Bo Ta Kultivá un Sintimentu di Atmirashon?

BO A ripará ku eskritornan di Beibel bes tras bes ta stimulá un sintimentu di atmirashon ora nan ta rekonosé e obra- i atributonan di Dios? ‘Mi ta trahá na un manera maravioso,’ e salmista a deklará. (Salmo 139:14) Profeta Isaias a skirbi: “O SEÑOR, bo ta mi Dios; lo mi halsa bo; lo mi duna gradisimentu na bo nòmber; pasobra bo a hasi kosnan maravioso.” (Isaias 25:1) Òf pensa riba e atmirashon i rèspèt profundo ku apòstel Pablo a ekspresá den su palabranan: “O profundidat di e rikesanan, tantu di e sabiduria komo di e konosementu di Dios!”—Romanonan 11:33.

Un kos maravioso ta algu ku ta stimulá emoshon dor ku e ta inesperá, deskonosí òf ineksplikabel, i foral ta lanta e sintimentu di sorpresa mesklá ku atmirashon òf kuriosidat.

No ta un goso pa mira kon mucha chikí ta habri nan wowonan hanchu-hanchu di atmirashon ora na mira, sinti òf tende algu ku ta nobo pa nan? Lamentablemente, e atmirashon ei basá riba kuriosidat òf riba e echo ku un kos ta nobo pa nan, hopi bes ta mengua segun ku añanan ta pasa.

Sin embargo, serka e eskritornan di Beibel ku nos a kaba di sita, e sintimentu di atmirashon i rèspèt tabata algu hopi profundo den nan. E tabata un sintimentu duradero. Kon bin? Pasobra nan a kultivá nan sintimentu di atmirashon dor di meditá ku apresio riba e obranan di Dios. E salmista a resa: “Mi ta meditá riba e añanan di hopi tempu pasá, riba tur loke bo a hasi; e maravianan di bo kreashon ta yena mi mente.”—Salmo 143:5, The New English Bible.

Ta di elogiá ku ainda bo por haña e sintimentu di atmirashon ei entre e adoradónan di Dios di tempu moderno! Abo tin e sintimentu ei? Bo ta kultivand’e?