Ta Semper Bo Mester di un Mandamentu Bíbliko?

TEMPU bo tabata chikí, bo mayornan probablemente a duna bo hopi regla. Segun ku bo a bira mas grandi, bo a bin komprondé ku bo mayornan tabata interesá den bo bienestar. Komo adulto, probablemente ainda bo ta biba segun algun prinsipio ku nan a inkulká den bo, ounke bo no ta bou di nan outoridat mas.

Nos Tata selestial, Yehova, ta duna nos un kantidat di mandamentu spesífiko mediante su Palabra, Beibel. Por ehèmpel, e ta prohibí idolatria, fornikashon, adulterio i ladronisia. (Eksodo 20:1-17; Echonan 15:28, 29) Segun ku spiritualmente nos ta “krese den tur aspekto,” nos ta bin komprondé ku Yehova tin nos bienestar na pechu i ku su mandamentunan no ta demasiado restriktivo.—Efesionan 4:15; Isaias 48:17, 18; 54:13.

Sin embargo, tin hopi situashon pa kua no tin un mandamentu direkto òf spesífiko. Pues den kasonan asina, tin hende ta sinti ku ya ku no tin un lei bíbliko spesífiko, nan ta liber pa hasi manera nan ke. Nan ta argumentá ku si Dios a haña ku tabata nesesario, lo el a ekspresá su boluntat den forma di un mandamentu spesífiko.

Hende ku ta pensa asina, hopi bes ta tuma desishonnan imprudente ku despues nan ta lamentá masha hopi. Nan no ta mira ku Beibel no ta kontené lei so, sino tambe kosnan ku ta indiká kon Dios ta pensa. Segun ku nos ta studia Beibel i ta siña konosé Yehova su punto di bista di asuntunan, nos ta desaroyá un konsenshi bíblikamente entrená i esei ta yuda nos tuma desishonnan ku ta reflehá su manera di pensa. Ora nos ta hasi asina, nos ta alegrá su kurason i nos ta kosechá e benefisionan ku ta bini di tuma desishonnan sabí.—Efesionan 5:1.

Ehèmpelnan Bíbliko Sobresaliente

Ora nos konsiderá relatonan bíbliko di sirbidónan di Dios di pasado, nos ta haña situashonnan den kua nan a tuma Yehova su manera di pensa na kuenta asta ora nan no tabata bou di un mandato spesífiko. Konsiderá e ehèmpel di Hosé (Yosef). Tempu ku el a konfrontá e proposishonnan inmoral di e kasá di Potifar, no tabatin un lei por eskrito i inspirá pa Dios kontra adulterio. Sin embargo, asta sin un lei spesífiko, Hosé a komprondé ku adulterio tabata un piká no solamente kontra su mes konsenshi sino tambe “kontra Dios.” (Génesis 39:9) Evidentemente, a base di loke Dios a ekspresá den Edén, Hosé a rekonosé ku adulterio tabata kontra Dios su manera di pensa i su boluntat.—Génesis 2:24.

Konsiderá un otro ehèmpel. Na Echonan 16:3, nos ta lesa ku promé ku Pablo a laga Timoteo kompañ’é riba su biahenan kristian, el a sirkunsidá Timoteo. Sin embargo, den versíkulo 4 nos ta lesa ku Pablo ku Timoteo despues di esei a biaha dor di e statnan entregando “reglanan ku a wòrdu dekretá dor di e apòstelnan i e ansianonan ku tabata na Yerusalèm.” Entre e reglanan ei tabatin e desishon ku kristiannan no tabata obligá mas di ser sirkunsidá! (Echonan 15:5, 6, 28, 29) Dikon anto Pablo a haña ku tabata nesesario pa sirkunsidá Timoteo? “Pa motibu di e hudiunan ku tabata na e lugánan ei, pasobra nan tur tabata sa ku [Timoteo] su tata tabata griego.”  Pablo no kier a ofendé òf trompeká e hudiunan ei innesesariamente. E tabata masha interesá pa kristiannan sigui “rekomendá [nan] mes na e konsenshi di tur hende den bista di Dios.”—2 Korintionan 4:2; 1 Korintionan 9:19-23.

E manera di pensa aki tabata algu típiko di Pablo i Timoteo. Lesa pasashinan manera na Romanonan 14:15, 20, 21 i 1 Korintionan 8:9-13; 10:23-33, i mira kon profundamente interesá Pablo tabata den e bienestar spiritual di otro hende, spesialmente di esnan ku lo por a trompeká riba algu ku eigenlijk no tabata malu. I Pablo a skirbi tokante Timoteo: “Pasobra mi no tin ni un otro hende di e mesun spiritu ku lo preokupá sinseramente pa boso bienestar. Pasobra nan tur ta buska nan mes interesnan, no esnan di Kristu Hesus. Ma boso tin prueba di su fieldat, ku el a sirbi huntu ku mi, manera un yu ku su tata, den e trabou di evangelio.” (Filipensenan 2:20-22) Ki un bunita ehèmpel e dos hòmbernan kristian aki a pone pa nos awe! En bes di skohe nan kumbinensia òf preferensia personal ora no tin un mandamentu divino spesífiko, nan a imitá e amor di Yehova i su Yu dor di konsiderá kon nan desishon personal lo por afektá otro hende spiritualmente.

Konsiderá Hesukristu, nos ehèmpel prinsipal. Den su Sermon Riba Seru, el a splika bon kla ku e persona ku kapta e spiritu di e leinan di Dios lo obedesé nan mas ayá di loke ta ser mandá òf prohibí spesífikamente. (Mateo 5:21, 22, 27, 28) Ni Hesus, Pablo, Timoteo òf Hosé no a rasoná ku ya ku no tin un lei divino spesífiko, un persona por hasi manera ku e ke. Na armonia ku Dios su manera di pensa, e hòmbernan aki a hiba nan bida segun e dos mandamentunan di mas grandi di tur: stima Dios i stima bo próhimo.—Mateo 22:36-40.

Kiko di Kristiannan Djawe?

Ta bisto ku nos no mester konsiderá Beibel manera hende ta konsiderá un dokumento legal: ku e mester deskribí tur obligashon bon kla i detayadamente. Nos ta hasi Yehova su kurason masha kontentu ora nos skohe pa hasi loke ta reflehá su manera di pensa, asta ora no tin un lei spesífiko pa dikta nos akshon. Ku otro palabra, en bes di ku semper nos mester haña un mandamentu spesífiko for di Dios, nos por ‘komprondé kiko ta e boluntat di Yehova.’ (Efesionan 5:17; Romanonan 12:2) Dikon esaki ta hasi Yehova kontentu? Pasobra esei ta mustra ku nos ta mas interesá den agradá Yehova ku den nos preferensia- i derechonan personal. Tambe esei ta mustra ku nos ta asina gradisidu pa su amor ku nos ke imitá e amor ei, i hasié e forsa ku ta motivá nos. (Proverbionan 23:15; 27:11) Ademas, aktonan ku ta basá riba loke e Skritura ta indiká, ta kontribuí na bon salú spiritual i hopi bes tambe na bon salú físiko.

Laga nos mira kon por apliká e prinsipio aki den asuntunan personal.

Ora di Skohe Dibertishon

Konsiderá e kaso di un mucha hòmber ku ke kumpra un sierto álbum musikal. Loke el a tende di e álbum ta zona hopi bon, pero loke ta preokup’é ta ku e portada patras ta indiká ku e letranan tin hopi palabra malu i detayenan seksual. Tambe e sa ku un gran parti di e artista su grabashonnan ta reflehá un spiritu agresivo i di rabia. Komo un hende ku ta stima Yehova,  e hóben aki ta interesá den kiko Yehova su pensamentu i sintimentunan ta pa ku e asuntu. Kon e por komprondé kiko ta Dios su boluntat den esaki?

Den su karta na e galationan, apòstel Pablo a menshoná e obranan di karni i e fruta di Dios su spiritu. Probablemente bo sa kiko e fruta di Dios su spiritu ta enserá: amor, goso, pas, pasenshi, kariño, bondat, fieldat, mansedumbre, dominio propio. Pero kua ta e aktividatnan ku ta kai bou di obranan di karni? Pablo a skirbi: “Awor e obranan di karni ta evidente, kuanan ta: inmoralidat, impuresa, sensualidat, idolatria, bruheria, hostilidat, bringamentu, yalursheit, rabiamentu, pleitamentu, desakuerdo, doktrina falsu, envidia, buracheria, parandiamentu, i kosnan asin’aki, di kuanan mi ta spièrta boso di antemano, meskos ku mi a spièrta boso kaba di antemano, ku esnan ku praktiká sorto di kosnan asina lo no heredá e reino di Dios.”—Galationan 5:19-23.

Tuma nota di e último ekspreshon den e lista ei: “kosnan asin’aki.” Pablo no a duna un lista kompletu di tur loke por ser konsiderá un obra di karni. No ta asina ku un hende por rasoná: ‘Bíblikamente, mi tin mag di partisipá den tur aktividat ku no ta riba Pablo su lista di obranan di karni.’ Mas bien, lektornan lo tabatin ku usa nan mente, nan kapasidat di diserní, pa identifiká kosnan ku kisas no ta riba e lista pero ku ta “kosnan asin’aki.” Esnan ku sin arepentí ta partisipá den práktikanan ku no ta ser menshoná pero ku ta “kosnan asin’aki” lo no heredá e bendishonnan di e Reino di Dios.

Pues, nos tin ku komprondé, òf diserní, kiko ta desagradá Yehova. Ta difísil pa hasi esei? Suponé ku bo dòkter a konsehá bo pa kome mas fruta ku bèrdura, pero evitá kesio, eiskrim i kosnan asina. Lo ta difísil pa determiná ta bou di kua kategoria bolo ta kai? Awor, bolbe wak e fruta di Dios su spiritu i e obranan di karni. Na kua kategoria e álbum musikal menshoná ariba ta pertenesé? Un kos ta sigur, e no ta reflehá e kualidatnan manera amor, bondat, dominio propio, ni e otro kualidatnan asosiá ku e fruta di Dios su spiritu. Un hende lo no tin mester di un lei spesífiko p’e komprondé ku e tipo di músika aki no ta kuadra ku Dios su manera di pensa. E mesun prinsipionan ta apliká na material di lesa, pelíkula, programa di televishon, wega di kòmpiuter, Web site, etcetera.

Aparensia Personal Aseptabel

Tambe Beibel ta duna prinsipionan ku tin di haber ku nos manera di bisti i peña. E prinsipionan aki ta hasi posibel ku kada kristian por ser guiá pa mantené un aparensia personal apropiá i agradabel. Aki atrobe, e persona ku stima Yehova ta mira den esaki un oportunidat pa hasi loke lo alegrá kurason di su Tata selestial, i no un chèns p’e hasi loke sea ku e tin gana di hasi. Manera nos a mira kaba, e echo ku Yehova no a duna reglanan spesífiko den un asuntu no ta nifiká ku e no tin kunes kiko su pueblo ta hasi. Stail di bisti ta varia di un lugá pa otro, i tin biaha asta den e mesun lugá, e ta kambia periódikamente. Sin embargo, Dios ta duna prinsipionan básiko ku mester guia su pueblo tur momentu i tur kaminda.

Por ehèmpel, 1 Timoteo 2:9 i 10 ta bisa: “Meskos, mi kier pa hende muhé dòrna nan mes ku bistí apropiá, desente i moderá, no ku kabei tur na flègtu i oro òf pèrla òf bistí kostoso, sino mas bien ku bon obra, manera ta pas pa muhénan ku ta teme Dios.” Pues, muhénan—i hòmbernan—kristian mester konsiderá kuidadosamente ki klase di aparensia hende den nan área ta ferwagt di esnan ku “ta teme Dios.” Ta masha apropiá pa un kristian konsiderá kiko su aparensia lo pone hende pensa di e mensahe di Beibel ku e ta hiba. (2 Korintionan 6:3) Un kristian ehemplar lo no ta demasiado preokupá ku su propio preferensianan òf supuesto derechonan, sino mas bien lo e ta preokupá pa e no bira un distraishon òf un piedra di trompeká pa otro hende.—Mateo 18:6; 1 Korintionan 8:9-13.

Ora un kristian nota ku un sierto stail den su aparensia personal ta ofendé òf trompeká otro hende, e por imitá apòstel Pablo dor di pone e  preokupashon pa e bienestar spiritual di otro hende promé ku su preferensianan personal. Pablo a bisa: “Sea imitadónan di mi, meskos ku ami tambe ta di Kristu.” (1 Korintionan 11:1) I tokante Hesus, Pablo a skirbi: “Ni Kristu no a agradá su mes.” Pablo su instrukshon pa tur kristian ta bon kla: “Awor nos ku ta fuerte mester soportá e debilidatnan di esnan ku ta sin forsa, i no djis agradá nos mes. Laga kada un di nos agradá su próhimo pa su bon, pa su edifikashon.”—Romanonan 15:1-3.

Hasi Nos Kapasidat di Diserní Mas Skèrpi

Kon nos por desaroyá nos kapasidat di diserní pa asina nos por sa kon pa agradá Yehova asta ora e no a duna instrukshon spesífiko den un asuntu? Si nos ta lesa su Palabra tur dia, ta studi’é regularmente, i ta meditá riba loke nos a lesa, nos lo nota ku nos ta krese den nos kapasidat di diserní. E kresementu ei no ta tuma lugá rápidamente. Meskos ku e kresementu físiko di un mucha, kresementu spiritual ta tuma lugá gradualmente i bo no ta ripar’é mesora. P’esei nos mester tin pasenshi, i nos no mester sinti nos tur frustrá si nos no ripará un mehoransa mesora. Di otro banda, djis pasobra hopi tempu a pasa riba su mes no ta hasi nos mente òf nos kapasidat di diserní mas skèrpi. Manera a ser menshoná ariba, nos mester yena e tempu ei ku un konsiderashon regular di e Palabra di Dios, i nos tin ku apliká e Palabra ei den nos bida lo mihó ku nos por.—Hebreonan 5:14.

Nos por bisa ku e leinan di Dios ta tèst nos obedensia, miéntras ku su prinsipionan ta tèst kon profundo nos spiritualidat i nos deseo di agrad’é ta. Segun ku nos ta krese spiritualmente, nos lo pone mas énfasis riba imitá Yehova i su Yu. Nos lo ta ansioso pa tuma nos desishonnan a base di loke Dios ta pensa di asuntunan, manera ta ser indiká den e Skritura. Segun ku nos ta alegrá e kurason di nos Tata selestial den tur loke nos ta hasi, nos lo nota ku nos propio goso tambe ta oumentá.

[Plachinan na página 23]

Stailnan di bisti ta varia di un lugá pa otro, pero prinsipionan di Beibel mester guia loke nos ta skohe