‘BOSO a risibí pòrnada, duna pòrnada.’ (Mateo 10:8) Esei ta e instrukshon ku Hesus a duna su apòstelnan ora el a manda nan prediká e bon nobo. E apòstelnan a obedesé e mandato ei? Sí, i nan a sigui hasi esei asta despues ku Hesus a bandoná tera.

Por ehèmpel, ora Simon, e eks-hasidó di bruha, a mira e podernan milagroso ku apòstel Pedro i Juan tabata poseé, e kier a paga nan pa e haña e poder ei. Pero Pedro a reprendé Simon, bisando: “Ku bo plaka peresé huntu ku bo, pasobra bo a pensa ku bo por a optené e don di Dios ku plaka!”—Echonan 8:18-20.

Apòstel Pablo a desplegá e mesun spiritu ku Pedro. Pablo por a permití su mes bira un karga finansiero pa su rumannan kristian na Korinto. Sin embargo, el a traha ku su mes mannan pa sostené su mes. (Echonan 18:1-3) Di manera ku e por a bisa ku konfiansa ku el a prediká e bon nobo n’e korintionan “pòrnada.”—1 Korintionan 4:12; 9:18.

Lamentablemente, hopi ku ta pretendé di ta siguidó di Kristu no a demostrá e mesun disponibilidat pa ‘duna pòrnada.’ Sí, hopi lider religioso di kristiandat ta “instruí pa un preis.” (Mikeas 3:11) Algun lider religioso a asta enrikesé nan mes ku e plaka ku nan a kolektá for di nan miembronan. Na 1989, un evangelista merikano a ser sentensiá na un kastigu di prizòn di 45 aña. Pa ki motibu? El a “malversá miónes di dòler for di miembronan dje iglesia i a gasta parti di e plaka pa bai ku fakansi, pa kumpra kas, outo i asta un kouchi di kachó ku erkondeshen.”—People’s Daily Graphic, 7 di òktober, 1989.

Na Ghana, segun Ghanaian Times di 31 di mart 1990, un pastor katóliko romano a tuma e sèn ku a ser kolektá durante un sirbishi religioso i bent’é bèk riba e hendenan den misa. Segun e korant, “el a hasi esei pasobra, komo hende grandi, nan mester a tira plaka di papel di mas balor.” Nada straño anto ku hopi iglesia ta purba stimulá nan miembronan pa bira golos pa kos dor ku nan mes ta promové wega di plaka i otro proyektonan ku e meta pa haña mas fondo.

Na kontraste ku esei, Testigunan di Yehova ta hasi esfuerso pa imitá Hesus i su promé disipelnan. Nan no tin klero ku ta kobra salario. Kada Testigu ta un sirbidó ku a haña e responsabilidat pa prediká e “evangelio di e reino” na otro hende. (Mateo 24:14) P’esei rònt mundu mas ku seis mion di nan ta yuda hiba “e awa di bida” pòrnada na hende. (Revelashon 22:17) Den e manera aki, asta esnan “ku no tin plaka” por benefisiá di e mensahe di Beibel. (Isaias 55:1) Ounke nan obra mundial ta ser finansiá pa donashon boluntario, hamas nan ta kana pidi plaka. Komo berdadero sirbidónan di Dios, nan no ta “kana hasi negoshi ku e palabra di Dios,” sino nan ta papia “ku tur sinseridat, manera hòmbernan mandá dor di Dios.”—2 Korintionan 2:17.

 Pero pakiko Testigunan di Yehova ta dispuesto pa yuda otro hende riba nan mes gastu, sin ku nan ta wòrdu pagá? Kiko ta motivá nan? E echo ku nan ta duna pòrnada ta nifiká ku nan ta hasi esei sin risibí niun rekompensa pa nan esfuersonan?

Loke ta motivá kristiannan berdadero awe ta prinsipalmente un deseo pa agradá Yehova—no pa enrikesé nan mes. Dje manera ei nan por kontestá un desafio ku Satanas e Diabel a lanta hopi siglo pasá. Relashoná ku un hòmber hustu ku yama Jòb, Satanas a reta Yehova ku e pregunta: “Ta pòrnada Jòb ta teme Dios?” Satanas a pretendé ku Jòb a sirbi Dios únikamente pasobra Dios a pone un tranké di protekshon rònt di dje. Segun Satanas, si Jòb a pèrdè su kosnan material, Jòb lo a maldishoná Dios den su kara!—Jòb 1:7-11.

Pa kontestá e desafio aki, Dios a permití Satanas pone Jòb na prueba, bisando: “Tur loke e tin ta den bo poder [“man,” NW].” (Jòb 1:12) Kiko tabata e resultado? Jòb a demostrá ku Satanas ta un mentiroso. Apesar di tur e difikultatnan ku Jòb a pasa aden, el a keda leal. El a bisa: “Te na mi morto lo mi no bandoná mi integridat.”—Jòb 27:5, 6.

Adoradónan berdadero djawe tin e mesun aktitut ku Jòb. No ta kos material ta motivá nan pa sirbi Dios.

Un otro motibu pakiko kristiannan berdadero ta dispuesto pa ‘duna pòrnada’ ta pasobra nan mes a ‘risibí pòrnada’ for di Dios. Humanidat ta sometí na piká i morto debí na e piká di nos antepasado Adam. (Romanonan 5:12) Den su gran amor, Yehova a hasi areglo pa su Yu muri un morto sakrifisial—algu ku a kousa Dios hopi doló. Humanidat sigur no a meresé esaki. Nò, esei ta un don di Dios.—Romanonan 4:4; 5:8; 6:23.

P’esei, segun Romanonan 3:23 i 24, Pablo a bisa e kristiannan ungí: “Tur a peka i ta falta e gloria di Dios, siendo hustifiká gratuitamente [“komo un don grátis,” NW] dor di su grasia pa medio di e redenshon ku ta den Kristu Hesus.” Esnan ku tin e speransa di biba pa semper riba tera tambe ta risibí “un don grátis.” E don aki ta inkluí e onor di ser deklará hustu komo amigu di Yehova.—Santiago 2:23; Revelashon 7:14.

E sakrifisio di reskate di Kristu ta hasi posibel tambe pa tur kristian sirbi Dios. Apòstel Pablo a skirbi: “Mi a wòrdu hasí un sirbidó [di e “sekreto sagrado,” NW], segun e don di e grasia di Dios.” (Efesionan 3:4-7) Despues ku Dios a yama su berdadero sirbidónan pa kumpli ku e sirbishi aki pa medio di un don ku nan no a meresé ni no por a gana, nan sigur no por a spera di risibí pago pa hiba notisia di e don aki pa otro hende.

Esaki ta nifiká anto ku Dios kier pa kristiannan sirbié sin spera di risibí niun rekompensa? Nò, pasobra apòstel Pablo a bisa su kompañeronan di adorashon: “Dios no ta inhustu pa lubidá boso trabou i e amor ku boso a mustra pa su nòmber.” (Hebreonan 6:10; Deuteronomio 32:4) Al kontrario, Yehova ta “rekompensá esnan ku ta busk’é.” (Hebreonan 11:6) Pero e promesa di bida eterno den Paradeis ta pone hende bira egoista?—Lukas 23:43.

Sigur ku nò, pasobra na promé lugá, ta Dios mes a duna hende e deseo di biba pa semper den Paradeis riba tera. Ta e ta esun ku a habri e posibilidat aki p’e promé pareha humano. (Génesis 1:28; 2:15-17) I ora Adam ku Eva a desperdisiá e chèns aki pa nan yunan, ta e mes a bolbe ofresé e speransa aki na nan desendientenan. Pues Dios a primintí den su Palabra ku “e kreashon mes tambe lo wòrdu librá for di su sklabitut na korupshon pa drenta den e libertat glorioso di e yunan di Dios.” (Romanonan 8:21) P’esei ta kompletamente na su lugá pa kristiannan awe, meskos ku Moisés di antigwedat, fiha nan “bista riba e rekompensa.” (Hebreonan 11:26) Dios no ta ofresé e rekompensa aki komo un soborno. E ta ofres’é pa motibu di su berdadero amor pa esnan ku ta sirbié. (2 Tesalonisensenan 2:16, 17) I nos reakshon riba esei ta ku “nos ta stima, pasobra el a stima nos promé.”—1 Juan 4:19.

No opstante, kristiannan djawe mester analisá konstantemente kiko ta nan motivashon pa sirbi Dios. Na Juan 6:10-13, nos ta lesa ku Hesus a hasi milager i alimentá un multitut di mas ku sinku mil hende. Despues di esei, algun hende a kuminsá sigui Hesus puramente pa motibunan egoista. Hesus a bisa nan: “Boso ta buska mi . . . pasobra boso a kome di e pannan i a keda barika yen.” (Juan 6:26) Meskos tambe, dékadanan mas despues algun kristian dediká tabata rindi sirbishi na Dios “no ku un motibu puru.” (Filipensenan 1:17, NW) Algun ku ‘no a bai di akuerdo ku e palabranan sano di Hesukristu’ a asta buska maneranan pa saka bentaha personal for di nan asosiashon ku kristiannan.—1 Timoteo 6:3-5.

Awe, un kristian ku ta sirbi Dios solamente pasobra e kier biba pa semper den Paradeis tambe lo por ta sirbiendo ku un motibu egoista. Ku tempu esaki por pon’é sufri un kaida spiritual. Pa motibu ku Satanas su sistema di kosnan aparentemente a dura mas largu ku el a spera, e por “kansa,” pensando ku e fin a tarda. (Galationan 6:9) E por asta bira amargá pa motibu di e sakrifisionan material ku el a hasi. Hesus ta kòrda nos: “Stima SEÑOR bo Dios ku henter bo kurason, i ku henter bo alma, i ku henter bo mente.” (Mateo 22:37) Sí, un persona kende su motibu prinsipal pa sirbi Dios ta amor no ta pone límite riba su sirbishi. E ta determiná pa sirbi Yehova pa semper! (Mikeas 4:5) E no tin duele di niun sakrifisio ku el a hasi en konekshon ku su sirbishi na Dios. (Hebreonan 13:15, 16) Amor pa Dios ta impuls’é pa pone interesnan di Dios na promé lugá den su bida.—Mateo 6:33.

Awe, mas ku seis mion adoradó berdadero ta “pone [nan] mes disponibel” den Yehova su sirbishi. (Salmo 110:3) Abo ta un di nan? Si no, e ora ei meditá riba loke Dios ta ofresé: konosementu eksakto di e bèrdat; (Juan 17:3) libertat for di sklabitut na siñansa religioso falsu; (Juan 8:32) e speransa di biba pa semper. (Revelashon 21:3, 4) Testigunan di Yehova por siña bo kon bo por risibí tur e kosnan aki for di Dios, anto pòrnada.