Historia di Bida

For di Prizonnan Skur pa e Serunan di Suisa

SEGUN E RELATO DI LOTHAR WALTHER

Despues di a pasa tres aña largu den e prizonnan skur di Ost Alemania komunista, mi tabata masha ansioso pa sali pa mi disfrutá di e dulsura di libertat i di e kompania kaluroso di mi famia.

PERO mi no tabata prepará pa e manera tur konfundí ku Johannes, mi yu hòmber di seis aña, a keda wak mi. E tabatin tres aña sin mira su tata. P’e, mi tabata un hende kompletamente deskonosí.

Distinto for di mi yu hòmber, ami sí a disfrutá di e kompania amoroso di mi mayornan na chikí. Mi a nase na aña 1928, na Chemnitz, Alemania. I na nos kas tabata reina un ambiente kaluroso. Mi tata tabata ekspresá abiertamente kon disgustá e tabata ku religion. E tabata kòrda ku durante Promé Guera Mundial, sòldánan “kristian” di ámbos banda a deseá esnan na e otro banda “Bon Pasku” dia 25 di desèmber, anto e siguiente dia nan a sigui mata otro manera nada no a pasa. Den su bista, religion tabata e pió forma di hipokresia.

Fe Ta Remplasá Desilushon

Felismente, mi no a eksperensiá e tipo di desepshon ei, pasobra Segundo Guera Mundial a terminá ora ku mi tabatin 17 aña, i mi a skapa na wowo di angua di ser reklutá. Pero tòg, tabatin preguntanan inkietante ku a kousá mi angustia. Preguntanan manera: ‘Dikon tin tantu matamentu? Ken mi por konfia? Unda mi por haña berdadero siguridat?’ Ost Alemania, kaminda nos tabata biba, a bin bou di kontròl Soviétiko. E idealnan di komunismo manera hustisia, igualdat, solidaridat i relashonnan pasífiko, a atraé e hendenan ku tabata kansá di  e devastashon kousá dor di guera. Lo no a dura largu ku hopi di e personanan sinsero aki lo a keda profundamente desilushoná, anto e biaha aki no dor di religion, sino dor di polítika.

Tabata durante mi búskeda personal pa kontestanan satisfaktorio ku un di mi tantanan, ku tabata un Testigu di Yehova, a papia ku mi tokante su fe. El a duna mi un publikashon basá riba Beibel ku a motivá mi pa lesa—pa promé bes den mi bida—henter e kapítulo 24 di Mateo. Mi a keda impreshoná ku e splikashonnan rasonabel i konvinsente ku e buki a duna, i ku a identifiká nos tempu komo “e fin di tempu” òf fin di e sistema di kosnan, i ku a la bes a señalá e kousa fundamental di e problemanan di humanidat.—Mateo 24:3; Revelashon 12:9.

Poko despues mi a haña mas publikashon di Testigunan di Yehova, i segun ku mi tabata lesa nan ku smak, mi a bin realisá ku mi a haña e bèrdat ku mi tabata buska asina ansiosamente. Tabata emoshonante pa siña ku Hesukristu a ser entronisá den shelu na aña 1914 i ku pronto lo el a dominá elementonan malbado afin di trese bendishon pa humanidat obediente. Un otro revelashon grandi pa mi tabata ku mi a haña un bon komprondementu di e reskate. Esei a yuda mi akudí na Yehova Dios den orashon sinsero, i pidié pordon. Mi a keda profundamente konmoví pa e invitashon bondadoso ku tin pará skirbí na Santiago 4:8: “Hala serka Dios i e lo hala serka boso.”

Apesar di mi entusiasmo ferviente pa mi religion nobo, mi mayornan i mi ruman muhé na promé instante no tabata masha dispuesto pa aseptá loke mi a bisa nan. Sin embargo, esaki no a mengua mi deseo pa asistí na e reunionnan kristian ku un grupo chikí di Testigu tabata tene serka di Chemnitz. Pa mi sorpresa, mi mayornan i mi ruman muhé a kompañá mi na e promé reunion! Esei tabata e temporada di wenter di 1945/46. Despues, ora ku a forma un grupo di studio di Beibel na Harthau, kaminda nos tabata biba, mi famia a kuminsá asistí regularmente.

“Mi Ta un Mucha”

Siñando bèrdatnan bíbliko importante i asosiashon regular ku e pueblo di Yehova a motivá mi pa dediká mi bida na Yehova, i mi a batisá dia 25 di mei 1946. Mi a keda hopi kontentu ora ku e miembronan di mi famia tambe a progresá spiritualmente, i ku tempu nan tur tres a bira fiel Testigu di Yehova. Mi ruman muhé ainda ta un miembro aktivo den un di e kongregashonnan di Chemnitz. Mi mama ku mi tata a sirbi fielmente te na nan morto. Mi mama a muri na 1965 i mi tata na 1986.

Seis luna despues di mi boutismo, mi a kuminsá sirbi komo pionero spesial. Esei tabata inisio di un bida largu di sirbishi “den tempu faborabel, den tempu difísil.” (2 Timoteo 4:2, NW) Pronto a presentá oportunidatnan nobo pa sirbishi. Tabatin mester di predikadó di tempu kompletu den un área aislá den parti ost di Alemania. Ami ku un ruman hòmber a  inskribí pa e asignashon aki, pero mi a sinti ku mi no tabatin e eksperensia ni e madures pa un tarea responsabel asina. Siendo ku mi tabatin 18 aña so, mi a sinti meskos ku Jeremias: “Ai, Señor DIOS! Mira, mi no sa kon pa papia, pasobra mi ta un mucha.” (Jeremias 1:6) Apesar di mi dudanan, e rumannan responsabel bondadosamente a disidí di duna nos un chèns. I asina nos a ser asigná na Belzig, un pueblito den e estado di Brandenburg.

Tabata masha difísil pa prediká den e teritorio ei, pero el a resultá un bon training pa mi. Ku tempu, vários señora komersiante prominente a aseptá e mensahe di Reino i a bira Testigu di Yehova. Sin embargo, nan posishon komo Testigu di Yehova a bai kontra di e estilo di bida masha tradishonal di e hendenan lokal ku tabata deskonfiá tur loke ta diferente. Tantu pastornan katóliko komo protestant a oponé nos implakablemente i a hasi akusashonnan falsu kontra nos pa motibu di nos predikashon. Pero dor di konfia den Yehova pa guia i protekshon, nos a logra yuda vários persona interesá aseptá e bèrdat.

Kresiente Indikashon di Intoleransia

Aña 1948 a trese bendishon i tambe difikultatnan inesperá. Na promé lugá, mi a risibí un asignashon di pionero pa Rudolstadt, na Thüringen. Einan mi a siña konosé hopi ruman fiel, i mi a disfrutá di nan kompania. Un otro bendishon importante mi a haña na yüli di e aña ei. Mi a kasa ku Erika Ullmann, un mucha muhé kristian fiel i aktivo ku mi tabata konosé for di tempu ku mi a kuminsá asistí na e reunionnan di Kongregashon Chemnitz. Huntu nos a kuminsá traha pionero na Harthau, mi pueblo natal. Sin embargo, ku tempu Erika no por a sigui den sirbishi di tempu kompletu debí na, entre otro, problema ku salú.

E tempunan ei Yehova su pueblo tabata pasa den hopi prueba difísil. Departamentu di Labor na Chemnitz a kanselá mi karchi di kuminda ku a hasi posibel ku mi por a kumpra sierto kantidat di artíkulo na un preis fiho. Nan a hasi esei den un intento pa obligá mi stòp di prediká i buska un trabou fultaim. E rumannan responsabel pa e obra a usa mi kaso pa buska manera di haña rekonosementu legal di estado. Nan a nenga nos esaki, i dia 23 di yüni 1950, nan a sentensiá mi na paga un but òf sinta 30 dia den prizon. Nos a apelá e desishon, pero e korte superior a rechasá e apelashon, i nan a manda mi prizon.

E insidente ei tabata djis un indikashon di e kresiente oposishon i kalamidat ku tabata na kaminda. Ménos ku un luna despues, na sèptèmber 1950, e régimen komunista despues di a hiba un kampaña di difamashon den medionan di komunikashon, a prohibí nos aktividatnan. Debí na nos kresementu rápido i nos posishon neutral, nan a katalogá nos komo un agensia peligroso di spionahe di paisnan no-komunista, ku tabata efektuá “aktividat dudoso” bou di e kapa di religion. Riba e mesun dia ku nan a saka e prohibishon, nos yu hòmber, Johannes, a nase. Mi kasá a duna lus na kas, miéntras ku ami tabata den prizon. Ignorando e protesta di e partera, funshonarionan di Siguridat di Estado a pusha drenta den nos apartamento en buska di evidensia pa proba nan akusashonnan. Klaru ku nan no a haña nada. No opstante, despues nan a logra infiltrá un spion den nos kongregashon. Esei a hiba na aresto di tur e ruman hòmbernan responsabel, inkluso ami, na òktober 1953.

Den Prizonnan Skur

Despues di a ser akusá i sentensiá na kastigunan di entre tres pa seis aña, nos a djòin vários  di nos rumannan den e prizonnan fis den bodega di Kastel Osterstein, na Zwickau. Apesar di e kondishonnan horibel einan, tabata un berdadero goso di por a asosiá ku rumannan maduro. Nos falta di libertat no a nifiká falta di kuminda spiritual. Ounke e régimen a despresiá i prohibí E Toren di Vigilansia, e revista tabata logra drenta den prizon i te den nos sèlnan! Kon?

Algun ruman tabatin e asignashon di traha den e minanan di karbon, kaminda nan a topa Testigunan ku no tabata enkarselá i ku a duna nan e revistanan. Anto e rumannan tabata trese e revistanan sekretamente den prizon i ku puru ingeniosidat tabata logra pasa e kuminda spiritual tan nesesario na e restu di nos. Mi a sinti mi hopi kontentu i animá di por a eksperensiá Yehova su kuido i guia den e manera aki!

Pa fin di aña 1954, nan a transferí nos pa e notorio prizon na Torgau. E Testigunan einan a risibí nos gustosamente. Promé ku nos a yega, nan a keda spiritualmente fuerte dor di resitá loke nan tabata kòrda for di edishonnan bieu di E Toren di Vigilansia. Nan a anhelá un suministro fresku di kuminda spiritual! Wèl, awor tabata nos deber di kompartí ku nan puntonan ku nos a studia na Zwickau. Pero kon nos por a hasi esei ya ku tabata estriktamente prohibí pa nos papia ku otro durante nos kaminatanan diario? Wèl, e rumannan a duna nos algun tep presioso kiko pa hasi, i Yehova su man poderoso di protekshon a guia nos. Esaki a siña nos e importansia di studia Beibel diligentemente i meditá riba dje tanten ku nos tin e libertat i oportunidat pa hasi esei.

Tempu pa Desishonnan Importante

Ku yudansa di Yehova nos a keda firme. Pa nos gran sorpresa, vários di nos a risibí amnistia na fin di 1956. Ta difísil pa deskribí kon felis nos tabata ora ku nan a habri e portanan di prizon pa nos! Pa e tempu ei mi yu hòmber tabatin seis aña, i pa mi tabata un tremendo goso di por ta bèk serka mi kasá i yud’é kria nos yu. Pa un tempu Johannes a trata mi manera un hende straño, pero no a dura hopi ku nos a forma un laso kaluroso.

Testigunan di Yehova na Ost Alemania tabata konfrontá un tempu hopi difísil. Kresiente hostilidat pa ku nos sirbishi kristian i nos posishon neutral a nifiká ku nos tabatin ku biba konstantemente bou di menasa, un bida yen di peliger, ansiedat i agotamentu. Pues, ami ku Erika a haña nos ta eksaminá nos situashon kuidadosamente i huntu ku orashon. I nos a sinti ku nos mester a muda bai un otro kaminda pa por biba den kondishonnan mas faborabel pa asina preokupashon no kaba ku nos. Nos tabata ke tin e libertat di sirbi Yehova i sigui tras di metanan spiritual.

Den lènte di 1957, a presentá un oportunidat pa nos muda pa Stuttgart, Wèst Alemania. E predikashon no tabata prohibí einan, i nos por a asosiá libremente ku nos rumannan. Nan sosten amoroso tabata abrumador. Nos a keda shete aña ku e kongregashon na Hedelfingen. Durante e añanan ei, nos yu hòmber a kuminsá bai skol i a hasi bon progreso den e bèrdat. Na sèptèmber 1962, mi tabatin e privilegio di asistí na e Skol di Ministerio di Reino na Wiesbaden. Einan mi a haña e animashon pa muda ku mi famia i bai sirbi kaminda tin mester di rumannan ku ta papia aleman pa siña hende e Beibel. Esaki a inkluí sierto áreanan di Alemania i Suisa.

Na e Serunan di Suisa

Pues, na 1963 nos a muda pa Suisa. Nos a haña instrukshon pa bai traha ku un kongregashon chikí na Brunnen, na kosta di e bunita Lago Luzern, den e parti sentral di e serunan di Alpen di Suisa. Pa nos, tabata manera biba den paradeis. Nos tabatin ku kustumbrá ku e dialekto aleman ku nan tabata papia einan, i tambe ku e estilo di bida lokal i ku e mentalidat di e hendenan. No opstante, nos a disfrutá di por a traha i prediká meimei di hendenan stimadó di pas. Nos a keda 14 aña na Brunnen. Nos yu hòmber a lanta einan.

 Na 1977, ora ku mi tabatin kasi 50 aña, nos a risibí un invitashon pa sirbi na Bètel di Suisa na Thun. Nos a konsiderá esei un privilegio inesperá i a asept’é ku gran antisipashon. Ami ku mi kasá a pasa nuebe aña den sirbishi di Bètel, un periodo ku nos ta kòrda komo un logro signifikativo den nos bida kristian i den nos desaroyo spiritual personal. Tambe nos tabata gusta prediká huntu ku e publikadónan lokal na Thun i den áreanan eibanda, ya ku semper nos tabatin un bista riba Yehova su “maravianan,” e serunan mahestuoso tapá ku sneu di e Alpen di Bern.—Salmo 9:1.

Nos Ta Bolbe Muda

Nos siguiente mudansa tabata na prinsipio di aña 1986. E rumannan a pidi nos pa sirbi komo pionero spesial den un teritorio masha grandi asigná na Kongregashon Buchs den e parti ost di Suisa. Atrobe nos mester a kustumbrá ku un otro estilo di bida. Sin embargo, motivá pa nos deseo di sirbi Yehova na unda ku por usa nos mihó, nos a kuminsá e asignashon nobo aki, i Yehova a bendishoná nos. Tabatin biaha ku mi a fungi komo supstituto pa superintendentenan biahero, i a bishitá e kongregashonnan i fortalesé nan. Diesocho aña a pasa, i nos tabatin hopi eksperensia felis predikando den e área aki. E kongregashon di Buchs a krese, i awor nos ta reuní den un bunita Salòn di Reino ku a keda dediká sinku aña pasá.

Yehova a perkurá pa nos den un manera masha generoso. Nos a pasa e gran parti di nos bida den sirbishi di tempu kompletu, i tòg nunka nos no tabata falta nada. Nos tin e goso di mira nos yu hòmber, su kasá i nan yunan, i tambe famia di nan yunan, kana fielmente den e kaminda di Yehova.

Mirando atras, mi ta sinti ku en bèrdat nos a sirbi Yehova “den tempu faborabel, den tempu difísil.” Mi esfuerso pa kumpli ku e sirbishi kristian a hiba mi for di e prizonnan skur di e régimen komunista te na e serunan magnífiko di Alpen di Suisa. Ami ku mi famia no a lamentá ni un solo momentu.

[Kuadro na página 28]

“Dòbel Víktimanan” Ta Para Firme bou di Persekushon

Bou di e Repúblika Demokrátiko Aleman (RDA), konosí tambe komo Ost Alemania, Testigunan di Yehova a bira e opheto di opreshon kruel. Registronan ta mustra ku nan a manda mas ku 5.000 Testigu na kamponan di trabou fòrsá i na sentronan di detenshon debí na nan sirbishi kristian i nan neutralidat.—Isaias 2:4.

Algun di e Testigunan aki a ser deskribí komo “dòbel víktimanan.” Un 325 di nan tabata enkarselá den kampo di konsentrashon i prizon nazi. Anto den dékada di 1950, nan a ser persiguí i enkarselá dor di Stasi, e Servisio di Siguridat di RDA. Asta algun di e prizonnan a traha dos warda: promé komo prizonnan nazi i despues komo prizonnan di Stasi.

Durante e promé dékada di persekushon intenso, di aña 1950 pa 1961, un total di 60 Testigu—hòmber i muhé—a muri den prizon debí na maltrato, malnutrishon, malesa i behes. Diesdos Testigu a risibí sentensia di bida largu ku despues nan a redusí na 15 aña den prizon.

Awe, den e eks-sede di Stasi na Berlin, tin un ekshibishon permanente ku ta resaltá e 40 añanan di persekushon ofisial di Testigunan di Yehova na Ost Alemania. E potrètnan i relatonan personal ku tin ekshibí einan ta duna un testimonio silensioso di e kurashi i fortalesa spiritual di e Testigunan aki ku a keda fiel bou di atake.

[Mapa na página 24, 25]

(Pa e teksto den su formato kompleto, wak e publikashon)

OST ALEMANIA

Rudolstadt

Belzig

Torgau

Chemnitz

Zwickau

[Plachi na página 25]

Kastel Osterstein, na Zwickau

[Rekonosementu]

Fotosammlung des Stadtarchiv Zwickau, Deutschland

[Plachi na página 26]

Huntu ku mi kasá, Erika