Kiko Yehova Ta Spera di Nos?

“Kiko Yehova ta pidi bek di bo sino di ehersé hustisia i stima bondat i sea modesto kanando ku bo Dios?”—MIKEAS 6:8, NW.

1, 2. Dikon algun sirbidó di Yehova lo por sinti nan desanimá, pero kiko lo yuda nan sigur?

VERA ta un kristian fiel di mas o ménos 75 aña di edat i ta sufri di kebrante di salú. E ta bisa: “Tin biaha, mi ta wak for di bentana i mira mi rumannan kristian prediká di kas pa kas. Mi wowo ta yena ku awa pasobra mi kier ta huntu ku nan, pero enfermedat ta stroba mi di sirbi Yehova.”

² Abo a yega di sinti bo asina? Klaru ku tur hende ku ta stima Yehova kier kana den su nòmber i kumpli ku su rekisitonan. Pero, kiko si nos salú ta bayendo atras, òf nos ta hende di edat avansá òf nos tin responsabilidatnan di famia? Nos lo por sinti nos un poko desanimá pasobra kosnan asina ta stroba nos di hasi tur loke nos kurason ta deseá di hasi den Dios su sirbishi. Si nos ta den un situashon asina, sigur un análisis di Mikeas kapítulo 6 i 7 lo animá nos hopi. E kapítulonan aki ta mustra bon kla ku loke Yehova ta spera di nos ta rasonabel i na nos alkanse.

Kon Dios Ta Trata Su Pueblo

3. Kon Yehova ta trata e israelitanan rebelde?

³ Promé, laga nos wak Mikeas 6:3-5 i mira kon Yehova ta trata su pueblo. Kòrda ku den tempu di Mikeas, e israelitanan tabata rebelde. Apesar di esei, Yehova ta dirigí su mes na nan ku kompashon, yamando nan “mi pueblo.” Na versíkulo 5, un tradukshon literal dje palabranan hebreo ta mustra ku Yehova ta supliká nan, bisando: “Mi pueblo, kòrda, por fabor.” En bes di akusá nan na moda brutu, e ta purba alkansá nan kurason dor di puntra nan: ‘Kiko mi a hasi boso?’ Asta e ta animá nan pa ‘kontest’é.’

4. Ki efekto e ehèmpel di Dios di mustra kompashon mester tin riba nos?

⁴ Dios ta pone un bunita ehèmpel pa nos tur! Ku kompashon el a yama asta e pueblo rebelde di Israel i Huda di Mikeas su tempu “mi pueblo,” i el a roga nan. Esei ta duna nos motibu anto pa mustra kompashon i bondat kristian den nos trato ku e miembronan di  kongregashon. Ta bèrdat ku tin biaha nos no ta sali bon ku sierto ruman, òf kisas nan ta spiritualmente suak. Pero si nan ta stima Yehova, nos kier yuda nan i mustra kompashon na nan.

5. Ki punto básiko Mikeas 6:6 i 7 ta trese dilanti?

⁵ Awor, laga nos bai na Mikeas 6:6 i 7. Mikeas ta hasi un seri di pregunta: “Ku kiko mi mester bin serka SEÑOR i bùig te na suela dilanti di e Dios haltísimo? Mi mester bin serka dje ku ofrenda kimá, ku bisé di un aña? SEÑOR tin delisia den míles di karné chubatu, den dies mil riu di zeta? Mi mester presentá mi primogénito pa mi echonan di rebeldia, e fruta di mi kurpa pa e piká di mi alma?” Nò, nos no por agradá Yehova ni ku ‘míles di karné chubatu, ni ku dies mil riu di zeta.’ Pero tin algu ku sí ta agrad’é. Kiko esei ta?

Nos Tin Ku Ehersé Hustisia

6. Segun Mikeas 6:8, kiko ta e tres kosnan ku Yehova ta spera di nos?

⁶ Na Mikeas 6:8 [NW] nos ta lesa kiko Yehova ta spera di nos. Mikeas ta puntra: “Kiko Yehova ta pidi bèk di bo sino di ehersé hustisia i stima bondat i sea modesto kanando ku bo Dios?” E tres rekisitonan aki tin di haber ku nos sintimentu-, pensamentu- i akshonnan. Nos tin ku sinti nos inkliná pa demostrá e kualidatnan aki, pensa riba kon nos por manifestá nan i tuma akshon pa desplegá nan. Laga nos analisá e tres rekisitonan aki un pa un.

7, 8. (a) Kiko kier men “ehersé hustisia”? (b) Ki inhustisia ta reina den tempu di Mikeas?

⁷ “Ehersé hustisia” kier men hasi loke ta korekto. Dios su manera di hasi kosnan ta e norma di hustisia. Pero e hendenan den tempu di Mikeas no ta ehersé hustisia, sino mas bien inhustisia. Kiko nan ta hasi? Wak Mikeas 6:10. Na final dje versíkulo ei e ta papia di komersiantenan ku ta usa “un midí skars,” esta, un midí muchu chikitu. Versíkulo 11 ta agregá ku nan ta usa “peso engañoso.” I segun versíkulo 12, “nan lenga ta engañoso.” Pues, midí falsu, peso falsu i lenga falsu ta dominá e mundu komersial den tempu di Mikeas.

⁸ Sin embargo, no ta na plasa so tin inhustisia, sino den korte tambe. Mikeas 7:3 ta mustra ku ‘e prens ta eksigí regalo, i e hues ta aseptá plaka pasá bou di mesa.’ Hues ta risibí sèn bou di mesa pa nan dikta sentensia inhustu kontra hende inosente. “E hòmber poderoso,” esta, un siudadano ku hopi influensia, ta nan kómplise den krímen. De echo, Mikeas ta bisa ku prens, hues i hòmber poderoso ta “konspirá huntu” den nan maldatnan.

9. Kon e inhustisianan ku e malbadonan a praktiká a afektá hende den Huda i Israel?

⁹ E inhustisianan ku e lidernan malbado ta kometé ta afektá tur hende den Huda i Israel. Mikeas 7:5 ta menshoná ku e falta di hustisia a hiba na deskonfiansa entre kolega, amigu di konfiansa i asta entre pareha kasá. Versíkulo 6 ta bisa ku esei a desbaratá e bida sosial. Tata i yu hòmber, mama i yu muhé—famia asina pegá—ta trata otro ku menospresio.

10. Den e ambiente aktual di inhustisia aki, kon kristiannan ta komportá nan mes?

¹⁰ Kiko nos ta mira awe? No ta e mesun kosnan? Meskos ku den tempu di Mikeas, tur kaminda tin inhustisia, un ambiente di deskonfiansa, i desintegrashon di bida sosial i di famia. Pero komo sirbidó di Dios ku ta biba den e mundu di inhustisia aki, nos no ta laga e spiritu inhustu di mundu penetrá den e kongregashon kristian. Mas bien nos ta mantené e prinsipionan di onestidat i integridat na haltu dor di desplegá nan den nos asuntunan di tur dia. En bèrdat, nos ta “komportá nos mes den tur kos na un manera onorabel.” (Hebreonan 13:18) Bo no ta haña ku dor ku nos ta praktiká hustisia nos ta gosa di hopi bendishon komo parti di un hermandat ku ta manifestá berdadero konfiansa?

Kon Hende Ta Tende “e Bos” di Yehova?

11. Kon Mikeas 7:12 ta hañando su kumplimentu?

¹¹ Mikeas ta profetisá ku apesar di e inhustisia ku ta reina, hustisia lo alkansá tur sorto di  hende. E profeta ta bisa ku hende lo ser reuní “di laman pa laman i di seru pa seru” pa nan bira adoradó di Yehova. (Mikeas 7:12) Awe ku e profesia aki ta haña su kumplimentu final, no ta un sierto nashon, sino hende for di tur nashon ta sakando benefisio dje hustisia imparsial di Dios. (Isaias 42:1) Kon asina?

12. Kon “e bos” di Yehova ta wòrdu tendé awe?

¹² Pa haña un kontesta, analisá e palabranan anterior di Mikeas. Mikeas 6:9 ta bisa: “E bos di SEÑOR lo yama na e stat—i ta sabiduria sano pa tin temor pa bo nòmber.” Kon hende di tur nashon ta tende “e bos” di Yehova, i kiko esaki tin di haber ku e echo ku nos ta praktiká hustisia? Klaru ku no ta literalmente hende ta tende e bos di Dios. Pero pa medio di nos trabou di prediká rònt mundu, hende di tur rasa i gremio sosial ta tendiendo e bos di Yehova. Dor di esei, esnan ku skucha lo ‘teme Dios su nòmber,’ i nan lo haña un gran rèspèt p’e. Ora nos ta sirbi komo proklamadónan seloso dje Reino, nos sigur ta aktua na un manera hustu i amoroso. Dor di duna tur hende di konosé e nòmber di Dios, sin hasi distinshon di persona, nos ta “ehersé hustisia.”

Nos Tin Ku Stima Bondat

13. Kiko ta e diferensia entre bondat amoroso i amor?

¹³ Awor, laga nos trata e di dos rekisito menshoná na Mikeas 6:8. Yehova kier pa nos “stima bondat.” Segun e Tradukshon di Mundu Nobo (Ku Referensia) na ingles, e palabra  hebreo tradusí aki komo “bondat” por ser tradusí tambe komo “bondat amoroso” òf “amor leal.” Mustra bondat amoroso ta enserá mustra atenshon pa otro hende, òf un interes kompasivo den nan. Tin un diferensia entre bondat amoroso i e kualidat di amor. Unda e diferensia ta sinta? Amor tin un nifikashon mas amplio. Bo por sinti amor asta pa un kos òf pa un konsepto. Por ehèmpel, Beibel ta papia di un persona ku ta “stima plaka” i tambe di hende ku ta “stima sabiduria.” (Eklesiastés 5:10; Proverbionan 29:3) Pero bondat amoroso semper tin di haber ku hende, prinsipalmente hende ku ta sirbi Dios. Ta p’esei Mikeas 7:20 di e Tradukshon di Mundu Nobo ta papia di “e bondat amoroso duná na Abraham,” un hòmber ku a sirbi Yehova Dios.

14, 15. Kon Yehova su sirbidónan ta demostrá bondat amoroso, i ki prueba di esei e paragrafnan ta duna?

¹⁴ Na Mikeas 7:18 [NW] e profeta ta bisa ku Dios “tin deleite den bondat amoroso.” Mikeas 6:8 [NW] ta bisa ku nos mester hasi mas ku djis mustra “bondat amoroso.” Nos tin ku stima e kualidat ei. Kiko nos ta siña for di e tekstonan aki? Nos ta mustra bondat amoroso di buena gana i generosamente dor ku nos kier despleg’é. Meskos ku Yehova, pa nos tambe ta un plaser pa mustra bondat amoroso na hende den nesesidat.

¹⁵ Awe, bondat amoroso ta un karakterístika dje pueblo di Dios. Wak djis un ehèmpel so: Na yüni di aña 2001, un tormenta tropikal a okashoná inundashonnan grandi na Texas, Merka. Míles di kas a sufri daño, inkluso sientos di kas di Testigunan di Yehova. Rònt di 10.000 Testigu a ofresé nan tempu i energia boluntariamente pa yuda nan rumannan kristian den nesesidat. E boluntarionan aki a traha inkansablemente pa mas ku mitar aña, dedikando nan dianan, anochinan i wikèntnan pa yuda rekonstruí 8 Salòn di Reino i mas ku 700 kas pa nan rumannan kristian. Esnan ku no por a kontribuí ku trabou a kontribuí ku kuminda, material i sèn. Dikon tur e míles di Testigunan aki a bai yuda nan rumannan? Pasobra nan “stima bondat.” I esta dushi ta pa sa ku ta rònt mundu nos rumannan ta hasi e tipo di aktonan di bondat amoroso ei! Sí, e rekisito di “stima bondat” no ta un karga, sino un goso!

Kana ku Dios ku Modestia

16. Ki ilustrashon ta yuda enfatisá e nesesidat pa kana ku Dios ku modestia?

¹⁶ E di tres rekisito na Mikeas 6:8 [NW] ta pa “sea modesto kanando ku bo Dios.” Esei kier men rekonosé nos limitashonnan i dependé riba Dios. Nos por ilustrá esaki di e siguiente manera: Djis imaginá un ratu un mucha muhé chikitu ku tin e man di su tata bon tené miéntras nan ta kanando den un tormenta. E mucha sa bon-bon ku e no ta muchu fuerte, pero e tin konfiansa den su tata. Meskos ku e mucha ei, nos tambe mester ta konsiente di nos limitashonnan. Pero nos tin konfiansa den nos Tata selestial. Kon nos por mantené e konfiansa ei? Un manera pa logra esei ta dor di tene na mente pakiko ta sabí pa nos mantené un amistat íntimo ku Dios. Mikeas ta hasi nos kòrda tres motibu: Yehova ta nos Libertador, nos Guia i nos Protektor.

17. Kon Yehova a libra, guia i protehá su pueblo di antigwedat?

¹⁷ Segun Mikeas 6:4 i 5, Dios ta bisa: “Mi a saka bo for di tera di Egipto.” Sí, ta Yehova tabata e Libertador di Israel. Yehova ta sigui bisa: “Mi a manda Moisés, Aaron i Miriam bo dilanti.” Dios a usa Moisés ku Aaron pa guia e nashon, i Miriam a guia e hende muhénan di Israel den un baile di viktoria. (Eksodo 7:1, 2; 15:1, 19-21; Deuteronomio 34:10) Pues, Yehova a perkurá guia pa medio di su sirbidónan. Na versíkulo 5, Yehova ta rekordá e nashon di Israel ku el a protehá nan kontra Balak i Balaam, i ku el a duna e israelitanan protekshon durante e último parti di nan biahe for di Sitim, ku ta na Moab, te na Gilgal den e Tera Primintí.

18. Kon Dios ta aktua komo nos Libertador, Guia i Protektor awe?

 ¹⁸ Segun ku nos ta kana ku Dios, e ta libra nos tambe for di e mundu di Satanas, e ta guia nos pa medio di su Palabra i su organisashon, i e ta protehá nos komo grupo ora nos ta bou di atake di opositornan. P’esei nos tin tur motibu pa tene duru na e man di nos Tata selestial segun ku nos ta kana pasa kuné dor di e último parti turbulento di nos biahe, rumbo pa algu hopi mas grandioso ku e Tera Primintí di pasado: e hustu mundu nobo di Dios.

19. Kiko modestia tin di haber ku nos limitashonnan?

¹⁹ Si nos ta kana ku Dios ku modestia, esei lo yuda nos haña un punto di bista realístiko di nos sirkunstansia. Esei ta pasobra modestia ta enserá ser konsiente di nos limitashonnan. Problema ku salú òf edat avansá por limitá un poko loke nos por hasi den Yehova su sirbishi. Pero en bes di laga esaki desanimá nos, ta bon pa kòrda ku Dios ta aseptá nos esfuerso- i sakrifisionan ‘segun loke nos tin, no segun loke nos no tin.’ (2 Korintionan 8:12) Sí, Yehova ta spera pa nos sirbié ku henter nos alma, hasiendo tur loke nos sirkunstansia ta permití. (Kolosensenan 3:23) Ora nos ta hasi tur loke  nos por den su sirbishi ku selo i ku henter nos kurason, Dios ta bendishoná nos rikamente.—Proverbionan 10:22.

Un Aktitut di Spera Ta Trese Bendishon

20. Ki echonan lo yuda nos desplegá e aktitut di spera ku Mikeas tabatin?

²⁰ E bendishonnan di Dios ku nos ta risibí ta motivá nos pa imitá e aktitut di Mikeas, kende a bisa: “Lo mi spera riba e Dios di mi salbashon.” (Mikeas 7:7) Kiko e palabranan aki tin di haber ku kana ku Dios ku modestia? Si nos tin pasenshi, òf un aktitut di spera, esei por yuda nos pa no keda desepshoná ku e dia di Yehova no a yega ainda. (Proverbionan 13:12) Frankamente bisá, ta nos tur ta anhelá pa e fin di e mundu malbado aki yega. Sin embargo, e echo ku tur siman tin míles di hende ta kuminsá kana ku Dios ta duna nos un bon motibu pa sigui spera. En konekshon ku esaki, un Testigu ku a sirbi Yehova pa hopi tempu a bisa: “Ora mi wak bèk i mira e 55 añanan ku mi tin den e trabou di prediká, mi ta konvensí ku mi no a pèrdè nada dor di spera riba Yehova. Al kontrario, mi a skapa di hopi doló di kurason.” Abo tambe ta sinti meskos?

21, 22. Kon Mikeas 7:14 ta kumpliendo den nos tempu?

²¹ No kabe duda, kana ku Yehova ta benefisiá nos. Manera nos ta lesa na Mikeas 7:14, Mikeas ta kompará e pueblo di Dios ku karné ku ta biba den siguridat serka nan wardadó. Awe, den e kumplimentu mayor di e profesia aki, tantu e restu di Israel spiritual komo e “otro karnénan” ta haña siguridat serka e Wardadó di konfiansa, Yehova. Nan ta biba “den mondi-será, meimei di un kunuku fértil,” apartá den sentido spiritual for dje mundu aki ku ta mas i mas problemátiko i peligroso.—Juan 10:16; Deuteronomio 33:28; Jeremias 49:31; Galationan 6:16.

²² Mikeas 7:14 a profetisá tambe ku Yehova su pueblo ta gosa di prosperidat. Papiando di Dios su karnénan, esta, su pueblo, Mikeas a deklará: “Laga nan kome na Basan i Galaad.” Meskos ku karnénan na Basan i Galaad a kome bon yerba i gòrda, Yehova su pueblo awe ta gosa di prosperidat spiritual. Esei ta un otro bendishon mas pa esnan ku ta kana ku Dios ku modestia.—Numbernan 32:1; Deuteronomio 32:14.

23. Ki lès nos por siña for di Mikeas 7:18 i 19?

²³ Na Mikeas 7:18 i 19 e profeta ta enfatisá Yehova su deseo pa pordoná esnan ku repentí. Versíkulo 18 ta deklará ku Yehova ta “pordoná inikidat” i ta ‘pasa e akto di rebeldia forbei.’ Segun versíkulo 19, e ta bai “tira tur nan pikánan den e profundidatnan di laman.” Ki lès nos por saka di esaki? Ta bon pa nos puntra nos mes si nos ta imitá Yehova den e aspekto aki. Nos ta pordoná e erornan ku hende ta kometé kontra nos? Ora un hende arepentí i purba drecha asuntu ku nos, ta bon pa nos imitá Yehova su disposishon pa pordoná di un manera kompletu i permanente.

24. Kon bo a benefisiá di e profesia di Mikeas?

²⁴ Kon nos a benefisiá for di e análisis aki di e profesia di Mikeas? El a rekordá nos ku Yehova ta duna berdadero speransa na esnan ku ta hala serka dje. (Mikeas 2:1-13) El a animá nos pa hasi tur loke nos por p’e adelanto di adorashon berdadero, pa asina nos por kana den e nòmber di Dios pa semper. (Mikeas 4:1-5) Ademas, el a duna nos e siguransa ku nos por kumpli ku Yehova su rekisitonan, sin importá den ki sirkunstansia nos ta. Sí, e profesia di Mikeas ta fortalesé nos di bèrdat pa kana den e nòmber di Yehova.

Kon Lo Bo Kontestá?

• Segun Mikeas 6:8, kiko Yehova ta spera di nos?

• Kiko ta nesesario si nos kier “ehersé hustisia”?

• Kon nos por mustra ku nos ta “stima bondat”?

• Kiko ta enserá ‘kana ku Dios ku modestia’?

[Preguntanan di Estudio]

[Plachi na página 21]

Apesar di e maldat ku a reina den tempu di Mikeas, el a kumpli ku e rekisitonan di Yehova. Abo tambe por

[Plachi na página 23]

Ehersé hustisia dor di duna testimonio na hende di tur gremio sosial

[Plachinan na página 23]

Mustra ku bo ta stima bondat dor di satisfasé e nesesidatnan di otro hende

[Plachi na página 23]

Hasi tur loke bo por miéntras bo ta rekonosé bo limitashonnan ku modestia