido di Famia serka un otro hues, kende a risibí nos bon i a primintí di lesa e informashon. Mi a dun’é mi number di telefon pa si e tin ku tuma kontakto ku nos den un kaso di emergensia. Dos siman despues el a bèl mi pa bisa mi ku un siruhano lokal a pidié outorisashon pa duna transfushon di sanger na un Testigu ku mester operá. E hues a bisa ku e kier pa nos yud’é haña un solushon ku lo respetá e deseo di e Testigu di no tuma sanger. Nos no tabatin masha problema pa haña otro hospital kaminda e siruhanonan a hasi e operashon eksitosamente sin usa sanger. E hues a keda masha kontentu ora el a tende e resultado, i el a sigurá nos ku lo e sigui buska solushonnan similar den futuro.

Durante mi bishitanan n’e hospitalnan hopi bes ta surgi preguntanan tokante étika di medisina,  ya ku nos kier pa e dòkternan tene kuenta ku e derechonan i konsenshi di e pashènt. Un hospital ku ta koperá ku nos a invitá mi pa partisipá den un kurso di étika ku nan tabata duna. E kurso aki a duna mi oportunidat pa presentá nos punto di bista bíbliko na hopi spesialista riba e tereno aki. Tambe e kurso a yuda mi komprondé vários desishon difísil ku dòkternan tin ku tuma.

Un di e instruktornan di e kurso, Profesor Diego Gracia, regularmente ta organisá kursonan prestigioso duná dor di ekspertonan di étika pa dòkternan di Spaña i el a bira un defensor firme di nos derecho di skohe un tratamentu den asuntu di transfushon di sanger despues ku nos a ser bon informá. * Dor ku nos tabatin kontakto regular ku Profesor Gracia, el a invitá algun representante di e ofisina di sukursal na Spaña pa splika nos posishon na studiantenan di dje ku a sigui studia despues ku nan a gradua. I algun di nan ta ser konsiderá e mihó dòkternan di e pais.

Enfrentando Realidat

Klaru ku e trabou aki ku ta duna satisfakshon i ku ta na benefisio di mi kompañeronan kreyente no a resolvé tur mi problemanan personal. Mi malesa no ta para ketu, e ta avansá sin piedat. Afortunadamente mi mente ta funshoná bon ainda. Danki na mi kasá i mi yu hòmber, kendenan nunka no ta keha, ainda mi por kumpli ku mi responsabilidatnan. Sin nan yudansa i apoyo esaki lo tabata imposibel. Mi no por ni sikiera sera mi karson ni bisti mi bachi. Mi ta gusta foral prediká tur djasabra ku mi yu hòmber Ismael kende ta kore mi den ròlstul pa bai prediká serka vários doño di kas. I ainda mi por kumpli ku mi responsabilidatnan komo ansiano di kongregashon.

Durante e último 12 añanan aki mi a konfrontá algun momentunan troumátiko. Tin bes ora mi mira kon mi desabilidat ta afektá mi famia, esaki ta hasi mi mas doló ku e malesa mes. Mi sa ku nan ta sufri, ounke nan ta hasié den silensio. No muchu tempu pasá, den un lapso di un aña, tantu mi suegra komo mi tata a muri. Durante e mesun aña ei mi no por a move mas sin un ròlstul. Mi tata, kende tabata biba huntu ku nos, a muri di un otro malesa degenerativo. Milagros kende tabata kuid’é, a sinti komo si fuera e tabata opservando loke lo pasa ku mi den futuro.

Sin embargo, e punto positivo di e malesa aki ta ku nos famia ta uní segun ku nos ta enfrentá e difikultatnan huntu. Mi a kambia mi stul di ehekutivo pa un ròlstul, pero bon mirá mi bida ta mihó awor aki pasobra e ta kompletamente dediká na sirbi otro hende. Duna di bo mes na otronan por aliviá bo sufrimentu, i Yehova ta kumpli ku su promesa di fortalesé nos ora nos tin mester di esei. Meskos ku Pablo, mi por bisa sinseramente: “Pa tur kos mi tin e forsa den birtut di esun ku ta duna mi poder.”—Filipensenan 4:13, NW.

[Nota]

[Kuadro na página 24]

Punto di Bista di un Yu Hòmber

E awante i optimismo di mi tata ta un bon ehèmpel pa mi, i mi ta sinti ku mi ta útil ora mi ta kore kuné den su ròlstul. Mi sa ku no ta semper lo mi por hasi loke mi kier. Awor aki mi ta un teenager, pero ora mi bira grandi, lo mi kier sirbi komo miembro di un Komité di Kontakto ku Hospital. E promesanan di Beibel a siña mi ku sufrimentu ta temporal i mi sa ku tin hopi ruman ta sufri mas ku nos.

[Kuadro na página 24]

Punto di Bista di un Esposa

Pa un esposa biba ku un partner ku ta sufri di múltiple sklerósis ta hopi difísil mentalmente, emoshonalmente i físikamente. Mi mester ta rasonabel den loke mi ta plania pa hasi i ser dispuesto pa no ansha innesesariamente tokante futuro. (Mateo 6:34) Apesar di esei, biba ku sufrimentu por revelá e mihó kualidatnan di un persona. Nos matrimonio ta mas fuerte ku ántes, i mi tin un mihó relashon ku Yehova. Historia di bida di otronan ku tambe ta den situashon difísil asina a yuda fortalesé mi mashá. Mi tambe ta sinti e mesun satisfakshon ku Julián ta sinti komo resultado di su sirbishi balioso na benefisio di e rumannan. I mi a ripará ku ounke kada dia ta bin ku su difikultatnan, Yehova nunka ta laga nos na kaya.

[Plachi na página 22]

Mi esposa ta un fuente di fortalesa pa mi

[Plachi na página 23]

Kòmbersando ku e kardiólogo, Dr. Juan Duarte

[Plachi na página 25]

Ami ku mi yu hòmber ta gusta traha huntu den sirbishi