Pregunta di Lektor

Kiko a sosodé den e insidente registrá na Eksodo 4:24-26, i ken su bida tabata na peliger?

Moisés tabata riba kaminda pa Egipto huntu ku su kasá, Séfora, i su yunan Gerson i Eliezer, ora e siguiente insidente a tuma lugá: “A sosodé ku na kaminda, na e posada, SEÑOR a kontra kuné i a busk’é pa mata. E ora ei Séfora a kohe un kuchú di piedra i a kòrta prepusio di su yu hòmber kita afó, i a tir’é na pia di Moisés [“su pia,” NW] i a bisa: ‘Di bèrdat, bo ta un brùidehòm di sanger pa mi.’ I el a lag’é bai. E ora ei Séfora a bisa: ‘Bo ta un brùidehòm di sanger’—pa motibu di e sirkunsishon.” (Eksodo 4:20, 24-26) Ounke e pasashi aki no ta muchu kla, i ta imposibel pa bisa ku tur siguransa kiko a pasa eksaktamente, esei no ta kita sí ku e Skritura ta yuda klarifiká e versíkulonan aki.

E relato no ta bisa spesífikamente ken su bida tabata na peliger. Pero, basá riba lógika, nos por konkluí ku esei no tabata e bida di Moisés, pasobra Dios a kaba di dun’é e tarea pa saka e israelitanan for di Egipto. (Eksodo 3:10) No ta parse probabel ku riba kaminda pa bai kumpli ku e mishon ei, e angel di Dios lo a pone Moisés su bida na peliger. P’esei, lo mester tabata trata aki di e bida di un di su yunan. E lei duná mas promé na Abraham relashoná ku sirkunsishon a deklará: “Un persona maskulino insirkunsidá, ku no ta sirkunsidá na e karni di su prepusio, e persona ei mester wòrdu kòrtá kitá for di su pueblo; el a kibra mi aliansa.” (Génesis 17:14) Aparentemente, Moisés a neglishá di sirkunsidá su yu, i dor di esei e yu su bida tabata na peliger na man di e angel di Yehova.

Ta na pia di Moisés Séfora a tira e prepusio ku el a kòrta di su yu ora el a trata na korigí e eror aki? Ta e angel di Yehova tabatin poder pa mata e yu insirkunsidá. Lógikamente anto, ta na pia di e angel Séfora a tira e prepusio, presentand’e na dje komo evidensia ku el a kumpli ku e aliansa.

E ekspreshon di Séfora “bo ta un brùidehòm di sanger pa mi” ta unu ekstraordinario. Kiko esei ta bisa di Séfora? Dor di kumpli ku e rekisitonan di e aliansa di sirkunsishon, Séfora a rekonosé ku e tabata den un relashon ku Yehova, basá riba un aliansa. E aliansa di Lei ku Yehova a sera ku e israelitanan despues a mustra ku den un relashon basá riba un aliansa, Yehova ta manera un esposo i e otro partido manera su kasá. (Jeremias 31:32) P’esei, ora Séfora a dirigí su mes na Yehova (pa medio di e angel ku a represent’é) komo “un brùidehòm di sanger,” aparentemente e tabata rekonosiendo su mes sumishon n’e kondishonnan dje aliansa ei. Tabata komo si fuera Séfora a aseptá un posishon komo esposa den e aliansa di sirkunsishon, ku Yehova Dios komo e esposo. Sea kual sea e kaso, pa motibu di su akto desisivo di obedensia n’e rekisito di Dios, e bida di su yu no tabata na peliger mas.