Kiko Ta Pasando ku Iglesianan?

“NA Gran Bretaña ainda hende ta kere den Dios, pero nan no kier hasi niun kompromiso ku Kristu,” segun Stephen Tirwomwe, pastor di Uganda. Un 20 aña pasá el a sobrebibí e aktonan violento kontra liderato di su iglesia na Uganda. Awe, e ta prediká den klup di hende hòmber na Leeds, Inglatera, dunando su spich di 10 minüt promé ku e hendenan kuminsá hunga bingo.

Na otro banda di Oséano Atlántiko, e Mishon Anglikano resien organisá riba kontinente merikano tambe ta konfrontando un krísis spiritual. Nan web site ofisial ta bisa: “Aworakí na Merka tin e poblashon di abla ingles di mas grandi na mundu ku no ta afiliá na ningun iglesia i ku no tin ningun interes den kosnan spiritual. Ta nos ta birando e kampo pa misionero.” Frustrá p’e echo ku nan esfuersonan pa realisá kambionan den nan iglesia a frakasá, e mishon nobo a kibra ku tradishon i a djòin lidernan asiátiko i afrikano pa ekstendé nan “aktividatnan misionero na Merka.”

Pero pakiko misioneronan afrikano, asiátiko i latinoamerikano ta ‘salbando alma’ den e paisnan supuestamente kristian di Europa i Norteamérika?

Ken Ta Salbando Ken?

Pa mas ku 400 aña, kuminsando djis despues ku paisnan europeo a kolonisá lugánan na Afrika, Asia, Pasífiko i Suramérika, misioneronan europeo deboto a yega e áreanan aki na gran kantidat. Nan a bini pa trese nan religion p’e asina yamá paganonan den e paisnan ei. Ku tempu, e kolonianan merikano, supuestamente fundá riba prinsipionan kristian, tambe a kuminsá establesé nan mes mishonnan evangéliko rònt mundu i despues a sigui hasi hopi mas ku e misioneronan europeo. Awor kosnan a bòltu.

 “E sentro [di kristianismo nominal] a kambia,” segun Andrew Walls, fundadó-direktor di e Sentro pa Investigashon di Kristianismo den e Mundu No-Oksidental. Na aña 1900, 80 porshento di hende ku a bisa ku nan ta kristian tabata sea europeo òf norteamerikano. Sin embargo, awe 60 porshento di tur hende ku ta bisa ku nan ta kristian ta biba na Afrika, Asia i Latinoamérika. Segun un informe di prensa resien, “iglesianan katóliko na Europa ta dependé di pastornan ku ta bini di Filipina i India,” i “un di kada seis pastor ku ta sirbiendo aworakí den parokianan katóliko riba kontinente merikano, originalmente a bini di otro pais.” Evangelistanan afrikano na Hulanda, kendenan ta bini prinsipalmente di Ghana, ta mira nan mes komo “un iglesia di misionero riba un kontinente kaminda hende ta biba sin Dios.” I awor ta evangelistanan di Brazil ta buska fielnan nobo den vários parti di Gran Bretaña. Un eskritor a remarká: “E tráfiko di misioneronan kristian a bira bèk.”

Un Konfrontashon Inevitabel

E kontinentenan europeo i norteamerikano ku ta birando mas i mas mundano en bèrdat lo por hasi bon uso di misionero. Segun un revista notisiero, “na Eskosia ménos di 10 porshento di kristian ta bai misa fielmente.” Na Fransia i Alemania e asistensia ta ménos ainda. Un otro informe di prensa ta deklará ku den un enkuesta “rònt di 40 porshento di merikano i 20 porshento di kanades a bisa ku nan ta bai misa regularmente.” Na kontraste, informenan ta mustra ku e asistensia na Filipina ta kasi 70 porshento, i e ta meskos den otro paisnan den desaroyo.

Loke ta asta mas notabel ainda ta ku baidónan di misa den Hemisferio Sur tin tendensia di pega muchu mas na tradishon ku esnan den Hemisferio Nort. Por ehèmpel, den un enkuesta ku a tene bou di katólikonan na Merka i Europa, konsistentemente nan ta ekspresá un deskonfiansa kresiente pa outoridat di kleronan i ta boga pa un partisipashon mas amplio di laiko i igualdat pa hende muhé. Di otro banda, katólikonan den e Hemisferio Sur sí ta respaldá den un forma kasi total e posishon tradishonal di iglesia riba e asuntunan aki. Segun ku e tendensia di apoyo pa iglesia ta sigui move bai zùit, e base pa un futuro konfrontashon ta poné kaba. Philip Jenkins, un erudito di historia i religion, ta pronostiká lo siguiente: “E chèns ta grandi ku aki un òf dos dékada miembronan di denominashonnan kristian di e dos hemisferionan lo no rekonosé otro komo kristian den un forma kompletu òf outéntiko.”

En bista di e tendensianan aki, segun Walls, un kuestion urgente ta, “kon kristiannan afrikano, asiátiko, latinoamerikano, norteamerikano i europeo ta hasi biba huntu den e mesun iglesia, ekspresando outéntikamente e mesun fe.” Kiko bo ta kere? Iglesianan por sobrebibí den un mundu dividí? Kiko ta e base pa berdadero unidat kristian? E siguiente artíkulo lo duna e kontestanan bíbliko, huntu ku evidensia kla ku un komunidat kristian uní ta floresiendo rònt mundu kaba.

[Plachi na página 4]

Loke un tempu tabata un misa awe ta un café

[Rekonosementu]

AP Photo/Nancy Palmieri