Bo Mester Ta Miembro di un Religion?

‘MI NO tin nodi pertenesé na ningun religion ni bai misa tur ora pa mi kere den Dios!’ Esei ta e pensamentu ku hopi hende tin; nan no ta haña ku nan mester ta miembro di un grupo religioso. De echo, algun ta bisa ku nan ta sinti nan mas serka Dios ora nan ta disfrutá pafó den naturalesa, ku ora nan ta den un servisio religioso den misa. E opinion general ku ta reina awe ta ku bo no tin nodi afiliá na un grupo òf organisashon religioso pa kere den Dios.

Otro hende sí tin henteramente un otro opinion, i nan ta hopi sinsero den esei. Nan ta haña ku si bo ke ta bon mirá den bista di Dios, ta nesesario i asta vital pa bo ta miembro di un iglesia i pa bo bai misa. Pues e kuestion ku si ta realmente nesesario pa afiliá na un religion no ta djis un asuntu di si bo ta haña esei interesante òf laga. Siendo ku esaki tin di haber ku nos relashon ku Dios, no ta lógiko pa buska pa sa kiko ta su punto di bista riba e asuntu aki? Kiko nos por siña for di su Palabra, Beibel, relashoná ku e tópiko aki?

Dios Su Trato ku Hende den Pasado

Kasi 4.400 aña pasá, tabatin un diluvio katastrófiko ku a tapa tera kompletamente bou di awa. Un suseso asina lo no a pasa fásilmente pa olvido, i rònt mundu pueblonan tin nan kuentanan tokante dje den nan leyendanan di antaño. Kisas e detayenan ta varia, pero e kuentanan aki tin hopi kos en komun, inkluso e echo ku ta apénas un par di hende i algun animal a logra skapa.

Ta simplemente suerte e sobrebibientenan di e Diluvio tabatin òf ta ‘di bon’ nan tabata ku nan a skapa for di e destrukshon? Segun e relato bíbliko, esei no ta asina. Ta bon pa remarká ku Dios no a informá kada hende individualmente tokante e binidero Diluvio. Mas bien, el a bisa Noe, kende na su turno a spièrta e  hendenan di su tempu di e Diluvio ku tabata na kaminda.—Génesis 6:13-16; 2 Pedro 2:5.

Pa hende por a sobrebibí nan mester tabatin laso estrecho ku e grupo di Noe i tambe nan mester tabata dispuesto pa aseptá e instrukshon ku Dios a duna Noe. Si no tabata pa e grupo aki, ni e animalnan ku tabata den e arka lo no a sobrebibí e Diluvio. Noe a haña instrukshon spesífiko enkuanto e medidanan apropiá ku e tabatin ku tuma pa konserbá bida di animal.—Génesis 6:17–7:8.

Siglonan despues, desendientenan di Noe ku a bini for di su yu Sèm a bira katibu na Egipto. Pero e propósito di Dios tabata pa libra nan i trese nan n’e tera ku el a primintí nan antepasado Abraham. Den e kaso aki tambe nos ta mira ku esaki no a wòrdu revelá na kada persona individualmente. Mas bien, Dios a revel’é promé na e personanan ku el a skohe komo nan lider: Moisés i su ruman Aaron. (Eksodo 3:7-10; 4:27-31) Despues ku e eks-katibunan a ser librá komo grupo for di Egipto, nan a haña e Lei di Dios na Seru Sinaí i a ser formá den e nashon di Israel.—Eksodo 19:1-6.

E úniko manera ku e israelitanan por a haña nan liberashon ta dor ku nan tabata forma parti di un grupo establesí pa Dios i a sigui e guia di e lidernan nombrá di e grupo aki. Tabatin asta e posibilidat pa e egipsionan individualmente forma parti di e grupo aki, ku opviamente tabatin e aprobashon di Dios. Ora e israelitanan a bandoná Egipto, e personanan aki a bai huntu ku nan, i dor di esei nan tambe a haña e oportunidat di risibí e bendishon di Dios.—Eksodo 12:37, 38.

Despues, den promé siglo, Hesus a kuminsá su aktividat di prediká, reuniendo un grupo di hende komo su disipelnan. Ounke el a mustra interes amoroso den algun di e personanan aki individualmente segun nan nesesidat, el a trata nan komo grupo. Hesus a bisa e 11 fiel apòstelnan: “Boso ta esnan ku a permanesé ku mi henter ora durante mi pruebanan; i mi ta sera un pakto ku boso, meskos ku mi Tata a sera un pakto ku mi, pa un reino.” (Lukas 22:28, 29, NW) Poko tempu despues, ora e disipelnan tabata huntu komo grupo, spiritu santu di Dios a baha riba nan.—Echonan 2:1-4.

E ehèmpelnan aki ta mustra bon kla ku den pasado semper Dios a trata ku su pueblo komo un grupo organisá. El a usa e poko personanan ku e tabatin un trato personal kuné—Noe, Moisés, Hesus i otro hende—pa komuniká ku un grupo estrechamente uní. No tin motibu pa kere ku Dios ta trata su sirbidónan djawe na un manera diferente. Awor, esaki ta hiba n’e siguiente preguntanan: Ta na kua grupo religioso bo tin ku afiliá? Tur ta bon? Nos lo konsiderá e preguntanan vital aki den e siguiente artíkulo.

[Plachi na página 4]

Pa hopi tempu Dios a trata ku su pueblo komo un grupo organisá