Informe di Proklamadónan di Reino

Pasenshi i Perseveransia Ta Duna Bon Resultado

HESUKRISTU a profetisá ku den e último dianan “amor di hopi hende lo fria.” Esei a pone ku awe, den hopi parti di mundu, hende en general a bira indiferente p’e bon nobo di Reino. Algun asta ta mira religion ku menospresio.—Mateo 24:12, 14.

Tòg, apesar di esei, ku fe i pasenshi, publikadónan di Reino ta enfrentando e desafio ku éksito, manera e siguiente eksperensia for di Repúblika Cheko ta mustra.

Dos Testigu a papia ku un señora ku tabata tras di un porta será. Despues di un ratu e señora a habri e porta djis un tiki, saka man tuma e revistanan Toren di Vigilansia i Spièrta! ku e Testigunan tabata ofresiendo, yama danki i sera e porta. E Testigunan a puntra nan mes si nan mester a bai bèk serka e señora. Un di nan, un pionero, òf sirbidó di tempu kompleto, a disidí di bai bèk. Pero a bolbe sosodé meskos i esaki a sigui pa un aña largu.

E pionero a pensa ku lo e tin ku kambia su sistema di abordá e señora i p’esei el a pidi Yehova yud’é. E siguiente biaha ku el a ofresé e revistanan, el a puntra e señora amigablemente: “Kon ta bai ku bo, señora? Kon bo a haña e revistanan?” Na prinsipio, e señora no tabata respondé, pero despues di un par di bishita mas, e señora a kuminsá bira mas amabel. Na un okashon el a habri e porta kompletamente, pero e kòmbersashon tabata kòrtiku.

Dor ku e señora no tabata gusta papia na porta, e pionero a disidí di skirbié un karta pa splik’é e propósito dje bishitanan i pa ofresé un studio di Beibel. Finalmente, despues di un aña i mei di esfuerso ku hopi pasenshi, e pionero a logra kuminsá un studio di Beibel ku e doño di kas. El a keda sorprendí, a la bes animá, ora e señora a bis’é despues: “Mi a kuminsá kere den Dios for di dia ku bo a kuminsá trese e revistanan pa mi.”

En bèrdat, pasenshi i perseveransia por duna rekompensa den e obra di prediká e Reino i hasi disipel.—Mateo 28:19, 20.