Rasoná ku Sano Huisio i Aktua Sabí

IMAGINÁ bo e esena aki: Hesukristu ta splikando ku lo e sufri hopi kos na man di enemigunan religioso na Yerusalèm i kaba nan lo mat’é. Apòstel Pedro, su amigu íntimo, no por kere esei. Asta e ta hala Hesus un banda i ta skual e. No kabe duda ku Pedro ta sinsero i ègt preokupá. Pero kon Hesus ta evaluá Pedro su manera di rasoná? Hesus ta bisa: “Kita for di mi dilanti, Satanas! Bo ta un piedra di trompeká pa mi; pasobra bo no tin bo pensamentu riba e kosnan di Dios, sino riba esnan di hende.”—Mateo 16:21-23.

Esei lo mester tabata un shòk grandi pa Pedro! En bes di ta un yudansa i apoyo, e tabata den e kaso aki “un piedra di trompeká” pa su Señor stimá. Kon bini esaki a sosodé? Pedro kisas a bira víktima di un falta komun den hende su manera di rasoná: el a kere solamente loke e kier a kere.

No Konfia Muchu den Nos Mes

Un kos ku por stroba nos di rasoná ku sano huisio ta e tendensia di konfia muchu den nos mes. Apòstel Pablo a spièrta kompañeronan kristian di Korinto di antigwedat: “Laga esun ku ta kere ku e ta pará tene kuidou pa e no kai.” (1 Korintionan 10:12) Dikon Pablo a bisa esaki? Aparentemente pasobra e tabata sa kon fásil ta pa hende kiboká nan mes den nan manera di pensa, sí asta pa mente di kristiannan ser “desviá for di e deboshon simpel i puru na Kristu.”—2 Korintionan 11:3.

Esaki a sosodé ku henter un generashon di Pablo su antepasadonan. N’e tempu ei Yehova a bisa nan: “Mi pensamentunan no ta boso pensamentunan, ni boso kamindanan no ta mi kamindanan.” (Isaias 55:8) Nan a bira “sabí den nan mes wowo,” i esei a resultá den kalamidat. (Isaias 5:21) P’esei siguramente ta rasonabel pa analisá kon nos por pensa ku sano huisio i asina evitá un kalamidat similar.

Tene Kuidou ku Pensamentu Karnal

Algun hende na Korinto tabata mal afektá dor di pensamentu karnal. (1 Korintionan 3:1-3) Nan a pone mas énfasis riba filosofia humano ku riba e Palabra di Dios. E filósofonan griego di e tempu ei sin duda tabata hòmbernan masha sabí. Sin embargo, den bista di Dios nan tabata bobo. Pablo a bisa: “Ta pará skirbí: ‘Lo mi destruí e sabiduria di e sabínan, i e inteligensia di e inteligentenan lo mi pone un banda.’ Unda e hende sabí ta? Unda e eskriba ta? Unda e disputador di e siglo aki ta? Dios  no a hasi sabiduria di e mundu aki bira lokura [òf, “bobedat,” NW]?” (1 Korintionan 1:19, 20) E intelektualnan ei a ser goberná pa “e spiritu di mundu” en bes di pa e spiritu di Dios. (1 Korintionan 2:12) Nan filosofia- i ideanan no tabata na armonia ku Yehova su manera di rasoná.

E fuente fundamental di tal pensamentu karnal ta Satanas e Diabel, kende a usa e kolebra pa gaña Eva ku astusia. (Génesis 3:1-6; 2 Korintionan 11:3) Ainda e ta un peliger pa nos? Sí! Segun e Palabra di Dios, Satanas “a siega mente” di hende asina tantu ku awor e ta “gaña henter mundu.” (2 Korintionan 4:4; Revelashon 12:9) Ta masha importante anto pa nos ta alerto pa su trikinan!—2 Korintionan 2:11.

Paga Tinu ku “Triki di Hende”

Apòstel Pablo a spièrta nos tambe pa “triki di hende.” (Efesionan 4:14) El a topa “trahadónan engañoso” ku a pretendé di ta papia e bèrdat pero ku en realidat a trose e bèrdat. (2 Korintionan 11:12-15) Pa alkansá nan metanan, e hendenan ei kisas ta skohe solamente evidensia ku ta apoyá nan manera di pensa, tambe nan ta usa un papiá kargá ku emoshon i mitar bèrdatnan ku ta engañoso, insinuashonnan tramposo i asta mentira abierto.

Personanan ku ta propagá ideanan oportunista hopi bes ta usa un palabra manera “sekta” pa pone otro hende den un lus negativo. Den un rekomendashon na e Asamblea Parlamentario di e Konseho di Europa, un persona a sugerí e outoridatnan ku ta investigá gruponan religioso “pa mihó stòp di usa e palabra ei.” Dikon? Pasobra e tabata di opinion ku e palabra “kulto” tabatin un konotashon demasiado negativo. Den un manera similar, intelektualnan griego eróneamente a akusá apòstel Pablo di ta un “charlatan,” òf literalmente “pikidó di simia.” Esaki tabata pa insinuá ku e no tabata nada mas ku un papiadó di ko’i loko, un hende ku a piki i ripití solamente pida-pida di informashon. Pero en realidat, Pablo “tabata prediká [e bon nobo di] Hesus i e resurekshon.”—Echonan 17:18.

E métodonan di e personanan ku ta plama nan ideanan ta duna resultado? Sí. Nan tabata un faktor prinsipal den krea odio étniko i religioso dor di trose hende su manera di mira otro nashon i religion. Hopi di nan a usa nan métodonan pa tene minorianan impopular abou den komunidat. Adolf Hitler a usa tal métodonan efikasmente ora el a pinta e hudiunan i otro gruponan minoritario komo “degenerá,” “malbado” i un “menasa” pa Estado. Nunka nos no mester permití e tipo di triki aki venená nos rasonamentu.—Echonan 28:19-22.

No Gaña Bo Mes

Ta fásil tambe pa gaña nos mes. De echo, por ta masha difísil pa nos legumai òf asta kuestioná ideanan ku nos ta gusta mashá. Dikon? Pasobra nos ta pega kurason na nos puntonan di bista. Anto nos por gaña nos mes dor di rashonalisá, es desir, nos ta inventá motibunan pa hustifiká loke en realidat ta kreensianan robes i engañoso.

Esaki ta loke a sosodé ku algun kristian di promé siglo. Nan tabata konosé e Palabra di Dios, pero nan no a lag’é dirigí nan manera di pensa. Na final di kuenta nan a “gaña nan mes.” (Santiago 1:22, 26) Un kos ku por indiká ku nos a bira víktima di e tipo di engaño propio aki ta si nos ta ripará ku nos ta rabia ora hende kuestioná nos kreensianan. En bes di rabia, ta sabí pa nos tene un mente habrí i skucha kuidadosamente loke otronan tin di bisa, asta ora nos ta sinti nos sigur ku nos opinion ta korekto.—Proverbionan 18:17.

Koba pa Haña “e Konosementu di Dios”

Kiko nos por hasi pa keda rasoná ku sano huisio? Tin hopi yudansa disponibel, pero nos mester ta dispuesto pa traha pa haña nan. Rei sabí Salomon a bisa: “Mi yu, si bo kier risibí mi palabranan i warda mi mandamentunan den bo, hasi bo orea atento na sabiduria, i inkliná  bo kurason na komprondementu; pasobra si bo sklama pa disernimentu, halsa bo bos pa komprondementu, si bo busk’é manera plata, i rondi’é manera tesoro skondí, e ora ei lo bo diserní e temor di SEÑOR, i deskubrí e konosementu di Dios.” (Proverbionan 2:1-5) En bèrdat, si personalmente nos hasi esfuerso pa yena nos mente i kurason ku e bèrdatnan di e Palabra di Dios, nos lo haña berdadero sabiduria, komprondementu i disernimentu. De echo, nos lo ta kobando pa haña kosnan ku tin hopi mas balor ku plata òf kualkier otro tesoro material.—Proverbionan 3:13-15.

Sabiduria i konosementu sigur ta faktornan importante pa nos por rasoná ku sano huisio. E Palabra di Dios ta bisa: “Sabiduria lo bin den bo kurason, i konosementu lo ta agradabel na bo alma. Diskreshon lo warda bo; komprondementu lo kuida bo. Sabiduria lo libra bo for di e kaminda di maldat, for di e hende ku ta papia kosnan pèrvèrso, for di esnan ku ta bandoná e bereanan di rektitut, pa kana den e kamindanan di skuridat.”—Proverbionan 2:10-13.

Ta spesialmente importante pa laga e pensamentunan di Dios guia nos manera di pensa na momentu di tenshon i peliger. Emoshonnan fuerte manera rabia òf miedu por stroba nos di rasoná ku sano huisio. Salomon a bisa: “Opreshon ta hasi un hende sabí bira loko [òf, “aktua manera hende loko,” NW].” (Eklesiastés 7:7) Ta asta posibel ku nos ta “bira razu kontra SEÑOR.” (Proverbionan 19:3) Kon? Dor di kulpa Dios pa nos problemanan i usa nan komo un èksküs pa hasi kosnan ku no ta na armonia ku su lei- i prinsipionan. En bes di pensa ku semper nos sa mihó, laga nos skucha humildemente na konseheronan sabí ku ta purba yuda nos dor di usa e Skritura. I si ta nesesario, laga nos ta prepará pa no insistí riba nos propio punto di bista ora ta bisto ku nos ta ekiboká.—Proverbionan 1:1-5; 15:22.

Sigui “Pidi Dios”

Nos ta biba den un tempu peligroso i konfuso. Pa nos por ehersé sano huisio i aktua sabí ta esensial pa nos hasi orashon regularmente pa pidi Yehova su guia. Pablo a skirbi: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.” (Filipensenan 4:6, 7) Si nos falta sabiduria pa manehá problema- i pruebanan pa kua nos no sa e salida, nos tin ku sigui “pidi Dios, kende ta duna na tur hende generosamente i sin reproche.”—Santiago 1:5-8.

Komo ku apòstel Pedro tabata sa ku kristiannan mester ehersé sabiduria, el a trata na ‘stimulá nan fakultatnan di pensa kla.’ E tabata kier pa nan “kòrda e dichonan papiá previamente dor di e profetanan santu i e mandamentu di e Señor i Salbadó,” Hesukristu. (2 Pedro 3:1, 2, NW) Si nos tambe hasi esaki i mantené nos manera di pensa na armonia ku e Palabra di Yehova, nos lo rasoná ku sano huisio i aktua sabí.

[Plachi na página 21]

Kristiannan di promé siglo a laga sabiduria divino, i no rasonamentu filosófiko forma nan manera di pensa

[Rekonosementu]

Filósofonan di robes pa drechi: Epikuro: Potrèt saká pa kortesia di British Museum; Cicero: Reprodusí for di The Lives of the Twelve Caesars; Plato: Roma, Musei Capitolini

[Plachi na página 23]

Ta esensial pa hasi orashon i studia e Palabra di Dios