Historia di Bida

‘Kiko Lo Mi Duna Yehova?’

SEGUN E RELATO DI MARIA KERASINIS

Na edat di 18 aña, mi tabata un desepshon grandi pa mi mayornan, rechasá dor di mi famianan, i ko’i hari di e pueblo unda mi tabata biba. Nan a roga, preshoná i menasá, den un intento pa kibra mi integridat na Dios, pero sin éksito. Mi tabatin sigur ku dor di pega fielmente na e bèrdatnan di Beibel esei lo a trese benefisionan spiritual. Mirando atras riba mas ku 50 aña sirbiendo Yehova, mi por solamente ripití e palabranan di e salmista: “Kiko lo mi duna SEÑOR pa tur su benefisionan na mi?”—Salmo 116:12.

MI A nase na 1930, na Aggelokastro, un pueblito ku ta keda mas o ménos 20 kilometer for di e haf di Senkrea, na banda ost di e Istmo di Korinto, kaminda tabatin un kongregashon di kristiannan berdadero den promé siglo.—Echonan 18:18; Romanonan 16:1.

Mi famia a hiba un bida trankil. Tata tabata presidente di e komunidat i un persona altamente respetá. Nos tabata sinku ruman, i ami tabata di tres. Mi mayornan a lanta nos komo miembronan deboto di Iglesia Griego Òrtodòks. Tur djadumingu mi tabata asistí na santu sakrifisio di misa. Mi tabata hasi penitensia dilanti prenchi, sende bela den kapianan di e pueblitonan, i a tene tur yunamentu. Hopi bes mi a pensa pa bira sùr. Pero ku tempu, mi a bira e promé den mi famia ku a desepshoná mi mayornan.

Entusiasmá ku Bèrdatnan Bíbliko

Tempu ku mi tabatin rònt di 18 aña, mi a tende ku Katina, ruman muhé di un di mi suanan,  i kende tabata biba den un pueblito bisiña, a kuminsá lesa publikashonnan di Testigunan di Yehova i ku e no tabata bai misa mas. Esaki a traha riba mi masha hopi, i p’esei mi a disidí di yud’é bin bèk na loke ami a konsiderá e kaminda korekto. Pues, ora el a bin bishitá nos, mi a hasi areglo pa nos dos bai dal un keiru, pero ku e intenshon di pasa na kas di pastor. Pastor a kuminsá e kòmbersashon ku un avalancha di insulto kontra Testigunan di Yehova, yamando nan e herehenan (ketters) ku a engañá Katina. E diskushon a sigui tres anochi tras di otro. Katina a refutá tur su alegashonnan ku argumentunan bíbliko bon prepará. Finalmente, pastor a bis’é ku ya ku e ta un mucha muhé asina atraktivo i inteligente, e mester gosa di su hubentut miéntras ku e por, i buska pa sa tokante Dios ora e bira bieu.

Mi no a bisa mi mayornan nada tokante e diskushon ei, pero su siguiente djadumingu mi no a bai misa. Mèrdia, pastor a bini derechitu nos tienda. Mi a inventá un èksküs bisando ku mi mester a keda den tienda pa yuda Tata.

“Esei ta realmente e motibu, òf ta e mucha muhé ei a influensiá bo?” pastor a puntra mi.

“E hendenan aki su kreensianan ta mihó ku di nos,” mi a bis’é frankamente.

Pastor a bira bisa mi tata: “Señor Economos, kore ku e famia di bo ei mesora; el a pega bo kas na kandela.”

Mi Famia Ta Bira Kontra Mi

E tempu ei tabata na final di dékada di 1940 ora ku Gresia tabata pasando dor di e horornan violento di guera sivil. Temiendo ku guerieronan lo por sekuestrá mi, Tata a hasi areglo pa mi bai kas di mi ruman muhé ku ta biba den e pueblito kaminda Katina tabata biba. Durante e dos lunanan ku mi a keda einan, mi a wòrdu yudá pa komprondé loke Beibel ta bisa tokante vários asuntu. Mi a keda desepshoná ora mi a mira ku hopi di e doktrinanan di Iglesia Òrtodòks no tabata kuadra ku Beibel. Mi a realisá ku Dios no ta aseptá adorashon mediante prenchi, i tambe ku vários tradishon religioso—manera e venerashon di krus—no ta di orígen kristian, i ku hende mester adorá Dios “den spiritu i bèrdat” pa nan agrad’é. (Juan 4:23; Eksodo 20:4, 5) Mas ku tur kos, mi a siña ku Beibel ta ofresé e speransa briante di bida eterno riba tera! E bèrdatnan presioso ei di Beibel tabata entre e promé benefisionan personal ku mi a risibí di Yehova.

Miéntras tantu, mi ruman muhé ku su kasá a ripará ku mi no tabata hasi nòmber di tata na ora di kome, ni mi no tabata resa dilanti prenchinan religioso. Un anochi nan tur dos a bati mi. E siguiente dia mi a disidí di bai for di nan kas, i mi a bai na kas di mi tanta. Mi sua a notifiká mi tata. Poko despues Tata a bini, awa na wowo, i a purba pone mi kambia di opinion. Mi sua a hinka rudia mi dilanti, i roga mi pa pordon’é, lokual mi a hasi. Pa terminá e asuntu, nan a pidi mi bolbe bèk na iglesia, pero mi a para firme.

Ora mi a regresá na e pueblito di Tata, nan a sigui pone preshon. Mi no tabatin niun manera pa komuniká ku Katina, i mi no tabatin niun literatura pa lesa, ni sikiera un Beibel. Mi a keda hopi kontentu ora un di mi primanan a purba yuda mi. Ora el a bai Korinto, el a topa un Testigu i a bini bèk ku e buki “Laga Dios Sea Hañá Berdadero” i un ehemplar di e Skritura Griego Kristian, ku mi a kuminsá lesa den sekreto.

Un Kambio Inesperá den Mi Bida

E oposishon feros a sigui pa tres aña. Mi no tabatin kontakto ku niun Testigu di Yehova, ni mi no por a risibí niun literatura. Sin embargo, sin ku mi sa, kosnan grandi relashoná ku mi bida tabata a punto di tuma lugá.

Tata a bisa mi ku mi mester a bai serka mi tio na Tesalónika. Promé ku mi a sali pa Tesalónika, mi a bai serka un kosedó na Korinto pa lag’é kose un bachi pa mi. Esta un gran sorpresa ora mi a haña sa ku Katina tabata traha einan! Nos tabata masha kontentu di mira otro despues di asina hopi tempu. Nèt ora nos dos tabata saliendo for di e pakus, nos a topa un  yònkuman masha agradabel ku tabata bayendo kas for di trabou riba baiskel. Su nòmber tabata Charalambos. Despues ku nos a siña konosé otro, nos a disidí ku nos lo kasa. Tabata rònt di e tempu aki tambe ku, dia 9 di yanüari 1952, mi a simbolisá mi dedikashon na Yehova dor di batisá.

Charalambos a batisá mas promé. E tambe tabata haña oposishon for di su famia. Charalambos tabata masha seloso. El a sirbi komo asistente di e sirbidó di kongregashon i a kondusí hopi studio di Beibel. No a tarda hopi ku su ruman hòmbernan a aseptá e bèrdat, i awe mayoria miembro di nan famia tambe ta sirbi Yehova.

Mi tata a ègt gusta Charalambos, p’esei el a bai di akuerdo pa nos kasa, pero no tabata fásil pa konvensé Mama. Apesar di tur esaki, ami ku Charalambos a kasa dia 29 di mart 1952. Ta mi ruman hòmber mayó i un di mi primunan so a bini kasamentu. Mi no tabata sa e tempu ei ki un bendishon inkomparabel—un berdadero regalo di Yehova—Charalambos lo a resultá di ta! Komo su kompañera, mi a logra hiba un bida ku a konsentrá riba e sirbishi di Yehova.

Fortalesiendo Nos Rumannan

Na 1953, ami ku Charalambos a disidí di muda pa Atenas. Komo ku Charalambos kier a hasi mas den e trabou di prediká, el a kita for di e negoshi di su famia i a buska trabou partaim. Nos tabata pasa tur atardi huntu den sirbishi kristian i a kondusí hopi studio di Beibel.

Komo ku nos sirbishi tabata bou di restrikshon ofisial, nos mester tabata hopi inventivo. Por ehèmpel, nos a disidí di pone un ehemplar di e revista Toren di Vigilansia den bentana di un kiosko den sentro di Atenas, kaminda mi kasá tabata traha partaim. Un funshonario haltu di polis a bisa nos ku e revista ta prohibí. Sin embargo, el a puntra si e por a haña un di e revistanan pa e por averiguá mas aleu na e departamentu di siguridat. Ora nan a sigur’é ku e revista tabata legal, el a bini bèk bin bisa nos. Asina ku e otro rumannan ku tabatin kiosko a tende esaki, nan tambe a kuminsá pone ehemplarnan di E Toren di Vigilansia den bentana di nan kiosko. Un hòmber ku a haña E Toren di Vigilansia na nos kiosko, a bira un Testigu i awor ta sirbi komo ansiano.

Tambe nos tabatin e goso di mira mi ruman hòmber mas chikí siña e bèrdat. El a bini Atenas pa bai studia na e kolegio di marina komersial, i nos a hib’é un kongreso huntu ku nos. Nos kongresonan tabata ser tené sekretamente den mondi. El a gusta loke el a tende, pero poko despues el a kuminsá nabegá. Durante un di su biahenan, el a yega na un haf na Argentina. Einan, un misionero a subi abordo di e barku pa prediká, i mi ruman a pidié pa nos revistanan. Nos a keda masha kontentu mes ora nos a haña su karta ku tabata bisa: “Mi a haña e bèrdat. Hasi mi un abonado di boso revistanan.” Awe, e ku su famia ta sirbiendo Yehova fielmente.

Na 1958 mi kasá a haña e invitashon pa sirbi komo un superintendente biahero. Siendo ku nos obra tabata prohibí i situashon tabata hopi difísil, superintendentenan biahero normalmente tabata sirbi sin nan esposa. Na òktober 1959, nos a pidi e rumannan responsabel na sukursal si lo mi por a kompañ’é. Nan a bai di akuerdo. Nos mester a bishitá i fortalesé e  kongregashonnan den parti sentral i nort di Gresia.

E biahenan ei no tabata fásil. Tabatin masha tiki kaminda asfaltá. Komo ku nos no tabatin outo, nos tabata biaha normalmente ku transporte públiko òf den baki di pikòp, huntu ku galiña i otro merkansia. Nos tabata bisti buts di rùber pa asina nos por a pasa dor di e kamindanan di lodo. Komo ku den tur pueblito tabatin un milisia sivil, nos tabata drenta e pueblitonan ora bira skur, pa evitá interogashon.

E rumannan tabata apresiá e bishitanan aki masha hopi. Ounke mayoria di nan tabata traha duru den nan kunuku, nan a hasi tur esfuerso pa asistí na e reunionnan ku a ser tené anochi lat den vários kas. Tambe e rumannan tabata masha hospitalario i tabata ofresé nos lo mihó ku nan tin, ounke nan tabatin masha tiki. Tabatin biaha ku nos a drumi huntu ku henter e famia den e mesun kuarto. E rumannan su fe, perseveransia i selo a resultá di ta un otro benefisio presioso pa nos.

Ekspandiendo Nos Sirbishi

Na febrüari 1961, durante un bishita na sukursal na Atenas, nan a puntra nos si nos lo ta dispuesto pa sirbi na Bètel. Nos a kontestá ku e palabranan di Isaias: “At’ami aki! Manda ami!” (Isaias 6:8) Dos luna despues, nos a haña un karta ku a bisa nos pa bini Bètel mas pronto posibel. Pues, dia 27 di mei 1961, nos a kuminsá sirbi na Bètel.

Nos a stima nos asignashon nobo, i nos a sinti nos na kas mesora. Mi kasá tabata traha den e departamentunan di Sirbishi i di Abonamènt, i despues el a sirbi pa un tempu den e Komité di Sukursal. Ami tabatin vários asignashon den e kas. E tempu ei e famia di Bètel tabata konsistí di 18 miembro, pero durante kasi sinku aña, tabatin alrededor di 40 hende debí ku nan tabata tene un skol pa ansiano na Bètel. Parti mainta, mi tabata laba tayó, yuda e kòki, drecha 12 kama, i drecha mesa pa mèrdia. Trèmerdia, mi tabata strika paña i limpia baño i kamber. Un biaha pa siman mi tabata traha tambe den labanderia. Tabatin hopi trabou, pero mi tabata kontentu ku mi por a yuda.

Nos tabata hopi okupá den nos asignashonnan di Bètel i tambe den sirbishi di vèlt. Hopi bes nos tabata kondusí te ku shete studio di Beibel. Den fin di siman, mi tabata kompañá Charalambos ora e bai duna diskurso den vários kongregashon. Nos tabata inseparabel.

Nos a kondusí un studio di Beibel ku un pareha ku tabatin lasonan estrecho ku Iglesia Griego Òrtodòks i ku tabata amigunan personal di e pastor di iglesia ku tabata enkabesá e agensia ku ta buska pa sa ken ta herehe. Den nan kas, nan tabatin un kuarto yen di prenchi, kaminda sensia tabata kima kontinuamente i kaminda henter dia tabata toka kantikanan di alabansa di iglesia griego tradishonal. Pa un periodo, nos tabata bishitá nan riba djaweps pa studia Beibel, i nan amigu pastor tabata bishitá nan riba djabièrnè. Un dia, nan a pidi nos pa no keda sin bin pasobra nan tabatin un sorpresa pa nos. E promé kos ku nan a mustra nos tabata e kuarto ei. Nan a deshasí di tur nan prenchinan i a renobá e kuarto. E pareha aki a sigui hasi progreso i a batisá. Na tur, nos tabatin e goso di mira alrededor di 50 hende ku nos a studia Beibel kuné dediká nan bida na Yehova i batisá.

 Un benefisio spesial ku mi a disfrutá di dje ta e asosiashon ku rumannan ungí. Bishitanan di miembronan di Kuerpo Gobernante, manera Rumannan Knorr, Franz i Henschel, tabata un tremendo animashon. Despues di mas ku 40 aña, ainda mi ta haña ku sirbi na Bètel ta un gran onor i privilegio.

Luchando ku Malesa i Pèrdida

Na 1982 mi kasá a kuminsá mustra síntomanan di malesa di Alzheimer. Pa 1990 su salú a bai hopi atras, i ku tempu e tabatin mester di kuido konstante. Durante e último ocho añanan di su bida, mi no por a sali mes for di Bètel. Hopi ruman stimá di e famia di Bètel, i tambe superintendentenan responsabel, a hasi areglo pa yuda nos. Sin embargo, apesar di nan yudansa bondadoso, mi mester a dediká gran parti di dia i anochi na kuid’é. Tabatin biaha ku e situashon tabata sumamente difísil, i mi a pasa hopi anochi sin drumi.

Na yüli 1998 mi kerido esposo a fayesé. Ounke mi ta sinti su falta sinfin, mi ta konsolá mi mes ku e echo ku e ta den e memoria di Yehova, i mi sa ku Yehova lo kòrd’é huntu ku miónes di otro hende den e resurekshon.—Juan 5:28, 29.

Gradisidu pa e Benefisionan di Yehova

Ounke mi a pèrdè mi kasá, mi no a keda mi so. Ainda mi tin e privilegio di sirbi na Bètel, i mi ta disfrutá di e amor i kuido di henter e famia di Bètel. Mi famia ekstenso ta inkluí tambe rumannan spiritual di tur parti di Gresia. Ounke awor mi tin riba 70 aña, ainda mi por traha henter dia den kushina i den komedor.

Na 1999 un soño di mi a bira realidat ora ku mi a bishitá e sede mundial di Testigunan di Yehova na New York. Mi no por deskribí kon mi a sinti. E tabata un eksperensia edifikante i inolvidabel.

Ora mi mira atras, mi ta kere sinseramente ku mi no por a usa mi bida mas mihó ku asin’aki. E mihó karera ku kualke hende por tin ta di sirbi Yehova tempu kompletu. Ku konfiansa mi por bisa ku nunka mi no a falta nada. Amorosamente Yehova a perkurá pa mi ku mi kasá, tantu spiritualmente komo físikamente. Di eksperensia personal mi ta komprondé dikon e salmista a puntra: “Kiko lo mi duna SEÑOR pa tur su benefisionan na mi?”—Salmo 116:12.

[Plachi na página 26]

Ami ku Charalambos tabata inseparabel

[Plachi na página 27]

Mi kasá den su ofisina na sukursal

[Plachi na página 28]

Mi ta haña ku sirbishi di Bètel ta un gran onor