Ta Rasonabel pa Kere den un Paradeis Riba Tera?

MASHA poko hende ta kere ku un dia tera lo bira un paradeis. Hopi hende ta pensa ku tera lo no sigui eksistí mes. Segun e buki The Sacred Earth (Tera Sagrado), di Brian Leigh Molyneaux, e planeta aki ta eksistí pa motibu di ‘un gran eksploshon kósmiko’ ku a tuma lugá miónes di aña pasá. Anto si hende mes no destruí tera, hopi hende ta kere ku tera i henter universo finalmente lo por “kai den otro i bolbe bira un bola di kandela bèk.”

John Milton, poëta ingles di siglo 17, no tabatin e pensamentunan pesimista ei. Den su poesia Paradeis Pèrdí, el a konta ku Dios a krea tera p’e bira un paradeis pa henter e famia humano por biba aden. E Paradeis original ei a bai pèrdí. Pero Milton a kere ku lo e wòrdu restorá, ku Hesukristu komo e reskatadó un dia lo “rekompensá esnan fiel na dje, i risibí nan pa nan haña felisidat kompletu . . . den Shelu òf riba Tera.” Ku konfiansa Milton a deklará: “Pasobra pa e tempu ei henter e Tera lo ta un Paradeis.”

Unda Paradeis Lo Ta—den Shelu òf Riba Tera?

Hopi hende religioso tin e mesun pensamentu ku Milton, esta ku finalmente nan lo bin haña un tipo di rekompensa pa e sufrimentunan ku nan mester a pasa aden riba tera. Pero unda nan lo disfrutá di e rekompensa ei? “Den Shelu òf Riba Tera”? Tin hende no ta pensa mes ku lo ta aki riba tera. Nan ta bisa ku hende lo disfrutá di “felisidat kompletu” solamente despues ku nan bandoná tera i biba den e region di spiritu den shelu.

Den e buki Heaven—A History (Historia di Shelu), outornan C. McDannell i B. Lang ta bisa ku Ireneo, teólogo di siglo 2, a kere ku bida den un paradeis restorá “lo no tuma lugá den un region leu aya den shelu, sino riba tera.” Segun e buki ei, maske lidernan religioso manera Johannes Calvijn i Martin Luther tabatin speransa pa bai shelu, nan a kere tambe ku “Dios lo renobá tera.” Hende di otro religion tabatin e mesun kreensianan. Tambe McDannell i Lang ta bisa ku algun hudiu a kere ku na Dios su debido tempu, tur sufrimentu humano “lo ser kitá i hende lo hiba un bida yen di satisfakshon riba tera.” Segun e antiguo kreensia perso, “e kondishon original ku tabatin riba tera lo wòrdu restorá i un biaha mas hende lo biba na pas,” The Encyclopaedia of Middle Eastern Mythology and Religion ta bisa.

Kiko a pasa ku e speransa di un paradeis riba tera? Tabata e intenshon pa nos biba djis un temporada riba tera? Filo, un filósofo hudiu di promé siglo, tabata di opinion ku bida riba tera ta djis “un episodio kòrtiku i hopi bes miserabel” den un biahe pa un region di spiritu. Esei ta e kaso? Òf Dios tabatin algu otro na mente ora el a krea tera i a pone hende biba den paradeis? Hende por haña berdadero satisfakshon spiritual i felisidat kompletu aki riba tera mes? Pakiko no eksaminá loke Beibel ta bisa tokante e tópiko aki? Kisas abo tambe lo yega na e mesun konklushon ku miónes di hende a yega kaba, esta ku e speransa pa un paradeis restorá riba tera sin duda ta rasonabel.

[Plachi na página 3]

E poëta John Milton a kere ku Paradeis lo ser rekobrá

 [Rekonosementu pa Potrèt na página 2]

PORTADA: Tera: U.S. Fish & Wildlife Service, Washington, D.C./NASA

[Rekonosementu pa Potrèt na página 3]

Tera: U.S. Fish & Wildlife Service, Washington, D.C./NASA; John Milton: Leslie’s