Bo Ta Spera Riba Yehova?

“Ki klase di persona boso mester ta den aktonan santu di kondukta i echonan di deboshon na Dios, sperando i teniendo bon na mente e presensia di e dia di Yehova!”—2 PEDRO 3:11, 12, NW.

1, 2. Kon nos lo por ilustrá kiko ta nifiká spera riba e dia di Yehova?

IMAGINÁ bo un famia ku ta spera bishita pa bin kome. E ora palabrá ta aserkando rápidamente. E esposa ta drùk hasiendo e preparashonnan final na e kuminda. Su esposo i yunan ta yuda hasi sigur ku tur kos ta kla. Tur hende ta emoshoná. Sí, henter e famia ta spera ansiosamente riba yegada di e invitadonan i ta antisipá un kuminda delisioso i dushi kompañerismo.

² Komo kristian nos ta sperando riba algu mas importante ainda. Kiko esei ta? Wèl, nos tur ta spera riba “e dia di Yehova”! Tanten ku e dia ei no yega, nos mester ta manera profeta Mikeas, kende a bisa: “Lo mi warda ku speransa riba SEÑOR; lo mi spera riba e Dios di mi salbashon.” (Mikeas 7:7) Esaki ta duna indikashon di inaktividat? Nò. Tin hopi trabou pa hasi.

3. Segun 2 Pedro 3:11 i 12, ki aktitut kristiannan mester tin?

³ Apòstel Pedro ta yuda nos pa nos tin e aktitut korekto miéntras ku nos ta spera. E ta bisa: “Ki klase di persona boso mester ta den aktonan santu di kondukta i echonan di deboshon na Dios, sperando i teniendo bon na mente e presensia di e dia di Yehova!” (2 Pedro 3:11, 12, NW) Tuma nota ku esaki ta un deklarashon ku tin un signo di sklamashon. Pedro no a hasi un pregunta. Den su dos kartanan inspirá pa Dios, el a deskribí ki klase di persona kristiannan mester ta. Tambe el a konsehá nan pa sigui hasi “aktonan santu di kondukta i echonan di deboshon na Dios.” Maske ku alrededor di 30 aña a pasa desde ku Hesukristu a duna e señal “di e fin di tempu,” kristiannan no mester a baha nan vigilansia. (Mateo 24:3) Nan mester a keda ‘spera i tene bon na mente’ e presensia di e dia di Yehova.

4. Kiko “teniendo bon na mente e presensia di e dia di Yehova” ta enserá?

⁴ E palabra griego tradusí aki “teniendo bon na mente” literalmente ta nifiká “purando.” Klaru ku literalmente nos no por ‘pura’ e dia di Yehova. Eigenlijk nos “no sa e dia ni e ora” ku Hesukristu lo bin pa ehekutá huisio kontra e enemigunan di su Tata. (Mateo 24:36; 25:13) Un buki di referensia ta splika ku e verbo básiko di e palabra “purando” ta nifiká akinan “‘hasi lihé’ i p’esei ta estrechamente relashoná ku ‘ser seloso, aktivo i mustra interes  den algu.’” Esei kier men ku Pedro tabata rekomendá rumannan den fe pa nan tin un deseo intenso pa e presensia di e dia di Yehova. Nan por a haña e deseo ei dor di tene e dia aki konstantemente na mente. (2 Pedro 3:12) Siendo ku “e dia grandi i temibel di SEÑOR” ta asina serka awor, nos mester tin e mesun aktitut ei.—Joel 2:31.

Spera ku “Aktonan Santu di Kondukta”

5. Kon nos por mustra ku nos tin e deseo intenso pa mira “e dia di Yehova”?

⁵ Si nos tin e deseo intenso pa sobrebibí e dia di Yehova, nos lo demostrá esei mediante nos “aktonan santu di kondukta i echonan di deboshon na Dios.” Probablemente e ekspreshon “aktonan santu di kondukta” ta hasi nos kòrda e konseho di Pedro: “Komo yunan obedesidu, no konformá boso ku e pashonnan ku boso tabatin ántes den boso ignoransia, ma meskos ku Esun Santu ku a yama boso, boso mes tambe sea santu den tur boso kondukta; pasobra ta pará skirbí: ‘Boso lo ta santu, pasobra ami ta santu.’”—1 Pedro 1:14-16.

6. Pa nos por ta santu, kiko nos mester hasi?

⁶ Pa nos por ta santu, nos tin ku keda limpi físikamente, mentalmente, moralmente i spiritualmente. Nos ta preparando pa “e dia di Yehova” dor di mantené nos mes santu komo esnan ku ta karga e nòmber di Yehova? Awendia no ta fásil pa mantené e puresa ei pasobra e normanan moral di mundu dia pa dia ta bai mas atras. (1 Korintionan 7:31; 2 Timoteo 3:13) Nos ta nota ku e diferensia entre nos normanan moral i esnan di mundu ta birando mas grandi? Si esei no ta e kaso, nos tin motibu pa preokupá. Ta posibel ku nos normanan personal, maske nan ta mas haltu ku esnan di mundu, ta bayendo atras? Si ta asina, nos tin ku tuma medidanan firme pa korigí esei pa nos por agradá Dios.

7, 8. (a) Kon nos lo por pèrdè for di bista e importansia di keda okupá den “aktonan santu di kondukta”? (b) Pa korigí e asuntu ki medidanan lo ta nesesario pa nos tuma?

⁷ Ku introdukshon di pornografia riba Internet i pa motibu ku esaki ta disponibel den privasidat, algun hende ku na un tempu no tabatin akseso na tal material inmoral, awor ta haña “un kantidat infinito di oportunidat [pa tin kontakto ku kosnan] seksual,” segun un dòkter. Si nos ta bai na e tipo di sitionan impuru ei riba Internet, anto sin duda nos ta ignorando e mandato di Beibel pa “no mishi ku nada impuru.” (Isaias 52:11) Realmente nos lo ta “teniendo bon na mente e presensia di e dia di Yehova”? Òf kisas nos lo ta posponiendo e dia mentalmente dor di rasoná ku si akaso nos kontaminá nos mente ku material sushi, ainda nos tin tempu pa limpia nos mes? P’esei si nos tin problema ku pornografia, ta masha importante pa pidi Yehova pa ‘kita nos bista for di banidat; i rebibá nos den su kamindanan’!—Salmo 119:37.

⁸ E gran mayoria di Testigunan di Yehova, tantu chikitu komo grandi, ta pega na Dios su normanan moral haltu i ta keda leu di tentashonnan inmoral di e mundu aki. Dor ku nan ta konsiente di e urgensia di nos tempu i di Pedro su spièrtamentu ku “e dia di Señor lo bin manera un ladron,” nan ta keda okupá den “aktonan santu di kondukta.” (2 Pedro 3:10) Nan akshonnan ta proba ku nan ta “sperando i teniendo bon na mente e presensia di e dia di Yehova.” *

 Spera ku “Echonan di Deboshon na Dios”

9. Kiko echonan di deboshon na Dios mester motivá nos pa hasi?

⁹ “Echonan di deboshon na Dios” tambe ta vital pa nos por tene e dia di Yehova na mente. “Echonan di deboshon na Dios” ta enserá un rèspèt profundo pa Dios ku ta motivá nos pa hasi loke ta bon den su bista. Apego leal na Yehova ta e motivashon tras di tal echonan di deboshon. Ta su boluntat pa “tur hende wòrdu salbá i yega na konosementu di e bèrdat.” (1 Timoteo 2:4) Dios “no kier pa ningun hende bai pèrdí, ma pa tur bin na repentimentu.” (2 Pedro 3:9) Pues anto, nos echonan di deboshon na Dios lo no mester motivá nos pa hasi mas esfuerso pa yuda hende siña tokante Yehova i imit’é?—Efesionan 5:1.

10. Dikon nos tin ku vigilá kontra “e engaño di rikesa”?

¹⁰ Nos bida lo ta abundá ku echonan di deboshon na Dios si nos ta buska promé e Reino di Dios. (Mateo 6:33) Esaki ta enserá ku nos lo tin un punto di bista balansá di kosnan material. Hesus a spièrta: “Tene kuidou, i warda boso di tur golosidat; pasobra bida di hende no ta konsistí di e abundansia di e kosnan ku e tin.” (Lukas 12:15) Maske kisas nos no por imaginá ku amor pa plaka lo por siega nos, ta bon pa nos tuma nota ku “e preokupashonnan di e mundu aki i e engaño di rikesa” por “hoga e palabra” di Dios. (Mateo 13:22) Kisas no ta fásil pa gana nos pan di kada dia. P’esei den algun parti di mundu, hopi hende ta rasoná ku pa nan por tin un mihó bida, nan tin ku bai biba na un pais mas próspero, kisas lagando nan famia atras pa algun aña. Asta algun persona den Dios su pueblo a rasoná di e manera aki. Dor di bai biba na un otro pais, kisas nan ta den un posishon pa proveé komodidatnan moderno pa nan famianan. Sin embargo, kiko por pasa ku e estado spiritual di nan sernan kerí ku nan a laga atras? Si e kabes di kas no t’ei pa duna e debido guia, nan lo ta sufisiente fuerte spiritualmente pa sobrebibí e dia di Yehova?

11. Kon un imigrante a demostrá ku echonan di deboshon na Dios ta mas importante ku rikesa?

¹¹ Un imigrante di Filipina ku a bai traha na Hapon a siña e bèrdat di Beibel einan serka un Testigu di Yehova. Ora el a haña sa di e responsabilidatnan bíbliko ku e tin komo kabes di kas, el a realisá ku e tin ku yuda su famia pa nan por bira adoradó di Yehova. (1 Korintionan 11:3) Pero su esposa na Filipina tabata masha kontra di e religion nobo ku el a haña i tabata kier p’e sigui manda plaka en bes di bin kas bèk pa siña e famia su kreensianan basá riba Beibel. Pero tòg el a bai kas bèk, motivá dor di e urgensia di e tempu i debí na su interes den su sernan kerí. Su pasenshi den trata amorosamente ku su famia a wòrdu rekompensá. Ku tempu, su famia a uni den adorashon berdadero, i su esposa a drenta den e sirbishi di tempu kompletu.

12. Dikon nos mester pone interesnan spiritual na promé lugá den nos bida?

¹² Nos por kompará nos situashon ku hende ku ta den un edifisio na kandela. Lo ta sabí pa kore bai bini pa loko sakando kosnan material for di e edifisio aki ku ta kasi basha den otro? En bes di esei, lo no ta hopi mas importante  pa salba nos mes bida i tambe e bida di nos famia i di otro hende ku ta den e edifisio? Wèl, e mundu malbado aki ta a punto di basha den otro, i bida di hende ta na peliger. Siendo konsiente di esaki, siguramente nos lo pone interesnan spiritual na promé lugá i konsentrá selosamente riba e trabou di prediká e Reino ku ta salba bida.—1 Timoteo 4:16.

Nos Mester Ta “sin Mancha”

13. Den ki kondishon nos lo kier ta ora e dia di Yehova dal aden?

¹³ Apòstel Pedro a enfatisá e importansia di mantené un aktitut korekto miéntras ku nos ta spera. El a bisa: “Stimánan, siendo ku boso ta spera e kosnan aki, hasi boso sumo posibel p’e haña boso finalmente sin mancha i sin defekto i na pas.” (2 Pedro 3:14, NW) Ademas di su konseho pa nos keda okupá den aktonan santu di kondukta i echonan di deboshon na Dios, Pedro a enfatisá e importansia di ku al final Yehova mester haña kada un di nos purifiká mediante e sanger presioso di Hesus. (Revelashon 7:9, 14) Esaki ta rekerí pa un hende ehersé fe den e sakrifisio di Hesus i bira un sirbidó dediká i batisá di Yehova.

14. Kiko ser “sin mancha” ta enserá?

¹⁴ Pedro a urgi nos pa hasi nos máksimo esfuerso pa wòrdu hañá “sin mancha.” Nos ta manteniendo nos “pañanan” di kondukta i personalidat kristian sin mancha, sin kontaminashon di mundu? Normalmente ora nos ripará ku tin un mancha riba nos paña, mesora nos ta purba kit’é. Si ta trata di un paña ku nos gusta hopi, nos lo limpi’é ku mas kuidou ainda. Nos ta pensa pa hasi e mesun kos si na moda di papia nos paña kristian mancha pa motibu di algun debilidat den nos personalidat òf kondukta?

15. (a) Pakiko e israelitanan mester a traha fraña na e zòm di nan pañanan? (b) Dikon Yehova su sirbidónan djawe ta destaká komo diferente?

¹⁵ E israelitanan mester a traha ‘fraña pa nan mes na e zòm di nan pañanan’ i kose un hilu blou riba rant di e zòm. Dikon nan mester a hasi esei? Pa nan kòrda riba e mandamentunan di Yehova, obedesé nan, i demostrá di ta “santu” pa nan Dios. (Numbernan 15:38-40) Komo Yehova su sirbidónan djawe, nos ta destaká komo diferente for di mundu pasobra nos ta kumpli ku leinan i prinsipionan di Dios. Por ehèmpel, nos ta mantené limpiesa moral, nos ta respetá e santidat di sanger i nos ta evitá tur sorto di idolatria. (Echonan 15:28, 29) Hopi hende ta respetá nos pa nos determinashon firme pa mantené nos mes puru i sin mancha.—Santiago 1:27.

Nos Mester Ta “sin Defekto”

16. Kiko ta enserá mantené nos mes “sin defekto”?

¹⁶ Tambe Pedro a bisa ku nos mester wòrdu haña “sin defekto.” Kon esei por ta posibel? Por lo general ta posibel pa kita un mancha pero un defekto ta duna e idea di algu mas serio. E ta indiká ku algu di paden ta robes. Apòstel Pablo a konsehá su rumannan kristian na Filipos: “Hasi tur kos sin murmurá ni diskutí, pa boso por proba boso mes di ta sin kulpa i inosente, yunan di Dios sin reproche meimei di un generashon korumpí i perverso, entre kualnan boso ta bria manera lusnan den mundu.” (Filipensenan 2:14, 15) Si nos sigui e konseho ei, nos lo evitá di murmurá i diskutí ku otro, anto nos lo sirbi Dios motivá pa  sintimentunan puru. Nos lo ser motivá pa nos amor pa Yehova i pa nos próhimo segun ku nos ta prediká “e evangelio aki di e reino.” (Mateo 22:35-40; 24:14) Ademas, nos lo sigui proklamá e evangelio di reino apesar ku hende en general kisas no ta komprondé dikon nos ta usa nos tempu boluntariamente pa yuda otro personanan siña tokante Dios i su Palabra, Beibel.

17. Kiko mester ta nos motivashon ora nos ta purba haña un privilegio den e kongregashon kristian?

¹⁷ Ya ku nos tin deseo di wòrdu haña “sin defekto” ta bon pa nos eksaminá kiko ta nos motivashon tras di tur loke nos ta hasi. Nos a bandoná mundu su manera di hasi kos pa motibunan egoista. Por ehèmpel nos no ta kore mas tras di rikesa òf no ta purba haña mas poder. Si nos ta purba haña privilegionan den e kongregashon kristian, laga nos motibunan keda puru i semper laga nos sea motivá pa amor pa Yehova i pa otro hende. Ta refreskante pa mira hòmbernan spiritual “aspirá na e puesto di ansiano” ku un goso i ku e deseo humilde pa traha manera esklabo pa Yehova i pa nan rumannan den fe. (1 Timoteo 3:1; 2 Korintionan 1:24) Sí, esnan ku ta kualifiká pa sirbi komo ansiano ta “pastoriá e tou di Dios . . . boluntariamente, segun e boluntat di Dios; i no pa ganashi desonesto, sino ku hopi afan; no manera hende ku tin dominio riba esnan ku a wòrdu konfiá na [nan], ma siendo ehèmpel pa e tou.”—1 Pedro 5:1-4.

Nos Mester Wòrdu Hañá ‘na Pas’

18. Pa ki kualidatnan Testigunan di Yehova ta bon konosí?

¹⁸ Por último Pedro ta bisa ku nos mester wòrdu hañá ‘na pas.’ Pa nos kumpli ku e rekisito aki, nos mester ta na pas ku Yehova i nos próhimo. Pedro a enfatisá e importansia di “keda ferviente den boso amor pa otro” i mantené pas ku nos rumannan kristian. (1 Pedro 2:17; 3:10, 11; 4:8; 2 Pedro 1:5-7) Pa mantené nos pas, nos mester stima otro. (Juan 13:34, 35; Efesionan 4:1, 2) Nos amor i pas ta bisto prinsipalmente na nos kongresonan internashonal. Na un kongreso na Costa Rica na 1999, un bendedó na aeropuerto a rabia pasobra Testigunan lokal inkonsientemente tabata para i tapa e bista di su negoshi ora ku nan tabata duna bonbiní na e delegadonan ku tabata yega. Sin embargo, riba e di dos dia, el a ripará e amor i pas demostrá den e kaluroso bonbiní ku e delegadonan tabata risibí, maske e Testigunan lokal no tabata konosé nan personalmente. Riba e último dia, e bendedó a djòin nan den e dunamentu di bonbiní i a pidi un studio di Beibel.

19. Dikon ta importante pa buska pas ku rumannan den fe?

¹⁹ Nos sinseridat den buska pas ku nos rumannan spiritual por indiká ku di bèrdat nos  ta spera riba e dia di Yehova i e mundu nobo ku el a primintí. (Salmo 37:11; 2 Pedro 3:13) Suponé ku nos tin difikultat pa mantené pas ku un sierto ruman den fe. Nos por imaginá nos mes ta biba na pas kuné den Paradeis? Si un ruman tin algu kontra nos, nos mester aktua lihé pa ‘rekonsiliá kuné.’ (Mateo 5:23, 24) Ta importante pa nos hasi esei si nos kier ta na pas ku Yehova.—Salmo 35:27, NW; 1 Juan 4:20.

20. Den ki maneranan nos por mustra ku nos ta spera riba Yehova?

²⁰ Personalmente, nos ta “sperando i teniendo bon na mente e presensia di e dia di Yehova”? Nos deseo intenso pa mira fin di maldat ta ser demostrá ora nos ta keda santu den e mundu inmoral aki. Ademas, nos anhelo ferviente pa e dia di Yehova bini i pa biba bou di e gobernashon di Reino ta bisto na nos echonan di deboshon na Dios. I nos ekspektativa di biba den e mundu nobo di pas ta ser reflehá den e manera ku awor nos ta buska pas ku nos rumannan den fe. Di e maneranan aki, nos ta mustra ku nos ta “teniendo bon na mente e presensia di e dia di Yehova.”

[Nota]

Bo Ta Kòrda?

• Kiko ta nifiká tene “bon na mente e presensia di e dia di Yehova”?

• Kon nos kondukta por demostrá ku nos ta spera riba Yehova?

• Dikon “echonan di deboshon na Dios” ta vital?

• Kiko nos mester hasi pa Yehova haña nos ‘sin mancha i sin defekto i na pas’?

[Preguntanan di Estudio]

[Plachi na página 11]

Spera riba Yehova ta ser reflehá den aktonan santu di kondukta

[Plachi na página 12]

E trabou di prediká e Reino ta salba bida

[Plachi na página 14]

Segun ku nos ta spera e dia di Yehova, laga nos buska pas ku otro hende