Bo Ta Enfoká Riba e Rekompensa?

GLOUKOMA, un di e kousanan prinsipal di sieguedat, ta un malesa ku ta avansá pokopoko. Na kuminsamentu e persona por mira solamente loke tin stret su dilanti; gloukoma ta limitá loke e ta mira den banda. Si no trat’é, e por plama bai na e parti sentral di su bista. Por último, gloukoma por pone e persona pèrdè su bista por kompletu.

Meskos ku pokopoko i na un manera masha sutil nos por pèrdè nos bista literal, asina nos por pèrdè un tipo di bista ku ta asta mas presioso: nos bista spiritual. P’esei ta masha importante pa nos mantené asuntunan spiritual bon enfoká den e parti sentral di nos bista.

Sigui Enfoká Riba e Rekompensa

Entre “e kosnan ku no ta wòrdu mirá” ku nos wowonan literal ta e rekompensa glorioso di bida eterno ku Yehova ta ofresé esnan leal na dje. (2 Korintionan 4:18) Klaru ku e motibu prinsipal pakiko kristiannan ta sirbi Dios ta pasobra nan stim’é. (Mateo 22:37) No opstante, Yehova ke pa nos spera ku gran antisipashon riba nos rekompensa. E ke pa nos rekonos’é komo un Tata generoso ku ta “rekompensá esnan ku ta busk’é.” (Hebreonan 11:6) P’esei, hende ku realmente konosé Dios i ta stim’é, tin gran apresio pa e bendishonnan ku el a primintí i nan ta anhelá pa nan kumpli.—Romanonan 8:19, 24, 25.

Hopi lektor di e revista aki i di su kompañero, Spièrta!, ta gusta e plachinan den nan ku ta representá e binidero Paradeis riba tera. Klaru ku nos no sa eksaktamente kon e Paradeis ei lo ta, i e plachinan publiká ta simplemente impreshonnan artístiko basá riba pasashinan bíbliko manera Isaias 11:6-9. Apesar di esei, un señora kristian a bisa: “Ora mi mira e plachinan di e binidero Paradeis den E Toren di Vigilansia i Spièrta!, mi ta analisá nan bon, manera un hende lo a hasi ku un folder di un destinashon turístiko. Mi ta purba mira mi mes einan, pasobra na Dios su debido tempu, ta ei ta kaminda realmente mi ta spera di ta.”

Apòstel Pablo tambe a sinti asina relashoná ku su “yamada selestial.” E no a pretendé ku el a gar’é kaba, pasobra e tabatin ku demostrá ku e ta fiel te na fin. Pero el a sigui ‘hasi esfuerso pa alkansá e meta.’ (Filipensenan 3:13, 14) Hesus tambe a soportá morto na un staka di tormento “pa motibu di e goso poní su dilanti.”—Hebreonan 12:2.

Bo a yega di duda si lo bo drenta den e mundu nobo òf nò? Klaru ku ta bon pa nos no tin demasiado konfiansa, ya ku pa nos risibí e premio di bida esei ta dependé di si nos ta keda fiel te na fin. (Mateo 24:13) Sin embargo, si nos ta purba hasi nos bèst pa kumpli ku e rekisitonan di Dios, nos tin tur motibu pa konfia ku nos lo haña e rekompensa. Kòrda ku Yehova “no kier  pa ningun hende bai pèrdí, ma pa tur bin na repentimentu.” (2 Pedro 3:9) Si nos ta konfia den Yehova, lo e yuda nos alkansá nos meta. De echo, ta kontra Yehova su naturalesa pa buska motibu pa deskualifiká esnan ku sinseramente ta purba agrad’é.—Salmo 103:8-11; 130:3, 4; Ezekiel 18:32.

Ora nos sa kon Yehova ta sinti pa ku su pueblo, esei ta duna nos speransa; i speransa ta mesun importante ku fe. (1 Korintionan 13:13) E palabra griego tradusí “speransa” den Beibel ta karga e idea di gran ekspektativa òf “antisipashon di bon.” Ku tal speransa na mente, apòstel Pablo a skirbi: “Nos ta deseá ku kada un di boso lo mustra e mesun diligensia pa asina realisá e siguransa kompletu di speransa te na fin, pa boso no flakia, ma pa boso ta imitadónan di esnan ku pa medio di fe i pasenshi ta heredá e promesanan.” (Hebreonan 6:11, 12) Tuma nota ku si nos sigui sirbi Yehova fielmente, nos por tin e siguransa di realisá nos speransa. Distinto for di hopi aspirashonnan mundano, e speransa aki “no ta desapuntá.” (Romanonan 5:5) Pues anto, kon nos por mantené nos speransa bibu i sigui enfoká riba dje?

Kon pa Hasi Nos Bista Spiritual Mas Skèrpi

Nos wowonan literal no por enfoká riba dos kos pareu. Meskos ta e kaso ku nos bista spiritual. Si nos fiha nos bista riba e kosnan di e sistema aktual, anto esei sigur lo pone ku e mundu nobo ku Dios ta primintí ta keda na banda den nos bista i ta bira ménos skèrpi den nos mente. Ku tempu e imágen wazig aki ku ta keda den banda di nos bista spiritual, lo por pèrdè su atrakshon i simplemente disparsé for di bista. Esei sí lo ta un tragedia! (Lukas 21:34) P’esei ta masha importante anto pa nos “wowo ta bon,” (literalmente, ‘bon enfoká’) es desir, pa nos keda tene nos bista fihá riba e Reino di Dios i e rekompensa di bida eterno!—Mateo 6:22.

No ta semper fásil pa nos wowo keda bon enfoká. Problemanan di tur dia ta eksigí nos atenshon, i den nos kaminda por tin distraishon, asta tentashon. Den tal sirkunstansia, kon nos por keda enfoká riba e Reino i e mundu nobo ku Dios ta primintí, sin neglishá otro aktividatnan nesesario? Laga nos konsiderá tres manera.

Studia e Palabra di Dios tur dia. Lesa Beibel i studia publikashonnan bíbliko riba un base regular ta yuda nos keda ku nos mente fihá riba asuntunan spiritual. Ta bèrdat ku kisas nos tin hopi aña ta studia e Palabra di Dios, pero nos tin ku sigui studi’é, meskos ku nos tin ku sigui kome kuminda pa sostené nos bida. Nos no ta stòp di kome djis pasobra nos a kome míles di biaha kaba den pasado. P’esei, sin importá kon bon nos konosé Beibel, nos mester sigui alimentá nos mes spiritualmente kuné riba un base regular i kontinuo pa asina nos por mantené nos speransa bibu i pa nos fe i amor keda fuerte.—Salmo 1:1-3.

Meditá ku apresio riba e Palabra di Dios. Dikon ta masha importante pa nos  meditá? Pa dos motibu. Na promé lugá, meditashon ta yuda nos digerí loke nos a lesa i kultivá apresio profundo p’e. Na di dos lugá, meditashon ta pone ku nos lo no haña chèns di lubidá Yehova ni su obranan maravioso, ni e speransa ku el a pone nos dilanti. Un ehèmpel: E israelitanan ku a sali for di Egipto ku Moisés, a mira ku nan propio wowo kon Yehova a demostrá su poder ekstraordinario. Tambe nan a eksperensiá su protekshon amoroso segun ku el a dirigí nan na nan herensia. Sin embargo, asina ku e israelitanan a yega na e desierto rumbo pa e Tera Primintí nan a kuminsá keha, i a revelá un falta serio di fe. (Salmo 78:11-17) Kiko tabata nan problema?

E pueblo a stòp di enfoká riba Yehova i riba e speransa maravioso ku el a pone nan dilanti i a bai konsentrá riba nan komodidatnan di e momentu ei i nan preokupashonnan karnal. Apesar di e señalnan i milagernan maravioso ku nan a mira personalmente, hopi israelita a bira kehadónan sin fe. Salmo 106:13 ta bisa ku “masha lihé nan a lubidá [Yehova] su obranan.” E negligensia ei tabata algu pa kua no tin èksküs, i a pone ku e generashon ei no a drenta e Tera Primintí.

P’esei, ora bo ta lesa e Skritura òf publikashonnan pa studia Beibel, tuma bo tempu pa meditá riba loke bo ta lesa. E meditashon ei ta vital pa bo salú i kresementu spiritual. Por ehèmpel, ora bo ta lesa Salmo 106, ku en parte ta sitá ariba, meditá riba e kualidatnan di Yehova. Opservá kuantu pasenshi i miserikòrdia el a demostrá na e israelitanan. Wak kon el a hasi tur su posibel pa yuda nan yega na e Tera Primintí. Tuma nota kon kontinuamente nan tabata rebeldiá kontra dje. Imaginá e angustia i doló ku Yehova a sinti segun ku un pueblo masha malagradisí i sin heful a pone su pasenshi i miserikòrdia yega te na nan límite. Ademas, dor di meditá riba versíkulo 30 i 31, ku ta deskribí Finees su posishon firme i di kurashi na fabor di hustisia, nos ta haña e siguransa ku Yehova no ta lubidá esnan leal na dje i ku e ta rekompensá nan abundantemente.

Apliká prinsipionan bíbliko den bo bida. Segun ku nos ta sigui prinsipionan bíbliko, nos ta mira pa nos mes ku Yehova su konseho ta duna resultado. Proverbionan 3:5 i 6 ta bisa: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” Pensa riba e manera ku e bida inmoral di hopi hende a resultá den problemanan mental, emoshonal i físiko pa nan. Dor di entregá na plasernan temporal, e hendenan ei ta kosechá kalamidat pa añanan largu, i tin biaha pa e restu di nan bida. Na kontraste skèrpi ku esei, esnan ku ta kana den e ‘kaminda smal’ ta haña chèns di purba di antemano kon bida lo ta den e sistema nobo, i esaki ta animá nan pa sigui riba e kaminda ku ta hiba na bida.—Mateo 7:13, 14; Salmo 34:8.

E por ta un reto pa apliká prinsipionan bíbliko. Tin biaha, ora nos ta den un situashon difísil, un solushon ku ta bai kontra prinsipionan di Beibel kisas ta primintí di duna alivio inmediato. Por ehèmpel, ora nos ta den difikultat  finansiero, kisas nos ta sinti e tentashon di pone interesnan di Reino na di dos lugá. Sin embargo, esnan ku aktua den fe i mantené nan bista fihá riba asuntunan spiritual tin e siguransa ku na final di kuenta “lo bai bon ku esnan ku ta teme Dios.” (Eklesiastés 8:12) Por sosodé ku un kristian tin ku traha overtaim de bes en kuando, pero nunka lo e bira manera Esau, kende a despresiá kosnan spiritual i a rechasá nan komo kosnan ku no ta importante.—Génesis 25:34; Hebreonan 12:16.

Hesus a splika bon kla kiko ta nos responsabilidat komo kristian. Nos tin ku sigui “buska promé e reino di Dios i su hustisia.” (Mateo 6:33) Si nos hasi esei, Yehova lo demostrá su amor di tata na nos dor di hasi sigur ku nos tin loke nos mester den sentido material. Un kos ta sigur, e no ke pa nos ta kargá ku preokupashon pa kosnan ku e ta bisa ta na su enkargo. Tal preokupashon innesesario por ta manera gloukoma spiritual: si nos neglish’é, pokopoko lo e redusí nos bista te ku nos ta mira solamente preokupashonnan material, i al final nos ta bira spiritualmente siegu. Si nos keda den e kondishon ei, e dia di Yehova lo bin riba nos “manera un trampa.” Esei sí lo ta un tragedia!—Lukas 21:34-36.

Keda ku Bista Fihá Manera Josué

Laga nos keda ku nos bista skèrpi, bon enfoká riba nos glorioso speransa di Reino, i pone nos otro responsabilidatnan na nan debido lugá. Dor di persistí den e rutina di studia, meditá i apliká prinsipionan bíbliko, nos por ta sigur di nos speransa meskos ku Josué. Despues di a hiba Israel den e Tera Primintí, el a bisa: “Boso sa di henter boso kurason i di henter boso alma ku ni un palabra di tur e bon palabranan ku SEÑOR boso Dios a papia tokante di boso no a faya; tur a keda kumplí pa boso, ni un di nan no a faya.”—Josué 23:14.

Nos deseo ta pa e speransa di Reino duna bo vigor, i hasi bo felis segun ku bo ta reflehá e speransa ei den bo pensamentu-, sintimentu-, desishon- i aktividatnan.—Proverbionan 15:15; Romanonan 12:12.

[Plachi na página 21]

Bo a yega di duda si lo bo drenta den e mundu nobo òf nò?

[Plachi na página 22]

Meditá riba loke bo siña ta un parti masha importante di studia Beibel

[Plachinan na página 23]

Keda ku bo bista fihá riba interesnan di Reino