Bo Por Trata ku Insiguridat ku Éksito

“SIGUR-SIGUR!” “Definitivamente!” “Garantisá!” Muy probablemente bo a tende e tipo di ekspreshonnan ei hopi biaha. Sin embargo, den nos bida diario tin masha tiki kos ku nos por ta sigur di dje. Bida ta asina impredisibel ku hopi bes nos ta puntra nos mes si no tin un kos ku nos por ta apsolutamente sigur di dje. Duda i insiguridat ta parse di ta un parti di bida.

Ta di komprondé ku mayoria hende ta deseá siguridat i felisidat pa nan mes i pa nan famia. Nan ta traha hopi duru pa optené e kosnan ku nan ta kere lo hasi nan felis i sigur, loke por lo general ta plaka i poseshonnan material. Sin embargo, un temblor, un horkan, un aksidente òf un krímen violento por destruí nan poseshonnan den un instante. Malesa grave, divorsio òf desempleo por kambia bida di hende di un dia pa otro. Ta bèrdat ku kisas e kosnan ei lo no sosodé ku abo. Sin embargo, e solo echo ku nos sa ku algu teribel por sosodé un ora pa otro, por molestiá nos i angustiá nos. Pero esei no ta tur.

E palabra “insigur” ta sinónimo di duda. I duda ta nifiká ku bo no ta sigur di un kreensia òf opinion, di tal grado ku hopi bes esei ta stroba tumamentu di desishon. Ademas, segun e buki Managing Your Mind (Kon pa Manehá Bo Mente), “ser insigur di algu importante ta un kousa prinsipal di ansiedat i preokupashon.” Duda ku no ser resolvé por hiba na ansiedat, frustrashon i rabia. Sí, preokupashon pa loke lo por òf lo no por sosodé, por kousa daño na nos salú físiko i mental.

Komo resultado, tin hende ta bai na e otro ekstremo. Nan ta manera e hóben di Brazil ku a bisa: “Pakiko preokupá tokante loke ta bai sosodé? Awe ta awe, mañan ta mañan.” Tal aktitut fatalista, ku ta ser deskribí bon pa e palabranan “laga nos kome i bebe, pasobra mañan nos ta muri,” por hiba solamente na desepshon, angustia i finalmente morto. (1 Korintionan 15:32) Ta mas mihó pa nos akudí na e Kreadó Yehova Dios, serka ken, segun Beibel, “no tin variashon ni sombra di kambio.” (Santiago 1:17) Si nos analisá Beibel, e Palabra di Dios, nos lo haña konseho i guia sano tokante kon pa trata ku éksito ku e insiguridatnan di bida. Tambe e por yuda nos komprondé dikon tin asina tantu inkietut tokante kosnan ku no ta sigur.

Motibu ku Kosnan No Ta Sigur

E Skritura ta duna un punto di bista realístiko di bida i ta yuda nos kultivá e debido aktitut  pa ku kambio i kosnan insigur. Relashonnan familiar, posishon sosial, inteligensia, bon salú, etcetera, por perkurá un sierto grado di siguridat. Pero Beibel ta mustra ku nos no por asumí ku e kosnan ei lo sigui asina sin kambia òf ferwagt ku nos bida lo ta sin problema, komo si fuera protehá pa podernan sobrenatural. E rei sabí Salomon a bisa: “E kareda no ta pa esun mas lihé, i e bataya no ta pa e guereronan, ni pan no ta pa e sabínan, ni rikesa pa esnan ku tin disernimentu, ni fabor pa e hendenan ku abilidat.” Dikon no? “Pasobra tempu i [“suseso imprevisto,” NW] ta alkansá nan tur.” P’esei Salomon a spièrta: “Manera piská kohé den un reda traishonero, i para kohé den un trampa, asina e yunan di hende ta kai den trampa den un tempu malu, ora esaki bin diripiente riba nan.”—Eklesiastés 9:11, 12.

Hesukristu tambe a papia di un tempu di ansiedat i insiguridat ekstremo ku lo a bini riba henter un generashon di hende. Ku palabranan hopi deskriptivo el a bisa: “Lo tin señalnan den solo i luna i streanan, i riba tera angustia entre e nashonnan, i desesperashon pa motibu di e ronkamentu di laman i olanan; hendenan ta desmayá di miedu i den e ekspektativa di e kosnan ku ta bin riba mundu, pasobra e podernan di e shelunan lo wòrdu sagudí.” Sin embargo, Hesus a indiká un kos positivo pa hende djawe di kurason onrado: “Ora boso mira e kosnan aki ta sosodé, sabi ku e reino di Dios ta serka.” (Lukas 21:25, 26, 31) Pues nos tambe, en bes di tin miedu di un futuro insigur, tin fe den Dios, lokual ta yuda nos mira mas ayá di e insiguridatnan na un futuro sigur i maravioso.

‘Tene e Siguransa Kompletu di e Speransa’

Ounke nos no por ta sigur di tur kos ku nos ta tende, lesa òf mira, nos tin bon motibu pa konfia e Kreadó. No solamente e ta Esun Supremo, sino tambe e ta un Tata amoroso ku ta perkurá pa su yunan riba tera. Dios a bisa tokante su propio palabra: “E lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.”—Isaias 55:11.

Hesukristu a siña hende e bèrdat ku ta bini di Dios, i hopi ku a skuch’é a aseptá e bèrdat ei ku un konvikshon i siguransa. Por ehèmpel, un grupo di samaritano di kurason onrado a bisa e muhé ku a skucha Hesus promé: “Awor nos no ta kere mas pa motibu di loke abo a bisa, pasobra nos mes a tende i nos sa ku esun aki di bèrdat ta e salbadó di mundu.” (Juan 4:42) Awe tambe, apesar ku nos ta biba den tempu di insiguridat, no tin nodi pa nos ta den duda di loke nos mester kere.

Relashoná ku kreensianan religioso, hopi hende ta di opinion ku en bes di purba komprondé e kreensianan, nos mester simplemente kere nan. Sin embargo, e eskritor bíbliko Lukas, no a pensa asina. El a hasi investigashon i a perkurá informashon eksakto di manera ku otro hende lo por “sa e bèrdat eksakto tokante di e kosnan” ku el a skirbi. (Lukas 1:4) Ya ku famia i amigunan ku no ta kompartí nos fe kisas tin miedu ku nos komo kreyente lo resultá desilushoná i desepshoná, ta importante pa nos por defendé nos fe. (1 Pedro 3:15) Ta solamente dor di sa eksaktamente pakiko nos ta kere sierto kosnan nos por yuda otro hende konfia den Dios. Beibel ta deskribí Yehova ku e palabranan aki: “E Baranka! Su obra ta perfekto, pasobra tur su kamindanan ta hustu; un Dios di fieldat i sin  inhustisia, hustu i rekto e ta.”—Deuteronomio 32:4.

Konsiderá e último deklarashon ei: “Hustu i rekto e ta.” Ki evidensia nos tin ku nos por ta sigur di esaki? Apòstel Pedro tabata plenamente konvensí di echo ei. El a bisa un ofisial romano ku su famia: “Di bèrdat mi ta komprondé awor ku Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.” (Echonan 10:34, 35) Pedro a bisa e palabranan aki pasobra el a kaba di mira kon Dios su propio man a dirigí asuntu pa asina un famia no-hudiu, ku anteriormente nan a konsiderá impuru i inaseptabel, por a bira aseptabel pa Dios. Nos tambe, meskos ku Pedro, por ta konvensí ku Dios no ta hasi distinshon di persona i ku e ta hustu. Dikon? Pasobra nos ta mira ku nos propio wowonan “un multitut grandi” di hende—mas ku seis mion—for di mas ku 230 pais rònt mundu ku a bandoná nan bida di ántes i awor ta kana den e kaminda di hustisia.—Revelashon 7:9; Isaias 2:2-4.

Komo kristiannan berdadero, nos no ke ta fanátiko ni arbitrario, sino humilde i rasonabel. Pero tòg nos no ta duda di loke nos ta kere ni di loke nos ta spera den futuro. Apòstel Pablo a skirbi na kristiannan di promé siglo: “Nos ta deseá ku kada un di boso lo mustra e mesun diligensia pa asina realisá e siguransa kompletu di speransa te na fin.” (Hebreonan 6:11) E bon nobo di e Beibel a duna nos tambe “e siguransa kompletu di speransa.” Manera Pablo a splika, e speransa ei ku ta firmemente basá riba e Palabra di Dios, ‘no ta laga nos keda desapuntá.’—Romanonan 5:5.

Ademas, nos ta plenamente konvensí ku dor di siña otro hende e bon nobo di e Beibel, esei por duna nan un konvikshon firme den nan relashon ku Dios, i asta laga nan sinti mas sigur emoshonalmente i físikamente. Nos por bisa meskos ku Pablo: “Nos evangelio no a yega serka boso den palabra so, sino tambe den poder i den spiritu santu i ku pleno konvikshon.”—1 Tesalonisensenan 1:5.

Bendishonnan Aktual Komo Resultado di Siguridat Spiritual

Ounke awe nos no por ferwagt siguridat kompletu den bida, tin kosnan ku nos por hasi ku lo yuda nos hiba un bida relativamente stabil i sigur. Por ehèmpel, asosiashon regular ku e kongregashon kristian na e reunionnan ta kontribuí na stabilidat pasobra einan nos ta siña prinsipionan i balornan korekto i sano. Pablo a skirbi: “Instruí esnan ku ta riku den e mundu aktual pa nan no ta sobèrbè i pa nan no fiha nan speransa riba e insiguridat di rikesa, ma riba Dios, kende ta proveé pa nos tur kos na abundansia pa nos disfrutá di nan.” (1 Timoteo 6:17) Dor di siña pone nan konfiansa den Yehova i no den kosnan material i plaser pasahero, hopi hende a logra kore ku e ansiedat i frustrashon ku nan tabata sinti na ántes.—Mateo 6:19-21.

Den e kongregashon, nos ta disfrutá tambe di un hermandat kaluroso ku ta perkurá yudansa i apoyo den vários manera. Apòstel Pablo i su kompañeronan di biahe na dado momentu den nan sirbishi a sinti “un karga masha pisá mes” i nan ‘asta tabata desesperá di nan bida.’ Unda Pablo a haña apoyo i alivio? Klaru ku su konfiansa den Dios no a tambaleá nunka. Pero fuera di esei, el a risibí animashon i konsuelo serka kompañeronan kristian ku a bin na su yudansa. (2 Korintionan 1:8, 9; 7:5-7) Awe ora tin un desaster natural òf kualke otro kalamidat, nos rumannan kristian bes tras bes ta e proménan ku ta yega pa duna yudansa material i spiritual na kompañeronan kristian i tambe na otro hende den nesesidat.

Un otro yudansa pa trata ku e insiguridatnan di bida ta orashon. Nos por akudí semper na nos amoroso Tata selestial ora nos ta bou di preshon inesperá. “SEÑOR lo ta un refugio pa e  oprimínan, un refugio den tempunan di angustia.” (Salmo 9:9) Mayornan humano kisas por keda sin protehá nan yunan. Di otro banda, Dios ta dispuesto pa yuda nos trata ku éksito ku nos temornan i sintimentunan di ta insigur. Ora nos benta nos ansiedatnan riba Yehova mediante orashon, nos por tin sigur ku e por “hasi tur kos muchu mas abundantemente di loke nos ta pidi òf pensa.”—Efesionan 3:20.

Abo ta akudí na Dios regularmente den orashon? Bo ta konvensí ku Dios ta tende bo orashon? Un hobensita na São Paulo a bisa: “Mi mama tabata bisa mi ku mi mester hasi orashon na Dios. Pero mi tabata puntra mi mes: ‘Dikon mi mester papia ku un persona ku ni sikiera mi konosé?’ Sin embargo, Proverbionan 18:10 a yuda mi komprondé ku nos tin mester di Dios su yudansa i ku nos tin ku papia kuné den orashon.” E skritura ei ta bisa: “E nòmber di [Yehova] ta un toren fuerte; e hustu ta kore drenta den dje i ta sigur.” Bon mirá, kon nos por desaroyá konfiansa den Yehova si nos no hasié un kustumber pa papia kuné? Pa disfrutá di e bendishonnan di siguridat spiritual, nos tin ku kultivá e kustumber di hasi orashon sinsero tur dia. Hesus a bisa: “Ma sea alerta tur ora bai, hasiendo orashon pa boso por tin forsa pa skapa di tur e kosnan aki ku ta bai tuma lugá, i pa para dilanti di e Yu di hende.”—Lukas 21:36.

Un otro kos ku nos por ta sigur di dje ta nos speransa den e Reino di Dios. Tuma nota di e palabranan na Daniel 2:44: “E Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.” E speransa ei ta sólido i e ta algu ku nos por ta sigur di dje. Promesanan humano hopi bes ta frakasá, pero semper nos por konfia e palabra di Yehova. En bes di ta inkonfiabel, Dios ta manera un baranka ku nos por stèns ariba. Nos por sinti meskos ku David, kende a bisa: “Mi Dios, mi baranka, den kende mi ta tuma refugio; mi eskudo i e kachu di mi salbashon, mi toren haltu i mi refugio; mi Salbadó, abo ta salba mi di violensia.”—2 Samuel 22:3.

E buki menshoná anteriormente Managing Your Mind a komentá mas aleu: “Mas un hende pensa riba e kosnan malu ku lo por sosodé, mas probabel nan lo parse, i mas difísil ta pa mira kon pa trata ku nan ku éksito.” P’esei anto, pakiko laga e ansiedat- i dudanan di e mundu aki bira un karga pa nos? Na lugá di esei, laga nos pone konfiansa den e promesanan sigur ku Dios ta duna i no den e insiguridatnan di e mundu aki. Dor di tin un fe firme den Yehova su promesanan infalibel, nos tin e siguransa aki: “Ken ku kere den dje lo no keda brongosá.”—Romanonan 10:11.

[Komentario na página 29]

E Palabra di Dios ta garantisá bendishon den futuro pa humanidat

[Komentario na página 30]

“Ken ku kere den dje lo no keda brongosá”

[Plachi na página 31]

E bon nobo di Reino ta duna hende siguridat